lHibru 12:1 - E Nut Ka Meer Mang Ka Mokpom To A Gunngar

¹ He ekam ko a murgun to orom o mia ngarlavurgem ruk endruk ko her monik moti ngta kaum ka vle kuon ma volkha kmarim mor ruk ngot kor mnam mor mang e Yesus he kmokpom kar tete, va ngruaka vle enang a mhel to nma sap ekam a ngaelaut to o mia ngat mi kut el ngang kam mopet kar klenar kam mo kir kmar. Ii, ngruaka vle enang a mhel enang tok, ekam ko en naka hong karo it ruk ngma kurogos mang he nam lo smia sasap vgum mar tok. Ii, ngruaka vle tok mekam mekam, he khong nguaro vrong kerkeknen tgus ruk ngma kurogos mang ngor kam hagam mor kmor mnam mor mang E Nut he smia mokpom kar tok kat. Va ngruak kle va kmatnge vgum o vnek he kor mnam mor mang E Nut he kmokpom kar ge, gi enang ngar tok kat ko E Nut ta ktar mi kut el mor, he mor kmor mnam mor mang En he kmokpom kar tok kat kngae kngae gi.

lHibru 12:1 ပူးပေါင်းရင်းမြစ်များ

E Matyu 10:22

He enang tok, o mia kavurgem ngar kaelat muk ekam dok, vanangko erieto mnam muk napa matnge vgum o vnek ruk endruk he kle kor mnam en mang dok ge, kam ngae kais ma kolkha to a kser kim, her en arhe E Nut nera sulgim kmen a ktalhok to kam plong vle ko kim E Nut ngnik ngnik ngang.

E Matyu 24:13

Vanang endruk ngat kle kmatnge vgum o vnek ruk endruk kam kle kor mnam mar mang dok ge kngae kais mnam a kolkha to a kser kim msim, va E Nut nera sulgim mar he kaen a ktalhok to kam plong vle ko kim En ngnik ngnik ngang ngar.

E Mak 10:50

To e Bartimeas thera hop klik kngam ka yet to kuon mail petgim he kngae ngok kim e Yesus.

E Luk 12:15

To ta hoger karo rhek kam reng ngar te, “Mgua le va sim kut mur kaelel kuo mang nguk he sim ktua toot mang nguk mruo, muk kam lua knun mang o gi vrong tgoluk. Ko a mhel tlo kais kam kol a ktalhok to kam plong vle ko kim E Nut ngnik ngnik vgum karo vu tgoluk e.”

E Luk 16:28

ko kim koornopeik ruk aktiek, en kmengorang ngar kam lo kaikkiem kuaro keknen e, he nang mar kam lua kol a nganngannes to alaut to enda ta kokol dok mo e.’

E Luk 21:34

He ekam tok, mguak ngangreal ngang nguk, matok o kerkeknen ngara vrengem mularo papat ruk mang a kolkha to endo, nang a kolkha to endo nak le kpis pangnaom muk enang a pnol ko nma senkrip kim a baor ko ther gi ru pum he. Ii, mguak ngangreal ngang nguk mang a kerkeknen to kam sovet mang a ngaiviem a ye to a serpgar va endo kam sovet mang a ngaemik. Va mguak ngangreal ngang nguk mang o gi vrong vnek ruk mo mmie kat, endruk ngma kpom o mia he kvanker mar.

E Yoanes 4:39

To ko tok mSamaria, o mia kavurgem ngat kor mnam mar mang e Yesus he kmokpom kar ekam ko a vlom to endo tngae khavaeng ngar mang te, “A mhel to ta havaeng dok mang o gi vrong keknen tgus ruk ko eharom mar he.”

E Yoanes 4:44

(Vanang en mruo tmur hover a papat ta te, o mia ngam lua totu pum a propet ko mnam ka rengmat ka pun msim e.)

lRom 12:12

Va mguak sirei mang mularo papat ruk kam nho mkor E Nut kam susulgim muk kat. Ii, va mguak matnge vgum o vokngnes ruk o mia ngma koskalil ormuk ormar kat. Va mguak or kmorim a keknen to kam ngarkie ngang E Nut kat e.

lRom 2:7

Mare, ko endruk ngma matnge vgum o vnek kmeharom o keknen ruk lyar, mar ngama nho mkor E Nut kam teiver mar, kmen a munik alaut ngang ngar he kmon mar kam kol a ktalhok to kam plong vle ko kim En ngnik ngnik, ko her endruk arhe E Nut ner kaekon ngang ngar orom a ktalhok to endo.

