Yohana 5:19 - Imuuma Eehya

¹⁹ Yëësu akahonshora abhatangati bhayö igha, “No-bhoheene nkobhatëëbhya igha, Omoona uwa Waryobha, takotora okokora ryoryonswe igho ko obhotoro ubhwaye hë. Kasi nkokora arë ghano akomaaha Suwaabho arakora. Ghonswe igho ghano Suwaabho akokora, ngo ghayöghayö na Omoona wonswe araakore.

Yohana 5:19 ပူးပေါင်းရင်းမြစ်များ

Mataayo 26:39

Akasuntara mbere hake igho, akairekera hansë bhubhuumaayë, akasaasaama Waryobha igha, “Taata, hano oraanyoore obhotoro bhooho, unduusiri-ho engʼana eno, kasi otakaakora kya bhono öni nkutuna, okore bhono uwe ukutuna.”

Ruuka 21:15

Öni nendebhahaana obhongʼaini na amangʼana agha okoghamba, kora abhabhisa abhëënyu tebharetora ukwanga, handë okobhanyeera senkaani.

Yohana 10:18

Taaho ömöntö ono akotora ukunduusya öbhöhöru ubhwane. Nö-öni umwene nkwiruusya öbhöhöru ubhwane. Öni neena obhotoro ubhwa ukwiruusya öbhöhöru ubhwane, ghwiki neena obhotoro ubhwa okobhoghegha. N-Taata umwene ono yaantoma we yaandaghërrya okokora igho.”

Yohana 12:49

Tengambirë amangʼana ghayö ku ubhwera ubhwane umwene hë, kasi Taata ono yaantoma, we yaandaghërrya amangʼana agha okoghamba, na kya bhono ndaaghaghambe.

Yohana 12:50

Ghwiki, nemanyirë igha amaraghërryö aghaaye, nkohaana gharë abhantö öbhöhöru ubhwa amakora ghonswe igho. Mbe, ghayö nkoghamba, nkoghaghamba ndë kya bhono Taata umwene yaantëëbhëri igha ngaghambe.”

Yohana 14:10

Kasi tukukumya igha öni m-mönsë iya Taata ndëngë hë? Amangʼana ghayö nkobhatëëbhya, teghakurwa mo-maitegherro aghaane hë, kasi nko-Taata ghakurwa ono arëngë mönsë iyaane, uyö we akokora emeremo ighyaye gheno.

Yohana 2:19

Yëësu akabhahonshora igha, “Motemore risengerro reno, na öni nendaarehaghaashe ku-sinsikö isatö.”

Yohana 3:3

Yëësu akamohonshora igha, “No-bhoheene nkökötëëbhya, taaho ömöntö ono akotora okosoha mo-Bhokama ubhwa Waryobha hano ataibhööywë urwa kabhërë.”

Yohana 5:21

Kya bhono Taata akuryökya abhaku, na okobhahaana öbhöhöru, ni-ighoigho Omoona wonswe akohaana öbhöhöru ömöntö wowonswe ono akutuna igha ahaane.

Yohana 6:38

Öni tenaasha ukurwa mu-ryobha okore nkore bhono nkutuna, kasi naasha igha, nkore bhono akutuna Taata ono yaantoma.

Yohana 8:28

Mbe Yëësu akakangʼasërrya igha, “Hano muririinia Omoona uwa Ömöntö okore mumwite, hayö bhoono ho moremanya igha ‘Öni nö-öni Omoona uwa ömöntö.’ Ghwiki ho moremanya igha ghonswe igho ghano nkokora, tenkokora kya bhono öni umwene nkutuna hë, kasi nkoghamba ndë ghano Taata yaanyëghya.

Yohana 9:4

Ni-igha tokore emeremo ighya Waryobha ono yaantoma, enkaagha eno iryobha rekeeho. Ko bhoora ubhutikö nkuusha bhörë, hano totaretora okokora emeremo gheno.

Amangʼana agha Abhatomwa 2:24

Kasi Waryobha yaamuryökëri ukurwa mo-bhaku. Akamuruusirya-ho öbhörrö ubhwa uruku, ko bhoora singuru isya uruku, tesekaatörrë okomorebherra hë.

Abharuumi 6:4

Ensonga iyaamo ni-igha, hano twaabhatiisiibhwi, ntwaabhaayë kya bhano tukuurë na okobheekwa hamwë nawe. Yëësu Kiristo yaamarrë akaryoka ko obhotoro obhonene ubhwa Taata Waryobha, ku bhuyö na bhëëtö bhonswe, ni-igha tobhe na eteemo iya öbhömënyi obhohya.

