१ पत्रुस 2:6 - Sunuwar Bible

⁶ मारदे हना परमप्रभु यावे आ लोव़मी मार ब्रेक्‍शो बाक्‍ब देंशा हना “नेनीन, गो सियोन डांडामी फुल्‍लु का वोइक्‍नुङ। मेको सुर ङा फुल्‍लु दुम्‍शा, योव़सीशा नु दाक्‍सीशा बाक्‍ब। सु सुमी मेको कली थमा सुद‍मे, मेको मुर मुने दोक्‍चा ममाल्‍नीम” दे ब्रेक्‍शो बाक्‍ब। यसैया २८:१६

१ पत्रुस 2:6 ပူးပေါင်းရင်းမြစ်များ

उत्पत्ती 49:24

तन्‍न आ लिब्रा बोल्‍यो बाक्‍ब, आ गुइ बोल्‍यो बाक्‍नीम। सक्ति पाइश्‍शो याकूब आ परमप्रभु, इस्राएल आ गोठला नु सेरथे फुल्‍लुम, मेको कली वारच पाप्‍तु। ब्‍यवस्‍था ३२:१८

भजन संग्रह 40:14

आं कली साइक्‍चा माल्‍ब नेल्‍ले मुने दोक्‍शा, ग्‍येत्‍थ लुक्‍च दुम्‍मल। आं कली श्‍येत जशो दाक्‍ब नेल्‍ल लेश्‍शा लशा, खतम दुम्‍मल।

भजन संग्रह 89:19

साइ ङोंइती गे इन कली मप्रोंइब मुर आन कली कोंइतीक कोंइशा, लोव़ पाइतीनी। मिनु गे “गो लडाइ पाइब का कली सक्ति गेता। गो मुर आन दाते रे का कली ठेयब सेल्‍ता। १सामुएल १३:१४; १सामुएल १६:१३

यसैया 28:16

मोपतीके परमप्रभु, परमप्रभु यावेमी “कोव़ङीन गो सियोन डांडाम जग फुल्‍लु का वोइक्‍नुङ। मेको रिम्‍शो नु बोल्‍यो सुर ङा फुल्‍लु बाक्‍ब। मेको शुश क्‍येट लाइब थम बोल्‍यो जग ङा फुल्‍लु बाक्‍ब। सु सु मेको कली थमा सुइक्‍नीमी, मेको आन थुं लुक्‍च मलाइब। भजन संग्रह ११८:२२; एफिसी २:२०; यसैया ७:९

यसैया 41:11

गे नु गाइक्‍ब नेल्‍ल मुने दोक्‍शा, शिशी मताइ‍नीम। इ जोरी सत्रु नेल्‍ल फश खोदेंशो दुम्‍शा, जाम्‍शा लाइनीम।

यसैया 42:1

परमप्रभुमी “आं गेय पाइब कली कोव़ङीन। गो मेको कली सक्ति गेनुङ। आं योव़शो गेय पाइब तशा, आं थुं ग्‍येरसीब। गो मेको कली आं सोक्‍तीम प्रिंताक्‍ङ। मेकोमी रागी रागी ङा मुर आन कली ठीक निसाफ पाइ‍ब। यसैया ४९:१-६; यसैया ५०:४-११; यसैया ५२:१३-यसैया ५३:१२; मत्ती १२:१८-२१; मत्ती ३:१७

यसैया 46:13

आं पाप रे प्रोंइतीक चाक्‍नुङ, मेको ङोन मबाक्‍ब। गो इन कली रीब पा पाप रे प्रोंइनुङ। गो आं पाप रे प्रोंइतीक सियोनम वोइक्‍नुङ। इस्राएल कली आं छेङछेङ गेनुङ” देंत।

यसैया 50:7

तन्‍न परमप्रभु, परमप्रभु यावेमी आं कली वारच पाइक्‍ती। मोपतीके गो शिशी मताइब मदुम्‍ङ। आं कुल शेरा‍ल फुल्‍लु खोदेंशो सेल्‍ता। गो मुने मदोक्‍नुङ, दे तुइश्‍शो नङ। इजीकीएल ३:८-९

