१ इतिहास 21:12 - Sunuwar Bible

¹² ‘गो इ ङोंइती लोव़ सां वोइक्‍नुङ। मेको रे का योव़सो’ देंशो बाक्‍ब। मेको लोव़ सां तेको बाक्‍नीम देंशा हना, ङोंइती ङा बर्स सां सम्‍म अन्‍काल दुम्‍तीके, नोले ङा महिना सां सम्‍म इन जोरी सत्रुमी खेदा पचा पुंइसीतीके, आन तरवारम इन कली ग्रातीके नु नेल्‍ल क्‍येङा नोले ङा परमप्रभु यावेमी आ तरवार रे नाक्‍त सां सम्‍म रागी नेल्‍लेम बेक्‍चा ङा रोइ पपाइश्‍शा मुर साइक्‍तीक। मेको लोव़ सांमी का योव़सो। परमप्रभु यावे आ स्‍वर्ग ङा गेय पाइबमी नाक्‍त सां सम्‍म इस्राएल रागीम शुश मुर आन कली साइक्‍तीक। मेको लोव़ सां बाक्‍तेक्‍म। का योव़सो। गो आं कली सोइक्‍ब कली मार देंचा माल्‍नुङ, देंनीन” देंमाक्‍त।

१ इतिहास 21:12 ပူးပေါင်းရင်းမြစ်များ

२ सामुएल 21:1

पिप दाऊद आ पालाम बर्स सां सम्‍म अन्‍काल दुम्‍स ङा दुम्‍स पवा बाक्‍त। मिनु दाऊदमी परमप्रभु यावे कली हिल्‍लो पवा बाक्‍त। मिनु परमप्रभु यावेमी “सावल नु आ खिं ङा मुर आन तार हुश आ दोस बाक्‍शो बाक्‍ब। मारदे हना मेकोम गिबोनी आन कली साइक्‍तु” देंमाक्‍त।

१ राजा 17:1

मिनु गिलाद ङा तिश्‍बे सहर ङा एलीयाम आहाब कली “परमप्रभु यावे, इस्राएली आन परमप्रभु ब्रोंइशा बाक्‍शो खोदेंशो पा, गो मेको आ ङोंइती राप्‍शा गेय पाइनुङ। इस्राएलम रेउ नु सीत मारेइ मयीब” देंमाक्‍त। १राजा ८:३५; लूका ४:२५; याकूब ५:१७; प्रकाश ११:६

२ राजा 19:35

मिनु मेको नाक्‍दो परमप्रभु यावे आ स्‍वर्ग ङा गेय पाइब का जाक्‍माक्‍त। मिनु मेकोमी अस्‍सुर ङा पिप आ लडाइ पाइब आन बाक्‍तीकेम ओव़शा, लाख का ८५ हजार मुर आन कली साइक्‍मी बाक्‍त। मिनु आ दीसा सुनी मुरपुकी बोक्‍मानु मेकेर बेक्‍शो मुर ला तामे बाक्‍त। यसैया ३७:३६-३८

२ राजा 8:1

तेको मीश मुर आ तौ कली एलीशाम बेक्‍शो रे सेंशो बाक्‍मे, मेको मीश मुर कली एलीशाम “इ खिं ङा मुर नेल्‍ल मेकेर रे गाक्‍कीन। मिनु इच्‍का नाक्‍ती कली ते दुम्‍बा, मेक लशा बाक्‍कीन। मारदे हना परमप्रभु यावेम एको रागीम ७ बर्स सम्‍म अन्‍काल दुम्‍पाइक्‍ब” दे माइश्‍शो बाक्‍माक्‍त। २राजा ४:३५

१ इतिहास 21:11

मिनु गाद दाऊद आ बाक्‍तीके जाक्‍शा, मेकोमी “परमप्रभु यावेमी इन कली लोव़ पाइब। मिनु गे लोव़ का योव़सो।

भजन संग्रह 91:6

छिङछिङम जाक्‍ब मुर साइक्‍ब रोइ नु नाक्‍ती याक्‍सीब रोइ तशा महिंनेवे।

प्रस्‍थान 12:23

परमप्रभु यावे इजीप्‍त ङा मुर साइक्‍चा कली हिरब। परमप्रभु यावेमी लाप्‍चो आ पिया नु थाममी हुश ख्रेक्‍शो तशा, इं खिं हेरशा लाक्‍ब। मिनु साइक्‍ब कली इं खिंम ओव़चा मगेब।

यसैया 66:16

मारदे हना परमप्रभु यावेमी मीमी निसाफ पाइब। मुर नेल्‍ल आन कली आ तरवारम निसाफ पाइब। मिनु परमप्रभु यावेमी मोपा साइश्‍शो शुश दुम्‍‍नीम।

