2 Peetero 1:19 - Imuuma Eehya

¹⁹ Kora ntoona amangʼana amaheene bhököngʼu, agha öbhörööti, hano moraaghaghoote, m-buuya oraanyoore mökörrë. Amangʼana ghayö n-kya etara eno ëkömërëkya mu-kisuntë, okohekera hano öröghörö roraasambe, na obhorabhu ubhwa inyota iya nyinkyo bhomoreke mo-senkoro isyënyu.

2 Peetero 1:19 ပူးပေါင်းရင်းမြစ်များ

Mataayo 4:16

Abhantö abha mu-kisuntë, bharööshë obhorabhu obhonene, abhantö bhayö abha mu-kiiriiri ikya uruku, bhamörëkirwë emerengaari ighya nyinkyo.”

Yohana 5:35

Yohana Omobhatiisya yaarenga kya etara eno ekooka na ökömërëkya mu-kisuntë, na bhëënyu mwaashëngëëyë obhorabhu bhuyö ku-ribhagha ike igho.

Yohana 5:39

“Moraitaaha bhököngʼu Amaandeko Amahörëëru ko bhoora mokokanya igha, moratora ukunyoora muyö öbhöhöru ubhwa amakora ghonswe igho. Kasi obhoheene Amaandeko Amahörëëru ghayö, ngo ghakunyimererra.

Yohana 8:12

Mbe, Yëësu akaghëndërrya okoghamba ghwiki na rikomo reera igha, “Öni nö-öni obhorabhu ubhwa ekebhara. Ömöntö wowonswe igho ono akonsoorana, takoghenda mu-kisuntë kora hake hë, kasi naraabhe na obhorabhu bhono bhokomotangata mö-bhöhöru ubhwa amakora ghonswe igho.”

Amangʼana agha Abhatomwa 15:29

Motakaarya ibhyakorya bheno bhimwënsëywë ëbhëtöndö, handë ukunywa amaanyinga, motakaarya ibhibhuuse, na motakaakora obhosooraare. Hano muriharreke amangʼana ghayö, m-buuya moraanyoore mökörrë. Mbe, mutighare na omorembe.”

Amangʼana agha Abhatomwa 17:11

Abhabheerooya bhayö, m-bantö abha heene bhaarë okokera Abhatësarönikë. Ko bhoora bhaaghöötirë engʼana iya Waryobha ko motono, bhakabha bharitaaha mo-Maandeko Amahörëëru sinsikö syonswe igho, okore bhamaahe nyoore amangʼana ghayö Pauro akoghamba m-maheene!

Abhaëbhuraania 2:2

Ko bhoora ntomanyirë igha, engʼana iya amaraghërryö agha Waryobha eno maraika yaaraarëkëëyë abhakörö abhëëtö, yaarë na ubhwera. Ku bhuyö abhantö bhonswe igho bhano bhataaghëghöötirë, mbaashibhiibhwi ubhwa heene, ko amangʼana agha öbhötëëyu na obhosarya ubhwabho bhonswe igho.

Yaakobho 2:8

Mo-Maandeko Amahörëëru, amaraghërryö agha Obhokama ubhwa Waryobha gharaghamba igha, “Ohanshe murikyaho, kya bhono wihanshirë uwe umwene.” Hano moraakore igho, m-buuya oraanyoore mökörrë.

1 Peetero 1:10

Abharööti abha kare bhaakörrë omotono ughwa okomanyërrya öbhöhönia bhuyö, bhakaroota amangʼana agha örööbhö urwa Waryobha rono robhahëkërëëyë bhëënyu.

1 Yohana 5:10

Ömöntö wowonswe igho ono akukumya Omoona uwa Waryobha, uyö nkunyoora örë akumiri igha, ubhwimërërri bhuyö, nu-bhwa obhoheene. Kasi ono atakukumya Waryobha, nkomokora arë morongo, ko bhoora akwanga ukukumya obhoheene bhono Waryobha yaaghamba ko amangʼana agha Omoona uwaaye.

3 Yohana 1:6

Mo-bhantö bhayö waatöörrya, mbo bhaatëëbhya ekanisa iya hano kya bhono ohanshirë bhököngʼu Abhakiristo bharikyaho. Bhoono keno nkökötëëbhya ni-igha, uwe ghëndërrya ökötöörrya abhantö kya bhayö, hano waanyoora bharatuna ukurwa kö-bhëënyu hayö bhaghi ahasë handë. Ko bhoora engʼana iya ökösërëënia iyö, nkushomera ërë Waryobha.

Okohonyora 2:28

Ömöntö wowonswe ono arekera inyanko iyö, nendemohaana inyota iya nyinkyo.

Okohonyora 22:16

“Öni Yëësu, nö-öni umwebhorwa uwa omokama Daudi, nkomekameka ndë kya entorrona. Ntömirë maraika uwaane, aashe abhatëëbhi bhëënyu abhasoorani abhaane, amangʼana ghano ko okoghera iya amakanisa.”