यसैया 54:4

गे महिनो। मारदे हना गे मुने मदोक्‍नेवे। इ थुं लुक्‍च लचा मगेवो। गे शिशी ताइनेवे। गे इ ठिटी बाक्‍ङे ना ङा मुने प्रेंनेवे। इ वोंइश बेक्‍शो ना ङा श्‍येत लेंशा ममिम्‍नेवे। भजन संग्रह २५:७; येरमीया ५१:५

दानीएल 10:21

मिनु गो थमा लोव़ ङा किताबमी मार ब्रेक्‍शो बाक्‍मे, मेको इ कली शोव़थ जाक्‍ती। मेकेर मिकाएल क्‍येङा लाक्‍शा, अरु वारच पाइब सैतान आ गेय पाइब नु लडाइ पचा कली सुइ मबाक्‍नीम। परमप्रभु यावे आ स्‍वर्ग ङा गेय पाइब, मिकाएल चहिं इस्राएली इन कली कोव़ब बाक्‍ब।

जकरिया 10:4

मिनु यहूदा रे सुर ङा फुल्‍लु, ताम्‍बु कीतीक किला, लडाइ पाइब आन लिब्रा नु कप्‍तान नेल्‍ल ग्रूनीम। येरमीया ३०:२१

मत्ती 12:18

यसैयामी मार देंशो बाक्‍त देंशा हना “आं गेय पाइब कली कोव़ङीन। एको कली योव़ता। मिनु एको कली दाक्‍नुङ। एको कली तशा शुश ग्‍येरसीनुङ। आं सोक्‍तीम प्रिंशा, अर्को रागी ङा मुर आन कली दोपा ठीक दुम्‍चा, दे तुइक्‍पपाइक्‍ब। प्रेरित ३:१३,२६; मत्ती ३:१७

मर्कूस 12:10

‘खिं सेल्‍बपुकीमी गारो प्रोव़ङमेनु, एको फुल्‍लु मगार, दे ताइक्‍तमे बाक्‍त। मेको मगारथु ताइश्‍शो फुल्‍लु चहिं सुर ङा सुरे फुल्‍लु दुम्‍माक्‍त’ दे ब्रेक्‍शो लोव़ मपढेनी?

लूका 20:17

मिनु येसुमी आ लोव़ नेंब आन कली मिक्‍च मयाक्‍थु कोव़शा “परमप्रभु यावेमी ब्रेक्‍पाइश्‍शो एको लोव़ रे मार रुम्‍सीबा, लो देनीन ‘खिं सेल्‍बपुकीमी गारो प्रोव़ङमेनु, एको फुल्‍लु मगार’ दे ताइक्‍तमे बाक्‍त। मेको मगारथु ताइश्‍शो फुल्‍लु चहिं सुर ङा सुरे फुल्‍लु दुम्‍माक्‍त। भजन संग्रह ११८:२२

लूका 23:35

मुर शुश मेकेर कोव़ना कोव़न बाक्‍शो बाक्‍मा बाक्‍त। ठेयब मुरपुकीमी “एकोमी शुश मुर आन कली श्‍येत रे प्रोंइना प्रोंइन गाक्‍बाक्‍माक्‍त। परमप्रभु यावे आ योव़शो ख्रीस्‍त बाक्‍त हना, मुल आंमा प्रोंइसेक्‍ल” दे शुक्‍शी पामे बाक्‍त।

यूहन्‍ना 7:38

सु सुमी आं कली थमा सुइक्‍नीमी, मेको आन रां रे ब्रोंइचा गेब ब्‍वाक्‍कु बुक्‍ब, दे परमप्रभु यावे आ लोव़मी ब्रेक्‍शो बाक्‍ब” दे शेंताक्‍मी। यसैया ५८:११; येरमीया ३१:१२

