2 Abhatësarönikë 1:8 - Imuuma Eehya

⁸ Hayö ho arehaka ikisiiyomba ko bhano bhakwanga Waryobha na bhano bhatakosooka Amangʼana Amaiya agha Omonene uwëëtö Yëësu.

2 Abhatësarönikë 1:8 ပူးပေါင်းရင်းမြစ်များ

Mataayo 25:41

“Ho ndemara ntëëbhi bhaara urinyoora bharëngë bhömösi ubhwane igha, ‘Murwe hano, ko bhoora bhëënyu, mwaihiimwa na Waryobha. Moghende mo-morro ghotakurima amakora ghonswe igho, ahasë hano Waryobha yaasëëmëërya Oghosambwa na abhamaraika abha Oghosambwa ghuyö.

Mataayo 25:46

“Ho bhoono abha ëbhëbhë bhayö, bharyemoka bhaghende mu-bhushibhu ubhwa amakora ghonswe igho. Kasi abhantö abha heene bhaara, bho mbaresoha mö-bhöhöru ubhwa amakora ghonswe igho.”

Yohana 3:19

Okobhotora ikiina nkörëngë igha, obhorabhu bhwaasha ko-kebhara kono, kasi abhantö bhakahansha ikisuntë okokera obhorabhu, ko bhoora amangʼana aghaabho m-maghogho.

Yohana 8:19

Mbe, Abhafarisaayo bhakabhöörya Yëësu igha, “Kasi, Suwëënyu hai arëngë?” Yëësu akabhahonshora igha, “Öni temommanyirë hë, kora Taata temomomanyirë hë. Mokaammanyirë öni, Taata wonswe mokaamomanyirë.”

Amangʼana agha Abhatomwa 6:7

Engʼana iya Waryobha, ekaghëndërrya okoromaana mo-bhantö. Ekerengere ikya abheegha abha Yëësu, kekaaruha bhököngʼu Yërusarëëmu hayö. Kora abhasëngëri abhaaru bhakaighwera Waryobha, na ukwikërrya Omonene Yëësu.

Abharuumi 1:28

Mbe, ko bhoora bhaanga okoghoota amangʼana agha Waryobha, Waryobha wonswe yaabhatigha bhakore bhono bhakutuna. Ku bhuyö nkokora bharë amangʼana amaghogho ghano bhaanagho mo-maitegherro aghaabho. Amangʼana ghayö, kora teghaana ubhwera hë.

Abharuumi 1:5

Waryobha yaangʼaayë örööbhö mbe omotomwa, okohetera ku-uyö. Yaakörrë igho, okore ntëëbhi Abhakyaro bhonswe igho, bhakumi Yëësu, kora bhatööni iriina iryaye.

Abharuumi 10:16

Nokaanyoora ni-igho ërë, kasi ti-igha Abhaisiraëri bhonswe igho, mbaaikërëëyi Amangʼana Amaiya agha Yëësu Kiristo, m-baaru bhaaghangirë. Ko bhoora ömörööti Isaaya yaaghambirë igha, “Omonene Waryobha, taaho ömöntö ono yaaikërëëyi amangʼana aghëëtö hë.”

Abharuumi 15:18

Tenkokareha okoghamba engʼana iyëndë hë, kasi ne-eera Kiristo Yëësu yaakora okohetera ku-öni, iya okokora Abhakyaro bhamwighwere. Engʼana iyö yaaghëkörrë okohetera ko ghano naaghambanga na ghano naakoranga.

Abharuumi 16:26

Bhoono amangʼana harabhu igho gharë okohetera ko-Maandeko Amahörëëru agha abharööti. Amangʼana ghayö agha imbumbure, ngamanyekaini ku-bhyaro bhyonswe igho. Waryobha uwa amakora ghonswe igho, we yaaraghërrya igha, obhoheene bhuyö bhoraarekwe ko-bhantö abha ibhyaro bhyonswe igho, okore abhantö bhayö, bhakumi Omonene Yëësu Kiristo, kora bhakore bhono akutuna.

Abharuumi 6:16

Kasi temomanyirë igha ömöntö nkobha arë omoghorwa uwa keera akwighwera? Aratora okobha omoghorwa uwa okokora ëbhëbhë, bhekamokorerra uruku. Handë aratora okobha ömöntö ono akwighwera Waryobha, ku bhuyö abha omoghorwa uwa Waryobha, uwa öbhömënyi ubhwa heene.

1 Abhakörintö 15:34

Mokore amangʼana kwa bhongʼaini, motakaakora ëbhëbhë, ko bhoora abhantö abhandë tebhamanyirë Waryobha hë. Nkoghamba ndë amangʼana ghayö okore mbasöökërri.

2 Abhakörintö 10:5

Nkotemora bhërë amaitegherro na amangʼana ghonswe igho agha ubhwihashi, ghano ghakoghera abhantö bhanga okomanya Waryobha. Nkoghoota törë këghötërëëyë amaitegherro ghonswe igho okore ghaighwere Yëësu Kiristo.

Abhagharatia 3:1

Bhëënyu bhare Bhagharatia, m-bakangi mörë! Nawë yaabharogha? Rëndë mbe naabharaghërrëëyi bhuuya amangʼana agha Yëësu Kiristo kya igho yaahanëkirwë ko-mosarabha.

Abhagharatia 4:8

Bhëënyu kare hayö, temwamanyirë Waryobha hë, m-baghorwa mwaarë, abha ëbhëntö bheno bhetarë Waryobha.

