lPilipai 4:7 - E Nut Ka Meer Mang Ka Mokpom To A Gunngar

⁷ Mguak kaeharom tok, va En ner le kaen a vrek longeik ngang nguk. Va a vrek longeik to endo ner kle he ktoot mang mularo ngaongtok mar kam lua kervavle va ktoot mang mularo papat kat, mar kam lo vua horotgi mang a tomhel tang kat e. Ii, E Nut ner kaen a vrek longeik ngang nguk tok, ko mut kor mnam muk mang e Yesus To E Nut Thim Orom Ka Msasaen he kmokpom kar. Vanangko mor, ngom sia ngangam kim mor kngongae pum a vrek longeik to endo kat te, nma pis kim mor nngia.

lPilipai 4:7 ပူးပေါင်းရင်းမြစ်များ

E Luk 1:79

Ii, en ner kaol he kpis enang tok, kam valler o mia ruk ngma vle kun mnam a slommok ko ngma vle enang o mia ruk ngat yor he. Va a mmok to endo nera ktong ngor, mor kmikkiem a ngaelaut to kam smia kol a vrek longeik kar E Nut.”

E Luk 2:14

“Ngruak guya pum E Nut to man ma volkha ka munik ko ta re kmel a vrek longeik kun pgegom o mia ruk ta higiang ngar kar En mruo.”

E Yoanes 14:27

Yu! Kua re kam ngae kparem muk he, vanang ko ktar kaen a vrek longeik ngang nguk na. Va a vrek longeik to ko kaen ngang nguk tete, tottek ekam dok mruo, he lua vle enang endo o mia ngam kaen ngang nglenar e. He ekam tok, mularo vurkul ngak or kam vua lo kurkur mang anito anito e, he kervavle.

E Yoanes 16:33

Ko her havaeng nguk tok, he nang muk kam kol a vrek longeik vgum dok, ko muma par mnam ke ho to dok. Mguer sia kervavle vgum o mia ruk mo mmie, vanangko mgua serppak na, ekam ko ko her kir kim o vrong serppak tgus ruk mo mmie he.”

lRom 1:7

Ko kaittiegom kua hor ta ngang nguk ruk lRom tgus, muk ruk E Nut tkaelongtok mang nguk he kvaeng nguk kam vle ngang En mruo. Ii, kua ngarkie ngang Ngor Teit E Nut kar Ngoldaip e Yesus Kristus min kam ring ya mang nguk, va min kmeharom mularo vurkul kmongeik kat.

lRom 14:17

Ii, mguak or kam kering ngar tok, ekam ko mor ruk E Nut ka tavgo ta vle kuo mang ngor ngom lo sir kuon malpgem a ngaemik va a ngaivie e. Vanangko, ngruak kle va ksir kuon malpgem o keknen ruk ngat ho mi kut sir hak ko pum E Nut kalo keik va o keknen ruk kmeharom o mia ngaro vurkul kmongeik va a keknen to kam sirei vgum E Nunu A Totur.

lRom 15:13

Ta vle ngang o vrong rhek tok, ko her E Nut arhe, endo o mia tgus ngaka nho mkor kam susulgim mar tok. He koma ngarkie ngang En kat, En kmensireim muk he kaeharom mularo vurkul kmongeik ko mum kor mnam muk mang e Yesus he kmokpom kar kngae kngae. Kua ngarkie ngang E Nut tok, he nang muk kam le ka nho lserppak mkor En orom a serppak to mkor E Nunu A Totur, En kam meng e Yesus kam kat kaeknik ngte.

lRom 5:1

He ekam ko E Nut timim kim o rhek mang nguaro kerkeknen enang tok, ko ngot kor mnam mor mang e Yesus he kmokpom kar, va ta khenam tete te, E Nut teharom nguaro vurkul kmongeik mang En mruo her vgum Ngoldaip to e Yesus Kristus tok kat arhe.

lRom 8:6

Ii, endruk E Nunu A Totur nam kut kaenkrovgem mar kmikkiem ka svil, E Nunu A Totur nam kaen a vrek longeik ngang ngar he kael mar kam kol a ktalhok to kam plong vle ko kim E Nut ngnik ngnik. Vanang endruk ngam mrua ngam mar mruo ekam ngaro pkor ngaro svil ruk ngam kaenen mar kmeharom o kerkeknen, her mar ruk arhe E Nut nera monik kim a yor ngang ngar.

2Korin 10:5

Ii, koma karkar mang ngar kir kim ngaro rhek va ngaro papat tgus ruk la ppiagar, endruk o mia ngama hover mar kam tokim E Nut karo papat ruk o minar kim o mia. Koma kir kim mar tok, to kle ka ktong o mia ngaro papat tgus kmeknik ormar ngok kim Endo E Nut Thim Orom Ka Msasaen, mar kam kat kael ngaro kerok mang en kat kam kta ngan vgum.

