आमोस 5:15 - Sunuwar Bible

¹⁵ मरिम्‍शो पतीक कली काइ मदाक्‍तीन। रिम्‍शो पतीक कली दाक्‍तीन। ठेयब लाप्‍चोमी ठीक निसाफ पने। मिनु मुर नेल्‍ल आन परमप्रभु यावेमी योसेफ आ लीशो मुर आन कली शिशी पाइ‍बा कों?” दे परमप्रभु यावेमी देंत। भजन संग्रह ३४:१५; रोमी १२:९

आमोस 5:15 ပူးပေါင်းရင်းမြစ်များ

२ सामुएल 16:12

परमप्रभु यावेम मेरे मुलाक्‍त ङा सराप आ पा ङा आं श्‍येत तशा आं कली रिम्‍शो पाइबा कों” देंमाक्‍त।

१ राजा 20:31

मिनु मेको आ गेय पाइबपुकीम मेको कली “गोपुकीमी इस्राएल आ खिं ङा पिपपुकी दा शिशी पाइब बाक्‍नीम देंशो लोव़ नेंशो बाक्‍नीकी। मोपतीके क्रातोम अरन्‍डी फेक्‍सीय। मिनु पियाम डोरी फ्रेंसीशा इस्राएल ङा पिप आ बाक्‍तीक लय। मिनु मेकोम इन कली ब्रोंइचा गेबा कों?” देंमा बाक्‍त।

२ राजा 13:7

येहो-अहाज के ५० जना शारा ङोइक्‍ब, १० ओटा बग्‍गी नु १० हजार खोइलीम गाक्‍ब लडाइ पाइब ङा लाक्‍शा अर्को मारेइ मलीशो बाक्‍माक्‍त। मारदे हना अरु आन कली अराम ङा पिपम साइश्‍शा, खप ङा फुरक खोदेंशो सेल्‍शो बाक्‍माक्‍त।

२ राजा 15:29

इस्राएल ङा पिप पेकाहमी सासन पवा ना अस्‍सुर ङा पिप तिग्‍लात-पिलेसेरमी लडाइ तोशा, इयोन, आबेल-बेथ-माकाह, यानोह, केदेश, हासोर, गिलाद, गालील रागी नु नाप्‍ताली आ रागी नेल्‍ल आ के सेल्‍शा, मेकेर ङा मुर आन कली ग्‍याइश्‍शा अस्‍सुर लाइक्‍मी बाक्‍त। १इतिहास ५:२६

२ राजा 19:4

परमप्रभु यावे, इन परमप्रभुमी अस्‍सुर ङा पिपमी सोइश्‍शो मेको राब्‍शाके आ लोव़ नेल्‍ल नेंना माइ। आ होव़प, अस्‍सुर ङा पिपमी ब्रोंइशा बाक्‍शो परमप्रभु कली शुक्‍शी पथ सोइश्‍शो बाक्‍ब। मिनु परमप्रभु यावे, इन परमप्रभुमी आ नेंशो लोव़ आ पर्बम मेको कली हुइक्‍बा कों। मोपतीके मुल लीशो मुर आन पर्बम प्रार्थना पने’ देंत” देंमा बाक्‍त। १सामुएल १७:१०; २राजा १८:३५

भजन संग्रह 119:104

इन ब्रेक्‍शा अरेशो लोव़ रे रुप्‍ब दुम्‍ती। मोपतीके गो दूली पतीक नेल्‍ल काइ मदाक्‍नुङ। भजन संग्रह ११९:२९

भजन संग्रह 34:14

मरिम्‍शो पतीके रे लेश्‍शा, रिम्‍शो पने। थुं नाइश्‍शा बाक्‍तीके माल्‍शा बाक्‍कीन।

भजन संग्रह 36:4

मेको आन ब्राख्‍येम बाक्‍मानु, आन मरिम्‍शो पतीक ला मिम्‍ना मिम्‍न बाक्‍नीम। मेको मरिम्‍शो लां खोइक्‍नीम। मेकोमी आन थुंमी “मरिम्‍शो पशो ग्रांग्रा दिशा मपाइनीकी” दे मदेंनीम। मीका २:१

भजन संग्रह 37:27

मरिम्‍शो पतीके रे ङोन बाक्‍कीन। रिम्‍शो पने। मिनु गे गेना हना यो ब्रोंइचा ताइनीनी।

