2 Abhakörintö 5:15 - Imuuma Eehya

¹⁵ Yëësu Kiristo yaakuurë ko okoghera iya abhantö bhonswe igho, okore abhantö abha öbhömënyi obhohya, bhatakaabha na öbhömënyi ko okoghera iyaabho abheene, kasi bhobhe ko okoghera iya ono yaakuurë akaryoka ko okoghera iyaabho.

2 Abhakörintö 5:15 ပူးပေါင်းရင်းမြစ်များ

Ruuka 1:74

naritutungurya ukurwa mo-mabhoko agha abhabhisa abhëëtö, okore tomosaasaamenga totakoobhoha, kö öbhöhörëëru na obhoheene, sinsikö syonswe igho isya öbhöhöru ubhwëtö.

Yohana 5:24

No-bhoheene nkobhatëëbhya igha, ömöntö ono akwighwa engʼana iyaane na ukukumya Waryobha ono yaantoma, uyö naana öbhöhöru ubhwa amakora ghonswe igho. Ömöntö kya uyö, tarebhotorrwa ikiina hë. Uyö amarrë ukwamboka ukurwa mu-ruku, bhoono asöhirë mö-bhöhöru.

Yohana 6:57

Taata Waryobha ömöhöru yaantoma, na öni wonswe neena öbhöhöru ukurwa ku umwene uyö. Ku bhuyö ömöntö ono araandaaghere, uyö naraanyoore öbhöhöru ukurwa ku-öni.

Abharuumi 12:1

Bhoono abhakumya bharikyëtö, ko bhoora igha Waryobha abhaayë na amaabhë na bhëëtö, ndabhasaasaama bhököngʼu igha, mwiruusi mobhe kya itugho ëhörëëru iya ikimwenso, eno ikushomera Waryobha. Okokora igho, nko enshera inshiiya iya okosengerra Waryobha.

Abharuumi 4:25

Waryobha yaarëëtirë Yëësu okore akwe, ko okoghera iya ëbhëbhë ibhyëtö. Akamuryökya, okore tobharwe igha, m-ba heene törë.

Abharuumi 6:2

A a, ti-igho hë! Ko bhoora bhëëtö bhoono igho n-kya abhaku ko-mangʼana agha okokora ëbhëbhë, ku bhuyö tetootore ghwiki ököghëndërrya okokora ëbhëbhë.

Abharuumi 6:6

Ntomanyirë igha eteemo iyëëtö iya kare eera, yaahanëkirwë ko-mosarabha hamwë na Yëësu Kiristo. Yaabhaayë igho, okore eteemo iyëëtö iya kare eera, etakaatobhaaha, na okotokora tobhe abhaghorwa abha ëbhëbhë.

Abharuumi 8:10

Ko bhoora igha Kiristo mmo-senkoro isyënyu amënyirë. Ku bhuyö nokaanyoora igha nkukwa mörë kinyamöbhërë, ko okoghera iya ëbhëbhë ibhyënyu, kasi Umwika Ömöhörëëru, nkobhahaana arë öbhöhöru, ko bhoora Waryobha abhabharrë igha, m-ba heene mörë.

Abharuumi 8:2

Ko okoghootana na Kiristo Yëësu, nnyöörrë obhotoro ubhwa Umwika Ömöhörëëru ono akotohaana öbhöhöru ubhwa amakora ghonswe igho. Öbhöhöru bhuyö, bhongʼaayë öbhötöönööni, okore ntakabhaahwa na obhotoro ubhwa ëbhëbhë na uruku.

Abharuumi 8:6

Ömöntö ono sehakëri isyaye sekotangatwa na esemoko iya öbhököri ubhwa ëbhëbhë, uyö nu-ruku urwa amakora ghonswe igho akwireetera. Kasi ömöntö ono akotangatwa na Umwika Ömöhörëëru, uyö naana öbhöhöru ubhwa amakora ghonswe igho, kora naana omorembe.

1 Abhakörintö 10:33

Mobhe kya öni bhono nkötëghërya abhantö bhonswe igho, ko amangʼana ghonswe igho ghano nkokora. Tenkokora igho ko okoghera iya ehoorohooro iyaane, kasi n-ko okoghera iya ehoorohooro iya abhantö abhaaru okore bhatööribhwi.

2 Abhakörintö 12:10

Ku bhuyö öbhötëntëëru ubhwane nkunshomera bhörë, hamwë na okotokwa, inyanko, amateeso, inyaanyi ko okoghera iya Kiristo, ko bhoora hano naabha ömötëntëëru, ho nkobha na singuru.

