JEREMIYA 50:17 - BAIBEL (BSI)

¹⁷ AMPEU no pi, “Israil lo akemiye bheriqo abongushuno hakuqoqhi eno halevekeu toi keqoke. Atughushi, panonguye Asiriya kukauno leighike eno tipashelo Babilon kukau Nebukadnezar no panoqo saghi tsachhevetsuke.

Sumi Naga CL (Re-edited) Bible (BSI)

¹⁷ “Israel ye abongshuu no haleve keu mbe toivae. Atüghüshi Assyria kükau no Israel kütsave, eno itehi Babylon kükau Nebuchadnezzar no panoqo saghi tsachheve tsüae.

JEREMIYA 50:17 ပူးပေါင်းရင်းမြစ်များ

KUKAMI AKINIU 15:19

Tiglat Pilaser Siriyami kukau no Israil le iloghi ke ghulokilo pa saphu pa kukaqha shikumtotsu apenike ghenguno Menahem no tsandiyi kilogram 34,000 pa tsuve.

KUKAMI AKINIU 15:29

Peka no ka ake ghuloki lono Asiriya lo akukau Tiglat Pilaser no aphughi hipaqo leluvetsu, tiye Ijon, Abel Beth Maaka, Janoa, Kedes, Hazor, Gilead, Galil eno Naftali ghakhulo akeqo ghi leluvetsu puzu timiqo kugha sasu Asiriya lo akughushi sawuve.

KUKAMI AKINIU 24:1

Jehoiakim no akukau shi akelono Babilon lo akukau Nebukadnezar no Juda le ighi eno ampe kuthu kutolo Jehoiakim ye pa yehza qholo ngokepu shive; tipathiu pa ghi mujochilethu.

KUKAMI AKINIU 24:10

Pano ka ake lono akukau Nebukadnezar kijemino Babilonmi ghushimi sasu ighino Jerusalem le thuve eno ti homxa khasuluve.

KUKAMI AKINIU 25:1

Zedekia no Babilon kukau Nebukadnezar sasu kumjothuve, ikeuloye Nebukadnezar no pawu ghushimi kumtsu sasu ighino Zedekia no kakeu ampe atokuulo aqhi chighi eno atsala achighiu shi akelono Jerusalem le thuve. Panonguno aphughi khalacheu homxa aghazu mlaluve eno ti homxa lenikeu akupuwu mlathuve,

YEKIKITHI AKINIU 28:20

Asiriya kukatou no Ahaz kuphunike zuqhulo pa mujochileuve eno pa punaqhive.

YEKIKITHI AKINIU 33:11

Tighenguno AMPEU no Asiriyami ghushimi shou ampimi pelo Juda le ighipe. Panonguno Manase kughaluve, ayi kughuhono pa fuluve, ayi kichhe pe tshuluve eno Babilon lo pa sawuve.

ISAIAH 15:9

Dibon taun lo aghokiye ajihno huchuyi ake, eno timi tile akeqo ghenguno Alhou ye tinguno alhoksapu kutau kutopuake. Iye, Muab lo ghupe puaghikeqo kumtsu aji pele ghiqhikhave nani.

ISAIAH 47:6

Niye iwu timiqo shou imlo ideke; panoqoye iwu kumo toi ino peitha veke; Ino panoqo pesu okukalo suve tsuke, eno noye panoqo kimiyeqhiyi keu piyemoke; kitemi ghi nono mughachhoi peithake.

JEREMIYA 10:25

Omllamokeu shiayehqo shou ologhu ide eno opevekemiqo shou tipau pukulo. Panonguno owu timiqo pithivetsu; panonguno qhoyi ningu kutsa leveke eno niyeghi ixapinyi qhivetsuke.

JEREMIYA 2:15

Panonguno abongushu toi pa shou ighapuku, panonguno pa yeghi pesu asayeqha shivetsu, pa phughiqoye ixapiniyi ani eno qhoyi qhivae.