2Korin 13:11

Yu! To kam rum kua hor ta, kua svil kmen kua mamrung ngang nguk ruk koornopeik ruk mut kor mnam muk mang e Yesus he kmokpom kar kam havaeng nguk te, mgua kael mula treil te, muk kam kaum ka vle orom a pat atgiang to mang e Kristus, kam smia mokpom kar en tok kam sim kut kolkol ekam. Va mgua sim kut kaikkiem kuaro rhek ri ko her kaurur kim muk orom mar. Va mguak kaum mang a pat atgiang mang kam totu pum E Nut kat. Va mgua sim ktua nho mang nguk mruo kmeharom mularo vurkul kmongeik mo nguk. He enangthe mguak kaeharom tok, va E Nut to nam kaelongtok mang o mia va kael a vrek longeik ngang ngar, En ner mrua khenam En mruo tok kat arhe ngang nguk mekam mekam.

lGalesia 5:22

Ii, o mia ngaro pkor ngaro keknen ngma vle tok arhe, vanangko E Nunu A Totur karo keknen ngam kle ktua vle ge ko En nam kle ktua khenam karo keknen ma mmok orom karo keknen ruk endri te: kmelongtok mang o mia, kam sirei, kam vle orom a vrek longeik, kam lo marer kmesik, kam vle lya ko kim o mia, kam ya mang o mia, kam vle ko kim o mia orom o keknen ruk o minar,

lEpeses 3:19

Koma ngarkie tok kat, he nang mularo papat kam sim kut kais kat kam kol ka keknen to kmelongtok mang o mia tok, endo ngot lo kais hak kam mnor mang orom nguaro gi papat ko ngta tu mang ka keknen to endo. Ii, koma ngarkie mang nguk tok, En kam mi kut kaeharom muk, he nang muk kam sim ktua kolkol ekam ka keknen to kmelongtok mang o mia tok, kmikkiem gi enang ko E Nut nam ho mi ktua papuntom a keknen to endo kmelongtok mang o mia tok kat.

lPilipai 1:1

Vae, dok e Pol kre Timoti mota kaum ka vle moti. Muo e Yesus To E Nut Thim Orom Ka Msasaen klo kaloyie ruk mom kaeha ngang. Muk ruk E Nut karo mia mruo ko mPilipai, muk ruk mut kor mnam muk mang e Yesus te, en her Endo E Nut Thim Orom Ka Msasaen he kmokpom kar, ko kaittiegom kua hor ta ngang nguk kar mulmialaol ruk ngama nho mang nguk va endruk ngma turang ngar orom ngaro reha ngang nguk kat.

lPilipai 1:2

Ii, kua ngarkie ngang Ngor Teit E Nut va Ngoldaip e Yesus Kristus, min kam ring ya mang nguk va min kmeharom mularo vurkul kmongeik kat.

lPilipai 4:19

Ii, he gi enang tok, enangthe mutaro tgoluk mruo ngapa tu kim muk enang tok kat, va E Nut to koma totu pum ner kle kael psing nguk orom karo ni tgoluk tgus ruk ngta tu kim muk vat. Ii, nera nngiar ngang nguk orom karo nngiar ruk En mruo nma vle kia vul orom mar, endruk ngta vle enang karo vu gol ruk ngat vua mmok hak ko En nera nngiar ngang nguk ormar tok, ekam ko mut kor mnam muk mang e Yesus To E Nut Thim Orom Ka Msasaen he kmokpom kar.

lPilipai 4:21

Dok kar koornopeik ri mo kmok, endruk ngat kor mnam mar mang e Yesus To E Nut Thim Orom Ka Msasaen he kmokpom kar, ngota svil muk kmen ngua mamrung ngang endruk tgus mnam muk ruk ngat kor mnam mar mang e Yesus he ka vle te, E Nut karo mia mruo tok.

lPilipai 4:9

Mu sim pat mang dok na. Ko ko her patter muk tiok he, mang o papat va o keknen ruk mkor E Nut. He mut her nganik vgum dok he klol ekam ko mut vokong dok ko kom kaeharom mar ngang nguk kat. He ekam tok, mguak kolkol ekam dok he sim kut kaikkiem o keknen ruk endruk kmeharom mar tok kat. Ii, mgua kaikkiem mar tok, va E Nut to nam kaen a vrek longeik ngang o mia, nera vle kar muk.

lKolosi 3:15

Va mularo vurkul ngak kaisis mo kmuk vgum Endo E Nut Thim Orom Ka Msasaen, ko her e Kristus arhe nam kaen a vrek longeik ngang o mia. Mguaka vle tok, ekam ko E Nut tvaeng nguk kam kaum ka vle orom a vrek atgiang gi enang tok arhe ekam ko langto langto mnam muk ta vle te, e Yesus ka ngaomevek to atgiang ket mhe langto langto orom muk. Ii, va mguaka vle tok he kanprim E Nut mang o vrong tgoluk tgus kat.

