2 Korin 4:4 - Seimat

⁴ *Satan, tetel i neneini kilan seilon ti tehu pon ie, i aile hapulaxa laha ape laha kum soh ti Jises Krais. Aile ape laha kum paxai tioi meng solian ti Jises Krais ti i hahaxewa lalape xewaian, pohen ma soliaian. Laha kum tua xeu wanen ka Jises Krais se puki masin alia Haeu.

2 Korin 4:4 ပူးပေါင်းရင်းမြစ်များ

Matiu 13:22

Hepekeun ti hina au ti waki maia put to, i kikilami teka seilon laha hong kakai Haeu, tuahe laha namiloi kasini waliko ti itan ie. Pahalaha soxialaha kilan. Namil tenen ien kokongini kakai Haeu ape laha kum hua.

Jon Meng solian ti Jises tataiai Jon 1:14

Tetel i Kakain i sohot seilon hanowi kaha ape i luama to kapi kaha ti tehu pon itan ie. Kaha ningahi lalape pohen ma soliaian, tel pate tuah wanen i luama ti Haeu tel Taman. Tap tel soliaian masin tetan. Ti soliaian i kola lalape wawahen ti Haeu hani kaha ape i kola hatakei lawe waliko salan ti Haeu.

Jon Meng solian ti Jises tataiai Jon 1:18

Tap tel ningahiwen Haeu. Tuahe telawe Natun i kola haxewa hani kaha seilon. Tel Natun se he aten wanen ma i se Haeu.

Jon Meng solian ti Jises tataiai Jon 12:31

Aope ie teka seilon ti tehu pon ie laha tu ti sulusulu nake ti lialui woulaha. Tuahe taun ape i tahiawen ti nga waxaini xaxaweni *Satan tel i neini hahalialu laha.

Jon Meng solian ti Jises tataiai Jon 12:35

Jises pahoi laha ukek, “Kum kue nga tel haxewaiamuto ape kumahe kapimuto. Aile ape ti nga tutuen kapimuto, usiwa nenein tetak lehe amuto kum puhei ailei saun lialun. Ien masin seilon na i nahih tatanga leili tilokoan.

Jon Meng solian ti Jises tataiai Jon 12:40

“Pulalaha masin ka pulaxa. Laha papaxai waliko ti Haeu ailele tuahe laha kum ningahi. Patulaha pate ailan, laha kum xeu. Ape laha kum towiahu ti lialui woulaha lehe Haeu aile haewia laha.” (Isa 6:10)

Jon Meng solian ti Jises tataiai Jon 12:45

Tel i paxaiwen nga, i paxai hetekiewen tel i taloma nga.

Jon Meng solian ti Jises tataiai Jon 14:30

“Nga kum kak kue kapimuto nake *Satan lehe i tohongi aile halialuak. Tuahe pohen i kum pon kui pohek.

Jon Meng solian ti Jises tataiai Jon 15:24

Na nga tai aile waliko tenen lalap ti pohe Haeu, tap tel pon tienialaha ti lialui woulaha. Tuahe kalak laha ningahiwen, laha watakai ati amili tel Tamak.

Jon Meng solian ti Jises tataiai Jon 16:11

Holi Spirit kola ka Haeu hoi i namiloiwen ukek ka i axi kawatan hani *Satan tel neini halialui seilon ma hani teteka ti ailei saun lialun.

Jon Meng solian ti Jises tataiai Jon 8:12

Jises kakane ulei teka kilai seilon, “Nga masin xewai alon. Nga kola aweisal tenen sawisawin hani seilon. Tel na i sohot kahikahik, tap i po to ti tilokoan ailei saun lialun nake nga tel neinian lehe i to kapi Haeu lian tehue.”

Aposel 26:18

O haxewai pulalaha waxi laha towiahu ti tilokoan hani xewan, ti pohe *Satan hani Haeu lehe Haeu oxoxi laha ti kawatan ti lialui woulaha. Ape laha selaia hani ailei puasan nake namilolaha xoxoan tetak.’

Aposel 26:23

Nga kakaxi ka *Krais, tetel Haeu taloma, i tunahi kawatan ape laha telei i. Tin nga kakaxi ka i tetel Haeu hamoihamu imat ti lawe seilon maten. Kakaian masin teik xewan hani teka Ju ma *teka kumahe Ju.”

1 Korin 10:20

Kumahe laha hahani Haeu, laha tua aile hahani *spirit lialun ti laha lolotui. Kumahe wanen pahak amuto tuai laha lotuiai spirit lialun.

2 Korin 2:11

Pahak amuto hong usiwa kakaiak sale tel seilon ien lehe *Satan kum pon neini hakalalaiamuto. Pake kako tioi sale nonosenan.

2 Korin 2:12

Ti nga lua haniwa tehu taon Troas kaxiai *meng solian ti Jises Krais, nga tunahi ka hoi liai Haeu apeseniwen aweisal ti tenen puasain ien.

