1 Timoteo 3:3 - Imuuma Eehya

³ Atakaabha umunywi uwa amarwa, atakaabha umutindi, abhe ömöntö omohaabhu ono ahanshirë amangʼana agha omorembe. Kora atakaabha ömöntö ono ahanshirë seehera.

1 Timoteo 3:3 ပူးပေါင်းရင်းမြစ်များ

Mataayo 21:13

Yëësu akabhatëëbhya igha, “Yandëkirwë mo-Maandeko Amahörëëru igha, ‘Risengerro iryane nderaabhe ahasë aha amasabhi.’ Kasi bhoono bhëënyu mörëkörrë kya ‘risana irya abhasaki!’”

Amangʼana agha Abhatomwa 20:33

“Öni tenaighömbirë hera, esahaabhu handë singibho isya ömöntö wowonswe oora hë.

Abharuumi 16:18

Abhantö kya bhayö to-Monene uwëëtö Yëësu Kiristo bhakokorra emeremo hë, kasi keno bhakutuna no-kokorra senda isyabho isyene igho. Bhaana amangʼana amaiya agha ököngʼöröngʼööbhya, okore bhangʼaine abhakumya abhatëntëëru.

Abhaëfësö 5:18

Motakaaghootwa na amarwa, ko bhoora okoghootwa na amarwa nkoghera körë ömöntö akora amangʼana agha sënsöni. Kasi bhëënyu mutighe Umwika Ömöhörëëru abhatangate ko amangʼana ghonswe igho.

1 Abhatësarönikë 5:14

Abhakumya bharikyëtö, torabhasaasaama igha, mokaaninga abhooro na okotogheka bhano bhaakwa emetwe. Ghwiki motoghekenga bhano bhataana singuru na ököghömërrya abhantö bhonswe igho.

1 Timoteo 3:8

Abhashemaasi bhonswe, bhabhe na eteemo inshiiya, bhatakaabha abhaihunaania, bhatakaabha abhanywi abha amarwa, bhatakaahansha seehera.

2 Timoteo 3:2

Senkaagha siyö, abhantö mbariihansha, mbarebha na oronamba urwa seehera, mbarebha abhaihashi, mbarebha na ikisiraani, mbarebha abha amatöki, tebharesookanga abhaibhöri abhaabho hë, tebharebha na umukumo hë, handë okosooka Waryobha.

Tiito 1:11

ko bhoora ukwëghya ukwabho, nkusirya körë abhantö mu-mighi ighyabho ghyonswe igho. Bharëëghya amangʼana ghano ghataana enshera, okore bhanyoore seehera, ko enshera engogho eno ëkösöökya.

Tiito 1:7

Ko bhoora igha, omoghaaka omotangati uwa ekanisa, uyö we umwimërërri ono yaaghöötibhwa emeremo ighya Waryobha, ku bhuyö ni-igha, atakaabha ömöntö uwa okotemwa amasoro. Atakaabha na ekeghaaka, atakaabha ömöntö uwa enkoro, atakaabha ömörëëbhi, atakaabha umutindi, kora atakaabha na oronamba urwa seehera.

Tiito 2:3

Abhakungu bhonswe bhakorenga kya igho, obhatëëbhi igha, bhabhe na eteemo eno ëkötöönia Waryobha. Bhatakaabha abhaghambi abha abhantö, bhatakaabha abharëëbhi, kasi bhatönibhwi ukwörökërrya abhantö eteemo inshiiya,

Tiito 3:2

Obhatëëbhi igha, bhatakaatoka ömöntö wowonswe oora, bhatakaabha abhatindi, kasi bhabhe abhahaabhu, na abhaihöötu ko-bhantö bhonswe igho.

Abhaëbhuraania 13:5

Motakaabha na eteemo iya okohansha seehera, mwiswe na bheno moonabhyo, ko bhoora Waryobha umwene yaaghamba igha, “Tinkutighe hë, tinkusuuhe kora hake hë.”

Yaakobho 4:1

Momanyirë ubhutindi na riihë bheno bhërëngë mö-bhëënyu muyö hano bhikurwera? Nkurwera bhërë ko-ronamba urwa mo-nkoro iya ömöntö, rono rukwitana na amaitegherro agha ömöntö uyö.

1 Peetero 5:2

mobhe abhakaraabhërri abha heene abha ekanisa eno mwaahaanwa na Waryobha. Ghwiki ni-igha, monaghi ekanisa kwa enkoro inshiiya kya bhono Waryobha akutuna, kasi te-kwa ukusingʼirribhwa hë. Motakaakora emeremo ighyënyu kwa oronamba oroghogho urwa ukunyoora seehera, kasi mobhe na omotono.

2 Peetero 2:3

Mbarebhaghaneranga amaghano agha obhorongo, ko oronamba urwabho oroghogho, okore bhanyoore keno bhakutuna kö-bhëënyu. Kasi okobhotorrwa ikiina ukwabho, kwamara kösëëmibhwa ukurwa kare. Ukusikibhwa ukwabho, tekoteghete hë.

Yuuda 1:11

Haahö, abheene bhayö! Ko bhoora bhaghöötirë enshera iya Kaini, iya okokora ëbhëbhë. Ko bhoora nu-bhwamë bhakutuna, bhaihaatera këmwë, kora mö-bhöngʼënërrya kya ubhwa Bharaamu bhoora bharë. Bhaasika, ko bhoora bhaatëëyirë kya bhoora Koora yaatëëyirë akasika.

Okohonyora 1:9

Öni nö-öni Yohana umukumya murikyënyu. Nkötöörrania ndë hamwë na bhëënyu ököghömërrya inyanko ko okoghera iya Yëësu na Obhokama ubhwaye. Öni naarëbhërrëëywë kwi-ghinga reno rekobherekerwa igha Paatimo. Naarëbhërrëëywë iyö, okore igha, ntakaaraareka engʼana iya Waryobha na ntakaimererra amangʼana agha Yëësu.