1Korin 14:20 - E Nut Ka Meer Mang Ka Mokpom To A Gunngar

²⁰ He ekam tok, koornopeik, mguak tu kam kat kael mo kim mularo papat mo malpek mang E Nunu A Totur karo nngiar ri enangthe muk o gi ngnes vop. Nang mguak kle va ka vle enang o mia ruk laol orom mularo papat ruk kam sim kut kael mo kmar mo malpek mang karo nngiar ri. Vanang ta mien te, mguaka vle enang o gunsvel orom mularo papat ruk mang kmeharom o kerkeknen orom E Nunu A Totur karo nngiar ri.

1Korin 14:20 ပူးပေါင်းရင်းမြစ်များ

1Pita 2:2

Ii, tete, ekam ko mut ngan mgaem Ngoldaip karo rhek ruk endruk, va mguak kle kaenang o gunsvel ruk ngam kael riring mnam mar mang a mem. Ii, mguak sovet kmel riring mnam muk mang Ngoldaip karo rhek ruk endruk o minar, endruk ngata vle ngang nguk ruk mut kor mnam muk mang Ngoldaip he kmokpom kar enangthe mar mularo ol tok. Ii, mguak vang mang ngar tok, he nang mularo papat ruk mang Ngoldaip kam laut kngae ormar ko her karo rhek ruk endruk Ngoldaip ther susulgim muk ormar arhe.

lRom 16:19

Va o mia tgus ngat her kol a re to mang nguk he te, mut her ngan vgum E Nut he kor mnam muk mang e Yesus he kmokpom kar he. He dok kom vua sirei hak mang muk tok arhe. Mut pua vle enang tok, vanangko kua havaeng nguk kam ngangreal ngang nguk mruo mang o pattermia ruk la ppiagar ge, ekam ko kua svil mularo papat ruk mang kmeharom o keknen ruk lyar kam laut kngae, nang mularo papat ruk mang kmeharom o kerkeknen kam ksir.

1Korin 13:11

Ii, o nngiar tgus ngta vle enang kuaro papat ruk tesgun ko dok a gi kalyie vop, ko koma rere enang a gi kalyie va kpapat kmelel mo kim kuaro papat mo malpek enang a gi kalyie tok kat. Enang tok, kuaro papat ngat lo is. Vanangko ekam ko kua laut kngae he kuaro papat ngat is mnam dok, o keknen ruk endruk mkor dok ko dok a gi kalyie tesgun, ngat her nop kun mnam dok tok kat he. He enang tok, klo kta papat kmelel mo kim kuaro papat mo malpek kam rere orom mar enang a gi kalyie tok kat e.

E Matyu 18:3

to khavaeng ngar te, “Kua havaeng nguk lmien te, enangthe mgua lo ktar khortgem mularo keknen, he nang kam vle enang ke kalyie ta, va mguer lo kais hak kam vaik kun meorom E Nut ka tavgo e.

1Korin 2:6

Pu lmien te, o mia akuruk ngam lua vokom a papat to mang e Yesus ka yor te, a papat to tvu laut, vanangko o mia akuruk yok, endruk ngaro papat ruk mang E Nut ngat tettek, mar ngam kle va kvokom a papat to endo te, a her mi papat to tho vu laut hak to arhe. Vanang kom lua havaeng ngar orom o rhek ruk lvu laol, endruk ngat ottek ekam o vrong mia ruk mo mmie e. Va kom lua havaeng ngar orom o rhek ruk ngat ottek ekam o taven ngaro serppak ruk ngar mia nop kat e.

2Pita 3:18

Ii, mguak or kmorim mar kam krong mularo vorngap, nang mguak kle sim kut kael mularo papat ruk mang Ngoldaip ka keknen to kam ring ya mang nguk kar mularo papat ruk kmor mnam muk mang en he kmokpom kar, mar kam kaum klaut kngae kun mnam muk. Ko her Ngoldaip to e Yesus Kristus, endo tsusulgim mor arhe, ngruak hover en tete kngae ngnik ngnik ge. Lmien.

lPilipai 1:9

He ekam tok, koma ngarkie mang nguk ti te, E Nut kmel muk ma hor mang karo papat lvu laol mruo, he nang muk kam vle kia vul orom a keknen to kmelongtok mang o mia orom karo papat lvu laol ruk endruk tok.