2 Abhakörintö 3:6

Uyö, we yaatokora tobhe abhaköri abha emeremo abha Imuuma Eehya, eno ikurwa ku-Mwika uwa Waryobha. Imuuma iyö, tërëngë igha na-maraghërryö ghano ghaandekwa hë, ko bhoora amaraghërryö ghano ghaandekwa, gho nu-ruku ghakoreeta, kasi Umwika uwa Waryobha, we nö-bhöhöru akoreeta.

2 Abhakörintö 5:16

Ku bhuyö ukusimirya bhoono igho, tetokorengʼaania ubhwera ubhwa ömöntö ko amangʼana agha kinyabhantö, nokaanyoora ekembere ntwaarengʼaaninga kora Yëësu Kiristo ko amangʼana agha kinyabhantö. Kasi bhoono igho, ti-igho tokokora hë.

Abhagharatia 5:25

Ko bhoora Umwika yaatohaana öbhöhöru obhohya, mbe ni-igha toghoote-ko obhotangati ubhwaye.

Abhaëfësö 4:17

Mbe, keno nkutuna mbatëëbhi ni-igha, mwitegherre bhuuya amangʼana aghaane ghano. Omonene Yëësu Kiristo yaangʼaana ubhwera, ku bhuyö nkobhakaania ndë igha, motakaaghëndërrya okokora amangʼana kya Abhakyaro. Bho nkokora bharë amangʼana bhono abheene bhakutuna. Amaitegherro aghaabho, teghaana ubhwera bhwobhwonswe bhoora hë.

Abhaëfësö 5:14

nkyo kekoghera eraghambwa igha, “Bhooka uwe ono oraayë, uryoke urwe mo-bhaku na obhorabhu ubhwa Yëësu Kiristo mboraakömërëkëri.”

Abhakorosaai 2:12

Mbe, hano mwaabhatiisiibhwi, mwaakurë hamwë na Kiristo, kora ghwiki mokaryoka hamwë nawe ko bhoora mwaaisëghirë obhotoro ubhwa Waryobha ono yaamuryökëri ukurwa mo-bhaku.

Abhakorosaai 3:1

Bhoono ko bhoora mwaaryoka hamwë na Kiristo, mutune amangʼana agha mu-ryobha iyö Kiristo aikaayë, orobhareka urwa bhoryo ubhwa Waryobha, ahasë aha okosookwa.

Abhakorosaai 3:17

Ghonswe igho ghano mokoghamba handë okokora, mokorenga okohetera iriina irya Omonene Yëësu Kiristo, na eno morakumya Taata Waryobha ko okohetera ku-uyö.

Abhakorosaai 3:23

Kyokyonswe igho keno mokokora, mokore kwa enkoro ëmwë ko okoghera iya Omonene, motakaakora morakanya igha m-möntö mokokorra.

1 Abhatësarönikë 5:10

Uyö we yaakuurë okoghera iya bhëëtö, okore twikare hamwë nawe, enkaagha eno tökërëngë abhahöru, kora hano urinyoora tukuurë.

Tiito 2:14

Yaairuusiri ko okoghera iya bhëëtö, okore atutunguri ukurwa mo-bhosarya ubhwëtö bhonswe igho. Yaatunirë igha atosaabhuure, okore tobhe abhantö abhaaye abha heene, bhano bhairuusya okokora amangʼana amaiya.

1 Peetero 4:6

Kiyö nkyo ikibhuno keno kyaaghërrë abhantö bhano bhaakuurë, bhakaraarekerwa Amangʼana Amaiya. Mbaaraarëkëëywë, okore nokaanyoora igha bhaabhotorrwa ibhiina kö-bhömënyi ubhwabho kya abhandë, kasi ko obhotoro ubhwa Umwika Ömöhörëëru, bhabhe abhahöru kya bhono Waryobha arëngë möhöru.

1 Yohana 4:9

Waryobha yöörökya righonshe iryaye kö-bhëëtö, ko okotoma Omoona uwaaye umumwëmwë ko-kebhara kono. Yaakörrë igho, okore okohetera ku-uyö, tunyoore öbhöhöru ubhwa amakora ghonswe igho.

Okohonyora 1:18

Nö-öni öbhöhöru! Naarenga nkuurë, kasi bhoono tamaaha, möhöru ndë, amakora ghonswe igho. Nö-öni neena sefongoro isya uruku na isya mu-kyaro ikya abhaku.