2 Abhakörintö 3:6 - Imuuma Eehya

⁶ Uyö, we yaatokora tobhe abhaköri abha emeremo abha Imuuma Eehya, eno ikurwa ku-Mwika uwa Waryobha. Imuuma iyö, tërëngë igha na-maraghërryö ghano ghaandekwa hë, ko bhoora amaraghërryö ghano ghaandekwa, gho nu-ruku ghakoreeta, kasi Umwika uwa Waryobha, we nö-bhöhöru akoreeta.

2 Abhakörintö 3:6 ပူးပေါင်းရင်းမြစ်များ

Mataayo 13:52

Ku bhuyö akabhatëëbhya igha, “Umwëghya wowonswe ono amanyirë amaraghërryö agha Waryobha na Obhokama ubhwa Waryobha, uyö n-kya ömöntö ono aana inyumba, eno akuruusya-mo ëbhëntö ibhya kare na ebhehya.”

Mataayo 26:28

Ko bhoora ghano ngo amaanyinga aghaane agha Imuuma, ghano ghareeteke ko okoghera iya ukwabhera abhantö ëbhëbhë ibhyabho.

Maariko 14:24

Akabhatëëbhya igha, “Ghano ngo amaanyinga aghaane agha Imuuma ghano ghareeteke ko okoghera iya abhantö abhaaru.

Ruuka 22:20

Hano bhaamarrë okorya ibhyakorya, Yëësu akaghegha ekekombe, akaghamba igha, “Idivai eno, ereemererra Imuuma Eehya, iya amaanyinga aghaane ghano ghareeteke ko okoghera iya bhëënyu.]

Yohana 5:21

Kya bhono Taata akuryökya abhaku, na okobhahaana öbhöhöru, ni-ighoigho Omoona wonswe akohaana öbhöhöru ömöntö wowonswe ono akutuna igha ahaane.

Yohana 6:63

Umwika uwa Waryobha we akohaana abhantö öbhöhöru. Esemoko iya ömöntö, teena obhotoro bhwobhwonswe bhoora hë. Amangʼana ghano mbatëëbhëri, na-agha Umwika uwa Waryobha, kora ngaana öbhöhöru ubhwa amakora ghonswe igho.

Abharuumi 1:5

Waryobha yaangʼaayë örööbhö mbe omotomwa, okohetera ku-uyö. Yaakörrë igho, okore ntëëbhi Abhakyaro bhonswe igho, bhakumi Yëësu, kora bhatööni iriina iryaye.

Abharuumi 3:20

Ko bhoora taaho ömöntö wowonswe ono akobharwa igha wa heene, ko okoghera iya okoghoota amaraghërryö agha Mosa. Omoremo ughwa amaraghërryö ghayö, nu-kwörökya igha, abhantö bhonswe igho, m-baköri abha ëbhëbhë.

Abharuumi 4:15

N-kwakë rekaabhaayë igha m-borongo? N-ko bhoora ömöntö ono akosarya amaraghërryö agha Mosa, nkushibhibhwa arë. Kasi hano amaraghërryö ghayö ghatakaabhaaye-ho, kora obhosarya ubhwa amaraghërryö bhwonswe, tebhokaabhaayë-ho hë.

Abharuumi 4:17

Amangʼana ghayö, n-kya bhono Amaandeko Amahörëëru ghakoghamba igha, “Nkötöörrë-ho, obhe ömökörö uwa abhantö abha ibhyaro ibhyaru.” Ku bhuyö ni-igha, hano waanyöörrë Ibhurahimu arëngë mbere iya Waryobha, yaaighuurë amangʼana ghayö Waryobha yaaraghaini. Akakumya Waryobha ono akohaana öbhöhöru abhantö bhano bhaakwa. Uyö we akoghamba, ëbhëntö bheno bhetaaho, bhebhaho.

Abharuumi 7:6

Twaarenga töghöötërrëëywë na maraghërryö. Kasi bhoono twaakwa hamwë na Yëësu Kiristo, ensonga iyaamo ni-igha, totashööywë ukurwa ko-maraghërryö. Bhoono tetokokorra Waryobha emeremo ko okohetera amaraghërryö agha kare ghaara, kasi nkomokorra törë emeremo ko-nshera eehya iya okotangwatwa na Umwika Ömöhörëëru.