2 Korin 3:11

Tenen namil ti Haeu xinotimu imat kapi teka seilon tetan Ju se tuah wanen, tuahe i kum hamalum lian tehue. Pamu soliaian tenen namil haun ti Haeu xinoti kapi kako teka kahikahi Krais nake tap tahi puas mongaian.

2 Korin 3:14

Tuahe namili teka Ju uke he takalah nake lato seilon tenen hatongetong. Hanima taen tetelao, na lato ridai pepai Moses, tin lato kum xeu ka soliai tenen namil ti Haeu xinotiwen kapi lato i tapoen. Lato masin ka tenen waliko titiehi namilolato. Mewenae na lato hana hatapo namilolato hani Jises Krais, namilolato xeu tautamus. Ien masin ka teik waliko i titiehi namilolato i xaxau.

2 Korin 3:18

Hanowi ka Haeu xaxaweniwen waliko ti i hatiloko namilokako ape kako paxai tioi lalape soliai Jises Krais tel Masiwi. Ti pohe Holi Spirit, kako sohia ahe tatale ti sohot hanowi Jises Krais. Ape ti sohiaiakako, seilon liai paxai tioi ka Jises Krais se tetel tuah tapein.

2 Korin 4:6

Ti Haeu tanomi tehu pon ie, i tua kak ka xewan haxewawa tilokoan ape i sohot. I tetel i aile ape meng solian ti Jises haxewa hawane namilokako teka kahikahin. I aile ukek lehe kako xeu ka xewai Haeu ma lalape soliaian hetekie pohen kako paxai nonoma ti Jises Krais.

Galasia 1:4

Jises mat ti ukei kahi saun lialun ti kako lehe i awai kako ti saun ma namil lialun ti seilon ti aope ie. I onoteni hawane namili tel Tamakako Haeu.

Epesus 2:2

Ti lokon ien amuto aile usiusi waliko ti teka seilon lialun ailele. Amuto hong usi kakai *Satan tel masiwi ti teka *spirit lialun laha toto he maun. I tetel i pupuas leili teka laha tale tehitolaha hani Haeu.

Epesus 6:12

Kumahe kako hihilei seilon, kako haeliel hawanewa hil pahoiai *spirit lialun ma teka masiwi ti laha, teteka laha toto he maun neini halialui teka seilon ti tehu pon ie.

Pilipai 2:6

Kalak i se Haeu, i kum aka kongini tesol totone Haeu.

Kolosi 1:15

Kaha kum pon ningahiai Haeu tuahe ti lokon Jises Krais tel Natun sohotuma tel seilon, i kola hatake hani kaha Haeu tel Taman nake i tin masin tel Taman. I Masiwi tapein ti lawe waliko Haeu tanomi.

Kolosi 1:27

Haeu ailewen namilon ti lehe teka seilon tetan tioi ka tin pahan i hani *teka kumahe Ju waliko tenen pate solian. Waliko tenen solian ien se Krais i pupuas leilomuto lehe namilomuto i eliel hawane ti ukei waliko solian ti Haeu kakawen i hani.

1 Timoti 1:11

Tenen kakain salan ien kako tunahi leili tenen meng pate solian ti Jises. Haeu tel pate tuah hani nga kaxi ahutian.

Taitus 2:13

Ti kaha puas usiusi nauna ien, kaha mon amumuke aliai Jises Krais hetekie lalape xewaian ma pohen. I Haeu tel Masiwi ti kaha ma awaiakaha.

Hibru 1:3

Puki alia Jises hina lalape pohe Haeu ma soliaian. Lawe namilon, woun ma pupuasan kola hawane ka puki i se Haeu. Lawe waliko i soli hahamalum ti tuahe pohe kakaian. I tetel i mat awaiakaha ti kawatan ti lialui woukaha lehe kaha sohot seilon haun ti usiai nauna ti Haeu. Muhin i to sai manau ti Haeu tel pate pohen, tetesol totone Masiwi.

Hibru 6:4

Teka seilon laha tale tamusuke tehitolaha hani Krais ma nauna tetan, i kum pon na laha soh ulea ti Krais. Teka seilon ien, kemuk laha tioiwen kakain salan ti Haeu. Laha ilameniwen *lalape soliai Haeu ma puase Holi Spirit.

2 Pita 1:19

Aile ape kakaiamite sale puase Krais i kola hawane ka waliko ti *teka kuluiai kakai Haeu kakawen se pate salan. Amuto nam waxiwa kakaialaha nake i huali amuto paxai tioiai waliko tenen salan masin ti xewai al i haxewa aweisalumuto. Ape taun ti aliai Jises Krais, i haxewa hawane lawe waliko hani amuto masin ti tehu kohot towisaian i hatapo tilokoan.

1 Jon 2:11

Tuahe tel na i watakai seilon liai, i masin leili tilokoan. Lialui woun hapulaxa i. I masin seilon tenen i nanahih leili tilokoan ape i kum paxai uke aweisalun.

1 Jon 5:19

Kako tioi ka kako se nati Haeu a teka seilon laha kumahe tetan, laha se hahitake nenein ti Satan.