JEREMIYA 21:7

Ikemu no ngo owu kijemiqo eno timi khunoqono aghukishi, puqumiyekeu eno kusukini lono puxupe aghini keno nongu kumtsu ino akukau Nebukadnezar ngo pawu timi noghumiqo pelo kughalukhavepe nani, nongu kuxuluve tsuniye phuchekemi ulo suvetsu nani. Pano nongu pithi khave nani. Pano nongu lakhimu ghumo nani momu nongu kimiyeqhiyikeu piyemo nani. Ni, AMPEU no piqhiveake.”

JEREMIYA 4:7

Abongushuno pa kughutshua lono cheke toi, ashiayeh kukutsau lakhi chevae. Paye Juda kutsanike cheni. Juda lo aphughiqoye ixapiniyi qhive nani eno tipaqolo khumu kughuna move nani.

JEREMIYA 49:19

Abongushu lakhino Jordan vekudalo aghasa lono achu kumzapu atsuni akeu yeghilo ipeghikeu toi ino ighi nani eno Edommi pelo zuleno pano yeghi lono kohapovepe nani. Tipathiuno ino kishelukeu sakipheu pelo tipa shiayeh shou ayehpe pe nani. Isasu kimighilu kepu khuu ani kya? Khuno ighumono ikhu lunani kya? Ayehkipemi kiutoi keuno imujolu nani kya?

JEREMIYA 5:17

Panonguno nowu axa ipeghikeu eno nochuqupu tsakhavetsu nani; no tianuli kiptimi totimi jeli ghiqhivetsu nani. Panonguno nomishi loji eno bheri loji ghiqhile nani eno no-tsayibo ngo khughuthibo shipusave tsu nani. Nophughiqo aliwo putupuakeu nongu no pukhu achekeu hu panowu ghushimi lojino kutsaleve nani.

JEREMIYA 5:6

Tighenguno aghasa lono abongushu qono panoqo tsuve nani. Asayeqhalo tungtughano panoqo sutha piniyive nani, eno angushuno pano phughilo miqe auve nani. Timi hupaqono khalau ipeghiaye panonguye kishitha pinyive nani, kughengu panoqo xineye kumzapuke eno panonguno tamono Alhou launo tsughu chilewuveke.

JEREMIYA 50:6

“Iwu timiqoye bheriqo toi akhemiqono panoqo pelo naghutolo puhapighiyive peke. Panonguno bheriqo toi naghuto lakhi lono lakhiulo itsusu wuveke eno panonguye panoqo ki khile ani keno kumsumavae.

JEREMIYA 51:38

Babilon mi kumtsu abongushu toi igha eno abongushu tiqo toi huhushi ighake.

JEREMIYA 52:1

Kughou Zedekiya no Juda lo akukau shilu keno pa punu mpeye muku qhaqhi shiake, eno pano Jerusalem lo ampe chighi qhaqhi ayehpeke. Paza jeye Hamutal, liye Libna phughilo Jeremiya kutami achekeu nongake.

EZEKEL 34:12

Bherikheuno paw bheri hami hapiye pighivekeqo phujuwu puzu saghi kithe keshi ino iw bheriqo phuwu nani. Ti akuzu eno kutsapinyive keu tsalalo a-a khipaqolo panoqo hapiye pighive keno tilauno ino panoqo sachile saghi nani.

DANIEL 6:24

Tileno akukauno timi khunoqono Danel shou athe shino pa kipimi shi sughi tsukeno panongu kugha lepi ahza tsuve eno panongu gholo anipu anuliqo kumtsu kughape abongushu kilo vesuve. Panongu kughape vesukelo abo tomono kunguu chephi lono abongushu qono muxape panonguqo ghi kubutha pinivetsu.

JOYIL 3:2

Ino ashiayeh hekutsu puzu Jehoshafat Khilalo panoqo saghi nani. Tilehino panonguno iwu timiqo shou shipepuakeu jeli kumtsu ghe- ghuno ino panoqo shou kughathabe nani. Panonguno inaghami yeghilo Israilmi apanagha haleveke, eno iyeghi, Israil kijethavetsuke.

1 Peter 2:25

Nonguye bheri ala puhavekeqo toike, ikemu itehiye nongu ngulho Kheu eno nongu Pighiu papelu penike nongu sachile saghivae.