एफिसी 4:2 - Sunuwar Bible

² गेपुकी ब्रेम्‍शो दुम्‍शा, सुइ नु मचुरथु, रिम्‍शो पा बाक्‍कीन। मुर आन कली फाल्‍शा, मेकोपुकी नु रिम्‍शो पा दाक्‍मुने। कलस्‍सी ३:१२-१३

एफिसी 4:2 ပူးပေါင်းရင်းမြစ်များ

भजन संग्रह 138:6

परमप्रभु यावे नेल्‍ल क्‍येङा ठेयब बाक्‍त हना यो, मेकोमी आइक्‍च मुर आन कली कोव़ब। तन्‍न ठेयब लेश्‍शो मुर आन क्‍येङा ङोन बाक्‍ब।

भजन संग्रह 45:4

इन मान ततीकेमी, थमा पतीके, ब्रेम्‍शो थुं दुम्‍तीके नु इन ठीक पतीकेमी गाक्‍शा, इन सक्तिमी छक लाक्‍चा ङा गेय कोंइदीन।

हितोपदेस 16:19

ठेयब लेश्‍शो आन रोइश्‍शो थोव़क योक्‍सीचा क्‍येङा ब्रेम्‍शो दुम्‍शा, श्‍येत जशो आइक्‍च मुरपुकी नु बाक्‍चा रिम्‍शो बाक्‍ब।

हितोपदेस 3:34

मिनु परमप्रभु यावेमी ठेयब लेश्‍शो शुक्‍शी पाइब मुर आन कली शुक्‍शी पाइब। ब्रेम्‍शो थुं पाइश्‍शो आन कली चहिं शिशी पाइब। १ पत्रुस ५:५

उपदेसक 7:8

गेय पचा गोशो क्‍येङा थुम्‍शो रिम्‍शो दुम्‍ब। ठेयब लेश्‍शो थुं पाइश्‍शो दुम्‍चा क्‍येङा फाल्‍तीक थुं पाइश्‍शो दुम्‍चा रिम्‍शो बाक्‍‍ब।

यसैया 57:15

मिनु ठेयब नु इर ङा, गेना हना यो बाक्‍ब आ नें का ला बाक्‍शो परमप्रभुमी “गो नेल्‍ल क्‍येङा इर ङा आं बाक्‍तीकेमी बाक्‍नुङ। मिनु गो थुं लुक्‍च लशो नु दिप्‍चा पुंइसीशो मुर नु बाक्‍नुङ। गो दिप्‍शो मुर नु आन थुं लुक्‍च लशो आन थुं बारपाइक्‍चा कली मेकोपुकी नु बाक्‍नुङ। भजन संग्रह ११३:५-९; यसैया ६६:१-२; भजन संग्रह ५०:१९

सेफन्‍याह 2:3

गे रागी ङा परमप्रभु यावे आ ङोंइती ठीक पाइब नु ब्रेम्‍शो मुरपुकी परमप्रभु यावे कली मालीन। गे ठीक पाइब नु ब्रेम्‍शो थुं पाइश्‍शो दुम्‍चा मालीन। मिनु परमप्रभु यावेमी आ गाइश्‍शो नाक्‍त इन कली ख्रुइक्‍बा कों? आमोस ५:१५

जकरिया 9:9

सियोन आ तमी, साप्‍पा ग्‍येरसो। यरूसलेम आ तमी ग्‍येरशा ठेयब सेंदा पा ग्रीङो। मारदे हना इ पिप इ बाक्‍तीकेमी जाक्‍ना जाक्‍न बाक्‍ब। मेको ग्राशा ग्‍येरसीशा जाक्‍ब। मेको ब्रेम्‍शो बाक्‍ब। मेको गधा तार ङोइश्‍शा जाक्‍ब। गधा आ चाइक्‍ब तार ङोइश्‍शा जाक्‍ब। सेफन्‍याह ३:१४; मत्ती २१:५

गन्‍ती 12:3

मोसा चहिं रागी ङा मुर नेल्‍ले आन क्‍येङा ब्रेम्‍शो मुर बाक्‍त।

मत्ती 11:29

आं जवा लाम्‍सीशा, गो नु शेंसीने। मारदे हना गो शिशी पाइब नु ब्रेम्‍शो थुं ङा नङ। मिनु गे इन थुं नाइक्‍चा ताइनीनी। यसैया २८:१२; येरमीया ६:१६

