लूका 7:47 - सिरमौरी नौवाँ नियम

⁴⁷ “हांव ताखै बुलू; कै ऐजै मुखै जादा प्यार इथकारिए कौरौ जिथुकै इयौंकै पाप माफ कौरे राए जू बौहितै थिए; पौरौ जिनकै दैणिक पाप माफ कौरे राए सै मुंआरी दैणी शा प्यार कौरौ।”

Sirmouri

⁴⁷ ईन्देंखे हाँव ताँव्खे बुलू, याँरे पाप जू बैजाऐ असो, से माफ हुऐ, किन्देंखे के ईऐं पियार शा भैजाऐ साँन माँनी थुवा; ईन्देंखे जैस्खे ठीको माँफ करी थो, से पियार शा साँन भे ठीका ही माँन्दा।”

लूका 7:47 ပူးပေါင်းရင်းမြစ်များ

मत्ती 10:37

जू माँ बापू खै मुं दा जादा प्यार कौरौ, सै मैरै लायक ना आथी, औरौ जू बैटा या बैटी खै मुं दा जादा प्यार कौरौ, सै मैरा चैला बौणणौ कै लायक ना आथी।

लूका 7:39

ऐजौ दैखैयो सैजा फरीसी जैणै तैसी बोइदै राए थिया, आपणै मनो दो सुंचदा लागा, “जै यीशु पौरमेशवर कै बातौ बौताणौवाल़ा हौंदा तौ जाणै पांदा कै ऐजै जियैं ऐसीखै छुए लौआ, सै कुण औसौ, औरौ ऐजै कैशणी बैटमाणिश औसौ, जिथुकै ऐजै तौ वेश्या बैटमाणिश औसौ।”

लूका 7:46

तुऐं मैरै मुंडो पांदी जैतून कौ तेल बै ना मुल़ी, पौरौ इयैं मैरै लातो पांदी मौंगौ इत्र मौल़ौ।

लूका 7:48

औरौ तैणै बैटमाणिशौ खै बौल़ौ, “तैरै पाप माफ हौए गौवै।”

प्रेरितो कै काम 5:31

तैसीखैईं पौरमेशवरे राजा औरौ उध्दार कौरणौवाल़ा ठोहराएयो, आपणै सोऐं हाथौ कै सौबी दै बौड़ै ठाँव पांदी बौठाल़े दिया ताकि सै इस्राएल देश कै लोगौ कै आपणै बुरै सोंच विचारो औरौ बुरै बाटो शै पौरमेशवर कै ढौबौ फिरो औरौ तैसकै दवारा तिनुकै आपणै पापौ कै माफी दै।

रोमियों 5:20

मूसा कै कानून इथकारिए दैय राए ताकि सौबै लोग दैखै सौकौ कै सै कैतरै पापी थिए। पौरौ जोबै लोगै जादा शै जादा पाप कौरे, तिथै पौरमेशवरे जू अनुग्रह दिखोऊवा सै जादा शै जादा हौआ।

2 कुरिन्थियों 5:14

जिथुकै मसीह का प्यार आमुखै मोजबूर कौरे दैंव; इथकारिए कै आमु ऐजा पौता औसौ, कै ऐक आदमी सौबी लोगौ कै खातिर मौरे गौआ, इथकारिए सौबै लोग मौरे गौवै।

गलातियौं 5:6

जै तुऐं मसीह यीशु कै चैलै औसौ तौ इयौं बातौ लैई किछै फर्क ना पौड़ौ कै तोंवारा खतना हौए रौआ कै ना हौए रैई। पौरौ बैजाए खास बात ऐजी औसौ कै आमु मसीह पांदी बिशवाश कौरु औरौ पौरमेशवर औरौ ओकी लोगौ कै प्रति प्यार राखु।

इफिसियों 6:24

पौरमेशवर तिनु सौबी कै आपणा अनुग्रह दिखांव जू अमारै प्रभु यीशु मसीह आरी प्यार कौरौ, सैजा प्यार जू कौलोंई खत्म ना हौंव।

फिलिप्पियों 1:9

हांव ऐजै प्रार्थना कौरु कै तुऐं ऐकी दुजैआरी हौजौ जादा प्यार कौरदै रौ, औरौ सौचाई कै ज्ञान औरौ सौबी भान्त कै विचारो कै साथै लगातार बौढ़दै जाव।

1 तीमुथियुस 1:14

अमारै प्रभुए मुं पांदी लगातार आपणा अनुग्रह दिखोऊवा। तैणै मुखै बिशवाश औरौ प्यार दैय राए जिथुखै हांव प्रभु यीशु कै साथै एकजुट थिया।

1 यूहन्ना 1:7

पौरौ जै आमै सैजौई कौरु जू सोही औसौ जैशैखै पौरमेशवर सिध्द औसौ औरौ पेयाशै कै जैशणा औसौ, तैशैखैई अमारा बर्ताव बै पेयाशै कै जैशणा सोही हौंव, तौ आमु ऐकी दूजै कै साथै रोऊं, औरौ तैसकै बैटै यीशु मसीह का लोऊ आमु सौबी पापौ शै शुध्द कौरौ।

1 यूहन्ना 3:18

ओए रै प्यारे नानड़िया, तुऔं साची मौदद कौरेयौ ओकीआरी आपणा प्यार दिखाणा चैंई ना कै सिरफ प्यार कै बारै मुंजी बातौ कौरणी चैंई।

1 यूहन्ना 4:19

आमु पौरमेशवर औरौ ऐकी दुजैआरी इथकारिए प्यार कौरु, जिथुकै आगै पौरमेशवरे आमुआरी प्यार कौरा।

1 यूहन्ना 5:3

पौरमेशवर आरी प्यार कौरणौ का मतलब ऐजा औसौ कै आमु तैसकी आज्ञाओं खै मानु, औरौ तैसकी आज्ञाओं का पालन कौरणा चैईथा ना आथी।