२ सामुएल 15:31 - Sunuwar Bible

³¹ मिनु दाऊद कली अहीथोफेल मरिम्‍शो पाइ‍ब आन दातेम अब्‍सालोम नु बाक्‍त देंशो लोव़ नेंपदमे बाक्‍त। मिनु दाऊदम “परमप्रभु यावे अहीथोफेल आ अर्ती शोर गाक्‍शो सेलीन” दे पुंना बाक्‍त। २सामुएल १७:१४

२ सामुएल 15:31 ပူးပေါင်းရင်းမြစ်များ

२ सामुएल 15:12

अब्‍सालोमम आ क्‍योरशा चढ़ेतीकेम चढ़ेवानु, गिलोह सहर ङा अहीथोफेल कली ब्रेत्‍थ सोइक्‍ता बाक्‍त। मेको अहीथोफेल चहिं गिलोह सहर ङा दाऊद कली अर्ती गेब मुर बाक्‍माक्‍त। मोपा पिप कली मरिम्‍शो गेय पना पन लशा अब्‍सालोम आ मुर शुश दुम्‍ना दुम्‍न लमा बाक्‍त। २सामुएल २३:३४; यहोसु १५:५१

२ सामुएल 16:23

मेना मुरपुकीम अहीथोफेल आ अर्ती परमप्रभु आ लोव़ खोदेंशो मिम्‍बाक्‍मा बाक्‍त। मोपतीके दाऊद नु अब्‍सालोमम अहीथोफेल आ अर्ती ठेयब मिम्‍बाक्‍‍सा बाक्‍त।

२ सामुएल 17:14

मिनु अब्‍सालोम नु इस्राएली नेल्‍लेमी “अहीथोफेल आ अर्ती क्‍येङा अरकी आ हुशाइमी गेशो अर्ती रिम्‍शो बाक्‍ब” देंमा बाक्‍त। मारदे हना परमप्रभु यावेमी अहीथोफेल आ अर्ती क्‍याम्‍शा, अब्‍सालोम कली खतम पोक्‍चा कली मो पवा बाक्‍त। २सामुएल १५:३१-३४

२ सामुएल 17:23

मिनु अहीथोफेलमी आ अर्ती ङा लोव़ मबिश्‍शो तुइश्‍शा, आ गधा ठीक पा आ सहर ङा खिं लमाक्‍त। मिनु आ खिं ङा मुर आन कली देंचा माल्‍शो लोव़ देंशा, आं चहिं ग्‍युक्‍शा बेक्‍माक्‍त। मेको मोपा बेक्‍शा आ आफ आ तुरसुम थिम्‍चा पुंइसे बाक्‍त। १सामुएल ३१:४; १राजा १६:१८; मत्ती २७:५

२ सामुएल 17:5

तन्‍न अब्‍सालोमम “अरकी आ हुशाइ कली ब्रेत्‍तीन। मेकोमी मार देंबा, मेको नेंय” देंमाक्‍त। २सामुएल १६:१६

२ सामुएल 17:7

मिनु हुशाइमी अब्‍सालोम कली “एको मुल ङा अहीथोफेल आ देंशो ठीक मदुम्‍ब” देंमाक्‍त।

अय्‍युब 5:12

मेकोम मरिम्‍शो मिम्‍शा पाइब आन कली आन मिम्‍शो मदुम्‍पाइक्‍ब। मिनु मेकोपुकीम आन मिम्‍शो पने मचाप्‍नीम।

भजन संग्रह 109:3

मेकोपुकीमी आं कली काइ मदाक्‍थु, लोव़ पा, आं कली जिचा तोशा मोशा ग्राम्‍नीम।

भजन संग्रह 3:1

परमप्रभु यावे, आं कली श्‍येत गेब शुश बाक्‍नीमी। आं जोरी सत्रु शुश बाक्‍नीम।

भजन संग्रह 41:9

गो आं नेक्‍था ङा वारच, आं शोब्‍ले जाइबमी यो, आं कली ताइक्‍चा कली आ खोइल क्‍युक्‍तु।

भजन संग्रह 55:10

मेकोपुकी नाक्‍दो नाक्‍ती सहर ङा गारो ङोइश्‍शा एर ओंथ हिरशो बाक्‍नीम। मेको सहरम मरिम्‍शो पतीके नु श्‍येत ला बाक्‍ब।

भजन संग्रह 55:12

आं कली काइ मदाक्‍बमी शुक्‍शी पाइय्‍यी हना, गो फाल्‍ने चबु वा। जोरी सत्रुमी आं कली लडाइ तोशो नम हना, गो मेको आन क्‍येङा प्रोक्‍शा ख्रुंइसीङ वा। भजन संग्रह ४१:१०

यसैया 19:3

मिनु इजीप्‍त ङा मुर आन थुं लुक्‍च लाइब। गो मेको आन मिम्‍शो खतम सेल्‍नुङ। मिनु मेकोपुकीमी आन मूर्ति नु बेक्‍शो मुर आन सल्‍ला नेंचा माल्‍नीम।

यसैया 44:25

गो जोल पाइब आन नोले दुम्‍ब लोव़ शोर गाक्‍शो सेल्‍नुङ। लिंक्‍यु कोव़ब आन निप्‍स क्‍यातामी। जोक्‍ब तुइक्‍ब आन कली दिप्‍शा, मेको आन जोक्‍तीके तुइक्‍तीके नेल्‍ल मूर्ख सेल्‍ता। यसैया २९:१४

यूहन्‍ना 13:18

मिनु येसुमी “गो नेल्‍ल इन पर्बम लोव़ मपाइनुङ। आं योव़शो आन कली तुइक्‍नुङ। परमप्रभु यावे आ ब्रेक्‍पाइश्‍शो लोव़मी मार ब्रेक्‍शो बाक्‍ब देंशा हना ‘आं शोब्‍ले जाइबमी आं कली साइक्‍चा कली आ खोइल क्‍युक्‍तु’ दे ब्रेक्‍शो बाक्‍ब। मुल मोदेंशो दुम्‍चा चिक्‍ताक्‍व। भजन संग्रह ४१:९

१ कोरिन्‍थी 1:20

जोक्‍ब तुइक्‍ब सु सु नमी? पढेस जोक्‍ब सु सु नमी? सिनाक्‍त मुलाक्‍त शुश लोव़ पा ग्राब सु नमी? लो, मिम्‍तीने। एको रागी ङा जोक्‍ब तुइक्‍ब लोव़ कली परमप्रभु यावेमी फश लोव़ मसेला ङा? मत्ती ११:२५; रोमी १:२२

याकूब 3:15

ओदेंशो मिम्‍तीके परमप्रभु आ गेशो रुप्‍तीक थुं मबाक्‍ब। तन्‍न मुर आन थुं रे नु सैतान रे जाक्‍ब। याकूब १:५