2Tesalonika 3:16

Yu! Va tete kua ngarkie ngang Ngoldaip to nam kaeharom o mia ngaro vurkul kmongeik mang nguk te, En mruo kmeharom mularo vurkul kmongeik mekam mekam kun pgegom o vrong tgoluk tgus ruk ngama kirpagis kim muk. Va koma ngarkie ngang En kat te, En kam vle ko kim muk mekam mekam kat.

lHibru 13:20

E Nut to nam kaen a vrek longeik ngang o mia, ther hover Ngoldaip e Yesus petgim ka nnak he, kmikkiem karo papat ruk mang ka mokpom to a gunngar, endo tel orom e Yesus ka gidiel kam plong vle ngnik ngnik. Ii, va her E Nut to arhe kua ngarkie ngang mang nguk te, en kmeharom mularo keknen tgus kam ya, mar kmis mang o vrong reha ruk En mruo ta svil muk kmeharom mar. Va kua ngarkie ngang En kat mang ngor tgus kat te, En kmeha kun mnam mor tgus kmikkiem ka svil mruo, he nang En kam higiang karo reha ruk endruk kun mnam mor tok. Ii, kua ngarkie ngang En tok vgum e Yesus Kristus, endo nma vle enang A Toot Kmo Sipsip to nam smia mnor kam nho mang karo sipsip. Ii, her e Yesus ka munik arhe ta laut kir kim o mia tgus. He ekam tok, ngruak hover ka munik kngorom kngorom gi. Lmien.

E Yut 1:1

Vae, dok e Yut to e Yems knopia, e Yesus Kristus kalkayie to kom kaeha ngang. Ko kaittiegom kua hor ta ngang nguk ruk Ngor Teit E Nut nam kaelongtok mang nguk he kvaeng nguk tesgun kam kol a ktalhok to kam plong vle ko kim En ngnik ngnik. Ii, her muk ruk E Nut nma toot mang nguk arhe kam ngae kais ko e Yesus Kristus na kat kaeknik kam mi kut kaen a ktalhok to endo ngang nguk.

O Ngaelmir 1:4

Dok e Yoanes. Ko kaittiegom kua hor ta ngang nguk tgus ruk e Yesus kakro ngaomevek ruk aktiek hori orom alomin ko mnam a mhe to e Esia. Ko kaittiek ngang nguk te: E Nut, En a plong vleir tennik, tete va ngnik gi enang tok ge. Va E Nunu A Totur to nam kaeha ko kim E Nut to kuon mang ka ngorsang, en ka tavgo nma vle kuo mang e Yesus kakro ngaomevek ruk endruk ko mar aktiek hori orom alomin. Va e Yesus, en her Endo E Nut Thim Orom Ka Msasaen arhe. Va en aktarang kam hop petgim ka nnak mnam endruk tgus ruk ngara hop petgim ngaro nnak kat. Va karo rhek ri ta rere lmien ormar ko tpolgerik ngang dok tok, ngaro kleim kat, mor kam kpom mar te, nop, mar o mi rhek ruk o minar kat. Ii, va e Yesus, en a taven to ka tavgo ta vle kuo mang o taven tgus ruk ngma vle mo mmie. He ekam tok, kua ngarkie ngang ngar ruk korlotge tgus, mar kam ring ya mang nguk va mar kmeharom mularo vurkul kmongeik kat. Mor ruk o mia ngruak kanprim yindo e Yesus mang ila mmok va ila serppak mekam mekam. Ko her yindo arhe im kaelongtok mang ngor he khong ngor pum nguaro kerkeknen pet mar petgim mor orom ila gidiel ko ta ksuk mang ngor. Ii, ye eharom mor tok, he enang tok, E Nut tlo kat kais kam kta mon mor ormar kat e. Ii, va ye her eharom mor kam vle te, ilaro ngaomevek mruo ruk ngota vle ku meorom E Nut ka tavgo. Va yeharom mor tgus kat kam vle kat te, E Nut karo pris ruk mor, he nang mor kam totu pum E Nut to yin mruo ima totu pum En kat. lmien!

O Ngaelmir 2:17

Muk ruk mut her lol E Nunu A Totur karo rhek ri ta rere ngang E Nut kakro ngaomevek ormar, mgua sim kael rela ekam karo rhek ri kam sim kut kaikkiem mar. He o mia ruk ngat matnge vgum o vnek kir kim mar he kor mnam mar mang E Nut kam kmokpom kar ge, her o mia ruk arhe ngor mur kaen dok mruo to a bret to a mana, endo koma tuvgom kim o mia ngaro kerok, ngang langto langto mnam mar. Va ngor mur kaen a kre to ta kas ngang langto langto mnam mar kat. Va kuon mang a kre langto langto ngora kaittiegom langto langto ka munik to a gunngar, endo langto langto nak kol. Vanang gi endo tuk to tkol ka kre to endo, en tuk nera mnor mang ka munik to a gunngar to endo.”