इब्रानियों 9:15 - सिरमौरी नौवाँ नियम

¹⁵ इथ बौजैह शै मसीह पौरमेशवर कै ढौबौशा आपणै लोगौ कारिए ऐक नोऐं कौरार लाणौ वाल़ा बिचोलिया औसौ। ताकि सैजै लोग जिनुखै पौरमेशवरे बौएदै राए तिनु आशीषौ खै पाए सौकौ जिथका वादा पौरमेशवरे कौरे राए थिया। ऐशै इथकारिए हौए सौकौ जिथुकै मसीह तिनु तिनकै पापौ कै सौजा शै आज़ाद कौरवाणौ कारिए मौरे गौआ जू तिनुऐ आगलै कौरार कै अधीन रौयौ कौरे राए थिए।

Sirmouri

¹⁵ अरह् ऐसी ही कारण मसीया नुवें वाचा खे ऐक त्रींण चीज बंणा, जू तियों मंऊँत्ती के कारण जुण्जी आगले वाचा के बंख्त्ते अपराधों शा छ़ुट्कारा पाँणों खे कंरा गुवा थिया; जिन्दें लंई बंईदे अंदे लोग तेसी बाय्दे के मुँताबिक सदा खे हंकदार बंणाँऐ ज़ाँदे।

इब्रानियों 9:15 ပူးပေါင်းရင်းမြစ်များ

मत्ती 19:29

औरौ जैसी कोसीए घोरो या भाईयों या माँ-बापू या नानड़िया या बागड़ी खै मैरै नांव कारिए छोड़े राए, तिनुखै शौ गुणा भेटदो: औरौ सै सौदा कै जिन्दगी का औधिकारी हौंदा।

मत्ती 22:3

औरौ तैणै आपणै नोकरो खै भैजै, कै नेवता देएयोंदे लोगौ कै बैयाव खाणौ खै बोईदौ, पौरौ तिनुऐ आणौ ना चैंई।

मत्ती 25:34

तोबै यीशु राजा आपणै सोऐं ढौबौ खौड़ै हौणौवाल़ै कै बौलदा, ‘ओए रै मैरै पिता खै धन्‍य लोगौ, आव, तैसी राज्य कै औधिकारी हौए जाव जू दुनिया कै शुरु सै तुऔं कारिए तैयार कौरे राए।

मत्ती 25:36

जोबै हांव नांगा थिया, तुऐं मुखै बामणौ खोटणो दियै, जोबै हांव बीमार थिया, तौ तुऐं मैरै दैखभाल कोरी, जोबै हांव कोयदी दा थिया, तुऐं मुखै भैटिंदै ओऊवे।’

मरकुस 10:17

जोबै यीशु औरौ तैसकै चैलै बाटो पुंडे जांदै लागै रौवै थिए, तौ ऐक आदमी तैसकै धोरे दौड़ैबा ओऊवा, औरौ तैसकै आगै घुंडू नियुड़ाएयो तैसी कैईंदु पूछु, “ओए रै आछै गुरु, हांव ऐशणा का काम कौरु कै पौरमेशवर मुखै सौदा कै जिन्दगी दैला?”

लूका 18:18

कोसी ऐकी ठोगड़े तैसी कैईंदु पूछु, “ओए रै आछै गुरु, हांव ऐशणा का काम कौरु, कै पौरमेशवर मुखै सौदा कै जिन्दगी दैला?”

लूका 22:20

ऐशैखैई तैणै खाणौ कै बाद अंगूर कै रसो का भौरेयौंदा छाना ऐजौ बौलेयौ दियु, “ऐजा अंगूर कै रसो का छाना मैरै तैसी लोऊ कै जैशणा औसौ जू तुऔं कारिए बोवाए जांव, जू नोऐं कौरार औसौ।

यूहन्ना 10:28

औरौ हांव तिनुकै सौदा कै जिन्दगी दियु, औरौ सै कौलोंई नाश ना हौंदै औरौ कुणिए तिनुखै मुंआदे छीणै ना सौकौ।

प्रेरितो कै काम 20:32

औरौ ऐबै हांव तुऔं पौरमेशवर कै, औरौ तैसकै अनुग्रह कै वचन खै सौंपै दियु, जू तुऔं बिशवाश दै मोजबूत कौरे सौकौ, औरौ पौरमेशवर तुऔं सैजै विरासत दैंदा जियौं दैणौ का वायदा तैणै तिनु सौबी लोगौ शै कौरे राए जू तैसकै जरिए पवित्र हौए रौवै।