Abharuumi 8:2

Ko okoghootana na Kiristo Yëësu, nnyöörrë obhotoro ubhwa Umwika Ömöhörëëru ono akotohaana öbhöhöru ubhwa amakora ghonswe igho. Öbhöhöru bhuyö, bhongʼaayë öbhötöönööni, okore ntakabhaahwa na obhotoro ubhwa ëbhëbhë na uruku.

1 Abhakörintö 11:25

Hano bhaamarrë okorya, akaghegha ekekombe ikya idivai, akakora kya bhoorabhoora, akaghamba igha, “Ekekombe keno kereemererra Imuuma Eehya eno Waryobha arekora okohetera ko-maanyinga aghaane. Mokorenga igho, ko okoheetoka.”

1 Abhakörintö 12:28

Abhatomwa mbo Waryobha yaatoora mo-kanisa abha mbere, abha kabhërë abharööti, abha katatö abhëëghya. Ghwiki yaatoora-mo bhano bhakokora amakono, na abha ituho iya ukuhwënia abharööyë, na abha ökötöörrya abhandë, na bhano bhakotangata bharikyabho, na abha ituho iya okoghamba ebheghambo ebhehya.

1 Abhakörintö 15:45

Amaandeko Amahörëëru gharaghamba igha, “Adamu ömöntö uwa mbere, yaabhömbirwë akabha na öbhöhöru,” kasi Adamu uwa umuhiko we nu-Mwika, ono akohaana abhantö öbhöhöru.

1 Abhakörintö 3:10

Waryobha kö örööbhö urwaye rono yaangʼaana, yaantöörrya okohaghaasha umusingi kya omohaghaashi umuuya omongʼaini, ono amanyirë amangʼana, nkatoora-ho umusingi ghono ömöntö uwöndë akohaghaasha-ko. Mbe, kera ömöntö angarre bhuuya bhono akohaghaasha ku-musingi kuyö.

1 Abhakörintö 3:5

Mbe bhoono, Apöörö n-nawë? Na Pauro n-nawë? Bhayö m-baköri abha emeremo abha Waryobha bhano bhaaghërrë mokakumya Waryobha, kera ömöntö mo-bhayö, yaakörrë emeremo gheno yaahaanwa na Omonene.

2 Abhakörintö 11:23

Bhoono tigha ngambe kinyabhushuuru igha, nyoore abheene m-baköri abha emeremo abha Kiristo, öni nembahëtëërëëyë. Öni naakora omotono ughwa okokora emeremo okobhakera. Naatoorwa mo-kebhohe hare kaaru, naatemwa bhököngʼu imishariti, naahona ukukwa hare kaaru.

2 Abhakörintö 3:14

Sehakëri isya Abhaisiraëri, ni-ndito syaarë. Ko bhoora igha, kora bhoono igho, hano Imuuma iya Kare yasomwa, ikikundikiryö keerakeera, nkobhakundikirya kërë. Ikikundikiryö kiyö, tikikuruusibhwa-ko hë, ko bhoora nkuruusibhwa-ko kërë hano ömöntö yaabha na öbhömwë na Yëësu Kiristo.

2 Abhakörintö 3:3

Nkomaahekana mörë bhuuya igha, bhëënyu n-kya ritashandighi irya Yëësu Kiristo mörë, reno rikwörökya emeremo gheno twaakora kö-bhëënyu. Ritashandighi riyö, tiryandekwa na ubhwino hë, kasi ndyandekwa na Umwika uwa Waryobha ömöhöru. Kora tëmörëngë kya ritashandighi reno ryandekwa ko-bhebhaau ibhya amaghena, kasi mo-senkoro isya abhantö.

