E Matyu 13:19 - E Nut Ka Meer Mang Ka Mokpom To A Gunngar

¹⁹ Ta vle ti te: O mia ruk ngma ngan o rhek ruk mang E Nut ka tavgo, vanang lua svil kam smia ngangam kmar mang ngar, ngta vle enang a ho karo khek ruk ngta vuut ko ekam a ngaelaut. Ngta vle enang tok, ekam ko ngma ngan o rhek ruk mang E Nut ka tavgo, to e Seten nam her gi kat pis ge, gi veret o rhek ruk endruk E Nut ta ktar kngam mar ngkun mnam ngaro vurkul petgim mar he krum kim mar hak.

E Matyu 13:19 ပူးပေါင်းရင်းမြစ်များ

E Matyu 12:26

He kmikkiem gi enang tok kat, e Seten ka valngan ruk o kool ngat lo is hak kmommenik he mur kaus kar mar mruo va kmopet mar mruo kat, matok ngar mrua kering ngar mruo gi enang tok kat ko nga serppak ner lua vle lhok kat e.

E Matyu 13:20

Va o mia ruk ngma ngan E Nut karo rhek he kmarer kam kpom mar kun mnam ngaro vurkul he ksirei mang ngar va kngatkal mang ngar ngatngae, endri ngta vle enang a ho karo khek ruk ngta vuvuut kun pgegom o gi krek.

E Matyu 13:38

A loot ta vle enang a mmie, va o sigla ruk lyar ngo kok, mar ngta vle enang E Nut kles ruk ngma vle ku meorom ka tavgo. Va o gigi ngata vle enang e Seten to tho mi kut kernonho hak kles ruk ngma vle ku meorom kta tavgo.

E Matyu 4:23

Ta vle tok, to e Yesus tkaelha kvaik kottek kun mnam a mhe to e Galili karo rengmat ngakro maksien tgus he kaelha kpatter o mia kun mnam o Yuda ngartaro rektor ruk kam rere mnam mar kun mnam a maksien langto langto. Ko tok nma polger o rhek ruk mang E Nut ka tavgo to tpis he re kam komor o mia. Va tkaeharom o mia pum ngaro yor ngo mamten tgus ruk kuo mang ngar kat.

E Matyu 5:37

Mguak kle va re kmel a tnangal, va mgua gia re lsir te, ‘Mare’ i o ‘Nove.’ Va ke lo re ngin ke lo gi vgon ennginduk arhe ngina gi kut kael mit lsir tok arhe. Vanang oni rhek ruk mut kaelik kuo malpgem enngindi kmel a tnangal ormar, ngat ottek ekam e Seten to tho mi kut kernonho hak.”

E Mak 4:15

Va o mia ruk ngma ngan o rhek ruk mang E Nut ka tavgo, vanang lo sim ktua ngangam kmar mang ngar, ngta vle enang a ho karo khek ruk ngta vuvuut ko ekam a ngaelaut. Ko ngma ngan o rhek ruk mang E Nut ka tavgo, vanang e Seten nam her gi kat pis ge, gi veveret o rhek ruk E Nut ta ktar kngam mar ngkun mnam ngaro vurkul petgim mar kam rum kim mar hak.

E Luk 10:9

Va mguak kaeha ngang a rengmat to endo kmeharom o yor ruk nkong ngar ko tok. Ii, mguak kaeharom mar tok, va khavaeng ngar te, E Nut ka tavgo ther mi pis ko kmar gi enang tok arhe.

E Luk 9:2

Teharom tok, kam meng ngar kam ngae kaelha kpolger a re mang E Nut ka tavgo to kam komor o mia tgus. Va ta meng ngar kmeharom endruk ngta yayor kat.

E Yoanes 18:38

E Yesus ta re tok, to e Pailet ta kle ka mngan pum te, “Hai-e! Ani re tang ko a minar mo mmie?” E Pailet ta re tok, to her kat kaeknik kngae ngok mnok kim o Yuda to kreng ngar te, “Dok mruo klo pis mang a re tang gi kam sim kael dok ma hor, dok kam mon enda orom e.

E Yoanes 8:43

Vanang kman ko mut lua mmok mang kuaro rhek vop? Te mut lua mmok vop ekam ko muk mruo mum mi mrua tok pelam muk ha.

