Jon Meng solian ti Jises tataiai Jon 1:34 - Seimat

³⁴ Salan wanen, nga ningahi waliko ien i sohotuen ape nga kaxi hani amuto ka tel seilon ie se tel Nati Haeu.”

Jon Meng solian ti Jises tataiai Jon 1:34 ပူးပေါင်းရင်းမြစ်များ

Matiu 11:27

Ape Jises hone teka seilon ukek, “Tel Tamak Haeu hani hatapoen nga pohen ma anesoan. Mewenae tel Tamak Haeu tioi hawane nga tel Natun ma mewenae nga tel Natun tioi hawane tel Tamak Haeu. Ape nga tel Natun nexi haxewa tel Tamak Haeu hani teka seilon ti nga kilami.

Matiu 16:16

Saimon Pita ukek, “O Krais, tel Nati Haeu. Haeu tel tap tahi matean!”

Matiu 17:5

Ti Pita kakak, teik maun tenen xewan wanen man atuhi lato. Ape kakai Haeu i ahuma he maun ien, i ukek, “Tel seilon ie se Natuk pate nga waheni. Nga amuke hawane i. Hong usiwa kakaian!”

Matiu 26:63

Tuahe Jises tai wix pahoi. Ape Kaiapas hone ulei i ukek, “O tuohawa ti puli Haeu na masin o *Krais tel Nati Haeu.”

Matiu 27:40

“O ukek o toi hamanana tehu Ingi Haeu ape o atai aliake leili ngain toluhu! Na masin o tel Nati Haeu, huali aliakewa o ape mosulih ti he teik kros ien!”

Matiu 27:43

Na masin namilon xoxoan ti Haeu ma salan ka i Natun, kako paxaimu na Haeu pahan i huali i aope!”

Matiu 27:54

Lokon ien, tel masiwi ti teka seilon ti hile ma tesol unauan to paxai pepeteni Jises. Ti lato ningahiwa xux i nuea ma hatesol waliko ti i sosohot, lato mamata hawane ape lato ukek, “Salan wanen i Nati Haeu!”

Matiu 3:17

Tataen ien teik kakain ahuma ti *tone Haeu, “Ie se tel Natuk wanen nga waheni, nga amuke hawane i.”

Matiu 4:3

Satan nahih hani kapin ape i ukek, “Na o tel Nati Haeu, kolitiniwa tesol pot ie haniwa bret.”

Matiu 4:6

Ape Satan kakane i, “Na masin salan o tel Nati Haeu, tautit haniwa itan. Ti leili pepai Haeu i kak ukek, “ ‘Haeu talo tesol engelaun tengeni awaiam he minalato lehe kalak taen aem pot kum hamange.’ ” (Ps 91:11-12)

Matiu 8:29

Ti lalu ningahiwa Jises, tesol spirit lialun leilolalu ausini, “Tel Nati Haeu, o paham waliko la ti amite? O nanahima ti aile halialuamite? I tai meiwa ngain ti Haeu kikilami.”

Mak Meng solian ti Jises tataiai Mak 1:1

Hutuiai *meng solian ti *Jises Krais tel Nati Haeu.

Mak Meng solian ti Jises tataiai Mak 1:11

Ape tenen kinax wixima ti *tone Haeu i ukek, “O se Natuk pate nga waheni, nga amuke hawane o.”

Luk Meng solian ti Jises tataiai Luk 1:35

Tel engel kak pahoi i ukek, “Ti pohe Haeu, Holi Spirit atuhi halihu o ape o pet akaik. I hani hatapo tupuan ailei puase Haeu ape laha axai i Nati Haeu.

Luk Meng solian ti Jises tataiai Luk 3:22

Lokon ien Holi Spirit mos hani kapin hanowi tok pux. Ape tenen kinax wixima ti *tone Haeu i ukek, “O se Natuk pate nga waheni, nga amuke hawane o.”

Jon Meng solian ti Jises tataiai Jon 1:18

Tap tel ningahiwen Haeu. Tuahe telawe Natun i kola haxewa hani kaha seilon. Tel Natun se he aten wanen ma i se Haeu.

Jon Meng solian ti Jises tataiai Jon 1:49

Nataniel ausinike hawane, “Tel masiwi, o tel Nati Haeu! O se masiwi tapein ti Israel!”