Abharuumi 8:11

Umwika Ömöhörëëru ono amënyirë mo-senkoro isyënyu, uyö we Umwika uwa Waryobha ono yaaryökëri Kiristo Yëësu. Ku bhuyö Waryobha nariryökya ëmëbhërë ighyënyu gheno ghikukwa ko okohetera obhotoro ubhwa Umwika Ömöhörëëru uyöuyö.

1 Abhakörintö 15:12

Mbe, nyoore nkoraareka törë igha, Kiristo yaaryökirë ukurwa mo-bhaku, bhoono n-kwakë abhandë mö-bhëënyu bhakoghamba igha, ukuryoka ukwa abhaku tekooho hë?

2 Abhakörintö 4:14

Nkoghamba törë igho, ko bhoora ntomanyirë igha, Waryobha ono yaaryökya Omonene uwëëtö Yëësu Kiristo, na bhëëtö bhonswe narituryökya ighoigho, bhëëtö na bhëënyu bhonswe igho, naretokora tobhe hamwë na Yëësu Kiristo mbere iya Waryobha.

2 Abhakörintö 5:10

Ko bhoora bhëëtö bhonswe igho, nturimerra mbere iya ikitumbë ikya Yëësu Kiristo ikya okobhotorra ibhiina, okore kera ömöntö, ahakwe ko okorengʼaana na amangʼana ghano yaakora, ko-kebhara kono, nyoore m-maiya handë igha m-maghogho.

Abhaëfësö 2:5

Ntwaarë kya abhaku ko okoghera ukwa obhosarya ubhwëtö, akatohaana öbhöhöru obhohya kya bhono yaahaana Yëësu Kiristo. Amaabhë agha Waryobha, ngo ghaaghërrë akabhatöörya.

Abhaëfësö 3:16

Nkobhasaasaamera ndë ku-Waryobha igha, ku ubhuhika ubhwaye ubhwaru bhono aanabho, Umwika Ömöhörëëru abhahaane singuru, mokongʼe mo-senkoro isyënyu,

Abhafiripi 3:21

We aana obhotoro ubhwa okotoora ëbhëntö bhyonswe igho, bhebhe hansë iya öbhötöngi ubhwaye. Ko obhotoro bhuyö, narisyörya ëmëbhërë ighyëtö ëmëtëntëëru gheno, ghebhe na ubhuhika kya bhoora ömöbhërë ughwaye ghörë.

Abhafiripi 4:13

Nkotora ndë okokora ghonswe igho ghayö, ko bhoora Kiristo we akongʼaana singuru isya okokora ghayö.

Abhakorosaai 1:11

Torabhasabhera igha, Waryobha abhatöörringa ku singuru isya ubhuhika ubhwaye, okore möghömërringa ghonswe igho motakaarosa. Mushomerwenga

Abhakorosaai 1:16

Ko bhoora ëbhëntö bhyonswe igho bhyaabhömbirwë okohetera ku-uyö, ibhya mu-ryobha na ibhya ko-kebhara, bheno bhekomaahekana na bheno bhetakomaahekana, mbokaabha ubhwera handë obhokama, obhonene handë singuru. Bhyonswe igho mbyaabhömbirwë, ko okoghera iya we.

1 Abhatësarönikë 4:14

Bhëëtö Abhakiristo ntomanyirë igha Yëësu yaakuurë, akamara akaryoka. Ku bhuyö, nkwesegha törë igha, Waryobha narereeta Yëësu hamwë na abhantö bhonswe igho bhano bhaakwa na eno bharamukumya.

1 Peetero 3:18

Yëësu Kiristo wonswe n-kamwë igho yaakuurë ko okoghera iya ëbhëbhë ibhyëtö, okore atwighwerrani na Waryobha, kasi tiyaarë na ëbhëbhë bhyobhyonswe igho hë. M-möntö uwa heene yaarë. Yaaitirwë kinyamöbhërë, kasi ko obhotoro ubhwa Umwika Ömöhörëëru, akanyoora ghwiki öbhöhöru.

Okohonyora 2:23

Ghwiki obhoheene ni-igha, nendaaite abhasoorani abhaaye. Hayö ho abhantö abha ekanisa bhareemanya igha, öni nkwitaaha ndë enkoro na amaitegherro agha ömöntö. Nendehaka kera ömöntö mö-bhëënyu, ko okorengʼaana na ghano yaakora.