दानीएल 8:3 - Sunuwar Bible

³ मिनु गो कोव़शा बाक्‍ङानु, ग्रोव़ निक्‍शी पाइश्‍शो सांड का ताता। मेको आ ग्रोव़ निम्‍फा दुइश्‍शो बाक्‍ताक्‍स। का चहिं अर्को क्‍येङा दुइश्‍शो बाक्‍त। मेको दुइश्‍शो ग्रोव़ नोले ग्रूशो बाक्‍त।

दानीएल 8:3 ပူးပေါင်းရင်းမြစ်များ

१ इतिहास 21:16

मिनु दाऊदमी इर गे कोव़ङानु, परमप्रभु यावे आ स्‍वर्ग ङा गेय पाइब का सरीङ नु रागी आस दातेमी राप्‍शा, आ गुइमी शोइश्‍शो तरवार का यरूसलेम गे दिंशो तवा बाक्‍त। मिनु दाऊद नु मेको नु बाक्‍शो खूशोपुकी भाङग्रा फेक्‍शा खुम्‍की पा बाम्‍मा बाक्‍त।

एज्रा 1:2

मिनु पारसी ङा पिप कोरेसमी मार लोव़ ब्रेक्‍पदा बाक्‍त देंशा हना “परमप्रभु यावे, स्‍वर्ग ङा परमप्रभुमी, रागी ङा राज्‍य नेल्‍ल आं कली गेशो बाक्‍ब। मिनु मेकोमी आं कली ‘यहूदा रागी ङा यरूसलेममी आं खिं सेलो’ दे माइक्‍ती।

एज्रा 4:5

मिनु यहूदी आन गेय नेल्‍ल क्‍याम्‍पाइक्‍चा कली, मेकोपुकीमी दरवार ङा ठेयब मुर आन कली घूस गेम्‍तेक्‍म। मिनु मेकोपुकीमी पिप कोरेस आ सासन पची ना रे पारसी ङा पिप दारा आ सासन पची ना सम्‍म मोदेंशो गेय पना पन बाक्‍तेक्‍म। एज्रा ४:२४

एस्‍तर 1:3

मिनु मेको पिप दुम्‍शो ३ बर्स जाक्‍दीम्‍मेनु, आ हुकुम पाइब मुर नु सरकार ङा गेय पाइब नेल्‍ल आन कली भोज का गेप्‍तु। मेको भोजमी मादी नु पारसी आन ठेयब मुर नु मेको रागी ङा हुकुम पाइब नेल्‍ल जाक्‍शो बाक्‍तेक्‍म।

यसैया 13:17

मिनु परमप्रभुमी “नेनीन, गो मादी आन कली गेपुकी नु लडाइ पपाइक्‍चा कली पोक्‍नुङमी। मेकोपुकीमी सुन चांदी ठेयब ममिम्‍नीम।

यसैया 21:2

गो हिंचा ङा लोव़ का नेंता। श्‍येत गेबपुकीम श्‍येत ला गेनीम। खतम पोक्‍‍बपुकीमी खतम ला पोक्‍नीमी। एलाम, गे कुवो। गे लशा, मादी रागी ङा मुर पुम्‍दीने। गो मेको आन हुक‍यी पचा तेक्‍नुङ” देंत।

यसैया 44:28

कोरेस आं गोठला बाक्‍ब। मेकोमी आं मिम्‍शो गेय पाइब। मेकोमी ‘यरूसलेम लेंशा सेल्‍चा माल्‍ब’ देंब। आं खिं आ पर्बम ‘नक जग सेल्‍नुङ’ ” देंत। २इतिहास ३६:२३; एज्रा १:१-४

येरमीया 51:11

इन ब्रा शेप्‍पीन। मिनु ब्रा कुरतीक प्रिंदीन। परमप्रभु यावेम मादी आन पिप कली लडाइ पपाइक्‍तु। मारदे हना मेकोमी बेबीलोन कली खतम सेल्‍चा कली मिम्‍ताक्‍व। मेको आ खिं आ पर्बम क्‍येक्‍क लेत्‍तीके बाक्‍ब। यसैया १३:१७; येरमीया ५०:२८

दानीएल 10:5

मिनु गो इर गे कोव़ङुनु, सुती वा फेक्‍शो मुर का ताता। मेकोमी थम रिम्‍शो ओफीर ङा सुन के किप्‍शुर किप्‍शो बाक्‍त। दानीएल ८:१५; दानीएल १२:६; इजीकीएल ९:२; प्रकाश १:१३-१५

