1 Peetero 1:3 - Imuuma Eehya

³ Tukumi Waryobha, Suwaabho Omonene uwëëtö Yëësu Kiristo. Nkumukumya törë ko okoghera iya ubhwaru ubhwa ikyabhera ikyaye, keno kyaaghërrë akatwebhora bhohya, okohetera ku ukuryökya Yëësu Kiristo ukurwa mo-bhaku. Ku bhuyö, bhoono tunyöörrë ubhweseghe ubhwa öbhöhöru.

1 Peetero 1:3 ပူးပေါင်းရင်းမြစ်များ

Yohana 1:13

Abhaana abha Waryobha bhayö, te-bhano bheebhorwa kinyamöbhërë, handë ko okohansha ukwa ömöntö, handë bhono ömöntö akutuna, kasi no-kohansha ukwa Waryobha umwene.

Abharuumi 12:12

Amangʼana amaiya ghaara Waryobha yaabharaghaini igha arebhakorra, ghakore mushomerwenga. Möghömërri hano mwanyoora inyanko, kora möghëndërringa okosaasaama Waryobha.

Abharuumi 15:13

Waryobha we tukwitengʼera igha, naraatokorre ghonswe igho ghano yaaraghaini. Ku bhuyö nkobhasabhera ndë igha, abhahaane omorembe, okore mushomerwe bhököngʼu enkaagha eno mököghëndërrya ukumukumya. Hayö ho moraamweseghe bhököngʼu, ko bhoora moraatööribhwi na obhotoro ubhwa Umwika Ömöhörëëru.

Abharuumi 4:25

Waryobha yaarëëtirë Yëësu okore akwe, ko okoghera iya ëbhëbhë ibhyëtö. Akamuryökya, okore tobharwe igha, m-ba heene törë.

Abharuumi 5:10

Kuyö n-ko okoghamba igha, ko bhoora Waryobha yaatwighwerrania nawe, ko okohetera uruku urwa Omoona uwaaye, hano waanyöörrë tokeena ëbhëbhë, bhoono twabha abhasaani abhaaye. Ko bhoora m-maheene igha, yaatwighwerrania okohetera uruku urwa Yëësu Kiristo, ku bhuyö ntoraatööribhwi ukurwa mu-bhushibhu ubhwa okorerra ukwa Waryobha, okohetera öbhöhöru ubhwa Yëësu Kiristo.

Abharuumi 8:11

Umwika Ömöhörëëru ono amënyirë mo-senkoro isyënyu, uyö we Umwika uwa Waryobha ono yaaryökëri Kiristo Yëësu. Ku bhuyö Waryobha nariryökya ëmëbhërë ighyënyu gheno ghikukwa ko okohetera obhotoro ubhwa Umwika Ömöhörëëru uyöuyö.

Abharuumi 8:24

Ukwitengʼera kuyö, ntoonako ukurwa haara Waryobha yaatötöörri. Kasi hano toraaitengʼere ëkëntö keno tokomaaha, kuyö tukwetengʼera hë. Bhoono nawë akwitengʼera okohaanwa ëkëntö keno aanakyo?

1 Abhakörintö 13:13

Mbe, amangʼana ghano ghaimërëëyë bhoono igho, na-tatö, umukumo, ubhweseghe na righonshe. Ko amangʼana atatö ghayö, ekenene ni-righonshe.

1 Abhakörintö 15:20

Kasi bhoono obhoheene ni-igha, Kiristo yaaryoka ukurwa mo-bhaku, omotangi uwa bhano bhaakwa.

2 Abhakörintö 1:3

Akumibhwi Waryobha, Suwaabho Omonene uwëëtö Yëësu Kiristo, Taata nyamaabhë, Waryobha ono aköröörësya ko amangʼana ghonswe igho.

Abhagharatia 6:16

Omorembe na ikyabhera ikya Waryobha, bhebhe ko-bhantö bhonswe igho bhano bhakoghootana na obhoheene bhuyö, bhayö mbo abhantö abha Waryobha.

Abhaëfësö 1:17

Nkosaasaama ndë Waryobha uwa Omonene uwëëtö Yëësu Kiristo, we Taata uwëëtö uwa ubhuhika obhonene, igha abhahaane obhongʼaini ubhwa mu-ryobha, na aihonyore kö-bhëënyu, okore momomanyërri bhuuya.