2Korin 7:1

To kolenar ruk kom vu kaelongtok mang nguk, ekam ko E Nut tel ka tnangal to endo ngang ngor va ngrua mrua kser mor pum nguaro kerkeknen petgim mar hak, ko her mar ruk arhe ngam kaeharom nguaro pkor va nguaro vurkul kam vle lua mmok ko pum E Nut kalo keik. Ii, ngrua mrua kser mor pum nguaro kerkeknen tok, nang kle kolkol ekam E Nut karo keknen mruo, mor kam ho mi kut kaisis tgus kngae ka ngmeang orom karo keknen ruk endruk tok. Ngruak kaeharom tok, ekam ko ngoma totu pum E Nut, he nang mor kam kle ktua vle la mmok hak ko kim kalo keik gi enangthe ngot her parrur orom ka munik he.

lGalesia 2:2

Vanangko ngot lo grap kmikkiem a gi vrong mhel ka mur svil ko ta vaeng dok e. Nove, ko grap ngok mYerusalem kmikkiem enang ko E Nut mruo tmur en o rhek mnam dok ko tengogong dok kam havaeng dok kam grap tok. Ii, ko grap ngoguon mYerusalem he smia keknen ngang endruk laol mang kuaro reha ruk kom kaeharom mar nngia nngia ngang o vrong rhek, ko koma havaeng o vrong rhek mang e Yesus ko tpis orom E Nut ka tavgo. Ii, ko her kaum kar mar ruk muma hover mar ko mYerusalem, ko gi mar va dok tuk, kam smia halger kuaro rhek mang kuaro reha ngang ngar. Gi mar va dok tuk tok ko kua gor te, kop mrua ngampaei pum kuaro mur reha mruo, endruk ko her eharom mar ngang o vrong rhek tesgun va endruk kua re kmeharom mar ngang ngar kat. Ko kua gor te, endruk laol nga lua tting mang kuaro rhek ruk endruk ngang o vrong rhek, he khos kim mar enang tok.

lGalesia 5:7

Tiok mute sim kaikkiem a keknen to kmor mnam muk mang e Kristus he, vanangko erieto taol eltoot orom ktakor he ka vraik orom mularo papat kmelha ka kser mar, he khagam muk kam lo kat kaikkiem o papat ruk o minar?

lEpeses 4:25

He ekam ko E Nut ten a ngorsang to a gunngar ngang nguk tok, va langto langto mnam muk naka ksir petgim a kerkeknen to kam ppiak ngang o mia, nang kle krere orom o rhek ruk o minar, ko mor tgus ngota vle te, E Nut ka ngaomevek atgiang to ta vle enang e Yesus ka vok to atgiang kat.

lPilipai 1:30

Va o vnek ruk muta lol mang en tete, mut her vokong ngar tiok he, ko ngat her pis kim dok kat. Va her mi kut o vnek ri kat arhe mut kol a re mang dok mang ngar kat te, koma lol tete vop.

lPilipai 2:16

Mguaka vle kun pgegom o mia la mmok enang tok, he khavaeng ngar mang E Nut karo rhek ruk ngat kais kmen a ktalhok to kam plong vle ko kim En ngnik ngnik ngang ngar. Ii, mguaka vle tok, he nang dok kam sirei mang nguk mnam a kolkha to e Kristus nak kaeknik mnam, ko mularo keknen ruk endruk tok ngara khenam ngang dok te, klo vu koham kuaro serppak vgum kuaro reha ruk ko eharom mar ngang nguk e.

2Timoti 2:4

Ii, ngiaka vle enang endruk ngam smia kar va tomten gi enang ko nong tang mnam mar nam kael kalo keik ekam o tgoluk ruk mkor o vrong mia ku mnok e. Nove. Nam lo kaeharom tok, ekam ko nma svil kmensireim kalaip.

2Timoti 4:7

Nga si kaim dok kngam dok tok, vanangko kua mnor te, kua papat to tesgun, endo kmor mnam dok mang e Yesus he kmokpom kar tvua serppak kun mnam dok ge, he ka vle gi enang a mhel to nma serppak kmus kam kikir kim klenar, he nang en kam kol ka keik to ka msasaen. He dok kat kua vle tete enangthe ko her tarkanang a khanier to kam sap kat ko dok ko serppak tok he khanier kir kim kolenar kam tarkanang a khanier to endo enang tok kat. Ii, ko ho mi kut kor mnam dok mang e Yesus he kmokpom kar tok kmis mang tete.

lHibru 6:15

E Ebrehem tkol E Nut ka tnangal to endo tok, to le gia vle he lua tutut mnam o kolkhek kam marer kam nop ko nam gia vle kpaneng E Nut kngae kais ko E Nut tmi mitom ka tnangal to endo ko tmur el ngang en tok.

E Yems 1:3

ekam ko mut hera mnor mang E Nut he te, nam kaegom mularo papat ruk kmor mnam muk mang En ormar, he nang muk kam kle kserppak kam matnge vgum mar.

1Pita 2:1

He ekam ko E Nut teharom mularo vurkul kam vle te, mar o gunngae enang tok, va mguak ksir pum o kerkeknen tgus ruk endri te, kam kering o mia orom mularo rhek, kam mas orom o mia orom o vrong keknen tgus ruk kam kauyang ngar ormar, kam kerruru, kmesik pum o mia ngaro tgoluk va kam rere pum o mia kam kering ngaro mnok.

