Abhakorosaai 3:5 - Imuuma Eehya

⁵ Mbe, ku bhuyö ni-igha, mutighe okokora amangʼana agha ko-kebhara kono, obhosooraare, ubhunyanku, amaitegherro amaghogho, obhoraaghëri, obhohoobhaaru, na oronamba urwa ëbhëntö. Okobha na oronamba urwa ëbhëntö, n-kya okosengerra ëbhëtöndö.

Abhakorosaai 3:5 ပူးပေါင်းရင်းမြစ်များ

Mataayo 15:19

Ko bhoora mo-nkoro iya ömöntö, mo ghakurwa amaitegherro amaghogho, ubhwiti ubhwa abhantö, obhosooraare, ubhwibhi, ubhwimërërri ubhwa obhorongo, na amatöki.

Abharuumi 1:26

Mbe, Waryobha akabhatigha bhakorenga amangʼana aghaabho agha sënsöni ghayö bhaatunanga. Abhakari bhakatigha okokora amangʼana kya bhono ëmëbhërë ighyabho ghyaabhömbirwë ukurwa okosemoka igha ghekore, kasi bhakakora bhöndë igho.

Abharuumi 1:29

M-baköri abha ëbhëbhë ibhya seteemo syonswe igho, obhoghogho bhwobhwonswe igho, kora m-bahiti abha ëbhëntö bhyonswe igho, mbaana orongʼeera. Bhahanshirë riihë, m-baiti abha abhantö, m-basëëghërrya, m-barongo, m-ba amaitegherro maghogho, m-baghambi abha abhantö.

Abharuumi 6:13

Motakaikërrya imyaho ighya ëmëbhërë ighyënyu ghekorenga amangʼana amaghogho agha ëbhëbhë. Kasi mwibhati ku-Waryobha, ko bhoora mobhaayë kya bhano muryökiibhwi na Waryobha, kora abhasöhëri mö-bhöhöru obhohya. Mobhati imyaho ighya ëmëbhërë ighyënyu ku-Waryobha, okore imyaho ighyënyu ghiyö, ghekorenga amangʼana agha heene.

Abharuumi 6:6

Ntomanyirë igha eteemo iyëëtö iya kare eera, yaahanëkirwë ko-mosarabha hamwë na Yëësu Kiristo. Yaabhaayë igho, okore eteemo iyëëtö iya kare eera, etakaatobhaaha, na okotokora tobhe abhaghorwa abha ëbhëbhë.

Abharuumi 7:23

Kasi nkomaaha ndë igha, imyaho ighya kö-möbhërë ughwane, ghyaabhaahwa na singuru isya esemoko iya öbhököri ubhwa ëbhëbhë eno ikwitana riihë na amaitegherro aghaane. Kiyö nkyo kekoghera ndabha omoghorwa uwa okokorra emeremo ëbhëbhë okohetera kö-möbhërë ughwane.

Abharuumi 7:5

Enkaagha eno esemoko iyëëtö iya öbhököri ubhwa ëbhëbhë yaatotonganga, amaraghërryö agha Mosa ngaaghërrë oronamba urwa ömöbhërë robhe na singuru bhököngʼu kö-bhëëtö. Kiyö nkyo kyaagheranga turatuna tokore ëbhëbhë bhököngʼu. Engʼana iyö, yo yaarëëtirë uruku.

Abharuumi 8:13

Momanye igha, hano moraabhe abhantö bhano mokotangatwa na esemoko iya öbhököri ubhwa ëbhëbhë, hayö nu-ruku urwa amakora ghonswe igho mukwireetera. Kasi hano obhotoro ubhwa Umwika Ömöhörëëru, bhoraabhatöörri mwange okokora amangʼana ghano esemoko iya öbhököri ubhwa ëbhëbhë ikutuna igha mokore, moraabhe na öbhöhöru ubhwa amakora ghonswe igho.

1 Abhakörintö 5:1

M-boheene, amangʼana ghaatohekeera igha, obhosooraare bhörëngë mö-bhëënyu muyö. Obhosooraare bhuyö, m-bono bhotakaamaahekaini kora ko-bhantö bhano bhatamanyirë Waryobha. Obhosooraare ubhwa ömöntö okotaara na mokaa suwaabho.

1 Abhakörintö 6:11

Abhandë mö-bhëënyu muyö, ni-igho mwaarë. Kasi bhoono mwoghibhwa obhoghogho ubhwënyu, mwahorwa, mokakorwa abha heene okohetera ku iriina irya Omonene uwëëtö Yëësu Kiristo, na ku-Mwika uwa Waryobha uwëëtö.

1 Abhakörintö 6:13

Abhantö abhandë bharaghamba igha, enda n-ko okoghera iya ibhyakorya, na ibhyakorya n-ko okoghera iya enda. Kasi bhyonswe igho bhibhërë bhiyö, enda na ibhyakorya, Waryobha naribhiruusya-ho. Kasi ömöbhërë te-ko okoghera iya obhosooraare hë, kasi n-ko okoghera iya Omonene uwëëtö, na Omonene n-ko okoghera iya ömöbhërë.