Abhaëfësö 1:3

Bhamurë, ni-igha tukumi Waryobha uwa Omonene uwëëtö Yëësu Kiristo, na we Suwaabho Omonene uwëëtö uyö. Waryobha yaatokorra amangʼana amaiya agha obhongʼoore bhwonswe igho ubhwa ahasë hano hatakomaahwa, ko okohetera kö-bhömwë ubhwëtö na Yëësu Kiristo.

Abhaëfësö 1:7

Ko okohetera amaanyinga agha Kiristo Yëësu, Waryobha yatutungurya, igha, atwabhëëyë ëbhëbhë ibhyëtö okorengʼaana na ubhwaru ubhwa örööbhö urwaye.

Abhaëfësö 2:4

Kasi bhoono ko bhoora Waryobha naana amaabhë bhököngʼu, natohanshirë ku righonshe iryaye reno retaana umuhiko.

Abhaëfësö 3:20

Bhoono tigha tötööni Waryobha, ono akotora okokora amangʼana amaaru okokera ghano ghonswe igho tokomosabha igha akore, handë ghano tukwitegherra. Nkokora arë ko obhotoro ubhwaye bhono bhokokora emeremo mo-senkoro isyëtö.

Abhakorosaai 1:23

Kasi ni-igha möghëndërri okobha na umukumo, mohangarre, mobhe na singuru, motakaikërrya ukutigha ubhweseghe bhono mwaanyoora mo-Mangʼana Amaiya ghano mwaaighwa. Amangʼana Amaiya ghayö, ghaaraarekwa ko-bhantö bhonswe igho abha ko-kebhara kono. Na öni Pauro naabha umutighinkani uwa Amangʼana Amaiya ghayö.

Abhakorosaai 1:27

Bhayö mbo Waryobha yaahanshirë igha abhahonyorre engʼana enene iyö iya ubhuhika eno yaakörrë ko okoghera iya Abhakyaro. Engʼana iya ikibhisirë iyö yo Kiristo ono arëngë mo-senkoro isyënyu, ghwiki we akobhahaana ubhweseghe igha moraasange ubhuhika ubhwa Waryobha.

1 Abhatësarönikë 1:3

Hano twabhasabhera ko-Taata uwëëtö Waryobha, nkuhiita törë umukumo ughwënyu ko amangʼana ghano mokokora. Torahiita omotono ughwa righonshe ghono moonagho, na kya igho monaghirë ku ubhweseghe bhono moonabho ko-Monene uwëëtö Yëësu Kiristo.

1 Abhatësarönikë 4:13

Bhëënyu abhakumya bharikyëtö, keno tukutuna ni-igha momanye amangʼana agha Abhakiristo bhano bhaakwa, okore motakaabhaabhayera kya abhantö abhandë bhano bhataana ubhweseghe ubhwa ukuryoka.

2 Abhatësarönikë 2:16

Omonene uwëëtö Yëësu Kiristo na Waryobha Taata uwëëtö ono atohanshirë, na kö örööbhö urwaye, nkötöröörësya arë amakora ghonswe igho, na okotohaana ubhweseghe ubhurito. Nkosaasaama törë igha,

1 Timoteo 1:14

Omonene Kiristo Yëësu yaansakërya örööbhö oronene, kora akangʼaana umukumo na righonshe ko okobha hamwë nawe.

Tiito 2:13

Tokorenga igho enkaagha tukwitengʼera urusikö urwa obhongʼoore. Urusikö roora Yëësu Kiristo arikyora, amaahekane ku-bhuhika ubhwaye. Uyö we Waryobha uwëëtö, Omonene uwëëtö, na m-Mötöörya uwëëtö.

Abhaëbhuraania 3:6

Kasi Yëësu Kiristo, we n-kya Omoona uwa heene ono aana ubhwera ko-mangʼana agha inyumba iya Waryobha. Inyumba iyö, m-bëëtö, hano toraaghëndërri okobha abhakarë na okonagha bhuuya ko-keno tukwesegha.

Yaakobho 1:18

Kya bhono we umwene yaatunanga, akatokora tobhe abhaana abhaaye, ko okohetera ko-ngʼana iyaaye iya obhoheene, okore tobhe abhatangi abhaaye, ku-bhyonswe igho bheno yaabhömbirë.