मर्कूस 9:19

मिनु येसुमी “गे थमा पा थमा मसुइक्‍बपुकी, गेना सम्‍म गेपुकी नु बाक्‍नुङा ङा? ओदेंशो इन पशो गेना सम्‍म फाल्‍शा बाक्‍नुङा ङा? रोइ पाइब कली चाक्‍कीन” दे माइक्‍मी बाक्‍त।

प्रेरित 20:19

गो प्रभु आ वाइल दुम्‍शा, ठेयब मलेत्‍थु प्रभु आ गेय पना पन गाक्‍ती। मोपा गाक्‍ङानु, यहूदीपुकीमी खेदा पा शुश श्‍येत गेशा, आं थुं खाइक्‍पा ङाक्‍पाइक्‍तीमी।

रोमी 15:1

गो थमा सुइक्‍चामी बोल्‍यो दुम्‍शोपुकीमी, आंम कली ठेयब मसेल्‍थु, बोल्‍यो मदुम्‍शो थमा सुइक्‍ब आन कली वारच पय। रोमी १४:१

१ कोरिन्‍थी 13:7

दाक्‍तीकेमी मारेइ मारेइ सुम्‍ब, मारेइ मारेइ थमा सुइक्‍ब, मारेइ मारेइ आस पाइब नु नेल्‍ल फाल्‍ने चाप्‍ब। हितोपदेस १०:११; मत्ती १८:२१-२२; रोमी १५:१

गलाती 6:2

कामी अर्को कली वारच पने। मोपा गे ख्रीस्‍त आ अरेशो लोव़ खाप्‍नीनी। २कोरिन्‍थी ११:२९

एफिसी 1:4

मोपतीके रागी सेल्‍चा क्‍येङा ङोंइती परमप्रभु यावेमी इं कली योव़तु। मार कली योव़तु देंशा हना, गोपुकी परमप्रभु यावे आ मुर दुम्‍शा, दोस मताइब नु दाक्‍ब दुम्‍यल, दे योव़तु। रोमी ८:२८-३०; एफिसी ५:२७

कलस्‍सी 1:11

इन छेङछेङ ङा सक्ति खोदेंशो पा मेको आन कली सक्ति पाइश्‍शो, बोल्‍यो सेलीन। मिनु सक्ति पाइश्‍शो बोल्‍यो दुम्‍शा, मारेइ मारेइ फाल्‍ने चाप्‍नीम” दे प्रार्थना पाइतस्‍कु।

१ तिमोथी 6:11

मोपतीके गे परमप्रभु यावे आ मुर दुम्‍शा, मेको नेल्‍ल रे ङोन बाक्‍को। ठीक पतीके, परमप्रभु यावे कली मिम्‍शा दाक्‍चा, थमा सुइक्‍चा, मुर आन कली दाक्‍चा, थमा सुइक्‍चा मप्रोंइचा नु ब्रेम्‍शो दुम्‍चा ला मिम्‍तो। २तिमोथी ३:१७; २तिमोथी २:२२

२ तिमोथी 2:25

जिचा पोक्‍ब आन कली रिम्‍शो लोव़मी ठीक सेल्‍चा माल्‍ब। परमप्रभु यावेमी मेको आन कली आ गे लेप्‍पाइश्‍शा, थमा शेंतीके तुइक्‍पाइक्‍ब कों?

याकूब 1:21

मोपतीके ग्रांग्रा दिचा ङा गेय नु काइ मरिम्‍शो पतीके नेल्‍ल प्रोनीन। गे ठेयब मलेत्‍थु, इन थुंमी वोइश्‍शो परमप्रभु यावे आ अरेशो लोव़ टिने। मोपा गेपुकी परमप्रभु यावे आ अरेशो लोव़ टिनीनु, मेको लोव़मी इन कली नरक रे प्रोंइने चाप्‍ब। १पत्रुस २:१

१ पत्रुस 3:15

तन्‍न इन थुंमी “ख्रीस्‍त ला प्रभु बाक्‍ब” दे मेको कली ठेयब सेलीन। गे गेना हना यो “इन थमा सुइक्‍तीके मार में” दे हिल्‍लो पाइब आन कली लोव़ लेत्‍चा ठीक दुम्‍शा बाक्‍कीन। ब्रेम्‍शो थुंमी रिम्‍शो लोव़ पा लोव़ लेत्‍तीने। १पत्रुस २:२१-१४

१ पत्रुस 3:8

मिनु नोले गे नेल्‍ल थुं का ङा दुम्‍शा, मुर आन कली दाक्‍शा, इन लोक्‍ब नु दाक्‍मुने। ब्रेम्‍शो थुं पाइश्‍शो मुर दुमीन।