1Pita 4:2

He ekam ko a mhel ther mi kut ksir pum karo kerkeknen ruk tok, va a mhel to endo nam lo kta ngam en mruo ekam ka vok karo svil kat e, endruk ngam kaenen en kam tmar kim mar ko nma vle mo mmie vop. Nove, ta kle ka khenam te, nam kle va kngam en mruo ekam E Nut kmeharom E Nut ka svil ha.

1Pita 5:1

Dok a mhel to ko her mi vokom e Kristus orom kualo keik mruo ko tkerkolkol vgum o vnek ruk tok. Ii, va ngora tuur mnam e Kristus kla mmok kat kun mnam a kolkha to E Nut na khenam en ma mmok mnam. Va dok a hipun to koma kaum kar mularo hipun akuruk mnam a ngaeha to kam toot mang E Nut ka ngaomevek langto, he ko kaurur kim mularo hipun ruk ngma toot mang E Nut ka ngaomevek to orom muk ruk ko tok te:

1Pita 5:12

E Silas to koma vokom te, konopia ko tkor mnam en mang e Yesus he kmokpom kar, en nam lo korim karo reha ruk ngang E Nut. Va en kat, ta turang dok orom ko ket hor ta. Ko dok ko gi vur ittiek ngang nguk tete orom he. Va kun mnam ko ke hor to enda ko her kaenkrovgem muk kam havaeng nguk lmien te, her a ktalhok to a mi minar to arhe, endo E Nut nma ring ya mang o mia orom. He mguaka kpom mekam mekam kserpgam.

2Pita 1:6

Va mguak le kngae kael a keknen to kam mrua nho mang mularo pkor kuon malpgem endo kam mnor mang o keknen ruk lyar va o keknen ruk nong lyar. Va a keknen to kam matnge vgum o vnek, mguak kael kuon malpgem endo kam mrua nho mang mularo pkor kat. Va a keknen to kam totu pum E Nut, mguak kael kuon malpgem endo kam matnge vgum o vnek.

O Ngaelmir 1:9

Dok mu nopia to e Yoanes. Kom mi ktua vle gi enang nguk, kam kaum kmatnge vgum o vnek, nang lua kaeloong mnam o vnek ruk endruk mor tgus ngoma lol, mar kam marer kam nop kat. Va koma vle ku meorom E Nut ka tavgo gi enang nguk tok kat. Ii, ngota kaum ka vle tok, ekam ko ngot kor mnam mor mang e Yesus he mokpom kar. Ii, her mu nopia to dok ta arhe, dok to o mia ngat likim dok kmenpasiker dok kun ma hengor mo mnam a nut to ngma mon te, e Patmos ekam ko koma hahavae lmien orom E Nut karo rhek ruk mang e Yesus.

O Ngaelmir 13:10

Ko o mia ruk E Nut ta ktar mur el mar ko maktiegom ngaro imuo, he nang ngaro imuo kam kleng singni mnam mar, va ngaro imuo ngar mia kleng singni mnam mar, gi enang tok arhe, kaurur mar kngorom mar ngok kmar, mar kam vle ngang ngar. Va endruk E Nut ta ktar mur el mar ko maktiegom ngaro imuo kmit mar, he nang ngaro imuo kam krong ngar orom a mus kngam mar o yoror, va ngaro imuo ngar mia krong ngar orom a mus kngam mar o yoror gi enang tok kat arhe. He ekam tok, muk E Nut karo mia mruo ruk muk, mguak or kam lua kaeloong mnam o vnek ruk endruk, mar kam marer kam nop e. Mguak kle va kmatnge vgum mar ha, he ka plong kor mnam muk mang e Yesus he kmokpom kar ge.

O Ngaelmir 22:16

Dok to e Yesus, ko her meng kua engyel langto ngang in kar ingornopeik ruk o propet akuruk kat, he nang en kmengogong yin orom o ngaelmir ruk endri tgus. Ii, tkaen o rhek ruk endri ngang in, he nang in kam hahavae lmien ormar ngang kuakro ngaomevek. Her e Devit Kaes to dok, dok to ngma mon dok kat te, Endo ta vle enang A Ho Ka Sipngan ko ta par mnam E Devit ka ngausie ka pun va A Ketor To E Lesa to nma nan klik.”

O Ngaelmir 3:10

He ekam ko muk mut her matnge vgum o vnek he lo kaeloong mnam o vnek ruk endruk, mar kam marer kam nop, nang kle sim ktua toot mang kuaro rhek he kaikkiem mar ge, va dok kat ngor smia toot mang nguk kat mang o vnek ruk endruk ko ngara pis kim o mia tgus ruk mo mmie kmegom mar.