1 Peetero 1:13

Ku bhuyö mwisëëmi na mwiraarerre, kora mongʼainihe. Ubhweseghe ubhwënyu bhwonswe igho, bhobhe kö örööbhö rono morehaanwa enkaagha eno Yëësu Kiristo ariisha aiyöröki harabhu igho.

1 Peetero 1:21

Bhëënyu nkukumya mörë Waryobha, okohetera ku-Yëësu Kiristo. Waryobha, we yaamuryökëri ukurwa mo-bhaku, akamohaana ubhuhika. Kiyö nkyo kekoghera morakumya Waryobha na ukumwesegha.

1 Peetero 1:23

ko bhono mwibhööywë bhohya. Ukwebhorwa bhohya kuyö, te-koora ukwa abhaibhöri abhëënyu hë, abhaibhöri abhëënyu bhayö nkukwa bharë, kasi mwebhorwa bhohya okohetera ko Engʼana iya Waryobha ëhöru, engʼana iyö, neraaghëndërri okobha-ho amakora ghonswe igho.

1 Peetero 2:2

Bhoono momarrë okomanya igha Omonene Yëësu Kiristo, n-wa heene. Mbe, mwighombenga amabheere amaiya agha öbhöhörëëru, kya bhono ebhengʼerre bhikutuna amabheere agha bhanyakuwaabho, na bhëënyu bhonswe ighoigho, okore mobhe na singuru, monaghe kora mohone.

1 Peetero 3:15

Mwisëëmi nkaagha syonswe igho okohonshora ömöntö wowonswe ono araabhabhööri keno mukwesegha. Mokorenga igho kwa obhohaabhu na esooko,

1 Peetero 3:21

Amanshë agha ëhöörö iyö në-kërëngyö ikya obhobhatiisyo bhono bhokobhatöörya bhëënyu reero eno, ti-igha nu-kuruusya ubhunyanku kö-möbhërë hë, kasi no-kobha na enkoro inshiiya ku-Waryobha. Amangʼana ghayö, nkobha gharë okohetera ukuryoka ukwa Yëësu Kiristo.

1 Peetero 3:5

Ni-igho bhaaikoonanga kare, abhakari bhano bhaaitengʼeranga Waryobha na ukwighwera bhashaasha abhaabho.

1 Yohana 2:29

Mmomanyirë igha, Yëësu Kiristo n-wa heene. Ku bhuyö momanye igha, wowonswe igho ono akokora amangʼana agha heene, uyö we omoona uwa Waryobha.

1 Yohana 3:3

Ömöntö wowonswe igho ono akwitengʼera igha atuubhane na Yëësu Kiristo, aisaabhuure, abhe ömöhörëëru kya Yëësu Kiristo.

1 Yohana 3:9

Ömöntö wowonswe ono yaamara okobha omoona uwa Waryobha, taköghëndërrya okokora ëbhëbhë hë, ko bhoora naana eteemo iya Waryobha. Taköghëndërrya okokora ëbhëbhë, ko bhoora m-moona uwa Waryobha.

1 Yohana 4:7

Abhaghonshe abhaane, tohanshane, ko bhoora righonshe nku-Waryobha rikurwa. Ömöntö wowonswe ono akohansha bharikyaye, uyö nkobha arë omoona uwa Waryobha, kora namanyirë Waryobha.

1 Yohana 5:1

Ömöntö wowonswe igho ono akukumya Yëësu igha n-Kiristo, uyö we omoona uwa Waryobha. Ömöntö wowonswe igho ono ahanshirë umwibhöri, nkohansha arë kora na omoona uwa umwibhöri uyö.

1 Yohana 5:18

Ntomanyirë igha, omoona uwa Waryobha taköghëndërrya okokora ëbhëbhë hë. Keno kekoghera ataköghëndërrya okokora ëbhëbhë, n-ko bhoora Yëësu Kiristo akomorenda. Ku bhuyö Oghosambwa teghokomokora ngʼana hë.

1 Yohana 5:4

Nkoghamba ndë igho ko bhoora igha, kera omoona uwa Waryobha, naana obhotoro ubhwa ukwanga obhoghogho ubhwa ko-kebhara kono. Obhoghogho bhuyö, nkubhwanga törë ku ukukumya Yëësu Kiristo.