O Aposel Ngaro Reha 17:32

E Pol ta rere tok knop, to endruk ngata vongnek kim, ngat re ngan ko ta re kvat a yoror ko tkat hop petgim ka nnak, to akuruk mnam mar ngta le ka klel orom. Vanang akuruk ngat le ho mi ktua nganmgaem karo rhek, en kam rere kngae gi mang ngar vop, ko ngat reng te, “Koknaik kat va ngota svil yin kam halger ilaro rhek mang a papat to endo.”

O Aposel Ngaro Reha 18:15

Vanangko muk o Yuda mut gia mo maen o rhek mang o gi papat, o gi mnok va mang nguk o Yuda mutaro mur pos mruo ge. He ekam tok, muk mula ngaeha orom a mhel to endo. Muk mruo mguak sisrim a vnek to enda. Vanang dok, klo kais kam vle he kvongnek kim o rhek ruk enang endri e.”

O Aposel Ngaro Reha 20:25

Yu! Va tete ngora ngae kngae hak he. He kua mnor te, nong tang hak mnam muk ruk mut ngan dok ko ko elha kpolger o rhek mang E Nut ka tavgo, ner lo kais kam kta vokom dok kat e.

O Aposel Ngaro Reha 28:23

Ngta re tok, to ka lgem o rhek kam kta pis mnam a kolkha langto yok vat kam vongnek kim e Pol. Kam ngae, to a kolkha to endo ta pis to o Yuda ngalmialaol ngata kta pis ko kim kat kun mnam e Pol kta rek to nma vle mnam. Ngta pis va vgum mar ko mar ngarlakhor va si endruk tesgun ko ngta pis ko kim va endruk endri ngarlakhor kir kim mar. Ngta vle ko tok, to kmelha marot to endo kngae kais masegain, e Pol te smia halger o papat ruk mkor e Moses kar o propet kmel mar ma hor mang e Yesus kam sim kaegom kam rere mnam mar te, her e Yesus arhe Endo E Nut Thim Orom Ka Msasaen va her en kat arhe tpis orom E Nut ka tavgo. E Pol ta rere tok,

lRom 1:28

Va kam ngam kuon mang a papat to endo tok kat, ekam ko ngata kpiem o papat ruk mang E Nut ko ngat mnang ngar tok, E Nut ther le ka mnang ngar tok kat, he nang mar kam ngae kaikkiem ngaro lpetuk ruk ngta tok orom o papat ruk ngat ho mi kut kernonho hak. Ii, ta mnang ngar tok, mar kmeharom o kerkeknen ruk o mia ngama leep pum mar kmeharom mar.

lRom 14:17

Ii, mguak or kam kering ngar tok, ekam ko mor ruk E Nut ka tavgo ta vle kuo mang ngor ngom lo sir kuon malpgem a ngaemik va a ngaivie e. Vanangko, ngruak kle va ksir kuon malpgem o keknen ruk ngat ho mi kut sir hak ko pum E Nut kalo keik va o keknen ruk kmeharom o mia ngaro vurkul kmongeik va a keknen to kam sirei vgum E Nunu A Totur.

lRom 2:8

Vanang endruk ngam mrua kansgum mar mruo he ksovet mang ngaro svil mruo kam mrua hover mar mruo, nang kle keyang E Nut karo rhek ruk o minar, nang kle kaikkiem o kerkeknen ruk ngat lo sir hak ko pum E Nut kalo keik, va E Nut ner kaekon ngang ngar orom ka ngaesik ko ka vrek nera kiin ngang ngar.

lEpeses 3:8

Dok to kom pua vle te, ko ho lo eveep is hak kam vle ko ngtu hak pekam E Nut karo mia tgus, vanangko E Nut ta kle kring ya mang dok ge, kmen a ngaeha to endo ngang dok, he nang dok kam havaeng o vrong rhek mang o papat ruk mang Endo E Nut Thim Orom Ka Msasaen. O papat ruk endruk ngta vle enang a gol ka pun. Va mor gi ko mor tuk ngot lo is hak kam non ekmar kam smia mnor mang ngar kat e.

