1Yoanes 4:1 - E Nut Ka Meer Mang Ka Mokpom To A Gunngar

¹ Kolenar ruk kom vu kaelongtok mang nguk, mguak or kam gi vrong kolaspa kam gi vrong kor mnam muk mang o gi vrong serppak ruk mkor o vrong mia va o vrong tgoluk e. Mguak or tok! Vanang mgua kle va sim ktua nho kun mnam mar na, kmegom mar kam mnor mang oni vrong serppak te, ngat ottek kuon kim E Nut, i o nop. Kua re tok, ko o propet kavurgem ruk la ppiagar ngat her ngae he ngrok tete he. Va ngta khanang ngar kam vraik orom mularo papat petgim E Nut kat.

1Yoanes 4:1 ပူးပေါင်းရင်းမြစ်များ

E Mak 13:21

To enang tok, enangthe tang nak pis mnam o kolkhek ruk endruk he khavaeng nguk te, ‘Mu nho na, Endo E Nut Thim Orom Ka Msasaen enda he,’ i o ‘en tko gut ho,’ va mguak or kmor mnam muk mang o rhek ruk endruk.

E Luk 12:57

“Kmikkiem enang tok, muk mruo mgua marer he smia ngangam kim muk mruo mang o ngaelmir ruk mang dok, muk kam mia mnor kun mnam muk mruo, he mrua havae mang ngar lsir te, mar o minar o nop.

E Luk 21:8

Va e Yesus ta kle khavaeng ngar mang a kolkha to a kser kim te, “Mguak ngangreal ngang nguk matok o mia ngara vraik orom muk petgim dok. Ko o mia kavurgem ngara pis he mur kaelel mar mruo orom kua munik kam re te, ‘A kolkha ta tete, her endo E Nut kmaottam karo rhek tgus mnam.’ Va langto langto ner mur kaelel en mruo orom kua munik kat kam re te, her en arhe Endo E Nut Thim Orom Ka Msasaen. Ngar pua havae tok, vanangko mguak or kam mrua ngam muk ekam mar ge.

O Aposel Ngaro Reha 17:11

Nginta havaeng lBerea mang e Yesus kat, vanangko lBerea ngaro keknen ngat vua kir kim lTesalonika ngartakor ko lBerea ngat ho mi ktua nganmgaem e Pol karo rhek kam ngannik he kol E Nut ka meer to le kpepet kam sim ktua non ekam mar kam smia mnor te, e Pol karo rhek ngta mien kmikkiem E Nut karo rhek i o nop.

O Aposel Ngaro Reha 20:29

Ii, mgua smia toot mang ngar enang tok, ko kua mnor te, ko pekam dok ko nguak ngae, o pendol ruk ngat ho mi kut kernonho hak, endruk o pattermia la ppiagar, ngar le kpapagis kvaik kun pgegom muk vat he ngar lua mrung tang mnam muk kmorim kat e.

1Korin 12:10

Va nama nngiar ngang akuruk orom a nngiar to kmeharom o reha ruk lserpgue, va akuruk orom a nngiar to kam kol E Nut ka gu he ka ktar kpolger karo papat. Va nama nngiar ngang akuruk kat orom a nngiar to kam smia nho kun mnam o propet ngaro rhek kam mnor mang ngar te, ngta mien, i o nop. Va nama nngiar ngang akuruk orom a nngiar to kam rere orom a re langto yok. Va ngang akuruk nama nngiar ngang ngar orom a nngiar to kam hortgem a re langto yok to endo kat.

1Korin 14:29

Va mang a nngiar to ta vle te, a propet, mguak orim alo propet ruk alomin, i o korlotge kam rere tok. Nang muk ruk muta ngan ngaro rhek, mgua smia papat ekam ngaro rhek kam mnor mang ngar te, ngta mien o nop.

1Tesalonika 5:21

Parem ko, mguak kle va ka ktar kaegom o rhek tgus na, kam mnor mang ngar te, ngata ya, i o ngata kernonho. Ii, mguak kaegom mar tok na, yek kle ka kpom o keknen ruk ngata ya,

2Tesalonika 2:2

mguak or kam tutut kam senkrip kim a re, i o a hor to mkor o mia akuruk yok ko ngama ppiak mang ngor kam havae te, ngot her havae mang a kolkha to Ngoldaip kmeknik mnam te, ther mi pis he. Va si enangthe a propet langto napa havae tok kat, va mguak or kam vua papat mang karo rhek ruk endruk kat e.

1Timoti 4:1

Vanangko E Nunu A Totur ta ktar mi kut pavap ge te, mnam o kolkhek ruk ngak konner a kolkha to a kser kim, o mia akuruk ngara sovet kmelel ngakro yaik ngang o papat ruk kmor mnam mar mang e Yesus he ka ksir petgim en hak, nang kle kaikkiem o papat ruk mkor o vrong serppak ruk o kool ko o kool ngar kael re ko vgum o mia kam kerpatter mar ormar kam mas ormar orom ngaro papat ruk endruk.

