1 Yohana 2:16 - Imuuma Eehya

¹⁶ Ngambirë igho ko bhoora igha, obhoghogho ubhwa ko-kebhara kono, tibhukurwa ku-Waryobha hë, nko-kebhara kono bhukurwa. Obhoghogho bhuyö, n-kya oronamba urwa ömöbhërë, ukwighomba okobha na kyokyonswe igho keno okomaaha, na ikiheemere ikya ubhwamë.

1 Yohana 2:16 ပူးပေါင်းရင်းမြစ်များ

Mataayo 4:8

Ho ghwiki Oghosambwa ghwaaghëghirë Yëësu, ghokamuhira ku-nguku entambë bhököngʼu. Ghokamwörökya ibhyaro bhyonswe igho ibhya ko-kebhara kono, na ubhuuya ubhwabhyo.

Mataayo 5:28

Kasi öni ndabhatëëbhya igha, umushaasha atakaighomba okotaara na omokari ono atarëngë mokaaye. Hano araakore igho, noraanyoore mo-maitegherro aghaaye, amarrë okotaara nawe.

Ruuka 4:5

Hano ghayö ghaahööyë, Oghosambwa ghokamuhira ku-nguku entambë bhököngʼu, ghokamwörökya ibhyaro bhyonswe igho ibhya ko-kebhara kono, kamwë igho.

Abharuumi 13:14

Kasi bhoono igho kö-bhömënyi ubhwënyu bhwonswe igho, motangatwenga na Omonene Yëësu Kiristo, motakaikërrya kora hake, okobha na esemoko iya öbhököri ubhwa ëbhëbhë, handë oronamba urwënyu oroghogho.

1 Abhakörintö 10:6

Mbe, amangʼana ghayö, ghaabha ëkërëngyö kö-bhëëtö, okore totakaabha na oronamba urwa ukwighomba amangʼana amaghogho kya bhono bho bhaaighömbirë.

Abhagharatia 5:17

Nkobhatëëbhya ndë igho ko bhoora igha, bhyonswe igho bheno ömöbhërë ghukwighomba, te-bhyo Umwika Ömöhörëëru akutuna hë. Kora bheera Umwika Ömöhörëëru akutuna, te-bhyo oronamba urwa ömöbhërë rukwighomba hë. Umwika Ömöhörëëru taana öbhömwë na oronamba urwa ömöbhërë hë, ku bhuyö temokotora okokora keera mukutuna igha mokore.

Abhagharatia 5:24

Hano wanyoora abhantö bhaghootaini na Yëësu Kiristo, nkunyoora örë n-kya bhano bhaahanekwa ko-mosarabha hamwë na Kiristo Yëësu. Tebhakotongwa ghwiki na oronamba urwabho urwa ëmëbhërë, hamwë na amaitegherro aghaabho amaghogho ghaara.

Abhaëfësö 2:3

Bhëëtö bhonswe igho Abhayahudi na bhëënyu Abhakyaro, tetwaighweranga Waryobha hë. Hano waanyöörrë totaraakumya Yëësu Kiristo, ntwaarë kya bhayö bhatakwighwera Waryobha. Twaakoranga amangʼana ghano ëmëbhërë ighyëtö na sehakëri isyëtö bhyaatunanga tokore. Ntwaarë kya bhono abhantö abhandë bharëngë ko-kebhara kono. Ntwaaibhööywë na esemoko iya obhoghogho. Twaarërërrëëywë na Waryobha, kora nakaatushibhiri.

Tiito 2:12

Örööbhö ruyö, nkutwörökërrya rörë igha, twange amangʼana amaghogho na oronamba urwa ko-kebhara kono. Ku bhuyö, enkaagha eno tökërëngë ko-kebhara kono, togheerenga ngʼora amangʼana, tobhe abhantö abha heene, na tobhe abhantö abha eteemo iya okosooka Waryobha.

Tiito 3:3

Kora bhëëtö bhonswe kare hayö, hano waanyöörrë totaraakumya Yëësu, m-bakangi twaarë, abhatëëyu, kora ntwaangʼainirwë, tokabha abhaghorwa abha oronamba, na amangʼana amaaru agha ko-kebhara kono, ghano ghaaturutanga. Tokabha abhantö abhaghogho na abha orongʼeera. Tokabha abhantö abha okoreghana na abhantö abhandë.

Yaakobho 3:15

Obhongʼaini ubhwa eteemo iyö, m-boghogho, tibhukurwa ku-Waryobha hë, kasi nu-bhwa kinyabhantö, ubhwa ko-kebhara kono, bhono bhukurwera ko-Ghosambwa.

Yaakobho 4:16

Kasi bhoono bhëënyu, moraighegha igha moonabhyo kora moraiheema. Ukwiheema kuyö n-koghogho.

1 Peetero 1:14

Ko bhoora igha, bhoono m-baana abha Waryobha mörë, ni-igha mosooke Waryobha. Motakaikërrya ghwiki okobha na oronamba oroghogho rono mwaarenga naro kare, hano mwaarenga motaraamanya Amangʼana Amaiya agha Yëësu Kiristo.

1 Peetero 2:11

Abhaghonshe abhaane, bhëënyu m-baghëni bhahëti mörë ko-kebhara kono. Ku bhuyö, ndabhasaasaama igha, motakaikërrya okobhaahwa na oronamba oroghogho urwa ëmëbhërë ighyënyu. Oronamba oroghogho ruyö, nkurutana rörë na bhëënyu, okore robhabhaahe.

2 Peetero 2:10

Ekenene m-baara abha oronamba oroghogho urwa kinyamöbhërë, bhano bhakosera ubhwera ubhwa Waryobha. Abhantö bhayö, m-baana eteemo iya senkaani na ikiheemere, kora tebhaakoobhoha okotoka ëbhëntö ibhya ubhuhika, bheno bhërëngë mu-ryobha.

2 Peetero 2:18

Nkoghamba bharë amangʼana agha ikiheemere, ghano ghataana ubhwera. Oronamba urwabho oroghogho urwa kinyamöbhërë, ndo rokoghera bharakemba abhantö bhano bhaakumya bhöngö hano, bhano bhaatigha okokora ghano abhasarya bhakokora.