Yohana 15:24 - Imuuma Eehya

²⁴ Singa ntakora emeremo gheno ghetakokorwa na ömöntö wowonswe oora, tebhakaabhaayë na ëbhëbhë hë. Kasi bhoono, bharööshë emeremo gheno naakörrë, bhandëghirë öni hamwë na Taata wonswe.

Yohana 15:24 ပူးပေါင်းရင်းမြစ်များ

Mataayo 11:5

Igha, abhahukuru nkomaaha bharë, amatengʼo nkoghenda gharë, abhaghenge nkosaabhuurwa bharë, abhakirö nkwighwa bharë, abhaku nkuryökibhwa bharë, kora abhatöbhu nkoraarekerwa bharë Amangʼana Amaiya.

Mataayo 21:32

Yohana yaaishirë kö-bhëënyu, okore abhöörökërri enshera iya heene, bhëënyu temwamukumiri hë. Kasi abhaghööti abha righööti, na abhasooraare, bho bhakamukumya. Nokaanyoora mwaarööshë ghonswe ghayö, kasi emetwe ighyënyu, teghyaisyörya, kora temwamukumiri hë.”

Mataayo 9:33

Yëësu akaata risambwa ukurwa kö-möntö uyö. Rimuumu riyö rekasimya ukushumaasha. Abhantö bhano bhaarë hayö, bhakaroghoora bhököngʼu, kora bhakaghamba igha, “Engʼana kya eno tiyaakakörrwë Isiraëri hano hë.”

Maariko 2:12

Enkaagha eno abhantö bhonswe igho bhamomaaherranga, hayö na hayö igho, ömörööyë uyö akemerra, akaghegha rishambi iryaye, akarishoka kebhara. Abhantö bhonswe igho bhakaroghoora, bhakatöönia Waryobha, bharaghamba igha, “Tetwakarööshë engʼana kya eno hë!”

Ruuka 24:19

Wonswe akamöbhöörya igha, “N-ghaahë ghayö?” Bhakamohonshora igha, “Amangʼana agha Yëësu uwa Nazarëëti. Yëësu uyö, yaarë ömörööti uwa obhotoro ko obhoghambi ubhwaye, na ko-mangʼana aghaaye ku-Waryobha na ko-bhantö bhonswe igho.

Yohana 10:32

Kasi Yëësu akabhatëëbhya igha, “Naabhöörökya amakono amaiya amaaru ghano naakora ko obhotoro ubhwa Taata. Ne-ngʼana kë eno ekoghera moratuna monteme na amaghena?”

Yohana 10:37

Nyoore ntakokora emeremo gheno Taata akokora, motakaankumya.

Yohana 12:10

Mbe, abhanene abha abhasëngëri, bhakakora ikiina ikya ukwita Raazaaro wonswe,

Yohana 12:45

Ömöntö ono akommaaha, tö-öni akomaaha hë, no-ono yaantoma akomaaha.

Yohana 14:9

Yëësu akamohonshora igha, “Kerenga naabha hamwë na bhëënyu ribhagha ryangʼana hayö Firipö, tuwakaammanyirë hë? Ömöntö ono andööshë, uyö n-Taata arööshë, bhoono n-kwakë ököntëëbhya igha, ‘Utwöröki Taata?’

Yohana 15:21

Kasi bharebhakorra ghayö ghonswe igho, ko bhoora igha, m-basoorani abhaane mörë. Kora ghwiki n-ko okoghera iya bhoora bhatamanyirë ono yaantoma.

Yohana 15:22

Singa ntaasha nshumaashe nabho, tebhakaabhaayë na ëbhëbhë hë. Kasi bhoono, tebhaana ikitamërryö ikya ëbhëbhë ibhyabho hë.

Yohana 15:23

Ömöntö ono akondegha, nkoregha arë na Taata wonswe.

Yohana 16:9

Ko amangʼana agha ëbhëbhë ibhyabho, n-ko okoghera iya ukwanga ukunkumya.

