1 Abhakörintö 13:4 - Imuuma Eehya

⁴ Ömöntö uwa righonshe, nköghömërrya arë amangʼana, nkösërëënia arë abhantö, takobha na rikenge hë, takwihasha handë ukwiheema hë.

1 Abhakörintö 13:4 ပူးပေါင်းရင်းမြစ်များ

Mataayo 27:18

Keno kyaaghërrë Piraato akabhabhöörya igho, n-ko bhoora yaamanyirë igha, abhatangati abha Abhayahudi, mbaaghöötirë Yëësu ko okoghera iya rikenge.

Amangʼana agha Abhatomwa 7:9

“Abhakörö abhëëtö bhayö, bhakamaahera mura uwaabho rikenge, ono yaabherekerwanga igha Yusufu. Bhakamöghörya, abhe omoghorwa mu-kyaro ikya Miisiri. Kasi Waryobha n-hamwë yaabhanga na Yusufu.

Abharuumi 1:29

M-baköri abha ëbhëbhë ibhya seteemo syonswe igho, obhoghogho bhwobhwonswe igho, kora m-bahiti abha ëbhëntö bhyonswe igho, mbaana orongʼeera. Bhahanshirë riihë, m-baiti abha abhantö, m-basëëghërrya, m-barongo, m-ba amaitegherro maghogho, m-baghambi abha abhantö.

Abharuumi 13:13

Tobhe na eteemo inshiiya kya iya abhantö abha mo-merengaari ighya urusikö orohya. Totakaabha abhaköri abha sinyangi isya obhohoobhaaru na öbhörëëbhi, totakaabha abhasooraare, totakaakora amangʼana agha sënsöni, ubhutindi na rikenge.

1 Abhakörintö 3:3

Ko bhoora nanyabhoono, bhëënyu m-bantö abha esemoko iya öbhököri ubhwa ëbhëbhë mörë. Hano okomaaha moona rikenge bheena öbhösëëghërrya, momanye igha, m-bantö abha esemoko iya öbhököri ubhwa ëbhëbhë mörë, kora amangʼana aghëënyu nkoghakora mörë kinyamöbhërë.

1 Abhakörintö 4:18

Ndaighwa igha mö-bhëënyu muyö bhaamo bhano bhakwihasha bharakanya igha tiniishe kö-bhëënyu iyö hë.

1 Abhakörintö 4:6

Mbe, abhakumya bharikyane, nëndëngëri amangʼana aghaane na Apöörö, okore ghabhe ëkërëngyö keno keraabhatöörri okomanya amangʼana agha ëkërëngyö keno igha, “Motakaataamboka keera Amaandeko Amahörëëru ghakoghamba.” Nkoghamba ndë igho, okore ömöntö mö-bhëënyu muyö, atakaibhaakera murikyaye na okomosera.

1 Abhakörintö 5:2

Bhëënyu moraihashera engʼana iyö. Nyakara mokaabhaabhayëëyë na mughire ömöntö uyö yaakora ghayö, arwe mö-bhëënyu muyö.

1 Abhakörintö 8:1

Mbe, bhoono tigha nshumaashere amangʼana agha ibhyakorya bheno bhimwënsëywë ëbhëtöndö. Ntomanyirë bhono bhëënyu mokoghamba igha, “Bhëëtö bhonswe igho, ntoona obhomanyi ko amangʼana ghayö.” Kasi obhomanyi, nkoreeta bhörë ikiheemere ko-bhantö. Na righonshe ryo nkoghera rërë umukumo ughwa ömöntö ghonagha.

2 Abhakörintö 12:20

Bhoono nkoobhoha ndë igha, ndatora ukuusha, nyoore morakora amangʼana ghano ghatakunshomera. Engʼana kya iyö eratora okokora mbakorre engʼana eno etaabhashomere. Ndatora ukunyoora morabheehana, moona rikenge, okorerrana, okokora ikisiiyomba, okohaamërrania, obhoghambi ubhwa abhantö, ubhwihëëmi, na riihë.

2 Abhakörintö 6:6

Bhëëtö m-bantö abha heene törë, m-bamanyi abha amangʼana törë, m-baghömërrya törë, kora m-basërëënia törë. Nkokora törë amangʼana ghayö, ko okotangatwa na Umwika Ömöhörëëru, na righonshe reno retaana ubhwiköri,

Abhagharatia 5:26

Totakaikumyanga bhosa igho, totakatenderananga handë okokorrana rikenge.

Abhaëfësö 4:2

Mwihoote ko-ghonswe igho ghano mokokora, mobhe abhahaabhu, möghömërri na ököghömërrania ukwa okohanshana.

Abhaëfësö 4:32

Mokorrane amangʼana amaiya, mohanshane na mwabherane kya bhono Waryobha yaabhabhëëyë okohetera ku-Yëësu Kiristo.