दानीएल 2:39

मिनु इन नोले इन क्‍येङा ग्‍युम्‍शो राज्‍य का जाक्‍ब। मिनु मेको आ नोले ङा अरु कांसा के खोदेंशो राज्‍य का जाक्‍ब। मिनु मेकोमी रागी नेल्‍ल आन कली अधिकार पाइब।

दानीएल 5:31

मिनु मादी रागी ङा पिप दारामी राज्‍य ताप्‍तु। मेना पिप दारा ६२ बर्स दुम्‍शो बाक्‍माक्‍त। दानीएल ९:१; यसैया १३:१७

दानीएल 6:28

मिनु दानीएल पिप दारा नु पारसी आन पिप कोरेस आस पालामी शुश मान तशा, सक्ति पाइश्‍शो दुम्‍‍त।

दानीएल 7:5

मिनु मेको आ नोले अर्को जन्‍तु का ग्रूत। मेको वां खोदेंशो बाक्‍त। मेकोमी का पटटी रे बोक्‍शा, जेरी सां आ शोव़म काम्‍शो बाक्‍त। मिनु मेको कली “बोक्‍को, श्‍ये शुश ब्‍वावो” देंशो नेंता।

दानीएल 8:2

मिनु मेको कोंइतीकेमी गो एलाम रागी ङा सुसा माइश्‍शो ठेयब सहर ङा उलाइ खोला आ नेक्‍था बाक्‍शो बाक्‍ती।

दानीएल 8:20

इ तशो ग्रोव़ निक्‍शी पाइश्‍शो सांड मादी नु पारसी रागी ङा पिप बाक्‍नीस।

जकरिया 1:18

मिनु इर गे कोव़ङुनु, ४ ओटा ग्रोव़ ता‍ता।

जकरिया 2:1

मिनु गो इर कोव़ङुनु, पुक्‍तीक डोरी शेशो मुर का आं ङोंइती राप्‍शो ता‍ता। इजीकीएल ४०:३

जकरिया 5:1

मिनु गो इर गे कोव़ङुनु, प्रा‍क्‍सीशो ब्रेक्‍स का बेरशो ता‍ता।

जकरिया 5:5

मिनु गो नु लोव़ पाइब, स्‍वर्ग ङा गेय पाइबमी आं नेक्‍था जाक्‍शा “हरी इर कोव़ङो। मार ग्रूमे?” देंत।

जकरिया 5:9

मिनु इर कोव़ङुनु, मीश मुर निक्‍शी पि‍शो ता‍तासी। मेको आस फ्रांमी फश बाक्‍त। मेको आस फ्रां सारस के खोदेंशो बाक्‍त। मेको निक्‍शीमी मेको डालो कली सरीङ नु रागी आस दा‍तेमी क्‍युक्‍शा लाइक्‍ताक्‍स।

जकरिया 6:1

मिनु गो लेंशा इर गे कोव़ङुनु आं ङोंइती डांडा आस दाते रे ४ ओटा बग्‍गी यिशो तातामी। मेको डांडा कांसा के बाक्‍ताक्‍स। प्रकाश ६:१-८; जकरिया १:८

गन्‍ती 24:2

मिनु बालाममी कोव़ना कोव़न, इस्राएली आन कली थर थर पा बाक्‍शो ताम्‍तीमी। मिनु परमप्रभु आ सोक्‍तीम मेको कली सुम्‍तु।

यहोसु 5:13

यहोसु यरीको आ नेक्‍था बाक्‍मेनु, मेको आ ङोंइती गुइमी तरवार शेशा मुर का दोक राप्‍शो ताप्‍तु। मिनु यहोसु मेको आ नेक्‍था लशा “गे आंइ मुर ननी देय आंइ जोरी सत्रु आ मुर ननी?” दे हिल्‍लो पाप्‍तु। गन्‍ती २२:२३,३१

प्रकाश 13:11

मिनु गो खप रे अर्को जन्‍तु का ग्रूशो ताता। मेको के पाठा के खोदेंशो ग्रोव़ निक्‍शी बाक्‍त। मिनु मेकोमी ठेयब बुस्‍स खोदेंशो पा लोव़ पाइबाक्‍त।

प्रकाश 5:6

मिनु गोमी ठेयब नित्‍तीके, ४ ओटा सेस जन्‍तु नु शेंब खाल्‍पा आन दातेमी क्‍योरशो पाठा खोदेंशो पा दोक राप्‍शो ताता। मेको पाठा के ७ ओटा ग्रोव़ नु ७ ओटा मिक्‍च बाक्‍त। मेको मिक्‍च चहिं परमप्रभु यावेमी रागी रागीमी सोइश्‍शो परमप्रभु यावे आ ७ ओटा सोक्‍त बाक्‍तेक्‍म। यसैया ५३:७; यूहन्‍ना १:२९