Yohana 3:2

Nikodeemo uyö, akaghya ku-Yëësu ubhutikö, akamötëëbhya igha, “Raabhi, ntomanyirë igha uwe nu-mwëghya ono watomwa na Waryobha, ko bhoora taaho ömöntö ono akotora okokora ebhemanyërryö ibhya amakono bheno okokora, hano oraanyoore Waryobha atarëngë hamwë nawe.”

Yohana 5:36

Kasi ubhwimërërri bhono öni neenabho, m-bonene okokera ubhwa Yohana bhoora. Ubhwimërërri bhuyö, ne-meremo gheno Taata yaangʼaayë igha ngemarërri. Emeremo ighyane nkwörökya ghërë igha, Taata Waryobha we yaantoma.

Yohana 6:36

“Kasi öni naabhatëëbhya igha, nokaanyoora möndööshë, kasi timukukumya hë.

Yohana 7:31

Kasi abhantö abhaaru bhano bhaarë hayö bhakakumya Yëësu. Abhantö bhayö bhakaghamba igha, “Hano Kiristo ariisha, narekora ebhemanyërryö ibhyaru ibhya amakono okokera bheno ömöntö ono yaakora?”

Yohana 9:32

Ukurwa kare, tetwakaighuurë kora kamwë igho igha, ömöntö ahwënëri ömöntö ono yaaibhorwa umuhukuru.

Yohana 9:41

Yëësu akabhahonshora igha, “Singa naasha nyoore igha m-bahukuru mörë, temokaabhaayë na isoro irya öbhököri ubhwa ëbhëbhë hë. Kasi bhëënyu nkoghamba mörë igha, nkomaaha mörë, ku bhuyö nköghëndërrya mörë okobha na risoro iryënyu, irya öbhököri ubhwa ëbhëbhë.”

Amangʼana agha Abhatomwa 10:38

Waryobha yaahööyë Yëësu uwa Nazarëëti, ko okomohaana Umwika Ömöhörëëru na obhotoro. Yëësu uyö, yaainaarrënaarrë arakora amangʼana amaiya na ukuhwënia bhonswe igho, bhano bhaanyankibhwanga na Oghosambwa, ko bhoora Waryobha, n-hamwë yaarë nawe.

Amangʼana agha Abhatomwa 2:22

Peetero akaghëndërrya okoghamba igha, “Bhëënyu bhare Abhaisiraëri, munyitegherre bhuuya! Waryobha yaatöörrë Yëësu uwa Nazarëëti harabhu igho bhöröngë bhwënyu, ko enshera iya amakono, na ebhemanyërryö ibhyaru mö-bhëënyu mono, ghayö mmoghamanyirë bhuuya.

Abharuumi 1:30

Ghwiki ni-igha, nkohanga bharë abhantö amangʼana, mbarëghirë Waryobha, m-batöki abha abhantö, mbaana ekeghaaka na ikiheemere. Keno bhakutuna nkaagha syonswe igho, nu-kutuna enshera eehya iya okokora amangʼana amaghogho, ghano ghatakaakörrwë na ömöntö uwöndë. Abhantö bhayö, tebhakosooka abhaibhöri abhaabho hë.

2 Timoteo 3:4

Abhantö bhayö, mbarekorranga abhantö inikö, mbarebhanga na emetwe ëmëköngʼu, abha ikiheemere. Mbarehansha oronamba urwa ko-kebhara kono, okokera okohansha Waryobha.

Yaakobho 4:4

Bhëënyu tëmörëngë abhantö abha heene ku-Waryobha hë, n-kya abhakari abhasooraare mörë. Kasi temomanyirë igha hano ömöntö yaghootana obhosaani na ekebhara, nkobha arë umubhisa uwa Waryobha? Ömöntö wowonswe ono araatune okoghootana obhosaani na ekebhara, uyö nkobha arë umubhisa uwa Waryobha.