1Tesalonika 1:8 - E Nut Ka Meer Mang Ka Mokpom To A Gunngar

⁸ Ii, ko o mia akuruk ko tok mnam a mmie kalo mhe ruk e Masadonia va e Akaia, ngat her ngan a re to mang Ngoldaip vgum muk, gi enangthe ngata ngan a nglung ka muktim ko tkaeti klik ngang ngar. Vanangko nong a mmie kalo gi mhe ruk ennginduk tuk ngint kol a re mang nguk e. Nove. A re to mang nguk tvaas kim a mmie karo mhetor kavurgem te, mut si lol o vnek tok, vanangko mut kle klol kuaro rhek ruk kmor mnam muk mang E Nut ge. He ekam tok, klo is hak kam havaeng o mia mang nguk kat e, ko ngat her mnor mang nguk tok arhe.

1Tesalonika 1:8 ပူးပေါင်းရင်းမြစ်များ

O Aposel Ngaro Reha 18:12

Vanang mnam a venloot to lRom ngalaip kalkayie to e Galio ta nho mang a mmie ka mhe to e Akaia, o Yuda ngalmialaol ngta kaum ksir kim e Pol orom a pat atgiang, endo kam kpom he ka srim ko pum o mia ngaro kerok kun mnam a rek to kam vongnek kim o rhek mnam.

lRom 1:8

Kmelha orom kuaro rhek ri, kua svil kam havaeng nguk te, koma kanprim E Nut mang nguk tgus ruk mut sim kut kor mnam muk mang e Yesus Kristus he kmokpom kar, ko o mia ngat seneker a re mang nguk tok mnam a mmie karo mhetor tgus.

lRom 15:26

Ko o vrong rhek ruk lMasadonia kar lAkaia ngta sirei kmen o krek ekam dok ngang E Nut karo mia mruo ruk ngat kor mnam mar mang En ko mYerusalem ko akuruk mnam mar ngta tu kmo tgoluk.

lRom 16:19

Va o mia tgus ngat her kol a re to mang nguk he te, mut her ngan vgum E Nut he kor mnam muk mang e Yesus he kmokpom kar he. He dok kom vua sirei hak mang muk tok arhe. Mut pua vle enang tok, vanangko kua havaeng nguk kam ngangreal ngang nguk mruo mang o pattermia ruk la ppiagar ge, ekam ko kua svil mularo papat ruk mang kmeharom o keknen ruk lyar kam laut kngae, nang mularo papat ruk mang kmeharom o kerkeknen kam ksir.

1Korin 14:36

He kmikkiem kuaro papat ruk kam totu pum Ngoldaip orom E Nunu A Totur karo nngiar ri, kua svil kam mnganang nguk te, nngia ko mut vua pat te, muk mruo tuk ruk mut ho mi kut kais orom E Nut karo papat? Nok pathe E Nut karo rhek ngat ottek vgum muk vor? I o nok mut mur kaelel muk te, muk tuk ruk mut lol E Nut karo rhek vor?

2Korin 2:14

Ko ngae to hera puknim ko tok, kol a re to mang nguk vgum en, to kle kanprim E Nut ko nama ktong ngor ruk kakro ngaomevek mruo kam kni pum en orom a knovvur to orom e Seten ko Endo E Nut Thim Orom Ka Msasaen tkir kim he. He tete si tamriem tamriem ko koma ngae kam havaeng o mia mang a knovvur to endo tok he kseneker o rhek ri, va E Nut nam kait o mia orom mar. Ko o rhek ri mang a knovvur to endo ta vle enang a ho to ka gri tngae gia hut he. Va o rhek ri, o mia ngma ngannik vgum dok va E Nut nam kait mar orom nga gri to tngae gia hut, he o mia ngama lol o papat ruk kam mnor mang e Kristus vgum mar tok.

