1 Yohana 5:4 - Imuuma Eehya

⁴ Nkoghamba ndë igho ko bhoora igha, kera omoona uwa Waryobha, naana obhotoro ubhwa ukwanga obhoghogho ubhwa ko-kebhara kono. Obhoghogho bhuyö, nkubhwanga törë ku ukukumya Yëësu Kiristo.

1 Yohana 5:4 ပူးပေါင်းရင်းမြစ်များ

Yohana 1:13

Abhaana abha Waryobha bhayö, te-bhano bheebhorwa kinyamöbhërë, handë ko okohansha ukwa ömöntö, handë bhono ömöntö akutuna, kasi no-kohansha ukwa Waryobha umwene.

Yohana 16:33

Mbatëëbhëri amangʼana ghayö, okore mobhe na omorembe ko bhoora moona öbhömwë na öni. Moona inyanko ko-kebhara kono, kasi motakaakwa emetwe, ko bhoora öni nabhaaha ekebhara keno.”

Yohana 3:3

Yëësu akamohonshora igha, “No-bhoheene nkökötëëbhya, taaho ömöntö ono akotora okosoha mo-Bhokama ubhwa Waryobha hano ataibhööywë urwa kabhërë.”

1 Abhakörintö 15:57

Kasi bhoono ni-igha tukumi Waryobha ono akotohaana obhotoro ubhwa okobhaaha okohetera ko-Monene uwëëtö Yëësu Kiristo.

1 Yohana 2:29

Mmomanyirë igha, Yëësu Kiristo n-wa heene. Ku bhuyö momanye igha, wowonswe igho ono akokora amangʼana agha heene, uyö we omoona uwa Waryobha.

1 Yohana 3:9

Ömöntö wowonswe ono yaamara okobha omoona uwa Waryobha, taköghëndërrya okokora ëbhëbhë hë, ko bhoora naana eteemo iya Waryobha. Taköghëndërrya okokora ëbhëbhë, ko bhoora m-moona uwa Waryobha.

1 Yohana 4:4

Bhëënyu abhaana abhaane abhaghonshe, m-baana abha Waryobha mörë. Kora mwaanga amangʼana agha abharööti abha obhorongo bhayö. Mwaanyoora obhotoro ubhwa okokora igho, ko bhoora Umwika Ömöhörëëru uwa Waryobha mö-bhëënyu arë. Umwika Ömöhörëëru uyö, we aana obhotoro okokera ëkëhwë ikya Oghosambwa, kiyö kekotangata abhantö bhano bhatakwighwera Waryobha.

1 Yohana 5:1

Ömöntö wowonswe igho ono akukumya Yëësu igha n-Kiristo, uyö we omoona uwa Waryobha. Ömöntö wowonswe igho ono ahanshirë umwibhöri, nkohansha arë kora na omoona uwa umwibhöri uyö.

1 Yohana 5:18

Ntomanyirë igha, omoona uwa Waryobha taköghëndërrya okokora ëbhëbhë hë. Keno kekoghera ataköghëndërrya okokora ëbhëbhë, n-ko bhoora Yëësu Kiristo akomorenda. Ku bhuyö Oghosambwa teghokomokora ngʼana hë.

1 Yohana 5:5

Bhoono n-nawë aana obhotoro ubhwa ukwanga obhoghogho ubhwa ko-kebhara kono? No-oora akukumya igha, Yëësu Kiristo m-Moona uwa Waryobha.

Okohonyora 12:11

Abhakumya bharikyëtö, bhaanyöörrë singuru isya okobhaaha Oghosambwa okohetera ko amaanyinga agha Omoona Ringʼöndi, na ko okoghera iya ubhwimërërri bhono bhaamwimërërrëëyë, ko bhoora tebhaatöniibhwi na öbhöhöru ubhwabho hë. Mbaaikërëëyi ukukwa, ko okoghera iya ukukumya Omoona Ringʼöndi.

Okohonyora 15:2

Ghwiki nkamaaha ëkëntö keno kenga inyansha iya ikyowa eno yishooghaini na omorro. Ku-nyansha hayö, bhaaimërëyë-ho abhantö bhaara bhabhaahirë ughutyënyi ghoora, ritöndö iryagho hamwë na risaabhu irya iriina iryagho. Abhantö bhayö, bhaarenga bhaghöötërrëëyë amatungu mo-mabhoko aghaabho, ghano bhaarenga bhahaaywë na Waryobha, okore bhamosengerre.

Okohonyora 2:11

Ono aana amatwë, aitegherre amangʼana ghano Umwika Ömöhörëëru akötëëbhya amakanisa. Ömöntö wowonswe ono arekera amangʼana ghayö, tarikunibhwa na omorro ughwa amakora ghonswe igho kora hake hë. Omorro ghuyö, ngwo uruku urwa kabhërë.”

Okohonyora 2:17

Ono aana amatwë, aitegherre amangʼana ghano Umwika Ömöhörëëru akötëëbhya amakanisa. Ömöntö wowonswe ono arekera amangʼana ghayö, ndimutuha ituho ekerengere ikya ibhyakorya ibhya emana eno yaabhiswa. Ghwiki nendemohaana reghena rirabhu. Reghena riyö, nurinyoora ryandëkirwë-ko iriina reehya. Taaho ömöntö ono aremanya iriina riyö hë. Kasi ono arehaanwa reghena riyö, we aremanya.”

Okohonyora 2:26

Ömöntö wowonswe ono arekera amangʼana ghayö na aghëndërri okokora bhono nkutuna okohekera umuhiko, “Nendemohaane ubhwera ubhwa okotonga ibhyaro bhyonswe igho.

Okohonyora 2:7

Ono aana amatwë, aitegherre amangʼana ghano Umwika Ömöhörëëru akötëëbhya amakanisa. Ömöntö wowonswe ono arekera amangʼana ghayö na aghömërri righonshe irya mbere reera, nindimwikërrya araaghere sehagho isya ömötë ghono ghokohaana abhantö öbhöhöru. Ömötë ghuyö, mu-ryobha iyö ghörë mu-bhusitaani iya Waryobha.”

Okohonyora 3:12

Ömöntö wowonswe ono arekera amangʼana ghayö, nendemokora abhe umutimö ughwa Inyumba iya Waryobha uwaane, na tarirwa-mo röndë hë. Kora nindimwandeka iriina irya Waryobha na iriina irya umughi ughwa Waryobha. Umughi ghuyö ngo Yërusarëëmu omohya, ghono ghuriika ukurwa mu-ryobha ku-Waryobha. Kora nindimwandeka iriina iryane reehya.

Okohonyora 3:21

Ömöntö wowonswe ono arekera amangʼana ghayö, nindimwikërrya aikare hamwë na öni ku-kitumbë ikyane ikya ekekama, kya bhono öni wonswe naakërrë, nkaikara na Taata ku-kitumbë ikyaye ikya ekekama.

Okohonyora 3:5

Ömöntö wowonswe ono arekera amangʼana ghayö, nindimwibhöhya singibho sendabhu kya bhayö. Tindiruusya iriina iryaye mo-Ketabho ikya Öbhöhöru. Kasi nindimwikërrya mbere iya Taata Waryobha na abhamaraika abhaaye igha, ono nu-uwaane.