एस्‍तर 7:4 - Sunuwar Bible

⁴ मारदे हना गो नु आं जात ङा मुर नेल्‍ल क्‍याम्‍चा, साइक्‍चा नु खतम दुम्‍चा कली लेयसीशो बाक्‍नीकी। गो वाइलीम वाइल सेल्‍चा कली ला लेयसीशो बाक्‍तक हना, गो सिक्‍सी पा बाक्‍ङ वा। मारदे हना मेको आइक्‍च लोव़मी पिप कली मारेइ श्‍येत मदुम वा” देंत।

एस्‍तर 7:4 ပူးပေါင်းရင်းမြစ်များ

नेहेम्‍याह 5:5

गो यो आंइ लोक्‍ब खोदेंशो बाक्‍नीकी। आंइ तमी तौ मेको आन तमी तौ खोदेंशो बाक्‍नीम। मिनु गो आंइ तमी तौ आन कली वाइलीम वाइल दुम्‍चा कली लेयचा माल्‍नीकी। आंइ तमी का निक्‍शी ङोंइतीन लेयचा पुंइसाक्‍म। गोपुकीमी मेको आन कली प्रोंइने मचाप्‍नीकी। मारदे हना आंइ रू नु अङगुर रू नेल्‍ल मुर आन के दुम्‍ने थुम्‍तु” देंतेक्‍म। लेवी २५:३९; २राजा ४:१; यसैया ५०:१; मत्ती १८:२५

एस्‍तर 3:13

मिनु मेको सोइश्‍शो मुरपुकीमी मेको ब्रेक्‍स रीब रीब पा पिप आ रागी ङा मुर नेल्‍ल आन कली सोइक्‍तमे बाक्‍त। मेको ब्रेक्‍समी मार ब्रेक्‍शो बाक्‍त देंशा हना, अदार माइश्‍शो महिना ङा १३ नाक्‍त, काबुमीन यहूदी नेल्‍ल आन कली साइक्‍चा माल्‍नीम। वोंइश आल रे खाल्‍पा सम्‍म नु मीश मुर नु आल ब्रेप्‍च नेल्‍ल आन कली यो साइक्‍चा माल्‍नीम। मिनु यहूदी आन शोंप नेल्‍ल रोइक्‍चा माल्‍नीम, दे ब्रेक्‍शो बाक्‍त।

एस्‍तर 3:9

मोपतीके गे दाक्‍नी‍नी हना, मेको आन कली खतम सेल्‍चा, दे ब्रेक्‍स का ब्रेक्‍पतीन। मिनु गो नोले मेको पिप आ क्‍येट वोइक्‍तीके ङा गेय पाइब आन कली १० हजार टलेन्ट चांदी पिप आ क्‍येट वोइक्‍तीकेमी वोइक्‍चा कली गेनुङ” देंत। टलेन्ट का चांदी ३४ किलो बाक्‍ब। एस्‍तर ४:७

एस्‍तर 7:5

मिनु पिप अहासूरसमी पिपीम एस्‍तर कली “मोदेंशो पचा माल्‍ब मुर सु बाक्‍बा? मिनु मेको मुर ते बाक्‍बा?” दे हिल्‍लो पाप्‍तु।

एस्‍तर 7:6

मिनु एस्‍तरमी “मेको श्‍येत गेब, मरिम्‍शो मुर एको हामान बाक्‍ब” देंत। मिनु हामान पिप नु पिपीम आ ङोंइती हिंशा, सेंदा का यो ग्रुंइने मचब।

एस्‍तर 8:11

मेको ब्रेक्‍समी मार ब्रेक्‍शो बाक्‍त देंशा हना “सहर नेल्‍ल ङा यहूदी बुक्‍शा, आंम कली खतम पाइबपुकी रे प्रोंइसीमल। मिनु मेकोपुकीमी तेको तेको जात ङा नु तेको तेको रागी ङा बुक्‍शो मुर, सु सुम आन मीश नु आन आल आन कली श्‍येत गेमे, मेको आन कली काबुमीन क्‍याम्‍चा, साइक्‍चा नु खतम सेल्‍चा कली बुक्‍चा माल्‍नीम। मिनु मेकोपुकीमी श्‍येत गेब मुर आन मारेइ मारेइ रोइक्‍ने चाप्‍नीम। एस्‍तर ३:१३; एस्‍तर ९:७-१०,१५,१६