रोमियों 5:10

जिथुकै जोबै आमै पौरमेशवर कै बौयरै थिए तौ तैसकै बैटै कै मौत कै दवारा तैणै अमारै साथै मैल-मिलाप बाणा, इथकारिए आमु निशोंक हौयौ ऐजै बात जाणुए कै अमारा तैसकै साथै मैल-मिलाप का सौमझौता हौए रौआ तौ सै आमु बौचांदा जिथुकै मसीह जियुंदी औसौ।

रोमियों 5:6

जिथुकै जोबै आमै कमजोर ही थिए, तौ पौरमेशवर दवारा ठौहरायौंदे सौमय पांदी मसीह आमु अधरमी लोगौ कारिए मौरा।

रोमियों 5:8

पौरौ पौरमेशवर आमु पांदी आपणै प्यार कै भोलाए इयौं तरीकै लैई प्रगट कौरौ, कै जोबै आमु पापी ही थिए तौलोंई मसीह आमु कारिए मौरा।

रोमियों 6:23

जिथुकै पाप वाल़ै कामौ का नतीजा तौ मौत औसौ, पौरौ जू वरदान पौरमेशवर आमु दैंव, सै सौदा कै जिन्दगी औसौ जू अमारै प्रभु मसीह यीशु दै औसौ।

रोमियों 8:28

औरौ आमै जाणुए, कै जू लोग पौरमेशवर आरी प्यार राखौ, पौरमेशवर तिनु लोगौ कै खातिर सौबी चीज़ौ कै ऐक आछै अन्त पांदी लांदा जू तैसीआरी प्यार कौरौ। यानी तिनु कारिए जू तैसकै इछा शै चोणे राए।

रोमियों 8:30

तोबै जिनु कारिए पौरमेशवरे आगैई तय कौरे राए तिनु चोणे बै राए, औरौ जिनु चोणे राए, तिनु धरमी साबित कौरे राए, औरौ जिनु धरमी साबित कौरे राए, तिनकै साथै आपणै महिमा बै बांडै राए।

रोमियों 9:24

चाहै यहूदी लोग हौंव या बैगानै यहूदी लोग हौंव, आमु सैजै चोणेयौंदे लोग औसौ जिनु पौरमेशवरे चोणे राए।

2 कुरिन्थियों 3:6

जैणै आमु नोऐं कौरार कै सेवक हौणौ कै ताकत बै दैय राए, मूसा कै लैखैयौंदे कानून सेवक ना आथी पौरौ पवित्र आत्मा कै; जिथुकै मूसा कै लैखैयौंदे कानून कै ना मानणौ का नतीजा मौत औसौ पौरौ पवित्र आत्मा सौदा कै जिन्दगी दैंव।

गलातियौं 3:20

जोबै दो लोगौ कै बिज़ सौमझौता हौंव, तोबै बिचोलिया कै जौरुरत हौंव। पौरौ जोबै पौरमेशवरे अब्राहम आरी वादा कौरा तौ तैणै कोसी बिचोलिया का इस्तैमाल ना कौरी, जिथुकै पौरमेशवर ऐक औसौ।

इफिसियों 1:7

मसीह कै लोऊ बोवाणो कै दवारा पौरमेशवरे आमु बौचाए राए यानी अमारै पापौ कै माफ कौरे राए। पौरमेशवर का अनुग्रह बैजाए बौड़ा औसौ जू तैणै आमु दैय राए।

2 थिस्सलुनीकियों 2:14

जैसी सुसमाचार का आमुए तुऔं प्रचार कौरे राए तिथकै दवारा पौरमेशवरे तुऔं बौचाणौ कारिए बौएदै राए ताकि तुऐं अमारै प्रभु यीशु मसीह कै महिमा दै शामिल हौए सौकौ।

1 तीमुथियुस 2:5

जिथुकै सिरफ ऐकैई पौरमेशवर औसौ, औरौ सिरफ ऐकैई आदमी औसौ जू पौरमेशवर औरौ लोगौ कै बीच मुंजी मैल मिलाप कौरवाए सौकौ यानी सै यीशु मसीह औसौ, जू ऐक आदमी कै रुप दा पौयदा हौआ।

2 तीमुथियुस 2:10

इथकारिए हांव तिनु लोगौ कै फायदै कारिए सौबै दुख सैहन कौरु, जिनु पौरमेशवरे चोणे राए, ताकि सै बै मसीह यीशु पांदी बिशवाश कौरौ औरौ बौचाए जांव, औरौ तियौं महिमा कै पांव जू सौदा बौणैयौंदे रौंव।

