1 Abhakörintö 2:14 - Imuuma Eehya

¹⁴ Mbe, ömöntö ono ataana Umwika uwa Waryobha, uyö takotora okoghoota amangʼana ghano ghakurwa ku-Mwika uwa Waryobha, ko bhoora uyö, nkomaaha arë amangʼana ghayö igha, n-ga ekekangi. Kora taatore okoghamanya hë, ko bhoora nkomanywa gharë ko obhotoro ubhwa Umwika Ömöhörëëru.

1 Abhakörintö 2:14 ပူးပေါင်းရင်းမြစ်များ

Mataayo 16:23

Kasi Yëësu akaisyörrya Peetero, akamohonshora igha, “Ndwera-ho ghore Oghosambwa! Nkushaashya örë okondebherra, okore ntakaakora bhono Waryobha akutuna. Amaitegherro aghaaho ghayö, n-ga kinyabhantö, tegharëngë agha Waryobha hë.”

Yohana 10:20

Abhantö abhaaru mo-bhayö, bhakaghamba igha, “Ono n-disambwa aanaryo, kora m-mushuuru, bhoono n-kwakë mukumwitegherra?”

Yohana 12:37

Nokaanyoora Yëësu yaakörrë ebhemanyërryö ibhyaru ibhya amakono bharamaaha na amaiso aghaabho, kasi tebhaamukumiri hë.

Yohana 14:17

Uyö we Umwika uwa obhoheene. Abhantö bhano bhatakwighwera Waryobha, tebhatore ukumwikërrya hë, ko bhoora tebhakomomaaha hë, kora tebhamomanyirë hë. Kasi bhëënyu momomanyirë ko bhoora hamwë arë na bhëënyu, kora mö-bhëënyu araabhe.

Yohana 14:26

Kasi Ömötöörrya uyö, Umwika Ömöhörëëru uyö, ono Taata araatome kö-bhëënyu okohetera ku iriina iryane, naraabhëëghi ghonswe igho, kora abhahiitöki ghonswe igho ghano naabhatëëbhëri.

Yohana 15:26

“Nentoma Ömötöörrya kö-bhëënyu, Ömötöörrya uyö we Umwika Ömöhörëëru ono akohonyorra abhantö bhonswe igho obhoheene. Nko-Taata akurwa, hano arihika, narimererra obhoheene ubhwa amangʼana aghaane.

Yohana 5:44

Bhoono iyakë moraankumi rëndë mbe keno mukutuna n-sinkuma isyënyu abheene ko bheene, kasi sinkuma seno sikurwa ku-Waryobha timukusituna hë?

Yohana 8:43

N-kwakë motakomanya ghano nkoghamba? N-ko bhoora mukwanga amangʼana aghaane.

Amangʼana agha Abhatomwa 16:14

Mo-bhantö bhano bhaatwitegherranga, yaare-mo omokari uwöndë uwa umughi ughwa Tiyatira, ono yaabherekerwanga igha Ridia. Ridia m-möhönia yaarë uwa singibho sinshiiya isya erangë këësërö, omokari uyö, yaasookanga Waryobha. Omonene Yëësu akaghoota enkoro iya Ridia, enkaagha eno yaaitegherranga amangʼana ghano Pauro yaaghambanga. Akakumya amangʼana ghayö, akabhatiisibhwa.

Amangʼana agha Abhatomwa 17:18

Mbe, Pauro akahomerana na abhamanyi abha rikomo irya idiini ya Ikiepikureo na Ikisitoiko, bhakanyeerana senkaani. Abhandë bhakaghamba igha, “M-mangʼana kë ghano umwibhamböku ono akoghamba?” Abhandë bhakaghamba igha, “Eramaahekana igha, m-biwaryobha ibhya ikyaro ikyëndë akushumaashera.” Mbaaghambirë igho, ko bhoora Pauro yaabharaarëkëëyë Amangʼana agha Yëësu, na agha ukuryoka ukwa abhaku.

Amangʼana agha Abhatomwa 17:32

Mbe, hano bhaaighuurë amangʼana agha ukuryoka ukwa abhaku, abhandë bhakashabhura. Kasi abhandë bhakamötëëbhya igha, “Toratuna ghwiki tukwitegherre ko engʼana iyö.”

Amangʼana agha Abhatomwa 18:15

Kasi ko bhono n-senkaani isya amangʼana, amariina na amaraghërryö ghëënyu, moghamare bhëënyu abheene. Öni tëndëngë umwahokania uwa amangʼana ghayö hë.”

Amangʼana agha Abhatomwa 25:19

Kasi keno bhaarë nakyo, n-nsenkaani isya amangʼana agha idiini iyaabho, na agha ömöntö ono yaakwa, arabherekerwa igha Yëësu, kasi Pauro akakangʼasërrya igha, Yëësu uyö m-möhöru.

