E Matyu 11:2 - E Nut Ka Meer Mang Ka Mokpom To A Gunngar

² Nangko tesgun ngat enpasiker e Yoanes kun pa hengor, he e Yoanes ta ngnek ko tok mang o reha ruk mkor Endo E Nut Thim Orom Ka Msasaen ko nam kaeharom mar. To thera meng klo kaloyie ngok kim orom a re

E Matyu 11:2 ပူးပေါင်းရင်းမြစ်များ

E Matyu 1:17

Yu! Her tok arhe. To kam pupam e Yesus karo pupnam ruk endri tgus ko ngata ngamngam mo kim o valngneik tgus ngat kais te, loktiek hori orom korlolo kmelha ko orom a venloot to tkol e Ebrehem ka grung kmis orom e Devit. Va loktiek hori orom korlolo yok vat kam le kaelha ko orom a venloot to tkol e Devit ka grung kmis ko lBabilon ngata kakapom lIsrael kmen a kapnes ngang ngar ngok mBabilon. Va loktiek hori orom korlolo kat kam le kaelha kat orom lBabilon ko ngata kakapom lIsrael kmen a kapnes ngang ngar ka grung kam le kngae her kais orom Endo E Nut Thim Orom Ka Msasaen.

E Matyu 14:3

E Herot ta mrua pat te, e Yesus, nok en e Yoanes to tkat hop petgim ka nnak tok vor, ekam ko tiok her e Herot mruo arhe to ta ktar en a volou mang e Yoanes. Ten a voluo mang tok, ko tiok e Yoanes nam sia kser e Herot mang knopia to e Pilip ktavlom, e Herodias ko e Herot ta vret petgim e Pilip he kle klei orom. Va e Yoanes nma palsie kim e Herot mang e Herodias kam havaeng te, “Nguaro pos ngat lua ngatkal mang in kam lei orom inan e Herodias tok e.” He ekam ko e Yoanes nma palsie kim tok, e Herot ten a volou mang tok arhe, o mia kam kpom e Yoanes kaussiem he kaenpasiker kun pa hengor. E Herot ka papat ta serppak kmim e Yoanes kngam a yoror, vanangko ta gorang o mia pum, ko o mia tgus ngat el e Yoanes te, en a propet langto.

E Matyu 4:12

To mnam a venloot to e Yesus ta ngnek mang e Yoanes te, ngat enpasiker kun ma hengor, e Yesus tvur kaol kngae kam kat kaeknik ngoguon ma mhe to e Galili

E Matyu 9:14

E Yesus ta hivuo kmemik vop, to e Yoanes kalngunes vat ngata pis he le kta mngan pum e Yesus mang ngaro keknen ruk nkong ngar tennik kat te, “Ngua keknen to kam paal kmo ol nkong ngar tennik, nang nong lgunngae nkong ngar tete e. He ekam tok, kman ko mor kar o Parisiau ngom kaikkiem ngua keknen to nkong ngar tennik, endo kam paal kmo ol tgus ko pum E Nut kalo keik he smia ngarkie ngang, vanang itlengunes ngam kle kaeharom a keknen to a gunngar ta yek, endo kam venu mang a ngaemik?”

E Mak 6:17

E Herot tpat tok, ko tiok, her en mruo to ten a volou mang e Yoanes, o mia kam kapom he kaussiem to le kaenpasiker kun ma hengor. Ii, e Herot ten a volou mang e Yoanes tok, ko tiok e Yoanes nama kser e Herot mang ktavlom to e Herodias. Ko tesgun e Herodias ta vle te, e Herot knopia to e Pilip ktavlom, nang e Herot ta vret e Herodias mkor knopia to kle klei orom, en kam vle te, ktavlom mruo.

E Luk 3:19

Vanang tesgun e Yoanes nma mon lRom ngalaip kalkayie to e Herot orom karo kerkeknen ngo mamten tgus. To mnam a kolkha langto e Yoanes ta kner e Herot pum ka kerkeknen langto, ko e Herot tparem ktavlom, nang kle klei orom knopia to e Pilip ktavlom to e Herodias.

E Luk 9:7

Kam ngae, to o rhek ruk mang e Yesus karo aposel ngta vaas kim o mia ko ngam kaeharom o reha ruk lserpgue kun mnam o mhetor tgus. Enang tok, o mia ngat kaelha kam havae mang e Yesus te, en e Elaisia he tkat hop kat ko tyor. Va akuruk ngta havae te, en a propet langto nkong ngar tennik he tkat hop kat. Va akuruk kat ngta ktua havae mang te, en e Yoanes to nama parrum o mia he tkat hop petgim ka nnak kat. Va e Herot to lGalili ngarlaip ta ngan o rhek ruk mang e Yesus karo reha ruk lserpgue ruk endruk kat. Va ta ngan o rhek mang e Yesus kat ko o mia ngta mon e Yesus te, en e Yoanes to nam parrum o mia, va te sei kam lopumtang pum e Yoanes hak he ka vrek te sei kam kiin ko

E Yoanes 4:1

O Parisiau ngata ngnek mang e Yesus te, o mia kavurgem ngta sovet kam gun ngok kim kir kim e Yoanes, he nang en kam parrum mar, nang mar kam vle te, kalngunes ruk mar.