1 Abhatësarönikë 4:5

Motakaabha na oronamba kya urwa Abhakyaro, bho tebhamanyirë Waryobha hë.

Abhaëbhuraania 10:27

Kasi keno ukunyoora kitighaayë, no-kobha na entarëki iya okobhotorrwa ikiina na omorro ghono ghurisikya abhabhisa abha Waryobha.

Abhaëbhuraania 10:30

Ko bhoora ntomanyirë igha, Waryobha we yaaghambirë igha, “Okohaka ikisiiyomba, ghuyö m-moremo ughwane, nendaahake.” Na ghwiki igha, “Omonene narebhotorra ikiina abhantö abhaaye.”

Abhaëbhuraania 11:8

Umukumo, ghwaaghërrë Ibhurahimu akaighwera Waryobha, enkaagha eno yaamöbhërëkëëyë, akamötëëbhya igha, aghende ahasë hano araahaanwe habhe umwandö ughwaye. Akeemoka, akatanora ukughya ahasë hano atamanyirë.

Abhaëbhuraania 12:29

Ko bhoora Waryobha uwëëtö, no-morro ghono ghukusikya.

Abhaëbhuraania 2:3

Mbe, bhëëtö bho hano toraasere öbhötöörya obhonene kya bhono, iyakë toraakore tohone? Öbhötöörya bhuyö, ekembere mbwaaraarëkirwë na Omonene Yëësu, ghwiki bhokakangʼasërribhwa kö-bhëëtö na bhano bhaamwighuurë.

Abhaëbhuraania 5:9

Mbe, ko okoghera iya ghayö, Waryobha akamokora aingʼarre okobha esemoko iya öbhötöörya ubhwa amakora ghonswe igho ko bhonswe igho bhano bhakwighwera Ömötöörya uyö.

1 Peetero 1:2

Taata Waryobha yaabhamanyirë, akabhashaaghora ukurwa kare, ko okoghera iya ësëëmyö iyaaye. Umwika uwaaye Ömöhörëëru, akabhakora mobhe abhahörëëru, okore mwighwere Yëësu Kiristo na okosaabhuurwa ko amaanyinga aghaaye. Waryobha abhëngëri örööbhö na omorembe.

1 Peetero 3:6

Saara mokaa Ibhurahimu, we ëkërëngyö. Yaaighweranga mushaasha uwaaye, kora yaamobherekeranga igha, “Omonene uwaane.” Kora bhëënyu bhonswe, hano moraakorenga amangʼana amaiya motakoobhoha kyokyonswe igho, hayö noraanyoore mobhaayë urwebhoro urwa Saara.

1 Peetero 4:17

Momanye igha, enkaagha iya okobhotora ibhiina ihikirë, na Waryobha naraasimi okobhotorra ibhiina abhantö abhaaye. Mbe, hano okobhotora ibhiina koraasimiri kö-bhëëtö abhantö abhaaye, bhoono iyakë erebha ko bhano bhakwanga Amangʼana Amaiya agha Waryobha?

2 Peetero 3:7

Ghwiki ko okohetera engʼana iyöiyö, Waryobha yatigha-ho mu-ryobha na ekebhara, okore bhiishe okosambwa mo-morro. Yabhitigha-ho okore bheghanye urusikö rono arebhotorra ibhiina abhantö bhano bhatakumwighwera, hayö bhoono, ho bharisika.

Yuuda 1:7

Ghwiki ni-igha muhiite ghano ghaanyöörrë abhantö abha imighi ighya Sodoma na Ghomora na imighi gheno ghyaaheegheraini naghyo. Amangʼana ghayö, n-kya agha abhamaraika bhayö. Abhantö bhayö, bhaakoranga obhosooraare na okoghoota amangʼana agha oronamba urwa ömöbhërë, rono rotatuubhaini kya bhono ëmëbhërë ighyabho ghyaabhömbirwë igha ghekore. Bhakashibhibhwa ku ukusikibhwa mo-morro ghotakurima amakora ghonswe igho. Ku bhuyö okobhotorrwa ikiina kuyö, kwabha ëkërëngyö ikya ukushibhibhwa.

Okohonyora 20:10

Mbe, Oghosambwa ghono ghwaabhangʼainirë, ngoretabhutwa mu-nyansha iyö ikwibhugha omorro na ubhurutu ubhwa ikibhiriiti. Muyö mo ughutyënyi ghoora na ömörööti uwa obhorongo oora, bhaarëkëëywë-mo. Muyö mo bhareteeswanga ubhutikö na omobhasö, amakora ghonswe igho.

Okohonyora 21:8

Kasi bhoono abhoobha, bhano bhatakukumya Waryobha, bhano bhakösësëëbhya enkoro iya Waryobha, abhaiti, abhasooraare, abhaturutumbi, bhano bhakosengerra ëbhëtöndö, na abharongo, bhonswe igho bhayö, mbaretoorwa mu-nyansha eno ikwibhugha omorro, na ubhurutu ubhwa ikibhiriiti. Na ruyö ndwo uruku urwa kabhërë.”

Okohonyora 6:10

Mbe, imiika ghiyö ghekakora ikituri gheraghamba igha, “Ë Omonene Waryobha ömötöngi uwa bhyonswe igho, ono örëngë Ömöhörëëru na uwa heene, n-kwakë okotegheta? N-dööhë orebhotorra ikiina abhantö abha ko-kebhara na okomara ikisiiyomba ikya ukutwita?”