२ सामुएल 20:1 - Sunuwar Bible

¹ शेबा नें पाइश्‍शो मरिम्‍शो पाइब मुर का बाक्‍माक्‍त। मेको बेन्‍यामीन आ थर ङा बिक्री आ तौ बाक्‍माक्‍त। मेकोम तुराही ताप्‍शा ग्रीशा “दाऊद नु आंइ के मार बाक्‍बा ङा? येस्‍से आ तौ नु आंइ के मारेइ मबाक्‍ब। ए इस्राएली, गे इन ताम्‍बु ताम्‍बुम लने” देंमाक्‍त। १राजा १२:१६

२ सामुएल 20:1 ပူးပေါင်းရင်းမြစ်များ

उत्पत्ती 46:21

बेन्‍यामीन आ तौपुकी बेला, बेकेर, अश्‍बेल, गेरा, नामान, एही, रोश, मुप्‍पीम, हुप्‍पीम नु आरद बाक्‍मा बाक्‍त।

२ सामुएल 15:10

मिनु अब्‍सालोमम इस्राएल ङा थर नेल्‍ल आन कली सुइम मतुइक्‍चा ङा पा, लोव़ कुरब सोइश्‍शा “तुराही ग्रीशो नेंनी चोटी, गेपुकीम ‘अब्‍सालोम हेब्रोनम पिप दुम्‍त’ देंनीन” देंपाइक्‍मी बाक्‍त।

२ सामुएल 16:11

मिनु दाऊदम अबीशै नु आ गेय पाइब नेल्‍ल आन कली “आं तौमी आं कली साइक्‍चा माल्‍ब हना, मेरे बेन्‍‍यामीन आ थर ङा मुर के मार लोव़ पचा ङा? मेरे कली प्रोनीन। मेरेमी सराप पवल। मारदे हना परमप्रभु यावेमीन मेरे कली सराप पचा गेशो बाक्‍म माइ।

२ सामुएल 16:7

शिमेइमी “लावो, लावो, ए मुर साइक्‍ब नु मरिम्‍शो पाइब” दे ग्रीशा, सराप पवा बाक्‍त।

२ सामुएल 18:17

मेकोपुकीम अब्‍सालोम आ बेक्‍शो रां लाइश्‍शा, ब्‍वाकी ङा ठेयब ढोडोङगा काम ताइक्‍तमे बाक्‍त। मिनु मेको तार शुश फुल्‍लु पुक्‍गमे बाक्‍त। मिनु इस्राएली नेल्‍ल आन आन खिं प्रोक्‍मा बाक्‍त। यहोसु ८:२९

२ सामुएल 20:2

मोपतीके इस्राएली नेल्‍लेमी दाऊद कली प्रोंइ‍शा, बिक्री आ तौ शेबा आ नोले खो‍दमे बाक्‍त। तन्‍न यहूदा ङा मुरपुकी चहिं दाऊद कली मप्रोंइथु, यर्दन रे यरूसलेम सम्‍म आ नोले खोइक्‍स ङा खोइक्‍स पामे बाक्‍त।

२ सामुएल 20:22

मिनु मेको मीश मुरुम आ लोव़ मुर नेल्‍ल आन कली नेंपाइक्‍मी बाक्‍त। मिनु मेकोपुकीम बिक्री आ तौ शेबा आ पिया ख्रोइश्‍शा, योआब कली ब्‍वारदमे बाक्‍त। मिनु योआबम तुराही तबा बाक्‍त। मिनु लडाइ पाइ‍ब नेल्‍ल सहर प्रोंइशा आन खिं खिं लेम्‍मा बाक्‍त। योआब चहिं पिप आ बाक्‍तीके यरूसलेम लेश्‍शा लमाक्‍त।

२ सामुएल 23:6

तन्‍न परमप्रभु यावे आ अरेशो मटीब फशेम बेरशो चू खोदेंशो बाक्‍नीम। सुइम मेको कली गुइम थीने मचाप्‍नीम।

१ राजा 12:16

मिनु इस्राएली नेल्‍लेमी पिपम मेको आन लोव़ मनेंशो तुइश्‍शा, मेकोपुकीम पिप कली “दाऊद नु आंइ के ततीक मार बाक्‍बा ङा? येस्‍से आ तौ नु आंइ के ततीक मारेइ मबाक्‍ब। इस्राएली, आंम आंम खिं लेतीन। दाऊद गे आंम थुती थाती पांइसो” देंमा बाक्‍त। मोपतीके इस्राएली आन आन खिं लेम्‍मा बाक्‍त। २सामुएल २०:१

१ राजा 21:10

मिनु मरिम्‍शो पाइब मुर निक्‍शी आस कली मेको आ ङोंइती निप्‍पाइश्‍शा, एकोम ‘परमप्रभु नु पिप कली सराप पशो बाक्‍ब’ दे दोस गेपतीन। मिनु मेको नोले मेको कली लाङगा ग्रुंइशा फुल्‍लु आप्‍शा सतीन” दे ब्रेक्‍ता बाक्‍त। ब्‍यवस्‍था १७:६; मत्ती २६:५९-६१; प्रस्‍थान २२:२७

२ इतिहास 10:16

मिनु उत्तरम बाक्‍ब इस्राएलीपुकी नेल्‍लेमी “पिपम आंइ देंशो मबिप्‍ब” दे तुइक्‍तमे बाक्‍त। मिनु मेकोपुकीमी पिप कली “दाऊद नु आंइ के मार भाग बाक्‍बा ङा? येस्‍से आ तौ नु आंइ के मार बाक्‍बा ङा? गे इस्राएलीपुकी, आंम ताम्‍बुम लने। मुल दाऊद आ खिं ङा मुर, गे आंमा इन खिं कली कोव़ङीन” देंमा बाक्‍त। मोपतीके इस्राएली नेल्‍ल आन ताम्‍बुम लमा बाक्‍त।