Jon Meng solian ti Jises tataiai Jon 10:30

Nga ma tel Tamak Haeu amili pakata xox hahawane, amili masin seilon tel.”

Jon Meng solian ti Jises tataiai Jon 11:27

Ape Mata pahoi i ukek, “Tel Masiwi, nga soh hawane ka o *Krais, tel Nati Haeu, tetel Haeu taloma.”

Jon Meng solian ti Jises tataiai Jon 19:7

Teka laha apupuha ien tilol pahoi i ukek, “Tenen nauna ti amite ukek ka liai i mat nake i kakaxi ka i tel Nati Haeu.”

Jon Meng solian ti Jises tataiai Jon 20:28

Tomas paxai tioiwa ape i kak eliel hawane, “O se Masiwi tetak ma Haeu tetak!”

Jon Meng solian ti Jises tataiai Jon 20:31

Tuahe tetesol ti leili pepa ie nga tai lehe amuto soh ka Jises i se *Krais tel Nati Haeu ape ti xoxoi namilomuto tetan, amuto uke *tonain kapi Haeu ti tap tahi tapoan.

Jon Meng solian ti Jises tataiai Jon 6:69

Amite hong soh kakaiam ma amite tioi ka o tel seilon sawisawin wanen ti Haeu.”

Rom Teik pasi Pol hani teka kahikahi Jises Krais ti Rom 1:4

I seilon sawisawin tapein. Ti lalape kui poh, Haeu hamoiha i ti matean ape i kola hawane ka i se Natun. I Jises Krais tetel Masiwi ti kako.

2 Korin 1:19

Tin masin Jises Krais tel Nati Haeu, tetel ti Sailas, Timoti ma nga Pol to kaxi hahani amuto, i kumahe seilon tenen autas, lawe i puas usi hawane kakaian.

Hibru 7:3

Tap tel tioi taman tinan ma sale nenex tetan. Tin laha kum tioi loke takahan ma matean. Tap tel tai konginiwen lokon ti i tapo pupuasan ti hukuminiai Haeu ma seilon, aile ape masin ti tel Nati Haeu, i to masiwi tapein ti hukuminiai Haeu ma seilon lian tehue.

1 Jon 2:23

Tel na i tale tehiton hani tel Nati Haeu, i kum pakata uke kapi tel Taman. Tuahe tel na i kum kaxi puluhini xoxoi namilon ti Krais, hoi liai i pakatawen kapi tel Taman.

1 Jon 3:8

Seilon tetel na i to aile tatale saun lialun, tel seilon ien se nati *Satan, tetel i aile saun lialun lilian ti i tahiwa Haeu. Tuahe Haeu talo Jises Krais hani tehu pon itan ie ti halialu tamusukei pupuase Satan.

1 Jon 4:9

Haeu aile kola haniwen kaha wawahen tetan ti i talo telawe Natun hanima tehu pon itan ie. I aile ukek ien lehe kaha pon ukei tonain kapin ti tap tahi tapoan nake ti soliai puase tel Natun Jises Krais.

1 Jon 5:20

Ape tin kako tioi ka tel Nati Haeu i lua hanima tehu pon itan ie ape i kaxi haxewa hani kako lehe kako nam tioi tel Haeu wanen. Ape aope ie kako pakatawen kapi tel Haeu wanen nake kako papakata kapi Jises Krais tel Natun. I se Haeu wanen ma tetel haniai tonain tuah ti tap tahi tapoan.

2 Jon 1:9

Tel na i kum tu xox ti waliko Jises Krais hanauen ma i hasea ma na hatae waliko ti puki namilon, i kum pakata wanen kapi Haeu. Tel na i puas usi aluini kakain salan ti Krais, i pakata xox kapi lalu hauhua, Haeu tel Tamakako ma tel Natun Jises.

Hahatakei Haeu 2:18

Imuh i kakane nga ukek, “Tai haniwa tel engel ngahatiai teka kahikahik ti Tiatira kewak. Ie se kakai tel Nati Haeu, tetel pulan i kamakam hanowi xekei ah ma titi aen i talepalep hanowi samen tenen laha lui hauniwen.