2 Abhakörintö 3:7

Amaraghërryö ngaatöörrwë-ho ku ukwandekwa ko-sembaau isya amaghena. Nokaanyoora ngaamarrë ghakareeta uruku, kasi ubhuhika ubhwako, m-bonene bhököngʼu bhwaarë, kora Abhaisiraëri tebhaatörrë okomaaherra ubhusyö ubhwa Mosa, ko okoghera iya emerengaari ighya-ko. Emerengaari ghiyö, n-gya ibhagha ike igho ghyaarë. Mbe, hano okomaaha igha emeremo ighya keera kyaarëëtirë uruku, nkyaarenga na emerengaari ëmërörö bhököngʼu,

2 Abhakörintö 3:9

Hano okomaaha igha, omoremo ughwa okobhotorra abhantö ikiina ngoona ubhuhika ubhwako, bhoono n-kwakë omoremo ghono ghokoghera abhantö bharakorwa okobha abha heene ku-Waryobha, ghwange okobha na ubhuhika obhonene bhököngʼu?

Abhagharatia 3:21

Kasi, amaraghërryö nkwangana gharë na ghano Waryobha yaaraghania? A a, ti-igho hë! Ko bhoora singa yaare-ho enshera eno ekohaana abhantö öbhöhöru, mbe, hayö bhoono ho Waryobha akaatobharrë igha, m-ba heene törë, okohetera ko-maraghërryö.

Abhaëfësö 2:1

Bhëënyu n-kya abhaku mwaarë, ko bhoora motaighweranga Waryobha, mokaghëndërrya okokora ëbhëbhë.

Abhaëfësö 2:5

Ntwaarë kya abhaku ko okoghera ukwa obhosarya ubhwëtö, akatohaana öbhöhöru obhohya kya bhono yaahaana Yëësu Kiristo. Amaabhë agha Waryobha, ngo ghaaghërrë akabhatöörya.

Abhaëfësö 3:7

Bhoono öni emeremo ighyane, no-koraareka Amangʼana Amaiya kö örööbhö urwa amaabhë agha Waryobha ghano yaankörëëyë ko obhotoro ubhwaye.

1 Timoteo 4:6

Hano örëëghi abhakumya amangʼana ghano, noraanyoore orakorra Kiristo Yëësu emeremo ubhwa heene, kora noraanyoore wëghiibhwi bhuuya ku umukumo na ko amëëghyö amaiya ghano waaghoota.

2 Timoteo 1:11

Öni naashaaghorwa mbe omoraarëki, omotomwa, na umwëghya uwa Amangʼana Amaiya ghayö.

Abhaëbhuraania 12:24

Muhikirë ku-Yëësu, umwighwerrania uwa Imuuma Eehya, ko-maanyinga aghaaye ghano gheeteka. Amaanyinga ghayö, teghanga kya amaanyinga agha Abhëëri ghano ghaatunanga okohaka ikisiiyomba, kasi gho na-maabhë ghakushumaashera.

Abhaëbhuraania 13:20

Mbe, Waryobha ono akohaana abhantö omorembe, yaaryökëri Omonene uwëëtö Yëësu Kiristo. Uyö we Omokaraabhërri uwa amangʼöndi Omonene, okohetera ko-nshera iya ukwëtëkya amaanyinga aghaaye agha imuuma iya amakora ghonswe igho.

Abhaëbhuraania 7:22

Mbe, ukutyana kuyö, kwaaghërrë Yëësu Kiristo akabha umwimërërri uwa Imuuma iya ubhwera obhonene.

Abhaëbhuraania 8:13

Ku ukushumaashera Imuuma Eehya iyö, Waryobha hayö nkwörökya arë igha, Imuuma iya mbere eera, yaghötirë. Mbe, ëkëntö keno kikusimya okoghota, n-haangʼë kërë kiruho.

1 Peetero 3:18

Yëësu Kiristo wonswe n-kamwë igho yaakuurë ko okoghera iya ëbhëbhë ibhyëtö, okore atwighwerrani na Waryobha, kasi tiyaarë na ëbhëbhë bhyobhyonswe igho hë. M-möntö uwa heene yaarë. Yaaitirwë kinyamöbhërë, kasi ko obhotoro ubhwa Umwika Ömöhörëëru, akanyoora ghwiki öbhöhöru.

1 Yohana 1:1

Nkobharaarekera törë amangʼana agha ono akobherekerwa igha, Engʼana iya öbhöhöru, ono yaarenga-ho ukurwa okosemoka. Bhëëtö ntwaamwighuurë, kora tokamomaaha na amaiso aghëëtö abheene. Tokamwitaaha, kora tokamoghootaghoota na amabhoko aghëëtö.