Ruuka 12:5 - Imuuma Eehya

⁵ Kasi nendaabhatëëbhi uwa okoobhoha. Mwobhohenga Waryobha, ko bhoora hano yamara ukwita ömöntö, aana ubhwera ubhwa okomorekera mo-morro ghotakurima. Uyö we uwa okoobhoha.

Ruuka 12:5 ပူးပေါင်းရင်းမြစ်များ

Mataayo 10:28

Motakoobhoha abhantö. Keno bhakotora ukwita, nö-möbhërë ughwënyu ughwene igho, kasi tebhakotora ukwita öbhöhöru ubhwa umwika ughwënyu hë. Waryobha we uwa ukwobhoha, ko bhoora umwene aratora ukusikya ömöbhërë na umwika ughwa ömöntö mo-morro ghotakurima.

Mataayo 25:41

“Ho ndemara ntëëbhi bhaara urinyoora bharëngë bhömösi ubhwane igha, ‘Murwe hano, ko bhoora bhëënyu, mwaihiimwa na Waryobha. Moghende mo-morro ghotakurima amakora ghonswe igho, ahasë hano Waryobha yaasëëmëërya Oghosambwa na abhamaraika abha Oghosambwa ghuyö.

Mataayo 25:46

“Ho bhoono abha ëbhëbhë bhayö, bharyemoka bhaghende mu-bhushibhu ubhwa amakora ghonswe igho. Kasi abhantö abha heene bhaara, bho mbaresoha mö-bhöhöru ubhwa amakora ghonswe igho.”

Mataayo 5:22

Kasi bhoono öni nkobhatëëbhya ndë igha, motakaarererra ömöntö wowonswe oora. Hano moraarererre ömöntö wowonswe oora, ni-igha mushibhibhwi mo-bharasa. Na hano mwatoka ömöntö igha m-mushiimushiimu, na okomoroka amariina amaghogho, ni-igha mushibhibhwi mo-bharasa enene. Na hano moraareghe ömöntö wowonswe igho, na ökömötëëbhya igha, Waryobha amwihiime, hayö ni-igha motabhutwe mo-morro ghotakurima.

Maariko 13:23

Mbe, kasi bhëënyu mwiyangarre! Öni mmarrë okobharoma ökötwë, amangʼana ghayö ghatareebhoka.

1 Abhatësarönikë 4:6

Ömöntö wowonswe oora atakaasarrya murikyaye ko amangʼana kya ghayö, handë okomongʼaina. Twaabhatëëbhëri na okobhakaania igha, bhonswe igho bhano bhakokora amangʼana kya ghayö, Omonene Yëësu narebhashibhya.

Abhaëbhuraania 10:31

Engʼana iya okoobhoha, nö-möntö okoghwa mo-mabhoko agha Waryobha ömöhöru.

2 Peetero 2:4

Abhamaraika bhano bhaakörrë ëbhëbhë, Waryobha tiyaabhatighirë hë. Kasi yaabhatabhutirë mu-kyaro ikya abhaku, bhakabhohwa-mo na ebheraangʼani mu-kisuntë. Mu-kyaro ikya abhaku muyö, mo bhakoghanyera urusikö urwa okobhotorrwa ikiina.

Okohonyora 14:7

Mbe, maraika uyö akakonga araghamba igha, “Mosookenga Waryobha na mömötööni, ko bhoora enkaagha iyaaye iya okobhotorra abhantö ikiina, ihikirë. Mosengerre Waryobha, we yaabhömbirë mu-ryobha, rirobha, inyansha, na ebheseekaani.”

Okohonyora 15:4

Ë Omonene, ni-igha abhantö bhonswe igho bhakwobhohe, kora bhatööni iriina iryaho, ko bhoora nu-uwe umwene ömöhörëëru. Abhantö abha ibhyaro bhyonswe igho mbariisha, bhakosengerre, ko bhoora amangʼana aghaaho agha heene, nkomaahekana gharë harabhu igho.”

Okohonyora 20:14

Hano ghayö ghaahööyë, uruku bheena ikyaro ikya abhaku, bhekatabhutwa mu-nyansha iyö ikwibhugha omorro. Inyansha iyö ikwibhugha omorro, yo uruku urwa kabhërë.