१ यूहन्‍ना 4:5 - Sunuwar Bible

⁵ मेको येसु ख्रीस्‍त आ पर्बम दूली शेंबपुकी रागी ङा मुर बाक्‍नीम। मोपतीके आन शेंतीके परमप्रभु यावे के ममाइ, रागी ङा बाक्‍ब। मिनु रागी ङा मुरपुकी मेको आन शेंशो दाक्‍नीमी। यूहन्‍ना १५:१९

१ यूहन्‍ना 4:5 ပူးပေါင်းရင်းမြစ်များ

भजन संग्रह 17:4

मुर आन पतीके तशा, गो इन लोव़ मिम्‍शा, हुश ख्राक्‍श पोक्‍ब आन लां मखोइक्‍नुङ।

येरमीया 29:8

मुर नेल्‍ल आन परमप्रभु यावे, इस्राएली आन परमप्रभुमी “इन दातेम बाक्‍ब परमप्रभु यावे आ लोव़ पाइबपुकी नु लिंक्‍यु कोव़बपुकीम इन कली जोल पा थमा मसुइक्‍पदमेक्‍ल। आन ङोमु ङा लोव़ मनेनीन। येरमीया १४:१४

येरमीया 5:31

परमप्रभु यावे आ लोव़ पाइबपुकीम जोल पा लोव़ पाइनीम। दोपा परमप्रभु यावे आ लोव़ पाइबपुकीम जोल पा लोव़ पाइनीमी, मोपा चढ़ेबपुकीम मुर आन कली हुकुम पाइनीम। मिनु आं मुरपुकी चहिं मोदेंशोन दुम्‍चा दाक्‍नीम। तन्‍न नोले ङा नाक्‍ती मार, पाइनीनी?” देंत। इजीकीएल १३:६

मीका 2:11

तेकोइ मुरुमी जोल पा दूली लोव़ पशा “गो इ कली अङगुर शांबु तूचा नु रकसी तूचा आ पर्बम लोव़ पाइनुङ” देंत हना, मेको मुर मेको आन कली गारचा ङा लोव़ पाइब बाक्‍ब।

लूका 16:8

मिनु जेर लाइक्‍ब नेल्‍ल आन के नक कागज सेल्‍शा, होव़प कली कोंइदा बाक्‍त। मिनु मेकोमी कोव़शा ‘गे मेको आन कली वारच सेल्‍शा, निप्‍स पाइश्‍शो गेय पा कोंइताक्‍यी’ देंमाक्‍त। रागीमी थमा सुइक्‍ब क्‍येङा थमा मसुइक्‍बपुकीमी निप्‍स पाइश्‍शो गेय पाइनीम। एफिसी ५:८-९

यूहन्‍ना 17:14

गो मेको आन कली इन देंशो लोव़ शेंताक्‍ङमी। मिनु रागी ङा मुरपुकीमी मेको आन कली श्‍येत गेम्‍तेक्‍म। मारदे हना रागी ङा मनम। गो यो रागी ङा मनङ। यूहन्‍ना १५:१९

यूहन्‍ना 17:16

गो रागी ङा मनङ। मिनु आं खोदेंशो पा मेकोपुकी यो रागी ङा मनम।

यूहन्‍ना 3:31

मेको स्‍वर्ग रे जाक्‍ब नेल्‍ल क्‍येङा ठेयब बाक्‍ब। रागी रे दुम्‍शो चहिं रागी ङा मुर बाक्‍ब। रागी ङा मुर आन पर्बम ला तुइश्‍शा लोव़ पाइब। स्‍वर्ग रे जाक्‍शो चहिं नेल्‍ल आन क्‍येङा ठेयब बाक्‍ब। यूहन्‍ना ८:२३

यूहन्‍ना 8:23

मिनु येसुमी मेको आन कली “गेपुकी उइ ङा ननी। गो चहिं इर ङा नङ। गेपुकी रागी ङा ननी। गो चहिं रागी ङा मनङ। यूहन्‍ना ३:३१

२ तिमोथी 4:3

मारदे हना इच्‍का नोले थमा शेंतीक नेंचा काइ मदाक्‍नीम। आंम दला दाक्‍स पा अर्को लोव़ कली नोफा दाइश्‍शा, आंम कली शेंबपुकी तेल्‍‍नीम। १तोमोथी ४:-

प्रकाश 12:9

मिनु मेको ठेयब बुस्‍स आ नें मार बाक्‍त देंशा हना, माइत बुस्‍स, दियाबलस, सैतान बाक्‍त। मिनु मेको रागी रागी नेल्‍ल ङा मुर आन कली पाप पपाइक्‍चा कली रागीमी तोक्‍चा पुंइसीशो बाक्‍त। मिनु मेको आ गेय पाइबपुकी यो रागीमी तोक्‍चा पुंइसीशो बाक्‍तेक्‍म। प्रकाश २०:२; उत्‍पत्ती ३:१; लूका १०:१८