2Korin 3:4

Klua kokkol hak kam rere ka tmor kim kua ngaeha lserppak hak ekam ko kuaro papat ngat ho mi kut serppak hak te, her Endo E Nut Thim Orom Ka Msasaen msim arhe, endo nam kaeha kun mnam muk vgum dok ko kom kaeha ngang nguk ma mmok ko pum E Nut kalo keik.

lKolosi 3:16

Va o rhek ruk mang Endo E Nut Thim Orom Ka Msasaen ngaka vle kia vul kun mnam muk kat. Ii, ngak kael rengmat kun mnam muk, he nang muk kam kle kmo patter muk mruo ormar he kmo psom muk orom o papat ruk laol. Va ngak kael rengmat kun mnam muk tok, he mguaka kni pum E Nut orom o vrong knituk ngo mamten, orom o tningel kam kanprim E Nut ormar, orom o knituk ruk E Nunu A Totur tkaen rhek mnam muk orom mar, va orom o knituk muma lap mang o tgoluk mang ngar. Ii, mguaka kni tok kam kanprim E Nut mang karo reha ruk ngang ngor.

2Tesalonika 1:4

He ekam tok, ngoma hover muk ko pum E Nut kakro ngaomevek ngaro kerok ko o mia ngam si kol a regesal mang nguk kmegom muk orom o vnek, vanangko mum kle kmatnge vgum mar ge, kam kle kut kor mnam muk mang e Yesus he kmokpom kar orom mularo keknen ruk endruk ge.

2Tesalonika 3:1

Yu! Koornopeik kua svil kmongor kuaro rhek kam havaeng nguk te, mguak ngarkie mang ngor ti te, a re to mang Ngoldaip ko ngruak seneker, nak mamarer kam lol o mia tgus, va o mia kam totu pum a re to endo, to kle kor mnam mar mang, her gi enang nguk ko mut her totu pum enang tok kat.

1Timoti 2:8

Vanangko mnam oni mhetor tgus ruk muma kaum kam ngarkie mnam mar, kua svil yin e Timoti kmen a re lserppak ngang lurokol ruk ngma hover ngaro singni kam ngarkie kam havaeng ngar te, ngak ngarkie orom ngaro vurkul ruk ngata mmok, nang nong orom alo kerkeknen ruk a mokrur va a ngaesik e.

2Timoti 2:9

Ii, va her vgum a knovvur to endo, o mia ngat kol a regesal mang dok. Va ngat si kleng kualo ktiek va kualo nhar kmenpasiker dok mo ma hengor ta, enangthe dok a ker mhel to ther kpoot mang o pos. Ngat eharom ngang dok tok, kam kser dok kam lo kta havaeng o mia mang a knovvur to endo. Vanangko E Nut karo rhek ruk endruk, o mia ngat lo is hak kam kserik, mar kam lua senkir kngae e.

3Yoanes 1:12

Vanangko ngua mhel langto yok e Dimitrias, o mia tgus ngma gu ya pum en orom ngaro rhek ruk o minar. Va dok mruo kat, koma gu ya pum tok kat. Va muta mnor mang kuaro rhek kat te, mar o minar kat.

O Ngaelmir 14:6

To ko vokom a engyel langto vat ko ta vo kngae kuo kia gan. Va ka ngaeha ta vle te, kam rere ngang o mia tgus ruk ngma vle ogu mmie, endruk ngat pal mnam o vrong valngan, o vrong usiel, o vrong rhek ko mnam o vrong marhok tgus mo mmie kam havaeng ngar mang a knovvur to mang e Yesus. Ko a knovvur to endo mang e Yesus na gia plong vle lmien ngnik ngnik.

O Ngaelmir 22:17

E Nunu A Totur kar e Yesus kakro ngaomevek ruk ngta vle enang a vlom to tre kam lei orom En, ngta reng e Yesus te, “Aol ngte!” Va ani mhel to tlol o rhek ruk endri va en kat na kta reng te, “Aol ngte” kat. He ani mhel to nak katngaivie, nak kaol kmivie mnam a ye to kam kol a ktalhok ko mkor. Tlo is kmenkim a ye to e, ko En ner gi nngiar ngang orom.