2Timoti 3:13

Ii, muk mguera vle tok, vanangko o pattermia ruk la ppiagar kar ngarlenar ruk orom ngaro kerkeknen ruk ngtel rengmat kun mnam mar ngar kle kngae ho mi ktua kernonho hak kir kim ngaro kerkeknen ruk ngam kaeharom mar tesgun, ko ngam kok mia mas orom o mia kam vraik orom mar tok. Va o mia akuruk yok ngar mrua kauyang ngar tok kat.

2Pita 2:1

Ii, pu lmien te, o Israel ngaro propet ruk tennik ngaro rhek ngat si ottek ekam E Nunu A Totur tok, vanangko lmien kat te, o propet ruk la ppiagar akuruk ngat pis kun pgegom lIsrael kat ge, he ka ppiak kam ktar kpavap orom ngaro rhek mruo ngang ngar kat. Va tok kat, o pattermia ruk la ppiagar akuruk ngata pis tete kun pgegom muk kat, gi enang ngar tok kat. Endri ngat her aol ma mmek mnam muk orom ngartaro papat ruk la ppiagar. He ngara hos kim o mia akuruk ngaro papat ruk kmor mnam mar mang e Yesus ormar kat. Ii, si a papat to mang Ngoldaip to La Vu Ngaurar hak ka yor to tel a ngaekam ekmar orom, va ngam kle ho mia klai mang endo kat. He ekam ko ngma vle tok, ngar mur kait a kapnes kuon mang ngar mruo, he E Nut ner lua hus hak kmen nga kapnes to endo ngang ngar kat e.

1Yoanes 2:18

Muk ruk ko kvam muk te, ko les ruk kom kaelongtok mang nguk, kua havaeng nguk te, a venloot to enda ngota vle mnam tete, ta re kam mtiet he. Va muk mruo mut her kol a re te, a mhel langto la ppiagar nak pis mnam a venloot to kam mtiet orom mar tgus he mur kael en mruo te, en her Endo E Nut Thim Orom Ka Msasaen kam sir malngaeng endo a minar enang tok. He si tete va o mia kavurgem ngat her mi pagis enang tok arhe. He ekam tok, o mia ruk endri, ngat kaenserpgam a papat to mang a venloot to tete te, nop, lmien he, a venloot to kam ngae ka mtiet orom mar tgus her enda tete arhe. Va ngot kais kam mnor mang a papat to tok vgum mar tok kat arhe.

1Yoanes 2:7

Vae, kolenar ruk kom kaelongtok mang nguk, klo kaittiegom a pos tang ko a gunngar he kaen ngang nguk e. Nove. Her gi endo mut her kol tiok he, ko mut gnua lol o rhek ruk mang e Yesus he ka plong knganik kam ngae kais mang tete. A pos to tesgun ta, her a pos to mut her kol tiok arhe.

2Yoanes 1:7

Ii, kua havaeng nguk tok, ekam o mia kavurgem ruk ngama kauyang o mia ngta vle kngae kun pgegom o mia ruk mo mmie tete he. He ngma klai mang e Yesus kam havae te, en nong Endo E Nut Thim Orom Ka Msasaen he en tlo mur el en a mi mhel kam pis mo mmie kat e. Nove! Ani mhel to ta klai mang e Yesus tok, her endo nama sir malngaeng Endo Msim E Nut Thim Orom Ka Msasaen to arhe ko nam kaegom kam kauyang o mia kam vraik orom ngaro papat petgim.

3Yoanes 1:11

Kua kambis to yin, yindo kom kaelongtok mang in, ngiak or kam kolkol ekam o kerkeknen ruk endri e. Ngia kle gi kael ilalo keik mang o keknen ruk lyar. Ii, ani mhel to tgi kael kalo keik mang o keknen ruk lyar, her endo ta mrua khenam en mruo ma mmok te, tpal mnam E Nut ka ngausie ka pun. Vanang ani mhel to nam kaeharom o kerkeknen, a mhel to endo ta kle mrua khenam en mruo ma mmok kat te, en nam lua vokom E Nut orom karo keknen e. Nove.

O Ngaelmir 2:2

Kua kanprim muk mang mularo reha ko muma prongyek ka psek kmeha kmegegom o mia ruk ngam mrua kansgum mar mruo he kmon mar mruo te, mar o mi aposel. Ii, kua mnor mang mularo reha kat te, muma matnge vgum a ngaeha to tok kmegegom mar kmommen mar ma mmok kmel o mia ma hor mang ngar te, nong mar o aposel ruk o minar e. Va mum lo kaennegiang ngar kam vle kun pgegom muk orom ngaro kerkeknen kat e.