2Tesalonika 2:12

Ii, E Nut ner ho mi kut kael moruo mnam mar tok, he nang En kam monik kim a yor ngang ngar tgus ko ngat lua svil kmor mnam mar mang o rhek ruk o minar mang e Yesus, nang kle ksirei kmeharom o kerkeknen.

lHibru 2:1

Tennik E Nut ten karo pos ngang o Yuda ko vgum o engyel ruk ngat kol ka gu kam rere orom mar tok. Va o Yuda tgus ngta lol he, he karo pos ngaro serppak ngta kpom mar tgus. Te tok, o Yuda tgus ngam kaennegiang E Nut karo pos ruk endruk he kerngnek vgum En kam kpoot mang ngar. He ekam tok, E Nut nam her mi kut kael a kapnes ngang ngar, kam sim kut kais kmikkiem lsir enang ko ngam kaennegiang karo pos enang tok kam kerngnek vgum En tok. Vanangko mor ri tete, ngot kle klol o rhek akuruk yok vat ko vgum o mia ruk ngat mi ngannik ko vgum Ngoldaip e Yesus mruo ko her en arhe ta ktar kpakvom kam paam ngaro rela mang ngar. Va o rhek ruk endruk ngta vle mang E Nut kam susulgim mor nngia nngia. Va ngat kaenserpagam o rhek ruk endruk kam kta havaeng ngor orom mar kat. Mare, E Nut mruo tmur kaenserpagam karo rhek ruk endruk kat orom o ngaelmir ruk lserpgue va orom o ngaelmir ruk ngta reimsor mnam o mia va orom o reha ruk lserpgue ngo mamten va orom o nngiar ruk mkor E Nunu A Totur ko En tkaisis kim o mia ormar kmikkiem ka mur kut svil mruo. He enang tok, e Yesus karo rhek ruk endruk ngat ho mi kut laut hak he kir kim E Nut karo pos ruk endruk o mia ngat lol ko vgum o engyel tennik. He ekam tok, enangthe ngop kaennegiang e Yesus karo rhek ruk endruk mang E Nut ko tsusulgim mor tok, va ngot ho lo is hak kam mrua hong ngor mnam a kapnes to E Nut ner kael malpgem mor ekam tok. He ekam ko e Yesus karo rhek ruk mang kam susulgim mor ngat laut he kir kim o engyel ngaro rhek ruk mang o pos tok, va ngruak ho sim ktua ngangreal ngang ngor hak mang e Yesus karo rhek ruk endruk ngot ngannik ko vgum endruk ngat mi ngannik ko vgum e Yesus mruo, he nang mor kam lua vraik petgim e Yesus. Ii, mguak smia ngangreal ngang nguk mang e Yesus karo rhek ruk endruk kir kim o Yuda ko ngat lo smia ngangreal ngang ngar mang E Nut karo pos e.

1Yoanes 3:12

Nang mguak or kam kolkol ekam e Kaen e, ko en tpal mnam e Seten to nam kaenen o mia kmeharom o kerkeknen ka ngausie ka pun. Ko e Kaen tpor knopia e Abel. To mu havaeng dok na, e Kaen tpor knopia pum anito? He ther gi kut por knopia ko ta tar ko knopia karo keknen ruk nam kaeharom mar ngta sir ko pum E Nut kalo keik, vanang en ktakor ngat kernonho.

1Yoanes 5:18

Ii, va ngota mnor kat te, oni mia ruk ngat pal mnam E Nut ka ngausie ka pun ngam lo kat kael kerok mang o kerkeknen kam venu kmeharom mar kat e, nove. Ko endo ta ktar pakvom kam pal mnam E Nut ka ngausie ka pun, ta kpom mar ko maktiegom, he e Seten to nam kaenen o mia kmeharom o kerkeknen tlo kat kais kam kta pis ktuom kalo ktiek mang kat e.

1Yoanes 5:20

Va ngota mnor kat te, E Nut Khal e Yesus Kristus ta grung ngte mmie he her el mor ma hor mang E mi Nut mruo msim. Ekam tok, tete ngota par mnam E Nut to a minar her vgum Khal mruo to e Yesus Kristus arhe. Mare, ko her e Yesus Kristus arhe to ten a ktalhok to kam plong vle ko kim E Nut ngnik ngnik ngang ngor ko en her E mi kut Nut msim to kat arhe.