1 Peetero 1:2 - Imuuma Eehya

² Taata Waryobha yaabhamanyirë, akabhashaaghora ukurwa kare, ko okoghera iya ësëëmyö iyaaye. Umwika uwaaye Ömöhörëëru, akabhakora mobhe abhahörëëru, okore mwighwere Yëësu Kiristo na okosaabhuurwa ko amaanyinga aghaaye. Waryobha abhëngëri örööbhö na omorembe.

1 Peetero 1:2 ပူးပေါင်းရင်းမြစ်များ

Mataayo 24:22

Singa Waryobha ataasuuhya sinsikö siyö isya inyaanyi iyö, taaho ömöntö ono akaahönirë hë. Kasi Waryobha yaasuuhya sinsikö siyö, ko okoghera iya abhaahorwa abhaaye.

Mataayo 24:24

Ko bhoora mbariisha abhantö abharongo bhano bharibherekeranga igha, mbo Kiristo, hamwë na bharööti abha obhorongo. Abhantö bhayö, mbarekora ebhemanyërryö ibhyaru ibhya amakono agha ököröghöörya. Mbarekoranga igho, okore bhangʼaine abhantö, kehane, bhangʼaine kora abhaahorwa abha Waryobha.

Mataayo 24:31

Ho ndetoma abhamaraika abhaane na eno bharahuuta sentera bhököngʼu, okore bhakomani abhaahorwa abhaane bhonswe igho. Mbarebhakomania ukurwa mbaara syonswe igho isya ekebhara keno, ukurwa ku-muhiko ughwa orobhareka örömwë, okohekera ku-muhiko ughwa orobhareka urwöndë.”

Maariko 13:20

Kora m-bono Omonene Waryobha yaasuuhya sinsikö siyö, singa atasisuuhya, taaho ömöntö ono akaahönirë hë. Kasi Waryobha yaasuuhya sinsikö siyö, ko okoghera iya abhaahorwa abhaaye.

Maariko 13:22

Ko bhoora mbariisha abhantö abharongo bhano bharibherekeranga igha, mbo Kiristo. Kora mbariisha abharööti abha obhorongo, bhano bharekora amakono na ebhemanyërryö, okore bhangʼaine abhantö, kora abhaahorwa abha Waryobha.

Maariko 13:27

Ho ndetoma abhamaraika abhaane, bhakomani abhaahorwa abhaane, ukurwa mbaara syonswe igho isya ekebhara keno, ukurwa hano ekebhara kisimiiyi, okohekera hano kikuhwera.”

Ruuka 18:7

Mbe, ku bhuyö momanye igha, Waryobha naraabhakorre ubhwa heene abhaahorwa abhaaye, bhano bhakomosaasaama ubhutikö na omobhasö. Taateghete okobhatöörrya hë

Amangʼana agha Abhatomwa 15:18

Amangʼana ghayö, ngaamanyekaini ukurwa kare.’”

Amangʼana agha Abhatomwa 2:23

Yëësu uyö, yaarëëtirwë kö-bhëënyu, ko bhono Waryobha yaamanyirë, na kya bhono yaatunanga ukurwa okosemoka. Kasi bhëënyu mokamohaneka ko-mosarabha, mokamwita, ko okohetera ko-bhantö bhano bhatarë Abhayahudi.

Amangʼana agha Abhatomwa 20:32

“Bhoono ndabhatoora ku-Waryobha, na ko engʼana iya örööbhö urwaye. Engʼana iyö, yo ekotora okobhatogheka ebhakore mobhe abhasangi abha umwandö hamwë na abhantö bhonswe igho bhano bhasaabhuurwa.

Abharuumi 1:5

Waryobha yaangʼaayë örööbhö mbe omotomwa, okohetera ku-uyö. Yaakörrë igho, okore ntëëbhi Abhakyaro bhonswe igho, bhakumi Yëësu, kora bhatööni iriina iryaye.

Abharuumi 1:7

Abhakumya bharikyane bhonswe igho bhano mörëngë Ruumi hayö, m-bëënyu nkwandekera. Waryobha nabhahanshirë bhököngʼu, nkyo kyaaghërrë akabhashaaghora igha mobhe abhantö abhaaye abhahörëëru. Örööbhö na omorembe ukurwa ku-Waryobha Taata uwëëtö, na ko-Monene uwëëtö Yëësu Kiristo, bhebhe hamwë na bhëënyu.

Abharuumi 11:2

Waryobha tiyasendeka hayö abhantö abhaaye bhano yaashaaghööyë kora ekebhara ketaraabhombwa. Kanaa, mmotamanyirë kya bhono Amaandeko Amahörëëru ghakoghamba ko amangʼana agha Ëriya, agha ikikuuro ikyaye ku-Waryobha, ko okoghera iya Abhaisiraëri?