तीतुस 1:2

इथका नतीजा ऐजा औसौ, कै लोग पौरमेशवर कै साथै हमैशा रौणौ कै आशा कौरौ, जिथुकै पौरमेशवर कौलोंई झूठु ना बौल़ौ, तैणै दुनिया कै बाणणौ दा आगै वादा कौरे राए थिया कै तैसकै लोग सौदा कारिए जियुंदी रौंदै।

तीतुस 3:7

पौरमेशवरे ऐशै इथकारिए कौरौ ताकि आपणै अनुग्रह शै सै आमु आपणै साथै सोही ठोहराए सौकौ, औरौ आमै तैसकै संतान बौणै सौकु औरौ इथकारिए बिशवाश कै साथै सौदा आशा राखै सौकु।

इब्रानियों 10:34

तुऐं कैदी कै दुख दै बै दुखी हुवे औरौ आपणै जायदात बै खुशी सै लुटणौ दै; जिथुकै तुऐं जाणौए कै तुऔं कैई ऐबै बै सैजी चीज़ौ औसौ जिथका वादा पौरमेशवरे कौरे राए थिया, जू कै बैजाए आछौ औसौ औरौ जू हमैशा बौणेयौंदी रौंदी।

इब्रानियों 10:36

ऐबै तुऔं सब्र कै साथै सैहन कौरणौ कै जौरुरत औसौ, तोबैई तुऐं पौरमेशवर कै इछा कै पूरै कौरदै औरौ तुऔं सैजी सौबै चीज़ौ भैटदी जिथका वादा पौरमेशवरे कौरे राए।

इब्रानियों 11:13

ऐजै सौबै लोग जिनुवै पौरमेशवर पांदी भोरोशा कौरा, तिनु चीज़ौ कै पाए बिना मौरे गौवै जिथका वादा पौरमेशवरे कौरे राए थिया, पौरौ तिनुऐ इनु बातौ खै दूर कै भविष्‍य दी आन्दै बैई दैखी औरौ खुशी हौवे। तिनुऐ ऐजै बात सौमझै पाए कै आमु इयौं धोरती पांदी अजनबी औरौ प्रदेशी औसौ।

इब्रानियों 12:24

तुऐं यीशु कै धोरे आए रौवै जू पौरमेशवर औरौ लोगौ मुंजी नोऐं कौरार कै बीचवैई कौरौ, औरौ छिड़कैयौंदे लोऊ कै धोरे आए रौवै, हाबिल कै लोऊए न्याय कै मांग कौरे पौरौ मसीह का लोऊ पापौ कै माफी कारिए बौवाया गौआ।

इब्रानियों 13:20

औरौ ऐबै शान्तै का पौरमेशवर, जैणै अमारै प्रभु यीशु खै मौरेयौंदे मुंजीदा औटेयौ लियोऊवा, तुऔं तिनु सौबी चीज़ौ लैई भरपूर कौरौ जिथकी तुऔं तैसकै इछा पोरे कौरणौ कारिए जौरुरत औसौ। यीशु मसीह कै शौकतै कै दवारा तैणै तुऔं मुंजी सैजौ सौबै पौयदा कौरे राए जू तैसी खुशी कौरौ। यीशु हमैशा कै कौरार कै दवारा भेड़ो का महान रोखवाल़ा बौणै गौआ, तैणै आपणी मौत शै आपणै भेड़ो कै झुंड कै साथै कौरार कै स्थापना कौरे जू हमैशा कारिए बौणैयौंदे रौंदी। आमीन।

इब्रानियों 2:14

जिथुकै जिनु पौरमेशवरे नानड़िया बौलेयौ बौएदै राए, तिनका ऐक आदमी कै जैशणा शोरीर थिया। औरौ यीशुए आपी अमारै जैशणा आदमी का शोरीर धारण कौरा ताकि सै आपणी मौत लैई मौत पांदी औधिकार राखणौवाल़ै शैतान खै नाश कौरौ।

इब्रानियों 3:1

इथकारिए, ओए रै बिशवाशी भाईयों तुऔं जू स्वर्ग दै तैसकै साथै शामिल हौणौ कारिए बौएदै राए, मसीह यीशु पांदी ध्यान दैव, सै अमारै खातिर पौरमेशवर का चोणेयौंदा चैला औरौ महायहूदी पुरोहित औसौ।

इब्रानियों 6:13

औरौ पौरमेशवरे अब्राहम आरी वादा कौरदै बैई आपणै नांव कै शौं खाए; जिथुकै तैसदा बौड़ा कुणिए ना आथी, जैसकौ नांव लौयौ सै शौं खाए सौकौ थिया।

इब्रानियों 6:15

अब्राहमै सब्र राखैयौ लाम्बै सौमय तौड़ी इंतजार कौरा। तोबै तैसी सैजौ भैटौ जिथका वादा पौरमेशवरे कौरे राए थिया।