येरमीया 12:12

गोरशो रागी ङा डांडा मेर नेल्‍ल श्‍येत्‍थ पोक्‍बपुकी क्राक्‍थ्री चोक्‍थ्री पा जाक्‍शो बाक्‍नीम। मारदे हना परमप्रभु यावे आ तरवारम रागी आ सुर का रे अर्को सुर सम्‍म क्‍योरब। मिनु सुइ मब्रोंइनीम।

येरमीया 42:16

तेको तरवार रे पा गे हिंशा प्रोक्‍शो बाक्‍नी, मेको तरवारमी इन कली इजीप्‍तमी साइक्‍ब। मिनु तेको अन्‍काल रे पा, गे हिंशो बाक्‍नी, मेको इजीप्‍तमी इन नोनोले जाक्‍ब। मिनु गे मेकेर बेक्‍नीनी।

येरमीया 47:6

“परमप्रभु यावे आ तरवार, गे ग्रीचा गेना नाइक्‍नेवे? इन तरवार खोतम पिप्‍तीन। गे नाइश्‍शा सिक्‍सी पा बाक्‍कीन।

बिलाप 4:9

जचा मतथु शोव़लु पा बेक्‍बपुकी क्‍येङा तरवारमी क्‍योरशा साइक्‍चा पुंइसीबपुकी ग्‍येरसीशो बाक्‍नीम। रू ङा फल मथित्‍थु, मेकोपुकी सोव़शा लाइ‍नीम।

लेवी 26:10

गेपुकीम इन खेक्‍शा वोइश्‍शो माइत अन्‍न जना जन, नक अन्‍न वोइक्‍चा कली माइत अन्‍न तिल्‍चा माल्‍नीनी।

लेवी 26:17

गो इन कली मरिम्‍शो पाइक्‍नुङ। गे इन जोरी सत्रु रे ब्रुइनीनी। इन जोरी सत्रु इन कली हुकुम पाइब दुम्‍नीम। मिनु सुइमी इन कली खेदा मपाम्‍तेक्‍म हना यो, गेपुकी प्रोक्‍नीनी।

लूका 4:25

थमा लोव़ मार बाक्‍त देंशा हना, एलीया आ पालाम इस्राएल रागीम शुश वोंइश बेक्‍शो मीश मुर बाक्‍शो बाक्‍तेक्‍म। मेना बर्स सां ६ महिना सम्‍म रेउ मयिमाक्‍त। मिनु रागी नेल्‍ल ङा मुरपुकीमी जचा मतामे बाक्‍त। १राजा १७:१,९-२४

प्रेरित 12:23

पिप हेरोदमी परमप्रभु यावे कली मान मपथु, आंमान ठेयब सेल्‍सीतीके परमप्रभु यावे आ स्‍वर्ग ङा गेय पाइबमी मेको कली रोइ पपदा बाक्‍त। मिनु मेको हेरोद लुस्‍पु जोल्‍शा बेक्‍माक्‍त। दानीएल ५:२०

ब्‍यवस्‍था 28:15

मिनु गे परमप्रभु यावे, इन परमप्रभु आ देंशो मटीब दुम्‍तीनी हना, मुलाक्‍ती गो इन कली माइश्‍शो आ शेंशो नु आ फुल्‍लुम मुशा ब्रेक्‍शो लोव़ नेल्‍ल होस पा मपाइतीनी हना, एको सराप चीले नेल्‍ल राइनीनी। मिनु गेपुकी सराप रशो मुर दुम्‍नीनी। दानीएल ९:११

ब्‍यवस्‍था 28:22

मिनु परमप्रभु यावेमी इन कली रां सोक्‍तीक रोइ, जोरो, शुश गार मुइक्‍तीके, रेउ मयितीके, नेल्‍ल बाली नाली सोव़‍तीके बुंखी ङाइक्‍तीके रोइ सोइक्‍ब।

ब्‍यवस्‍था 28:25

मिनु परमप्रभु यावेमी इन कली इन जोरी सत्रु आन ङोंइती ब्रुपाइक्‍ब। गेपुकी मेकोपुकी नु लडाइ पथ लां कामी लाइनीनी, मिनु ब्रुशा शाउ शिउ ब्रशा ७ ओटा लां रे प्रोक्‍चा माल्‍नीनी। मिनु राज्‍य राज्‍य ङा मुर नेल्‍ल आन ङोंइती ग्रांग्रा दिशो दुम्‍नीनी।

ब्‍यवस्‍था 28:27

मिनु परमप्रभु यावेमी इन कली इजीप्‍त रागी ङा कान मुपाइक्‍ब, साने मचाप्‍चा ङा पा गार नु लुतो पपाइक्‍ब। प्रस्‍थान ९:९

ब्‍यवस्‍था 28:35

मिनु परमप्रभु यावेमी इन पोक्‍च नु खोइलीम गेनायो मसाब गार मुपाइक्‍ब। मिनु मोदेंशो गारम इन पिया रे दिम्‍ला सम्‍म रां नेल्‍ल सुम्‍पाइक्‍ब। मिनु सुइम इन कली सापाइक्‍ने मचाप्‍ब।