Abharuumi 11:28

Ko engʼana eera iya ukwanga Amangʼana Amaiya agha Yëësu Kiristo, hayö Abhaisiraëri bhaabhaayë abhabhisa abha Waryobha, okore bhëënyu Abhakyaro munyoore ehoorohooro. Nokaanyoora ni-igho ërë, kasi Waryobha nakehanshirë Abhaisiraëri, ko bhoora igha, yaashaaghööyë abhakörö abhaabho kora akakora nabho riraghano.

Abharuumi 15:16

okore mbe ömököri uwa emeremo uwa Kiristo Yëësu ko-Bhakyaro. Ensonga iyaamo ni-igha, naakorwa ömösëngëri uwa okoraareka Amangʼana Amaiya agha Waryobha, okore Abhakyaro bhabhe kya ibhimwenso bheno bhëkötëghërya Waryobha, bheno bhyaarabhwa na Umwika Ömöhörëëru.

Abharuumi 16:19

Abhantö bhonswe igho bhaighwa igha, m-baighwa mörë. Engʼana iyö nkunshomera ërë bhököngʼu. Nkutuna ndë mobhe na sehakëri isya okokora amangʼana amaiya, motakaabha na risoro irya amangʼana amaghogho.

Abharuumi 16:26

Bhoono amangʼana harabhu igho gharë okohetera ko-Maandeko Amahörëëru agha abharööti. Amangʼana ghayö agha imbumbure, ngamanyekaini ku-bhyaro bhyonswe igho. Waryobha uwa amakora ghonswe igho, we yaaraghërrya igha, obhoheene bhuyö bhoraarekwe ko-bhantö abha ibhyaro bhyonswe igho, okore abhantö bhayö, bhakumi Omonene Yëësu Kiristo, kora bhakore bhono akutuna.

Abharuumi 8:13

Momanye igha, hano moraabhe abhantö bhano mokotangatwa na esemoko iya öbhököri ubhwa ëbhëbhë, hayö nu-ruku urwa amakora ghonswe igho mukwireetera. Kasi hano obhotoro ubhwa Umwika Ömöhörëëru, bhoraabhatöörri mwange okokora amangʼana ghano esemoko iya öbhököri ubhwa ëbhëbhë ikutuna igha mokore, moraabhe na öbhöhöru ubhwa amakora ghonswe igho.

Abharuumi 8:33

Taaho ömöntö uwa ukushongera abhaahorwa abha Waryobha, ko bhoora Waryobha umwene we akobhabhara igha m-ba heene.

1 Abhakörintö 1:30

Waryobha we abhaghootaini hamwë na Kiristo Yëësu. Uyö, we Waryobha yaamokora abhe obhongʼaini kö-bhëëtö, bhono bhukurwa ku-Waryobha, obhoheene, esaabhuuro na ubhutungurya ubhwa ëbhëbhë ibhyëtö.

1 Abhakörintö 6:11

Abhandë mö-bhëënyu muyö, ni-igho mwaarë. Kasi bhoono mwoghibhwa obhoghogho ubhwënyu, mwahorwa, mokakorwa abha heene okohetera ku iriina irya Omonene uwëëtö Yëësu Kiristo, na ku-Mwika uwa Waryobha uwëëtö.

2 Abhakörintö 10:5

Nkotemora bhërë amaitegherro na amangʼana ghonswe igho agha ubhwihashi, ghano ghakoghera abhantö bhanga okomanya Waryobha. Nkoghoota törë këghötërëëyë amaitegherro ghonswe igho okore ghaighwere Yëësu Kiristo.

Abhakorosaai 3:12

Bhoono ko bhoora m-baahorwa abha Waryobha mörë, kora na-bhahörëëru bhano ahanshirë, mobhe na enkoro iya amaabhë, eteemo inshiiya, ubhwihöötu, obhohaabhu, bheena öbhöghömërrya.

2 Abhatësarönikë 2:13

Kasi bhëëtö, ni-igha tukumi Waryobha senkaagha syonswe igho, ko okoghera iya bhëënyu abhakumya bharikyëtö, bhëënyu bhano mohanshirwë na Omonene Yëësu. Ni-igha tokore igho, ko bhoora yaabhashaaghööyë ukurwa okosemoka ukwaye ukwa öbhöbhömbi, okore möhönibhwi. Möhönibhwi ko okosaabhuurwa na Umwika Ömöhörëëru ono akosaabhuura, na ko kohetera ukukumya ukwënyu obhoheene.

2 Timoteo 2:10

Ku bhuyö nköghömërrya ndë ghonswe igho, ko okoghera iya abhantö bhano bhaashaaghorwa na Waryobha igha bhabhe abhantö abhaaye. Nkokora ndë igho, okore abhantö bhayö bhahönibhwi ku ukukumya Kiristo Yëësu, kora bhasange ubhuhika ubhwaye bhono bhotakohwa.