इब्रानियों 7:22

इथकारिए यीशु सैजा औसौ जू आमु कै ऐक बड़िया कौरार कै पूरै हौणौ कै बौजैह बौणौ।

इब्रानियों 8:13

पौरमेशवरे इथु ऐक नोऐं कौरार बौल़ै, इथकारिए तैणै आगलै कौरार खै पुराणी कौरे दी। औरौ जू किछै बै पुराणौ औसौ औरौ घिसै-पिटीयौंदौ औसौ तिथका नामोनिशान ना रौंदा।

इब्रानियों 9:12

औरौ यीशु मसीह सौबी दै पवित्र ठाँव दा सिरफ ऐकै बैई औरौ हमैशा कारिए हौटा। सै आपणै साथै बाकरी कौ लोऊ लैयौ ना हौटै रैई थी। तैसका बलिदान तैसकौ आपणौ लोऊ औसौ, इथलैई तैणै आमु पापौ शै हमैशा कारिए आज़ाद कौरे दियै।

इब्रानियों 9:16

आमै जाणुए जै कुणिए आदमी आपणै मौत कै बाद आपणी जायदात कै बांटणौ कै बारै मुंजी आखरी नियमौ खै लिखांव, तौ ऐजौ जौरुरी औसौ कै आगै तैसकै मौत हौं ताकि तैसकै नियमौ खै पूरै कौरेयौ।

इब्रानियों 9:28

तैशैखैई, मसीह बै सिरफ ऐकै बैई बलिदान हौए गौआ ताकि सै सौबी लोगौ कै पापौ खै दूर कौरे दैंव। जोबै सै औटेयौ आन्दा तौ सै पाप कै बलिदान हौणौ कारिए ना आन्दा पौरौ तिनुखै बौचाणौ कारिए आन्दा जू तैसकी ठोल़नाए कौरौ।

याकूब 1:12

धन्‍य औसौ सैजा आदमै, जू परीक्षा दा टिकैयौंदा रौंव, जोबै सै खरा साबित हौंव तौ तैसी सौदा कै जिन्दगी का मुकुट भैटदा, जिथका वादा पौरमेशवरे आपणै प्यार कौरणौवाल़ै आरी कौरे राए।

1 पतरस 3:18

हांव ऐजौ बुलू जिथुकै मसीहे बै अमारै पापौ की बौजैह शै दुख झैला औरौ मौर गौआ। सै सिरफ ऐकैई बैई मौरा औरौ इयौं बातौ कै बार-बार बौलणौ कै जौरुरत ना आथी। सै ऐक धरमी आदमी थिया जू पापी लोगौ कारिए मौरे गौआ ताकि सै आमु कै पौरमेशवर कै धोरे लाए सौकौ। तिनुऐ तैसकै शोरीर कै मार दिया पौरौ पौरमेशवरे तैसी पवित्र आत्मा कै शौकतै लैई औटेयौ जियुंदी कौरे दिया।

1 पतरस 5:10

पौरमेशवर जू पूरी तरह शै अनुग्रह लैई भौरेयौंदा औसौ, तैणै आमु मसीह कै साथै अमारै रिशतै कै बौजैह शै स्वर्ग दै तैसकै सौदा कै महिमा दै शामिल हौणौ कारिए बौएदै राए। औरौ तोंवारै दैणिक सौमय तौड़ी दुख सैहणौ कै बाद, पौरमेशवर तुऔं आछा बाणै दैंदा ताकि तुऔं मुंजी हौजौ कुणजाई दोष नी रौंव औरौ सै तोंवारै दिलो खै मोजबूत कौरदा औरौ तैसी पांदी तोंवारै भोरोशे खै सौथीखै मोजबूत बाणै दैंदा।

1 यूहन्ना 2:25

औरौ पौरमेशवरे आमुआरी वादा कौरे राए कै सै आमु सौदा कै जिन्दगी दैंदा।

प्रकाशितवाक्य 5:9

तिनिए ऐजौ गीत मेम्ने यानी यीशु मसीह कै बारै मुंजी गाए लो थियु, “तू इयौं किताब कै मोहरो खै तौड़णौ औरौ इयौं खौलणौ का औधिकार राखै।” तिनुऐ ताखै बलिदान कौरे राए थिया औरौ तैरै लोऊए जू क्रूसो पांदी बौवाए राए, लोगौ खै छुड़ाए दियै ताकि सै पौरमेशवर शै सौमबंधित लोग बौणै जांव। ऐजै लोग सौब गोत्रो, सौब भाषाओं, सौब ठाँव औरौ सौब राज्यो शै औसौ।