Abhafiripi 1:15

No-bhoheene igha, bhaaho abhandë bhano bhakoraareka amangʼana agha Kiristo, ku rikenge na riihë. Kasi abhandë hobharë, bhano bhakoraareka kwa nkoro nshiiya.

Abhakorosaai 1:11

Torabhasabhera igha, Waryobha abhatöörringa ku singuru isya ubhuhika ubhwaye, okore möghömërringa ghonswe igho motakaarosa. Mushomerwenga

Abhakorosaai 2:18

Bhaaho abhantö bhano bhakokangʼasërrya amangʼana agha ubhwihöötu ubhwa okomaahwa na abhantö na agha okosengerra abhamaraika. Motakabhaikërrya, bhatakaasha okobharuusya ituho iyëënyu iya amakora ghonswe igho. Abhantö bhayö nkwiheema bharë ko bhoora bhakoghamba igha, bhaamaaha amangʼana ghayö mo-bherooto. Kasi obhoheene ni-igha, amaitegherro aghaabho amaghogho agha bhunyakyaro, ghabhakangihya.

Abhakorosaai 3:12

Bhoono ko bhoora m-baahorwa abha Waryobha mörë, kora na-bhahörëëru bhano ahanshirë, mobhe na enkoro iya amaabhë, eteemo inshiiya, ubhwihöötu, obhohaabhu, bheena öbhöghömërrya.

1 Abhatësarönikë 5:14

Abhakumya bharikyëtö, torabhasaasaama igha, mokaaninga abhooro na okotogheka bhano bhaakwa emetwe. Ghwiki motoghekenga bhano bhataana singuru na ököghömërrya abhantö bhonswe igho.

1 Timoteo 6:4

Abhantö bhayö, nkwibhaaka arë bhosa igho, kora tamanyirë engʼana hë. Ömöntö kya uyö, nu-mwingʼangʼo aanagho ughwa senkaani isya ebhengʼanangʼana igho, bheno bhetaana ubhwera. Amangʼana ghayö, ngo ghakoreeta orongʼeera, riihë, amatöki, na amaitegherro amaghogho.

2 Timoteo 2:25

Ni-igha akaaninga abhantö bhohaabhu igho bhano bhakumunyeera senkaani, okore hanga Waryobha akabhakora bhahongore ëbhëbhë ibhyabho, bhamanye obhoheene.

2 Timoteo 3:10

Kasi uwe waaghoota-ko amëëghyö aghaane, eteemo iyaane, ësëëmyö iyaane, umukumo ughwane, na ököghömërrya ukwane,

2 Timoteo 4:2

Bhoono oraarekenga engʼana iya Waryobha na eno wisëëmëri okokora emeremo ighya Waryobha, ko-nkaagha eno amangʼana ghakughya bhuuya, na enkaagha eno ukunyoora ghasarëkirë. Okaaninga abhantö, obhahamerenga na okobhatogheka. Okorenga igho, kö ököghömërrya bhököngʼu na örëëghya.

Tiito 3:3

Kora bhëëtö bhonswe kare hayö, hano waanyöörrë totaraakumya Yëësu, m-bakangi twaarë, abhatëëyu, kora ntwaangʼainirwë, tokabha abhaghorwa abha oronamba, na amangʼana amaaru agha ko-kebhara kono, ghano ghaaturutanga. Tokabha abhantö abhaghogho na abha orongʼeera. Tokabha abhantö abha okoreghana na abhantö abhandë.

Yaakobho 4:5

Kasi nkokanya mörë igha, Amaandeko Amahörëëru m-bosa ghakoghamba igha, Umwika ono Waryobha yaatohaana araighwa öbhörrö bhököngʼu?

1 Peetero 2:1

Mbe, mutighe obhoghogho bhonswe igho, seteemo syonswe igho isya okongʼaina abhantö, ubhwiköri, na rikenge, kora motakaaghambanga bhoghogho abhantö.

1 Peetero 3:8

Ko okomarërrya, nkobhatëëbhya ndë bhonswe igho igha, mobhe kiina këmwë, motakaabha na amaitegherro abhërë. Mohanshane kya abhantö abha enda ëmwë, mwabheranenga kora mwihootenga.

1 Peetero 4:8

Engʼana enene okokera ghonswe igho, ni-igha mohanshane bhököngʼu, hano moraahanshane, moraabherane bhököngʼu obhosarya ubhwënyu bhono mokokorrana.

2 Peetero 1:7

Okosooka Waryobha kuyö kwëngëribhwi-ko righonshe irya okohanshana bhëënyu abheene ko abheene, okohanshana kuyö, kwëngëribhwi-ko na righonshe irya okohansha abhantö bhonswe igho.

1 Yohana 4:11

Abhaghonshe abhaane, ko bhoora igha Waryobha ni-igho yaatohanshirë, na bhëëtö bhonswe ni-igha tohanshane.