Tiito 1:1

Ritashandighi reno, nö-öni Pauro ndyandëkirë, öni ömököri uwa emeremo uwa Waryobha, ono ndëngë omotomwa uwa Yëësu Kiristo. Naatomwa ndaghërri abhantö bhano bhaashaaghorwa na Waryobha, okore bhamukumi na okomanya obhoheene ubhwa Yëësu Kiristo. Obhoheene bhuyö, mbo bhokoraghërrya abhantö bhasooke Waryobha,

Abhaëbhuraania 10:22

Ku bhuyö ni-igha tusuntare ku-Waryobha kwa nkoro nyihöötu na umukumo omohekeranu, ko bhoora Waryobha asaabhuurrë senkoro isyëtö ko amaanyinga agha Yëësu Kiristo, okore totakaabha na amaitegherro amaghogho. Kora atwisaabhëri ëmëbhërë ighyëtö mo-manshë ghano ghatabhöröngökirë.

Abhaëbhuraania 11:28

Umukumo, ghwaaghërrë Mosa akakora inyangi iya Epasaka, akatëëbhya Abhaisiraëri igha bhahake amaanyinga ko-mekango ighya ebhesaku, okore hano maraika umusikya araashe, atakaakunia abhaana abhatangi abha Abhaisiraëri.

Abhaëbhuraania 12:24

Muhikirë ku-Yëësu, umwighwerrania uwa Imuuma Eehya, ko-maanyinga aghaaye ghano gheeteka. Amaanyinga ghayö, teghanga kya amaanyinga agha Abhëëri ghano ghaatunanga okohaka ikisiiyomba, kasi gho na-maabhë ghakushumaashera.

Abhaëbhuraania 5:9

Mbe, ko okoghera iya ghayö, Waryobha akamokora aingʼarre okobha esemoko iya öbhötöörya ubhwa amakora ghonswe igho ko bhonswe igho bhano bhakwighwera Ömötöörya uyö.

1 Peetero 1:14

Ko bhoora igha, bhoono m-baana abha Waryobha mörë, ni-igha mosooke Waryobha. Motakaikërrya ghwiki okobha na oronamba oroghogho rono mwaarenga naro kare, hano mwaarenga motaraamanya Amangʼana Amaiya agha Yëësu Kiristo.

1 Peetero 1:19

Kasi yaabhatungurya okohetera ko amaanyinga ghano ghaana ubhwera obhonene. Amaanyinga ghayö, na-agha Yëësu Kiristo, uyö we yaarë kya ekemaanwa ikya ringʼöndi keno ketaana ekebheera handë risoro.

1 Peetero 1:20

Waryobha yaamwahööyë ukurwa kare kora ekebhara ketaraabhombwa, ko okoghera iya ësëëmyö iyaaye. Kasi akaghanya okohekera ko-nkaagha iya umuhiko eno, akamoreeta, akamotoora harabhu igho ko-bhantö bhonswe igho abha ko-kebhara kono. Yaakörrë ghayö ghonswe igho, ko okoghera iya bhëënyu.

1 Peetero 1:22

Öbhömënyi ubhwënyu, nkorengʼaana bhörë na amëëghyö agha heene agha amangʼana agha Yëësu Kiristo. Ku bhuyö senkoro isyënyu syasaabhuurwa, na bhoono nkotora mörë okohansha abhakumya bharikyënyu këmwëkëmwë. Mbe, mohanshane bhököngʼu,

1 Peetero 2:9

Kasi bhëënyu no-roghanda urwahorwa mörë, abhasëngëri abha Obhokama, rikomo irya abhahörëëru, abhantö abha Waryobha umwene, okore moraarekenga amangʼana amarito agha Waryobha. We yaabhabhërëkëëyë murwe mu-kisuntë, mosohe mo-bhorabhu ubhwaye obhonene bhono bhököröghöörya.

2 Peetero 1:2

Örööbhö na omorembe bhebhe hamwë na bhëënyu bhököngʼu, ko okohetera ko okomanya Waryobha bhaana Omonene uwëëtö Yëësu.

2 Yohana 1:1

Öni omoghaaka uwa ekanisa, nu-uwe umusubhaati nkwandekera ritashandighi reno, hamwë na abhaana abhaaho. Uwe musubhaati, waahorwa na Waryobha hamwë na abhaana abhaaho. Uwe hamwë na abhaana abhaaho, ko bhoheene nembahanshirë. Tö-öni umwene igho mbahanshirë hë, kasi kora abhandë bhonswe igho bhano bhamanyirë obhoheene, mbabhahanshirë.

2 Yohana 1:13

Abhaana abha musubhaati uwëënyu ono yaahorwa na Waryobha, bharakökëërya.

Yuuda 1:2

Ikyabhera, omorembe na righonshe bhebhe hamwë na bhëënyu bhököngʼu.