भजन संग्रह 80:1

इस्राएल ङा गोठला, आंइ लोव़ नेनीन। गे योसेफ कली भेडा आन हुल खोदेंशो पा खुल्‍तीनी। गे करूब आन तार ठेयब नित्‍तीकेमी नित्‍नीनी। भजन संग्रह १८:११; २सामुएल ६:२

भजन संग्रह 97:10

परमप्रभु यावेमी मरिम्‍शो पतीक कली काइ मदाक्‍ब मुर आन कली दाक्‍ब। आ कली थमा सुइक्‍ब आन कली कोव़ब। मेको आन कली आ अरेशो मटीब आन गुइ रे प्रोंइब।

प्रस्‍थान 32:30

आ दीसा मोसामी मुर आन कली “गेपुकीमी ठेयब पाप पाइतीनी। मिनु गो परमप्रभु यावे आ बाक्‍तीक ङोइश्‍शा, लाइनुङ। गो इन पशो पाप क्‍याम्‍तीक गेय पने चाप्‍नुङा, कों?” दें‍त।

येरमीया 18:8

तन्‍न मेको आ देंशो रागी ङा मुर आन मरिम्‍शो पतीक रे आं गे लेत्‍तेक्‍म हना, गो आं मिम्‍शो मेको आन कली ठेयब श्‍येत गेतीक रे फाइक्‍नुङ। श्‍येत मगेनुङमी। येरमीया २६:३; इजीकीएल ३३:११; जोना ३:१०

येरमीया 22:3

परमप्रभु यावेमी मार देंत देंशा हना “गे ठीक निसाफ पने। ठीक गेय पने। रोइक्‍चा पुंइसीशो आन कली मरिम्‍शो पाइब आन गुइ रे प्रोनीन। अर्को रागी ङा मुर, रोम रोइक्‍च नु आन वोंइश बेक्‍शो मीश मुर आन कली मरिम्‍शो मपने। मिनु एको रागीम मारेइ दोस मताइब आन हुश मशाइक्‍पतीन। येरमीया २१:१२

येरमीया 31:7

परमप्रभु यावेमी “याकूब आ पर्बम ग्‍येरशा ठेयब सेंदा पा कुम्‍सो पने। मिनु रागी रागी ङा नेल्‍ल क्‍येङा ठेयब रागी आ पर्बम ठेयब सेंदा पा ग्रीङीन। मिनु परमप्रभु यावेम आ मुर आन कली श्‍येत रे प्रोंइतु। इस्राएल ङा लीशो आन कली प्रोंइतु।

इजीकीएल 45:9

मिनु परमप्रभु, परमप्रभु यावेमी “ए इस्राएल ङा सासन पाइबपुकी। गेपुकीम हुश ख्राक्‍श पोक्‍तीनी। दिप्‍चा प्रोनीन। गेपुकीम थम रिम्‍शो नु ठीक गेय पने। आं मुर आन कली आन खिं रू रे मखेरीन। १राजा १२:४,११; १राजा २१; येरमीया २१:११-१२; मीका ३:१-३

दानीएल 2:49

मिनु दानीएलमी “शद्रक, मेशक नु अबेद-नेगो आन कली बेबीलोन रागी ङा सासन पतीक गेय गेचा” दे पिप नु लोव़ पा पुंइतु। दानीएल चहिं पिप आ दरवारमीन बाक्‍त। दानीएल ३:१२

योएल 2:14

मिनु परमप्रभु यावेमी आ थुं लेश्‍शा, सजाइ मगेथु, आसीक गेबा कों? मेको सुम तुइक्‍बा ङा? मिनु गेपुकीम परमप्रभु यावे, इन परमप्रभु कली अन्‍न चढ़ेतीक नु तूचा थोव़क चढ़ेतीके चढ़ेने। योना ३:९

आमोस 5:10

मेकोपुकीम निसाफ पतीके लाप्‍चोम निश्‍शा अरेब कली काइ मदाक्‍नीम। मिनु थमा लोव़ पाइब आन कली ग्रांग्रा दित्‍नीम। यसैया २९:२१

आमोस 5:24

तन्‍न ठीक निसाफ पतीक ब्‍वाक्‍क खोदेंशो पा शाइक्‍पतीन। ठीक पतीक गेनायो मसोव़ब खोला खोदेंशो पा शाइक्‍पतीन।

आमोस 5:6

परमप्रभु यावे कली मालीने। मिनु ब्रोंइचा ताइनीनी। मो मपाइतीनी हना, मेको मी खोदेंशो पा गाइश्‍शा योसेफ आ खिंम मी सुइक्‍ब। बेथेल कली खतम पोक्‍ब। मेको मी कली काप्‍ब सुइ मबाक्‍नीम। आमोस ६:१२; यसैया ५:२०

