JEREMIYA 42:18 - BAIBEL (BSI)

¹⁸ “AMPEU, Israil Lhou no pianike, ‘Nonguno Ijip lo wuve aye Jerusalem lo akemiqo shou imlo kighide ngo iloghu lepukuke paphishi nongu shou ghi lepuku nani. Nonguye junike akuighupu shive nani; timino thaighakeu shi nongu peitha nani eno nongu je pesu musuini keulo peitha nani. Nonguye khilemu a-a hipau ithulu kithemove nani.’ ”

Sumi Naga CL (Re-edited) Bible (BSI)

¹⁸ “Kughengu aqokitikhi MPEU, Israel Lhou no ishi piani: I no Jerusalem lo küami shou I loghu puku ketoi nongu Egypt lo wuve kemi shou ghi puku nani. Nongu ye ghukushopu, aküighüpu, thoküghapu shive no a-a hipau khilemu ithumlave nani.

JEREMIYA 42:18 ပူးပေါင်းရင်းမြစ်များ

YEKIKITHI AKINIU 34:25

Panonguno ipeveke eno kutau lhouqo lau aghakishi pesu tsuke eno panonguno mlave keu huno iloghu xukuthove tsuke. Iloghu ye Jerusalem shou xukutho pukuvae eno tiye iquilomo nanike.

ISAIAH 30:3

Ikemu akukauye panoqo kuphukulupu kuka have nani eno Ijip no susho chekeuye kutsakungo keu lono kishekha nani.

ISAIAH 65:15

Ino kisheluvekemi timiqono nongu je peitha puzu musuini nani. Ni AMPEU Alhou no nongu pithive nani. Ikemu khunoqono igholu keno tipaqo lau ino aje kithe lakhi tsu nani.

JEREMIYA 18:16

Panonguno hipau yeghi pesu jukichi kepu eno pulhapujulo jukimthipu shive tsuake. Tipau veche wuchekemi kumtsuno jukichipe kutuxoxoke. Panonguno akumzaqhiyi kelauno akutsu kunguke.

JEREMIYA 22:27

Noye aghakhu hipau ithulu kithenishi kutu nani ikemu noye khilemu ideghimo nani.”

JEREMIYA 23:40

Ino panoqo shou alhokupujulo kujochekepu eno kuthakughapu khilemu kumsumave mlakepu sughi nanike.”

JEREMIYA 24:9

Ino kutsakungo keu lakhi pakutakeu panoqo shou sughikeulo ayeghiqhalo ashiayeh kutami kumtsuno thughuive nani. Timiqono panoqo thaigha nani eno panoqo pesu azukutunupu lakhi shinani, panoqo thakepu shi nani, eno ino panoqo halepuwu vekeqha kumtsulo panoqo je pesu musuinikeu lakhi shi peitha nani.

JEREMIYA 25:9

‘Niye timiqo ghenguno ashiayeh ahuu akeqo kupuwuni cheni eno Babilon lo akukau iqeu Nebukadnezar kupuwuni cheni. Ino panoqo pelo Juda ngo tile akemiqo eno tipau cheaxulo ashiayeh akeqo sasu aghushi penike ino panoqo sasu ighini cheni. Niye ashiayeh hipau eno hipau cheaxulo akemiqo kutsanike ighini cheni eno panoqoye alhokupujulo hexapinyi qhive nani, akumsapu eno jukichi kepu shipe nani. Ni, AMPEU no piqhive anike.

JEREMIYA 26:6

Nonguno hebide auve aye ino Shilo lau kiu shikeno Achineki hipau shou shipuku nanike, ayeghiqhalo ashiayeh kumtsuno hipau phughi pesu musuinikeu lakhi shi-ghi peitha nanike.”

JEREMIYA 29:18

Ino aghukishi, akhuava eno kusukini pesu panoqo hakuqoni cheni, ayeghiqhalo ashiayeh akeqo kumtsuno tipau ithulukelo kichimamave nani. Khipaqhalo ino panoqo halepuwuni keno, panoqo shou kiu shivekeno tipaulo timiqono jukichive eno musave nani. Timino panoqo thaigha nani eno panongu je pesu musuini keu lakhi shi peitha nani.

JEREMIYA 29:22

Kughono timi khunoqo Jerusalem lono Babilon lo akughumi shi sawuve keqono kutami shou musuini pukunishi nikeno, panonguno ishi pinani, ‘Zedekiya ngo Ahab pama Babilon kukauno akuxu ghiqhi pithive keshi AMPEU no okutotsu peni!’

JEREMIYA 33:5

Tipau shiayeh ino iloghu kighide lono khuno hekuluqhini cheni keno tipaqo kithi kumono aphughi chitoi keu likhi shiniake.

JEREMIYA 44:12

Ike Juda lo timi khijehi ghupe puanikeno eno panonguno Ijip lo wu puzu tilau auvenikeu shi pulo akhani keno, panoqo kumtsu kutsalekha kemo kela ino tsaqui jutsu nani. Panoqo kumtsu kijemi na kitilami namu aghukishilo momu akhuava lono Ijip lono thikhave nanike. Panongu junike kumsa kimshipu shi nani; timino panongu phimo ghi peitha nani eno panongu jeku ghi musuini keu shinani.

JEREMIYA 44:22

Ishi tsalalo ghi noyeghiye ixapinyi ani eno khuu nomu tipaulo achemoke. Tiye timino juighukeu-a shi ani eno timino musuini keulo tipau je peitha anike, kughengu AMPEU ye nongu kixikila lhoksa pepimhe ache keu xapuqhe khamlaveke.

