Yohana 16:11 - Imuuma Eehya

¹¹ Ko amangʼana agha okobhotorrwa ukwabho ikiina, n-ko bhoora Oghosambwa ghono ghokotonga ko-kebhara kono, ghwamara okobhotorrwa ikiina.

Yohana 16:11 ပူးပေါင်းရင်းမြစ်များ

Mataayo 12:18

“Tamaaha, ono we ömököri uwaane uwa emeremo ono naahööyë, omoghonshe uwaane ono aköntëghërya. Nendaamohaane Umwika uwaane, okore araareke amangʼana aghaane agha obhoheene ko-Bhakyaro.

Mataayo 12:36

No-bhoheene nkobhatëëbhya igha, rono Waryobha arebhotorra abhantö ibhiina ibhyabho, abhantö mbariruusya amasaabhu agha amangʼana ghano bhaaghamba, ghano ghataana ubhwera.

Ruuka 10:18

Yëësu akabhahonshora igha, “Naarë ndööshë Oghosambwa, ghoraharaatoka ukurwa mu-ryobha kya ëkëmësyö ikya enkobha.

Yohana 12:31

Bhoono enkaagha iya Waryobha iya okobhotorra ekebhara keno ikiina, ihikirë. Bhoono Oghosambwa ghono ghokotonga ko-kebhara kono, ngoraatabhutwe kebhara iyö.

Yohana 14:30

Öni tentore ukushumaasha na bhëënyu ku-ribhagha ritambë hë, ko bhoora Oghosambwa öghötöngi ughwa ekebhara keno ghoraasha. Kasi teghoona ubhwera bhwobhwonswe igho ku-öni hë.

Yohana 16:12

“Amangʼana m-maaru nkenagho agha okobhatëëbhya, kasi temotore okoghamanya ko bhoono igho hë.

Amangʼana agha Abhatomwa 10:42

Akatoraghërrya toraarekere abhantö, na ukwimererra igha, we yaatoorwa-ho na Waryobha igha, abhotore ibhiina ibhya abhahöru na abhaku.

Amangʼana agha Abhatomwa 24:25

Pauro akaghëndërrya okobhatëëbhya amangʼana ghano Waryobha akutuna bhakore, na agha ömöntö ukwirebherra atakaakora amangʼana amaghogho na agha urusikö urwa umuhiko urwa okobhotora ibhiina. Hano Fëriki yaaighuurë ghayö, akoobhoha. Akatëëbhya Pauro igha, “Bhoono uwe kaghi, hano ndinyoora umweya, nendekobherekera ghwiki.”

Amangʼana agha Abhatomwa 26:18

Okore obharamöki bharwe mu-kisuntë, bhaghi ko-bhorabhu. Bharwe mo-mabhoko agha Oghosambwa, bhaghi ku-Waryobha. Hayö ho bhoono bhaabherwe ëbhëbhë ibhyabho, okohetera ku-mukumo ughwabho ku-öni. Bhabhe hamwë na abhantö abha Waryobha bhonswe igho bhano bhasaabhuurwa.’

Abharuumi 16:20

Bhoono Waryobha ono akotohaana omorembe, m-böngö araatashere hansë Oghosambwa. Naraaghotashere mo-bhora ubhwa amaghörö aghëëtö. Örööbhö urwa Omonene uwëëtö Yëësu Kiristo robhe hamwë na bhëënyu. [Amina.]

Abharuumi 2:16

Ni-igho erebha ko-nkaagha iya okobhotorrwa ibhiina. Hayö ho Waryobha arebhotorra abhantö ibhiina okohetera ku-Kiristo Yëësu. Narebhabhotorra ibhiina ibhyabho kora imbumbure iya amaitegherro aghaabho. Amangʼana Amaiya ghano nkoraareka, ni-igho gharë.

1 Abhakörintö 4:5

Ku bhuyö motakaabhotora ikiina, enkaagha iyaako etaraabha, moghanye okohekera hano Omonene ariisha. We aremoreka amangʼana agha mu-kisuntë ghonswe igho ghano ghabhisirwë, na okotoora harabhu ghano gharëngë mo-senkoro isya abhantö. Hayö ho bhoono kera ömöntö arinyoora sinkuma seno aingʼarëëyi, ukurwa ku-Waryobha.

2 Abhakörintö 4:4

Amangʼana Amaiya teghakomanyekana ko-bhantö bhayö, ko bhoora Oghosambwa, oghokama ughwa ekebhara keno, ghoroghaini emetwe ighya abhantö bhano bhatakukumya. Nkyo kekoghera bhatakomaaha obhorabhu ubhwa Amangʼana Amaiya agha emerengaari ighya Yëësu Kiristo, uyö we ituubho iya Waryobha.

Abhaëfësö 2:2

Enkaagha iyö, mwaakoranga amangʼana agha ko-kebhara kono. Kora mwaasorananga omotangati omoghogho uyö, Omonene uwa singuru isya ighörö isya amasambwa. Uyö we bhoono igho akokora emeremo mo-bhantö bhano bhatakwighwera Waryobha.

Abhakorosaai 2:15

Ko okohetera omosarabha, Waryobha akaruusya amasambwa obhokama ubhwagho na ubhwera ubhwagho akaghakera ku ukukirirrya, akaghasöökërrya harabhu igho.

Abhaëbhuraania 2:14

Mbe, ko bhoora ntoona ëmëbhërë na amaanyinga, Yëësu Kiristo wonswe yaaishirë akabha na ömöbhërë na amaanyinga kya bhëëtö. Yaakörrë igho, okore ko okohetera ukukwa ukwaye, asiki Oghosambwa nyabhwera ubhwa uruku.

Abhaëbhuraania 6:2

Totakaakyorra amëëghyö agha obhobhatiisyo, okosambekera amabhoko, ukuryoka ukwa abhaku na okobhotorrwa ikiina ukwa amakora ghonswe igho.

Abhaëbhuraania 9:27

Mbe, kya bhoora abhantö bhaatoorerwa-ho ukukwa kamwë igho, na hano ömöntö amarrë ukukwa, keno keekoroobhera, no-kobhotorrwa ikiina.

2 Peetero 3:7

Ghwiki ko okohetera engʼana iyöiyö, Waryobha yatigha-ho mu-ryobha na ekebhara, okore bhiishe okosambwa mo-morro. Yabhitigha-ho okore bheghanye urusikö rono arebhotorra ibhiina abhantö bhano bhatakumwighwera, hayö bhoono, ho bharisika.

1 Yohana 3:8

Kasi ömöntö wowonswe ono aköghëndërrya okokora ëbhëbhë, uyö m-möntö uwa Oghosambwa. Ntomanyirë igho, ko bhoora Oghosambwa n-gököri ughwa ëbhëbhë ukurwa kare. Kiyö nkyo ikibhuno keno kyaaghërrë Omoona uwa Waryobha akaasha ko-kebhara kono, okore asari emeremo ighya Oghosambwa.

Okohonyora 1:7

Motamaaha! Nariisha arëngë ko-masaarö! Kera ömöntö naremomaaha, kora abhantö bhaara bhaamöbhëtirë ritimö, bhayö bhonswe mbaremomaaha. Amakabhira ghonswe igho ko-kebhara ngarikuura ko okoghera iya Yëësu. Yëë. Amina.