प्रेरित 1:16

मिनु पत्रुस मेको आन दातेमी राप्‍शा, मेको आन कली “आं लोक्‍बपुकी, नेनीने, येसु कली ग्‍याइक्‍ब आन कली लां कोंइब यहूदा आ पर्बम लोव़ का निक्‍शी पाइनुङ। साइ परमप्रभु यावे आ सोक्‍तीमी पिप दाऊद कली मार ब्रेक्‍पाइश्‍शो बाक्‍मे, मेको नेल्‍ल थमा दुम्‍चा माल्‍ब। मिनु मुल थमा दुम्‍त। भजन संग्रह ४१:१०

रोमी 10:11

मिनु परमप्रभु यावे आ लोव़मी “सु सुमी मेको कली थमा सुइक्‍नीमी, मेको मुने मदोक्‍नीम” दे ब्रेक्‍शो बाक्‍ब। यसैया २८:१६

एफिसी 1:4

मोपतीके रागी सेल्‍चा क्‍येङा ङोंइती परमप्रभु यावेमी इं कली योव़तु। मार कली योव़तु देंशा हना, गोपुकी परमप्रभु यावे आ मुर दुम्‍शा, दोस मताइब नु दाक्‍ब दुम्‍यल, दे योव़तु। रोमी ८:२८-३०; एफिसी ५:२७

एफिसी 2:20

मिनु ख्रीस्‍त आ सोइश्‍शो नु साइ ङा परमप्रभु यावे आ लोव़ पाइबपुकी जग खोदेंशो दुम्‍तेक्‍म। गेपुकी चहिं मेको तारी सेल्‍शो खिं खोदेंशो ननी। ख्रीस्‍त येसु मेको खिं ङा ङोंइती वोइश्‍शो जग फुल्‍लु खोदेंशो बाक्‍ब। मत्ती १६:१८; यसैया २८:१६; १पत्रुस २:४-६ मत्ती १६:१८

२ तिमोथी 3:16

परमप्रभु यावेमी मेको लोव़ नेल्‍ल गेशो बाक्‍त। मेको शेंचा कली, हुइक्‍चा कली, रिम्‍शो सेल्‍चा कली नु थमा सुइक्‍तीक ठीक सेल्‍चा कली बाक्‍ब। २पत्रुस १:१९-२१

१ पत्रुस 2:4

येसु ख्रीस्‍त ब्रोंइचा गेब फुल्‍लु बाक्‍ब। मेको आ नेक्‍था लने। मुरपुकीमी मेको कली ममाल्‍शो फुल्‍लु खोदेंशो पा ताइक्‍ताक्‍म। तन्‍न परमप्रभु यावेमी “मेको कली योव़शो नु नेल्‍ल क्‍येङा दाक्‍शो बाक्‍ब” दे मिम्‍ब। भजन संग्रह ११८:२२; यसैया ८:१४-१५; मत्ती २१:४२

१ पत्रुस 2:8

मिनु लेंशा “मेको फुल्‍लुमी मुर आन कली दाइल प‍पाइक्‍ब। मेको ठेयब फुल्‍लुमी मुर आन कली थिप्‍पाइक्‍ब” दे ब्रेक्‍शो बाक्‍ब। मुरपुकीमी परमप्रभु यावे आ लोव़ मटितीके दाइल पांइसीनीम, दे ङोंइती मेको आ पर्बम देंशो बाक्‍ब। भजन संग्रह ११८:२२; यसैया ८:१४; रोमी ९:३३; लूका २:३४

२ पत्रुस 1:20

गेपुकी ङोंइती मार रुप्‍चा माल्‍नीनी देंशा हना, परमप्रभु यावे आ साइ ङा लोव़ पाइब आन ब्रेक्‍शो लोव़ मुर आन मिम्‍शो लोव़ ममाइ,

२ पत्रुस 3:16

मेको आ पर्बम आ चिठी नेल्‍लेमी लोव़ पाइब। पावल आ ब्रेक्‍शो लोव़ का निक्‍शी रुप्‍चा कली श्‍येत बाक्‍ब। मजोक्‍ब नु थमा मसुइक्‍ब मुरपुकीमी मेको दूली शेंनीम। परमप्रभु यावे आ ब्रेक्‍पाइश्‍शो अरु लोव़ यो दूली शेंनीम। मोपा आंमा जाम्‍शा लाइब दुम्‍नीम।