Abhakorosaai 2:1 - Imuuma Eehya

¹ Nkutuna ndë momanye bhono neena omotono ko-meremo, ko okoghera iya bhëënyu, na bhaara abha mu-mughi ughwa Raodikia, hamwë na abhandë bhonswe igho bhano motaakaandööshë.

Abhakorosaai 2:1 ပူးပေါင်းရင်းမြစ်များ

Ruuka 22:44

Yëësu yaarë na öbhörrö ubhurito, bhono bhwakörrë akaghëndërrya okosaasaama bhököngʼu Waryobha. Ëbhëghëri ibhyaye, bhekatoonya hansë kya amatonyokera agha amaanyinga.]

Amangʼana agha Abhatomwa 20:25

“Kasi bhoono nemanyirë igha, kö-bhëënyu bhonswe igho bhano naaraarekera amangʼana agha Obhokama ubhwa Waryobha, taaho ömöntö ono areemaaha ghwiki hë.

Amangʼana agha Abhatomwa 20:38

Engʼana eno yaaghërrë bhakabhaabhayera bhököngʼu, m-boora yaabhatëëbhëri igha, taaho ömöntö ono areemaaha ghwiki hë. Mbe, bhakamoherekerra igho, bhakamuhikya mu-ryato.

Abhagharatia 4:19

Abhaana abhaane, kya bhoora omokari uwa enda akunyanka na ebhesa ko-nkaagha iya ukwebhora, öni wonswe ni-ighoigho nkwiyighwa. Nendaaghëndërri ukwiyighwa igho, okohekera hano eteemo iya Kiristo eremaahekana mo-teemo iyëënyu.

Abhafiripi 1:30

Moraitana riihë reerareera naitananga kya bhoora mwaarööshë. Ghwiki kora bhoono nkwighwa mörë igha nköghëndërrya ndë ukwitana.

Abhakorosaai 1:24

Bhoono nkushomerwa ndë ku-nyaanyi eno nkunyoora kö-möbhërë ughwane ko okoghera iya bhëënyu, ko bhoora nkosanga inyaanyi iya Yëësu Kiristo eno ëköghëndërrya ko okoghera iya ömöbhërë ughwaye, ömöbhërë ghuyö ngo ekanisa.

Abhakorosaai 1:29

Ko okoghera iya engʼana iyö, neena omotono ughwa okokora emeremo bhököngʼu, ku singuru seno Kiristo akongʼaana.

Abhakorosaai 2:5

Nokaanyoora tëndëngë hamwë na bhëënyu kinyamöbhërë, kasi enkoro iyaane hamwë ërë na bhëënyu. Nkushomerwa ndë ko bhoora mmanyirë igha, nköghëndërrya mörë okobha na öbhömwë, na umukumo ughwënyu ngotashirë sehaama ku-Kiristo.

1 Abhatësarönikë 2:2

Ghwiki mmomanyirë igha, enkaagha eno waanyöörrë totaraahika kö-bhëënyu, ntwaanyankiibhwi bhököngʼu, kora tokatokwa mu-mughi ghoora ghokobherekerwa igha Firipi. Nokaanyoora twaarëbhërrëywë bhököngʼu igha totakaasha kö-bhëënyu, kasi Waryobha yaatohaayë singuru isya okoraareka Amangʼana aghaaye Amaiya kö-bhëënyu.

Abhaëbhuraania 5:7

Mbe, enkaagha eno waanyöörrë Yëësu Kiristo akërëngë ko-kebhara kono, yaasabhirë, akasaasaama, kora akakoorra bhököngʼu Waryobha mwene obhotoro ubhwa ukumuruusya mu-singuru isya uruku. Ko okoghera iya ubhwihöötu ubhwaye, Waryobha akamwighwera.

1 Peetero 1:8

Bhëënyu temwakaamörööshë hë, kasi momohanshirë. Kora nokaanyoora igha temokomomaaha bhoono igho hë, kasi nkumukumya mörë. Ku bhuyö, nkushomerwa mörë bhököngʼu moona ubhuhika bhono bhotakoghambwa,

Okohonyora 1:11

Engamba iyö yaaghambirë igha, “Andeka mo-ketabho amangʼana ghonswe igho ghano oraamaahe. Omare otomane eketabho kiyö mo-makanisa muhungatë agha Ëfësö, Simirina, Perighamo, Tiyatira, Saridi, Firadërifia, na Raodikia.”