Maariko 13:9 - Imuuma Eehya

⁹ “Kasi bhëënyu mwiyangarre bhököngʼu. Abhantö mbarebhaghoota bhabhahire mo-sebharasa, kora mbarebhatemanga bhököngʼu mu-sinyumba isya esango iya Abhayahudi. Mbarebhahira ko-bhanene abha ikyaro na ko-bhakama, ko bhoora igha, m-bantö abhaane mörë. Iyö yo erebha enkaagha iya bhëënyu ukwimererra Amangʼana Amaiya ko-bhantö bhayö.

Maariko 13:9 ပူးပေါင်းရင်းမြစ်များ

Mataayo 5:22

Kasi bhoono öni nkobhatëëbhya ndë igha, motakaarererra ömöntö wowonswe oora. Hano moraarererre ömöntö wowonswe oora, ni-igha mushibhibhwi mo-bharasa. Na hano mwatoka ömöntö igha m-mushiimushiimu, na okomoroka amariina amaghogho, ni-igha mushibhibhwi mo-bharasa enene. Na hano moraareghe ömöntö wowonswe igho, na ökömötëëbhya igha, Waryobha amwihiime, hayö ni-igha motabhutwe mo-morro ghotakurima.

Maariko 1:44

aramokangʼasërrya igha, “Otakaatëëbhya ömöntö wowonswe oora amangʼana ghano. Kasi, kaghi wiyöröki kö-mösëngëri uwa Waryobha. Oghende okore ikimwenso ikya okorama ukwaho, kya bhono Mosa yaaghambirë igha, abhaghenge bhano bharamirë obhoghenge bhakorenga igho, okore abhasëngëri hamwë na abhantö abhandë, bhamaahe bhono Waryobha akökörëëyë.”

Maariko 13:5

Mbe, Yëësu akabhahonshora igha, “Mwiyangarre, motakaasha okongʼainwa!

Maariko 13:8

Ikyaro nyabhorebhe, nkiriitana na ikyaro ikyëndë, obhokama mburiitana na obhokama ubhwöndë. Ibhirighiti na inshara, mberebha ahasë ahaaru ko-kebhara kono. Amangʼana ghayö, n-kya ebhesa ibhya omokari bheno bhekotangata omoona atareebhorwa.

Maariko 6:11

Ghwiki, ahasë hohonswe igho hano bharaange kobhasërëënia handë okobhaitegherra, motanore ukurwa hayö. Hano mwatanora, mokongʼonte urutu urwa ko-maghörö aghëënyu, ko ököbhöörökya igha, Waryobha we bhangirë.”

Ruuka 9:5

Na umughi ghoghonswe ghono abhantö abha muyö bhataabhasërëëni, murwe-mo na okokongʼonta urutu urwa ko-maghörö aghëënyu, okore robhe ekemanyërryö ikya ukwanga ukwabho.”

Yohana 15:20

Motakeebha ghano naabhatëëbhëri igha, ‘Omoghorwa, taatore okobha omonene kokera omonene uwaaye hë.’ Mbe, nyoore bhaannyankëri, na bhëënyu bhonswe mbaraabhanyanki. Nyoore bhaghöötirë amangʼana aghaane, aghëënyu ghonswe mbaraaghaghoote.

Yohana 16:2

Abhantö mbaraabharughi murwe mu-sinyumba isya esango iya Abhayahudi. Kora enkaagha irihika-ho, eno kera ömöntö ono arebhaita, arekanyanga igha m-buuya akokora ku-Waryobha.

Amangʼana agha Abhatomwa 21:11

Hano yaahikirë kö-bhëëtö hayö, akaghegha umushibhi ughwa Pauro, akaghwibhoha ko-mabhoko na ko-maghörö aghaaye. Akaghamba igha, “Umwika Ömöhörëëru aghambirë igha, ‘Ni-igho mwene umushibhi ghono, araakorrwe. Ni-igho eraabhe, hano araaghi Yërusarëëmu. Abhayahudi abha iyö mbaraamoghoote, bhamobhohe, bhamare bhamöghööti mo-mabhoko agha Abhakyaro.’ ”

Amangʼana agha Abhatomwa 7:54

Hano abhanene abha Abhayahudi bhaaighuurë amangʼana agha Sitefaano ghayö yaaghambirë, bhakarerra bhököngʼu, bhakamokaaraatërya amaino.

Amangʼana agha Abhatomwa 9:16

Nendaamwöröki kya igho araatundësibhwi bhököngʼu, ko okoghera iya iriina iryane.”

Abhafiripi 1:29

Ko bhoora tukukumya Kiristo ukwene igho mwaahaanwa, kasi kora inyanko yonswe mwatoorrwa-ho ko okoghera iya we.

2 Abhatësarönikë 1:5

Ghayö ghonswe igho nkwörökya gharë igha, okobhotora ibhiina ukwa Waryobha, n-kwa heene. Okobhotora ibhiina kuyö nkoraaghere bhëënyu mongʼaarre okosoha mo-Bhokama ubhwaye, bhono mukunyankera.

2 Yohana 1:8

Mbe, ku bhuyö ni-igha mwiyangarrenga, okore omotono ughwënyu ughwa okokorra Waryobha emeremo, ghotakaaheta bhosa igho. Kasi omotono ughwënyu ghuyö, ghobhareetere ehoorohooro iya okobhaisa, eno ikurwa ku-Waryobha.

Okohonyora 1:9

Öni nö-öni Yohana umukumya murikyënyu. Nkötöörrania ndë hamwë na bhëënyu ököghömërrya inyanko ko okoghera iya Yëësu na Obhokama ubhwaye. Öni naarëbhërrëëywë kwi-ghinga reno rekobherekerwa igha Paatimo. Naarëbhërrëëywë iyö, okore igha, ntakaaraareka engʼana iya Waryobha na ntakaimererra amangʼana agha Yëësu.

Okohonyora 2:10

Motakoobhoha inyanko iyö murinyoora. Motamaaha! Oghosambwa ngorebhashaashya, kora ghotoore bharikyënyu mo-kebhohe, na bhëënyu murinyankibhwa sinsikö ikömi. Kasi mobhe abhantö abha heene ku-öni, nokaanyoora igha nkukwa, mukwe. Ko bhoora öni, nendebhatuha ibhirighi ibhya öbhöhöru ubhwa amakora ghonswe igho.

Okohonyora 2:13

Öni nemanyirë ahasë hayö mömënyirë, hayö, ho Oghosambwa ghokotonga. Nokaanyoora ni-igho amangʼana gharë, kasi nkunkumya mökërë. Kora enkaagha eno umwimërërri uwaane uwa heene Antipa yaaitirwë mu-mughi ughwënyu muyö Oghosambwa ghömënyirë, temwanyikaanirë hë. Antipa uyö, nu-mwimërërri uwaane uwa heene yaarë.