1 Abhakörintö 6:18

Ku bhuyö ni-igha mongʼose obhosooraare. Ëbhëbhë ibhyëndë bhyonswe igho bheno ömöntö akokora, n-kebhara iya ömöbhërë ughwaye bhërë, kasi ömöntö ono akokora obhosooraare, uyö nö-möbhërë ughwaye umwene akokorra obhosarya.

2 Abhakörintö 12:21

Ghwiki nkoobhoha ndë igha, hano ndiisha, Waryobha nareghera nsooke kö-bhëënyu. Ndebhaabhayera hano ndemaaha abhantö abhaaru, bhano bhaakora ëbhëbhë mö-bhëënyu, tebhakaahöngööyë ëbhëbhë ibhyabho hë. Kasi mbakeena amangʼana aghaabho amaghogho ghaara agha obhosooraare, na amangʼana aghandë agha sënsöni ghano bhaarë nagho ukurwa kare.

Abhagharatia 5:24

Hano wanyoora abhantö bhaghootaini na Yëësu Kiristo, nkunyoora örë n-kya bhano bhaahanekwa ko-mosarabha hamwë na Kiristo Yëësu. Tebhakotongwa ghwiki na oronamba urwabho urwa ëmëbhërë, hamwë na amaitegherro aghaabho amaghogho ghaara.

Abhaëfësö 4:19

Ku bhuyö tebhaana sënsöni hë. Bhaasareka ko okokora amangʼana agha seteemo syonswe igho isya obhosooraare. Kora nkutuna bharë bhaghëndërri okokora igho bhököngʼu.

Abhakorosaai 2:11

Hano mwaabhaayë na öbhömwë na Kiristo, mwaangʼaabhööyë esemoko iya öbhököri ubhwa ëbhëbhë, Yëësu Kiristo akabhasaara. Yaabhasaarrë esaaro eno etakosaarwa na abhantö, kasi we umwene akoghekora.

1 Abhatësarönikë 4:3

Waryobha nkutuna arë mobhe abhantö abhahörëëru, nkwo okoghamba igha, motakaakora obhosooraare.

1 Abhatësarönikë 4:5

Motakaabha na oronamba kya urwa Abhakyaro, bho tebhamanyirë Waryobha hë.

1 Timoteo 6:10

Esemoko iya amangʼana amaghogho ghonswe igho, no-kohansha seehera. Abhandë okohansha seehera, kwabhangʼaina bhaatigha umukumo, bhaikorerra öbhörrö ubhurito, kya ömöntö ono aibhëtirë na ekegheso.

Abhaëbhuraania 12:16

Mwiyangarre mö-bhëënyu, atakaabha-mo omosooraare, handë ömöntö ono atakosaasaama Waryobha kya bhono Esaau atasaasaamanga Waryobha. Esaau uyö, yaaghörri obhoheene ubhwa obhotangi ubhwaye, ko okoghera iya okorya ökömwë igho.

Abhaëbhuraania 13:4

Öbhötëti ne-ngʼana iya okosookwa na abhantö bhonswe igho. Obhosooraare, bhwibhashwe, ko bhoora Waryobha narebhotorra ikiina abhasooraare na abha sintwara.

Abhaëbhuraania 13:5

Motakaabha na eteemo iya okohansha seehera, mwiswe na bheno moonabhyo, ko bhoora Waryobha umwene yaaghamba igha, “Tinkutighe hë, tinkusuuhe kora hake hë.”

Yaakobho 4:1

Momanyirë ubhutindi na riihë bheno bhërëngë mö-bhëënyu muyö hano bhikurwera? Nkurwera bhërë ko-ronamba urwa mo-nkoro iya ömöntö, rono rukwitana na amaitegherro agha ömöntö uyö.

1 Peetero 2:11

Abhaghonshe abhaane, bhëënyu m-baghëni bhahëti mörë ko-kebhara kono. Ku bhuyö, ndabhasaasaama igha, motakaikërrya okobhaahwa na oronamba oroghogho urwa ëmëbhërë ighyënyu. Oronamba oroghogho ruyö, nkurutana rörë na bhëënyu, okore robhabhaahe.

Okohonyora 21:8

Kasi bhoono abhoobha, bhano bhatakukumya Waryobha, bhano bhakösësëëbhya enkoro iya Waryobha, abhaiti, abhasooraare, abhaturutumbi, bhano bhakosengerra ëbhëtöndö, na abharongo, bhonswe igho bhayö, mbaretoorwa mu-nyansha eno ikwibhugha omorro, na ubhurutu ubhwa ikibhiriiti. Na ruyö ndwo uruku urwa kabhërë.”

Okohonyora 22:15

Kasi abhaturutumbi bhonswe igho, abhasooraare, abhaiti abha abhantö, bhano bhakosengerra ëbhëtöndö, na bhonswe igho bhano bhakorongoha, mbarebha kebhara iya umughi ghuyö, kya sësëësë.