Yuuda 1:6 - Imuuma Eehya

⁶ Muhiitoke igha, kora abhamaraika bhano bhataanaghëri ibhyeo ibhyabho, bhakatigha ahasë ahaabho aha okomenya, Waryobha yabhabhoha na ebheraangʼani mu-kisuntë. Nkoghanya bharë urusikö oronene roora, urwa okobhotorrwa ikiina.

Yuuda 1:6 ပူးပေါင်းရင်းမြစ်များ

Mataayo 10:15

No-bhoheene nkobhatëëbhya igha, hano Waryobha arebhotorra abhantö bhonswe igho ibhiina ibhyabho, narishibhya bhököngʼu abhantö abha mu-mughi muyö okokera bhono arishibhya abhantö abha Sodoma na Ghomora.”

Mataayo 25:41

“Ho ndemara ntëëbhi bhaara urinyoora bharëngë bhömösi ubhwane igha, ‘Murwe hano, ko bhoora bhëënyu, mwaihiimwa na Waryobha. Moghende mo-morro ghotakurima amakora ghonswe igho, ahasë hano Waryobha yaasëëmëërya Oghosambwa na abhamaraika abha Oghosambwa ghuyö.

Mataayo 8:29

Mbe, amasambwa ghayö ghakakongera Yëësu igha, “Ë Omoona uwa Waryobha, iyakë ukutuna okotokora? Kasi wishirë ukutusikya, kora enkaagha eno Waryobha yaatoora-ho iya ukutusikya etaraahika?”

Yohana 8:44

Bhëënyu na-abha Oghosambwa mörë, ghuyö ngwo suwëënyu. Oronamba urwa suwëënyu urwa okokora ghano akutuna, ndwo monaro. Oghosambwa ukurwa bhosemoka n-ghwiti, ghwiki teghohanshirë obhoheene hë, ko bhoora teghoona obhoheene hë. Hano Oghosambwa ghwaghamba obhorongo, iyö ne-teemo iyaaghwo ko bhoora n-gorongo, ghwiki ngwo suwaabho obhorongo bhwonswe igho.

Abharuumi 2:5

Hano okomaaha igha oona ekeghaaka, kora tukutuna igha ohongore ëbhëbhë ibhyaho hë, ku bhuyö nkwibheekera örë ubhushibhu, okohekera ku-rusikö roora Waryobha arebhotora ubhwa heene ibhiina ibhya abhantö.

Abhaëfësö 6:12

Nkobhatëëbhya ndë igho ko bhoora igha, riihë reno tukwitana, ti-irya kinyabhantö hë, kasi nkwitana törë riihë na ëbhëntö bheno bhetakomaahwa, ibhya ubhwera na obhotoro. Nkwitana törë riihë na abhanene abha amangʼana amaghogho, bhano bhakotonga ekebhara keno. Nkwitana törë riihë na amasambwa ghonswe igho ghano ghakokora amangʼana amaghogho, na amatöngi agha ahasë hano hatakomaahwa.

Abhaëbhuraania 10:27

Kasi keno ukunyoora kitighaayë, no-kobha na entarëki iya okobhotorrwa ikiina na omorro ghono ghurisikya abhabhisa abha Waryobha.

2 Peetero 2:4

Abhamaraika bhano bhaakörrë ëbhëbhë, Waryobha tiyaabhatighirë hë. Kasi yaabhatabhutirë mu-kyaro ikya abhaku, bhakabhohwa-mo na ebheraangʼani mu-kisuntë. Mu-kyaro ikya abhaku muyö, mo bhakoghanyera urusikö urwa okobhotorrwa ikiina.

2 Peetero 2:9

Ku bhuyö momanye igha, Omonene Waryobha namanyirë enshera iya ökötöörya abhantö abhaaye, bharwe mo-mashaashyo. Kora ghwiki namanyirë bhono arishibhya abhakora amaghogho, urusikö urwa okobhabhotorra ikiina.

Yuuda 1:13

Tebhakwirebherra hë. Bhaabha kya amayengo amanene agha ku-nyansha. Amangʼana aghaabho agha sënsöni ghano bhakokora, gharomaana kya rihuro irya amayengo. N-kya sinyota seno sikwinaaranaara igho, kora teseena ubhwera hë. Waryobha yaabhatoorra-ho emongo iyaabho, ahasë aha ikisuntë ekenene amakora ghonswe igho.

Okohonyora 20:10

Mbe, Oghosambwa ghono ghwaabhangʼainirë, ngoretabhutwa mu-nyansha iyö ikwibhugha omorro na ubhurutu ubhwa ikibhiriiti. Muyö mo ughutyënyi ghoora na ömörööti uwa obhorongo oora, bhaarëkëëywë-mo. Muyö mo bhareteeswanga ubhutikö na omobhasö, amakora ghonswe igho.

Okohonyora 20:2

Akaghoota ughushoka ghoora. Ughushoka ghuyö, ngo inshoka iya kare eera ekobherekerwa igha, Nyangasheka, handë igha Oghosambwa. Akaghobhoha na ekeraangʼani, akaghotabhuta mu-bhwina ubhwa mu-kyaro ikya abhaku, akasiika-ho ekesaku, akamaameka-ko umuhuri ughwa ubhurimbo, okore ghotakaasha okongʼaina ghwiki Abhakyaro. Oghosambwa ghuyö ngorebhohwa imyoka ëkëkwë ëkëmwë. Hano ribhagha riyö rerehwa, ni-igha ghuruusibhwi mo-kebhohe ko-nkaagha enke igho.