1 Abhakörintö 1:18

Engʼana iya omosarabha ughwa Yëësu Kiristo ko bhano bhakusira, nkomaaha bharë igha, m-bokangi, kasi ko bhano tökötööribhwa, nkomaaha törë igha, engʼana iyö, no-bhotoro ubhwa Waryobha.

1 Abhakörintö 1:21

Nkoghamba ndë igho ko bhoora igha, Waryobha ko obhongʼaini ubhwaye, yaakörrë igha, abhantö bhatakaamomanya okohetera ko-bhongʼaini ubhwabho abheene. Kasi Waryobha akamaaha igha, atööri abhantö bhano bhakukumya engʼana eno ekoraarekwa, eno abhantö abhandë bhakomaaha igha m-bokangi.

1 Abhakörintö 1:23

Kasi bhëëtö, Yëësu Kiristo we tokoraareka, ono yaahanëkirwë ko-mosarabha. Engʼana iyö, yo Abhayahudi bhakwituuratuura-ko, na ko-Bhaghiriki, m-bokangi.

1 Abhakörintö 1:25

Ko bhoora igha, engʼana iya Waryobha eno ekomaahekana igha ni-iya obhokangi, nkunyoora örë eena obhongʼaini okokera obhongʼaini ubhwa abhantö. Engʼana iya Waryobha eno abhantö bhakomaaha igha m-botaaniinu, neena obhotoro okokera ubhwa abhantö.

1 Abhakörintö 15:44

Nkobheekwa ghörë ömöbhërë ughwa esemoko, ghuryökibhwa ömöbhërë omohya ghono torehaanwa na Umwika Ömöhörëëru. Ko bhoora ghooho ömöbhërë ughwa esemoko, na ömöbhërë omohya ghono torehaanwa na Umwika Ömöhörëëru, ghonswe ho ghörë.

1 Abhakörintö 15:46

Kasi ömöbhërë ghono ghokotangata, tu-ughwa öbhöhöru hë, nu-ghwa esemoko ghoora, bhoono ho ghomanya kuusha ghono ghotakukwa.

1 Abhakörintö 2:12

Bhëëtö, tetwahaanwa enkoro iya ko-kebhara kono, kasi nu-Mwika ono akurwa ku-Waryobha we twaahaanwa, okore tomanye amangʼana ghano Waryobha yaatohaana bhosa igho.

1 Abhakörintö 3:1

Abhakumya bharikyane, tenaashumaashirë na bhëënyu kya hano ömöntö akushumaasha na abhantö bhano bhakotangatwa na Umwika Ömöhörëëru. Kasi naashumaashirë na bhëënyu, kya hano ömöntö akushumaasha na abhantö bhano bhaana esemoko iya öbhököri ubhwa ëbhëbhë. Naashumaashirë na bhëënyu kya ebhengʼerre ko mangʼana agha ukukumya Kiristo.

Yaakobho 3:15

Obhongʼaini ubhwa eteemo iyö, m-boghogho, tibhukurwa ku-Waryobha hë, kasi nu-bhwa kinyabhantö, ubhwa ko-kebhara kono, bhono bhukurwera ko-Ghosambwa.

1 Yohana 2:20

Kasi bhëënyu, Yëësu Ömöhörëëru yaabhahaana Umwika uwaaye, bhoono bhëënyu bhonswe igho, mmomanyirë obhoheene.

1 Yohana 2:27

Kasi bhëënyu, Yëësu Kiristo yaabhahaana Umwika Ömöhörëëru, ono akwikara mö-bhëënyu. Uyö we aköbhöörökërrya ghonswe igho, na amëëghyö aghaaye na-agha obhoheene, te-agha obhorongo hë. Ku bhuyö, taaho ömöntö uwöndë uwa ököbhöörökërrya, kya bhono Umwika aköbhëëghya, möghëndërri okobha na öbhömwë na Yëësu Kiristo.

1 Yohana 5:20

Ghwiki ntomanyirë igha, Omoona uwa Waryobha yaamara ukuusha ko-kebhara kono, yaatohaana obhongʼaini ubhwa okomanya Waryobha ubhwa heene. Ntoona öbhömwë na Waryobha uwa heene, ko okohetera kö-bhömwë ubhwëtö na Yëësu Kiristo Omoona uwaaye. Yëësu Kiristo uyö, we Waryobha uwa heene, na uwa öbhöhöru ubhwa amakora ghonswe igho.

Yuuda 1:19

Abhantö bhayö, m-baköri abha ikisiiyomba, amangʼana agha ko-kebhara kono, ngo agheene bhakwitegherra, tebhaana Umwika Ömöhörëëru uwa Waryobha hë.