2 Abhakörintö 6:1 - Imuuma Eehya

¹ Mbe, ko bhono tokokora emeremo hamwë na Waryobha, ku bhuyö nkobhasaasaama törë igha, örööbhö urwa Waryobha rono mwanyoora, rotakaaheta bhosa.

2 Abhakörintö 6:1 ပူးပေါင်းရင်းမြစ်များ

Mataayo 23:37

Mbe, Yëësu akaghamba igha, “Bhëënyu abhantö abha Yërusarëëmu, bhëënyu! Moraita abharööti, na okotema na amaghena abhantö bhano Waryobha yaatoma. N-kaaru naakora omotono ughwa okobhakomania, kya hano engoko yakomania ibhishuushu mo-mabhabha aghaayo, kasi mokaanga.

Amangʼana agha Abhatomwa 11:23

Hano yaahikirë-yo akamaaha bhono abhantö bhayö bhaarë na örööbhö urwa Waryobha. Akashomerwa, akabhakangʼasërrya igha, bhaghëndërri okobha abhakumya abha heene mo-senkoro isyabho, ko-Monene Yëësu.

Amangʼana agha Abhatomwa 14:3

Pauro bhaana Bharinaabha bhakaghëndërrya ukwikara Iköniö hayö sinsikö sinsharu. Bhakaraareka amangʼana agha örööbhö urwa Omonene Yëësu ko obhokarë. Omonene Yëësu wonswe akabha arabhaimererra ko okobhahaana obhotoro ubhwa okokora amakono na ebhemanyërryö.

Abharuumi 12:1

Bhoono abhakumya bharikyëtö, ko bhoora igha Waryobha abhaayë na amaabhë na bhëëtö, ndabhasaasaama bhököngʼu igha, mwiruusi mobhe kya itugho ëhörëëru iya ikimwenso, eno ikushomera Waryobha. Okokora igho, nko enshera inshiiya iya okosengerra Waryobha.

1 Abhakörintö 3:9

Nkoghamba ndë igho ko bhoora bhëëtö m-baköri abha emeremo abha Waryobha törë, na ömöghöndö ughwa Waryobha, m-bëënyu, kora m-bëënyu inyumba iyaaye.

2 Abhakörintö 10:1

Mbe, ndabhasaasaama ko obhohaabhu na kö öbhöntö ubhwa heene ubhwa Yëësu Kiristo, nö-öni Pauro ono bhakoghamba igha, hano naabha hamwë na bhëënyu, nkobha ndë omohaabhu, kasi hano naabha hare na bhëënyu, ndabha omokarë.

Abhagharatia 2:21

Tentore ukwanga örööbhö urwa Waryobha hë. Nyoore ömöntö nkobharwa arë igha wa heene, ko okoghoota amaraghërryö agha Mosa, bhoono hayö toghambe igha, ukukwa ukwa Kiristo n-kwa bhosa!

Abhagharatia 3:4

Kasi, inyaanyi eera yonswe igho eno yaabhanyoora, nkokanya mörë igha ya bhosa yaarë? Tiyaarë iya bhosa hë!

1 Abhatësarönikë 3:5

Ho yaahikirë-ho enkaagha eno naakërrwë ököghömërrya, nkatoma Timoteo kö-bhëënyu, okore mmanyërri amangʼana agha umukumo ughwënyu. Naakörrë igho, ko bhoora naakanyanga igha, handë umushaashi uwa amangʼana oora aratora okobhashaashya na okobhasirya. Hayö ho bhoono emeremo ghyonswe igho gheno twaakörrë kö-bhëënyu, ghekaahëtirë bhosa igho.

Tiito 2:11

Wëëghinga abhantö amangʼana ghayö, ko bhoora, örööbhö urwa Waryobha rono rököhönia abhantö bhonswe igho, harabhu igho rörë.

Abhaëbhuraania 12:15

Mwiyangarre bhököngʼu, ömöntö wowonswe oora atakaabhorwa örööbhö urwa Waryobha. Atakeebhoka-ho ömöntö mö-bhëënyu, ono anga kya umuri ömörörö. Ömöntö kya uyö, naraabhanyanki na ukunyankuhya senkoro isya abhantö abhaaru.

Abhaëbhuraania 12:25

Mwangarre motakaanga omoghambi. Abhaisiraëri tebhaaibhashirë ubhushibhu hano bhaangirë ono yaabhakaanianga ko-kebhara kono. Bhoono bhëëtö bho, ntohona hano toraange ukwighwera uyö akotokaania ukurwa mu-ryobha iyö?

Abhaëbhuraania 4:1

Mbe, ko bhoora rekeeho riraghaniö irya Waryobha, irya okosoha ahasë ahaaye aha ukumuunya, ni-igha twobhohe, okore ömöntö atakaakerwa okosoha-mo.

1 Peetero 4:10

Kera ömöntö naana ituho iyaaye eno yaahaanwa na Waryobha. Bhoono ni-igha aghekorre emeremo bhuuya ko ökötöörrya bharikyaye. Akorenga igho kya umwimërërri umuuya uwa örööbhö urwa Waryobha urwa seteemo nsharu.