JEREMIYA 44:6

Tighenguno ino imlo kighide ngo iloghu pesu Juda lo taunqo shou eno Jerusalem laghilalo lepukuke eno ino tipaqo shou ami suvetsuke. Tipaqoye ixapinyi qhiveke eno jukumsapu shivetsu, ishi kutolo tishi anike.

JEREMIYA 44:8

Nonguye kushiye hilau Ijip lo acheuveniye ighivekeu-alo kutau lhouqo lau lhoxu heqhi mlla ani eno asu-atu julho mlla puzu imlo shikighide ani kya? Nonguno nolikhi nongu kutsaleveniye hipau shi ani kesha? Tishianguno ayeghilo ashiayeh kumtsu nongu phimo ghi peitha eno musuinikeulo nongu je peithapeni kesha?

JEREMIYA 6:11

AMPEU, panoqo shou ologhu akeu huye ilolo ghi pitipuzaqhi ani eno niye tipau suchile pesu ngo nikeu ngosumlavae.” Tileno AMPEU no ivilo pi, “Iloghu pesu alaghilalo ititunu akeqo shou eno lhothemi kumqo akeqo shou lepukulo. Akimiqo eno anipunoqoye kughasawuve nani eno kutamiqo ghi phemo nani.

JEREMIYA 7:20

Tighenguno ni, AMPEU Alhou no iloghu kighide Achineki hipau shou lepuku nani. Timi shou ngo lhoxuqo shou aphiphi shi ino tipau lepuku nani, eno asubo ngo axabo shou ghi lepuku nani. Iloghuye, timi khunomu pinhemla keu mi toi nani.

AKUMLO 2:4

Aghumi toi pa piji pesu ni mijike; Pano ami toi axukighide lepheno achinekilo Zion limi nino jupe amloqi chekeqo pithi khavetsue.

AKUMLO 2:6

Ninguno pa mlla chekeu Achine ki pano mukhu munoshi hepholevetsu; Akimtheshi ikhilu chekeu tsalaqo ngo Sabat pinyeqo kumtsu pano lakhavetsu. Kukami ghi achinemi ghi aphiphi lono pa mlo kighide gha sholuke.

AKUMLO 4:11

AMPEU no pa loghu kighide kumtsu pephe eno pa mlo kighide tuleke; Pano Zion lo ami lakhi kuyiquno tipau boqha pitipuhave.

EZEKEL 20:34

Ino ikuka eno iloghu kighide nongu piye nani, tiye aghakhu khilehi nongu kuthole puwuve keno tilauno ino nongu xukumqono nongu sachile saghi keu lono piye nani.

EZEKEL 22:22

Tsandiyi kipitibolo piti pekumulave ketoi panonguye Jerusalem lo pitiqhi nani eno tileno panonguye AMPEU loghu kighide dilu ani kepi ithi nani.”

DANIEL 9:11

Israilmi kumtsu oyezah hephoveno nono kiu pikeno inimono tuchileve tsuke. Nino ozulo kuquvae, tighenguno oqeu Muse vechewo sughikeu yezah kiqi lono angsu nishou ighi ani.

DANIEL 9:27

Akukau tipauno ampe tsuni ghenguno timi kutomo sasu visho mlaveno, ado tuxa wove kemtsa, heqhino mllachekeu eno akumllagho tsu chekeu lakhave tsu nani. Akumsapu lakhi shipe achineki mtalo qhi nani eno timi khuuno qhikeno, Alhou no pa kuxu do ashekhashi kutope qhipua tsukeu sasu kushomoke kutolo tile qhi puache nani.

HOSIYA 7:16

Panonguye ilauno tsughususu akuka kumto kuhakeu lhou lau wuve acheni. Panonguye asuzu kughuho lhoksa toi pukhubemlake. Panongu sakiphemiqono aqhekuza tsa kipi ghenguno panonguye ghuyi kithi sholu nani eno Ijipmino junuqhi nani.”

NAHUM 1:6

Kughou pano axu ideni keno khuno xukulupu kya? khuno pa loghu pukulupu kya? Pano pa loghu amikuyiqu toi leqhike; pa zulo atuquye ipopinyi amkhu shiveke.

ZEKHARIA 8:13

Juda ngo Israil lo akemiqo! Wovekeu tsalalo inaghamino lakhino lakhi ghusho keulo, ‘Juda ngo Israil kuma shou kutsakungo keu ikughikeu tho oshou ikughi peniu!’ ipi picheke. Ikemu ino nongu xalu nani eno tileno inaghami hupaqoye lakhino lakhi vilo, ‘Juda ngo Israil kuma shou kukumgha ighike tho opelo ithulu peniu!’ ipi pinani. Tighenguno amlo kumtoshilo eno msa ichi kevilo.”

AKIKIHI 5:27

Lino salha puaghi aye azuno minhe keuno kukhu kixi shinani; li kive ingu ipeghive nani eno li philo lhoxu lhoa sukutsuve nani. Li je li timiqo gholo musuinikeu asusho kupu lakhi shive nani.

Piyeküsü 14:10

timi tipauye Alhou loghu ji lekitemokeu pa jukhulo lesuno shope nani. Timi tipauye kungumi akimthemi zulono eno Bheriti zulono ami ngo amichu pesu pitipuzaqhi nani.