E Mak 10:15

Ii, lmien ko kua havaeng nguk te, mguak toot he ka nho na, ko endo nam lua kolaspa kam tting kam vaik ku meorom E Nut ka tavgo enang o ngnes ruk endri, ko mar ngam gia kolaspa mang o tgoluk enang tok, va en tlo kais hak kam vaik ku meorom e. Nop hak!”

lPilipai 3:15

He enang tok, mor ruk nguaro papat ruk o tger mang e Yesus, ngruak smia kolkol ekam a papat to E Nut kam mon mor la mmok ko pum kalo keik, endo ko gnua rere orom. Vanangko enangthe akuruk mnam muk nga si kut korsang orom ngarta papat tang ko yok ko kemilaut mang a papat to endo, va E Nut ner kle kael muk ma hor mang kat ge.

E Matyu 11:25

To mnam a kolkha to endo ke vgon to endo ge, e Yesus ta kle kngarkie ngang E Nut kam kanprim te, “Titou, yin arhe yindo ya kueng a volkha va a mmie. Kua kanprim yin ko yi tuvgong o papat ruk mang ila tavgo to endo kim o mia ruk ngam mrua hover mar mruo vgum ngakro papat ruk vu laol, vanang kle ka khenam mar ma mmok ngang endruk ngat kaenang o ngnes.

E Matyu 19:4

Va e Yesus tkoripang ngar te, “Puoo, mum lua mmok mang E Nut karo pos gi? Ko tennik ngat ittiegom karo rhek ri ti te, ‘Ta kueng o mia he kmommen mar kam vle te, lurokol va lraip.’ Ta kueng ngar kmommen mar tok to le

E Matyu 19:14

Vanangko e Yesus ta kle kreng kalngunes te, “Mguak orim mar he ngak kaol ngte kim dok na. Mguak or kam tokim mar e, ko o mia ruk ngat kaenang o ngnes ruk enang endri, her mar ruk arhe E Nut to tkuon ma volkha ka tavgo ta komor mar.”

E Luk 18:17

Ii, lmien ko kua havaeng nguk te, endo nam lua kolaspa kam tting kam vaik ku meorom E Nut ka tavgo enang o ngnes ruk endri, ko mar ngama kolaspa mang o gi vrong tgoluk enang tok, va en tlo kais hak kam vaik kun meorom e. Nop hak!”

lRom 1:13

Koornopeik, kua svil muk kam mnor mang kuaro papat na te, ko hera ngae ngok kim E Nut ka loot to orom o vrong rhek akuruk yok he khavaeng ngar mang o papat ruk kmor mnam mar mang e Yesus, he nang dok kam lluol mnam E Nut ka loot to ormar tok, he nang E Nut ka tavgo kam vle kuo mang ngar. He gi enang o vrong rhek ruk endruk tok kat, mnam o kolkhek kavurgem, ko her el kuaro papat te, dok kam pis ko kmuk ruk E Nut ka loot langto yok orom muk kat he khavaeng nguk mang e Yesus kat, he dok kam lluol mnam E Nut ka loot to orom muk tok kat, he nang E Nut ka tavgo kam le ka vle kuo mang nguk tok kat. Ii, tiok ko ko pu el kuaro papat tok, vanangko kam ngae kais mang tete, o vrong tgoluk ngma pis kim dok he khagam dok kam pis ko kmuk.

1Korin 14:19

Vanangko mnam o kolkhek ruk E Nut kakro ngaomevek ngama kaum kam totu pum En, ta ya dok kam vrua rere nong ke laut orom o rhek ruk o mia ngat kais kam ngannik kam smia keknen ngang ngar, nang tlo vu ya dok kam vua ngarkie orom a re langto yok kam hoger tok e.

lEpeses 4:13

Ii, E Nut ner kaelel kim ka ngaomevek to ormor tok kam ngae kais ko mor tgus ngruaka vle enang a valngan to atgiang orom nguaro papat ruk kmor mnam mor mang E Nut Khal he kmokpom kar. Ii, va ner kaelel kim mor tok kat, kam ngae kais ko nguaro papat ruk mang ngak laut kngae kam ttek va ngot kolkol ekam Endo E Nut Thim Orom Ka Msasaen karo keknen tgus ruk ngat ho mi kut ya hak, endruk Endo E Nut Thim Orom Ka Msasaen mruo tho mi kut kaisis kun mnam en ormar. He enang tok, ngruer kais kam ho mi kut kaiser en ko ngrera ttek orom mar tok kat arhe.