आमोस 6:12

मेकोमी “मार, शारा रोंगुम दोरनीमी ङा? मार, मेकेर ब्‍यफ वाक्‍नीमी ङा? तन्‍न गेपुकीम ठीक निसाफ कली दूली सेल्‍तीनी। ठीक पतीक कली कशो सेल्‍तीनी। आमोस ५:७

आमोस 7:3

मिनु परमप्रभु यावेमी “मेको मोदेंशो मदुम्‍ब” देंत।

योना 1:6

मिनु डोंगा चलेबमी योना आ इप्‍तीकेम लशा “गिश ङा इमे। बोक्‍को, इ परमप्रभु कली थोवो। मेको परमप्रभु इं कली खतम दुम्‍चा रे प्रोंइबा, कों” देंमाक्‍त।

योना 3:9

परमप्रभु आ शुश गाइक्‍तीक रे लेप्‍बा, कों? मेकोमी आंइ कली मसाइक्‍बा, कों? सुम तुइक्‍बा, ङा?” देंमा बाक्‍त। योएल २:१४

मीका 2:12

परमप्रभुमी “याकूब गो थमा पा नेल्‍ल इन कली खुप्‍शा पुक्‍नन्‍नी। गो इस्राएलम लीशो आन कली थमा पा खुप्‍नुङमी। गो मेको आन कली भेडा बगालम वोइश्‍शो खोदेंशो पा नु योव़तीकेम योव़शो खोदेंशो पा वोइक्‍नुङ। मिनु मेकेर शुश मुर दुम्‍नीम। येरमीया ३१:१०; इजीकीएल ३६:३७; यसैया ५२:१२

मीका 3:2

गेपुकी रिम्‍शो पचा काइ मदाक्‍नीनी। मिनु मरिम्‍शो पतीक दाक्‍नीनी। गेपुकीमी आं मुर आन कुशुल उक्‍नीनी। मिनु मेको आन रुश रे आन श्‍ये रिक्‍‍नीनी।

मीका 5:3

मिनु परमप्रभु यावेमी इस्राएली आन कली काइ मकोव़ब। मिनु मीश मुरुमी आल थिवा नोले ला कोव़ब। मेना लीशो मुरपुकी इस्राएल ङा मुर नु गारशा, लेत्‍चा पुंइसीनीम। इजीकीएल ३४:२३

सेफन्‍याह 2:3

गे रागी ङा परमप्रभु यावे आ ङोंइती ठीक पाइब नु ब्रेम्‍शो मुरपुकी परमप्रभु यावे कली मालीन। गे ठीक पाइब नु ब्रेम्‍शो थुं पाइश्‍शो दुम्‍चा मालीन। मिनु परमप्रभु यावेमी आ गाइश्‍शो नाक्‍त इन कली ख्रुइक्‍बा कों? आमोस ५:१५

मलाकी 3:18

मेको नाक्‍त ठीक पाइब नु परमप्रभु आ अरेशो मटीब खाल का ङा मदुम्‍नीम। मेको ताइनीनी। परमप्रभु कली गेय पाइब नु गेय मपाइब खाल का ङा मदुम्‍नीम। मेको यो ताइनीनी” देंत।

रोमी 12:9

थमा पा दाक्‍मुशा बाक्‍कीन। मरिम्‍शो गेय रे ङोन बाक्‍कीन। रिम्‍शो पने। १तिमोथी १:५; आमोस ५:१५

रोमी 7:22

गो आं थुंमी परमप्रभु यावे आ अरेशो लोव़ दाक्‍शा ग्‍येरसीनुङ।

रोमी 8:7

मुर आ थुंमी परमप्रभु यावे कली मदाक्‍ब आ जोरी सत्रु दुम्‍शा, आ देंशो मटीब। मारदे हना परमप्रभु यावे आ अरेशो लोव़ थमा पा टिने मचाप्‍ब। याकूब ४:४

३ यूहन्‍ना 1:11

आं दाक्‍शो थमा सुइक्‍ब लोक्‍ब, मरिम्‍शो मुर आन तस मखोतो। तन्‍न रिम्‍शो मुर आन तस खोतो। सु रिम्‍शो गेय पाइबा, मेको परमप्रभु यावे आ मुर बाक्‍ब। सु चहिं मरिम्‍शो पाइबा, मेको परमप्रभु यावे कली मतुइक्‍ब बाक्‍ब।