एस्‍तर 8:6

मारदे हना आं जात नु आं खिं ङा मुरपुकी खतम दुम्‍शो गो दोपा फाल्‍ने चाप्‍नुङा ङा?” देंत।

एस्‍तर 9:25

मिनु मेको लोव़ पिप कली तुइक्‍पदमे नोले पिपमी, ब्रेक्‍स पा यहूदी आन कली मरिम्‍शो नु श्‍येत गेचा मिम्‍शो नेल्‍ल हामान आंम आ पियामी कोप्‍ताक्‍व। मिनु मेको नु आ तौ थामम क्‍युक्‍शा साइक्‍चा पुंइसाक्‍म, दे छाप आप्‍शो ब्रेक्‍तीक का ब्रेक्‍शा ग्रुंइ‍ताक्‍व। एस्‍तर ७:१०

दानीएल 6:2

मिनु पिप दाराम मारेइ मजाम्‍ल, दे मेको नेल्‍ल आन कली ठेयब कोव़ब मुर सां वोइश्‍शो बाक्‍‍त। मिनु मेको सां आन दातेमी का दानीएल बाक्‍त। मेको हुकुम पाइबपुकीमी ठेयब कोव़ब मुर सां आन कली रागीम मार दुम्‍मे, मेको शोव़चा माल्‍शो बाक्‍‍तेक्‍म।

योएल 3:6

मिनु गे यहूदा नु यरूसलेम ङा मुर आन कली मेको आन रागी रे लाइश्‍शा, ग्रीस ङा मुर आन कली लेयतीनी।

आमोस 2:6

मिनु परमप्रभु यावेमी “गो इस्राएल आ ३ खेयप नु ४ खेयप मरिम्‍शो प‍शो आ पर्बम ततीके सजाइ मतेक्‍नुङ। मारदे हना मेकोपुकीमी ठीक पाइब आन कली चांदी के क्‍येटीम नु मारेइ मथीब आन कली जोर का चेपल ताक्‍शा लेयतेक्‍म। आमोस ८:६

लूका 12:45

तन्‍न मेको गेय पाइबमी ‘आं होव़प इच्‍का नोले जाक्‍ब’ दे मिम्‍शा, मेकोमी गेय पाइब वोंइश मुर, मीश मुर आन कली तुप्‍शा श्‍येत गेशा, जशा तूशा, दुक्‍शा पाप्‍तु हना,

ब्‍यवस्‍था 28:68

परमप्रभु यावेमी इन कली जहाजम इजीप्‍त रागीम लेश्‍शा सोइक्‍ब। गो मेको लां आ पर्बमी ‘गेपुकीमी एको लां गेनायो लेंशा लचा मदुम्‍ब’ दे गो इन कली देंती। मेकेर जाक्‍शा इन कली इन जोरी सत्रु आन कली वाइलीम वाइल सेल्‍चा कली लेयचा दाक्‍नीम, तन्‍न सुइम इन कली मग्‍याप्‍नीम” देंत। ब्‍यवस्‍था १७:१६; होसे ८:१३

यहोसु 9:23

मोपा जोल पतीके मुल गेपुकी सराप रशो दुम्‍तीनी। गेपुकी गेना हना यो वाइल दुम्‍चा माल्‍नीनी। गेपुकी आं परमप्रभु यावे आ खिं ङा शी चेप्‍ब नु ब्‍वाक्‍कु क्‍याक्‍ब दुम्‍तीनी” देंत।

१ सामुएल 22:23

गे एक गो नु बाक्‍को। महिनो। इ कली साइक्‍चा माल्‍बम आं कली साइक्‍चा माल्‍शो बाक्‍ब। गे गो नु मारेइ मदुम्‍थु बाक्‍नेवे” दे मदा बाक्‍त। १राजा २:२६-२७