२ इतिहास 10:6

मिनु नोले पिप रेहोबामम आ आफ सोलोमन ब्रोंइशा बाक्‍मेनु, अर्ती गेब खाल्‍पापुकी नु अर्ती पुंइशा “एको मुर आन कली मार लोव़ लेत्‍तुमी? गे मार अर्ती गेनीनी?” दे हिल्‍लो पवा बाक्‍त।

भजन संग्रह 17:13

परमप्रभु यावे, बोक्‍कीन। मेको आन कली दोक्‍पतीन। आं कली इन तरवारमी इन अरेशो मटीब मुर रे प्रोंइ‍यीनी। गन्‍ती १०:३५

भजन संग्रह 34:19

ठीक पाइबपुकी शुश श्‍येत जाइनीम। तन्‍न परमप्रभु यावेमी मेको आन कली श्‍येत नेल्‍ल रे प्रोंइब। २कोरिन्‍थी १:५

हितोपदेस 25:8

गे मार मरिम्‍शो ताप्‍तीवी हना यो, रीब पा निसाफ पतीकेमी मलावो। मारदे हना इ नेक्‍था ङा मुरुम इ कली मुने तोक्‍ते हना, मार पाइनेवे। लूका १४:७-११

हितोपदेस 26:21

दोपा मी मुइक्‍चा कली कोइला नु ब्रचा कली शी माल्‍बा, मोपा रीब पा गाइक्‍ब मुर जिचा पोक्‍ब बाक्‍ब। हितोपदेस १५:१८

मर्कूस 3:24

राज्‍य का ङा मुरपुकी जिशा ब्राशा गाक्‍तेक्‍म हना, मेको राज्‍य जाम्‍शा लाइब।

लूका 19:14

मेको मुर गाक्‍म नोले मेको रागी ङा मुरपुकीमी ‘मेको मुर आंइ कली सासन पाइब मदुम्‍ल’ दे लोव़ कुरब मुर मेको पिप आ बाक्‍तीक सोइक्‍तमे बाक्‍त। मारदे हना मेको कली मदाक्‍बाक्‍मा बाक्‍त। यूहन्‍ना १:११

लूका 19:27

तन्‍न आं कली मटीब आं जोरी सत्रु आन कली चहिं ग्‍याइश्‍शा चाक्‍शा आं ङोंइती क्‍योरशा सतीन’ देंमाक्‍त” दे शेंदीमी बाक्‍त।

यूहन्‍ना 13:8

पत्रुसमी “गो आं खोइल चिक्‍चा काइ मगेनुङ” देंत। मिनु येसुमी “गो इ खोइल मचिक्‍ताक्‍न हना, गे आं मुर मनवे” दे माइक्‍तु।

ब्‍यवस्‍था 13:13

इन दाते रे मरिम्‍शो वोंइश मुरपुकी बोक्‍शा, सहर ङा मुर आन कली दूली पपाइश्‍शा, मेकोपुकीमी ‘लय, देवी देवता आन कली पूजा पय’ देंतेक्‍म हना, गेपुकी मेको देवी देवता गेनायो मतुइश्‍शो बाक्‍तीनी हना,

न्‍यायाधीस 19:22

मेकोपुकी ग्‍येरसीशा बाक्‍शो बाक्‍मानु, सहर ङा मरिम्‍शो मुरपुकीमी मेको खिं कली दि दा रे पा पुम्दमे बाक्‍त। मिनु खिं ङा लाप्‍चो कली ख्रोकोल पना पन “इ खिंमी ओव़ब मुर कली लाङगा ग्रुंइदो। गोपुकी मेको नु इप्‍नीकी” दे ग्रीमा बाक्‍त। उत्‍पत्ती १९:५-८

न्‍यायाधीस 3:27

मिनु एफ्राइम ङा पहाड रागीम जाक्‍दीम नोले, मेकेर रे मेकोमी तुराही तबा बाक्‍त। मिनु इस्राएली मेको नु पहाड रे तोइश्‍शा, आ नोले खोदमे बाक्‍त।

रूथ 2:3

मिनु रूथ लशा, रिक्‍ब आन नोनोले सिला बाला गुबा बाक्‍त। आ जाक्‍दीश्‍शो रू चहिं एलीमेलेक आ खिं ङा मुर बोआज आ रू बाक्‍माक्‍त।

१ सामुएल 13:2

सावलमी इस्राएल ङा हजार सां मुर आन कली योव़मी बाक्‍त। मिनु हजार निक्‍शी आं नु मिकमाशम नु बेथेल ङा पहाडीम बाक्‍मा बाक्‍त। मिनु हजार का मुर योनाथन नु बेन्‍यामीन ङा गिबाम बाक्‍मा बाक्‍त। लीशो मुर आन कली चहिं आन खिं सोइक्‍तीमी बाक्‍त।

१ सामुएल 2:12

एली आ तौ निम्‍फा हिंचा ङा मरिम्‍शो पाइब बाक्‍सा बाक्‍त। मेको निक्‍शी परमप्रभु यावे कली मान पा महिंब बाक्‍सा बाक्‍त।

१ सामुएल 30:22

तन्‍न दाऊद नु लाइब का निक्‍शी शोर गाक्‍शो मुरपुकीम मेको आ लोव़ ख्रोइश्‍शा दाऊद कली “एको मुरपुकी गो नु मलम। गोपुकीम लशा रोइश्‍शा चाक्‍शो मार मार गो मेको आन कली योक्‍शा मगेनीकी। मेकोपुकीम आन मीश नु आन आलपुकी ला लद‍मेक्‍ल” देंमा बाक्‍त।