इब्रानियों 6:2 - सिरमौरी नौवाँ नियम

² औरौ आमु बपतिस्मा कै बारै मुंजी, औरौ कोसी पांदी हाथ राखैयौ आशीष दैणौ कै बारै मुंजी, औरौ मौरेयौंदे मुंजीदै जियुंदी हौणौ कै बारै मुंजी, औरौ आखरी न्यांव की शिक्षा कै नीयुं औटेयौ पाणौ कै जौरुरत ना आथी।

Sirmouri

² अरह् नहाँण-नहाँणों अरह् ओकी गाशी हाथ थंहणें, अरह् मँरे अँदे के ऊबे पाछ़ु जीऊँदे हंणों के; अरह् आखरी के नियाँव की शिक्क्षा देंणों के पंह्-नींव हजों ने पाँव।

इब्रानियों 6:2 ပူးပေါင်းရင်းမြစ်များ

मत्ती 28:19

इथकारिए तुऐं जांव, सौबी देशो कै लोगौ खै चैला बाणौ औरौ तिनु पिता, बैटै, औरौ पवित्र आत्मा खै नांव लैई ऐक निशान कै तौर पांदी बपतिस्मा दैव, कै सै पौरमेशवर औरौ मैरै चैलै बौणै गौवै।

मत्ती 3:14

पौरौ यूहन्ना बपतिस्मा दाता तैसीखै ऐजौ बौलेयौ रोकदा लागा, “कै मुखै तौ तैरै हाथौ लैई बपतिस्मा लोणो कै जौरुरत औसौ, औरौ तू मैरै धोरे आए रौआ?”

मरकुस 16:16

जू मुं पांदी बिशवाश कौरलै औरौ ऐक निशान कै तौर पांदी बपतिस्मा लोले। तिनु पौरमेशवर तिनकै पापौ कै सौजा शै बौचाल़ा, पौरौ जू कुणिए मुं पांदी बिशवाश नी कौरला, तिनुखै तिनकै पापौ कै सौजा दैला।

मरकुस 7:4

जोबै सै बोजारों शै घोरे आंव थिए, तौ खाणौ खाणै दै आगै यहूदी भोवार कै हिसाब शै आपी कै साफ कौरौ थिए; औरौ बुड़ेईको कै भोवारो की बौहिती बातौ मानौ थिए, जैशैखै छानै, औरौ लोटै, औरौ ताँबे कै बासणौ खै माजणे औरौ धोणे।

मरकुस 7:8

जिथु तुऐं पौरमेशवर कै आज्ञा खै टालेबा आदमियों कै भोवार खै मानौ।”

लूका 11:38

फरीसी लोग ऐजौ दैखैयो हैरान हौए गौवै कै तैणै खाणौ खाणै दो औगौड़ियौ आपणै भोवार कै हिसाब शै हाथ लात ना धुई।

लूका 12:50

मुखै तावल़ी खतरनाक पीड़ो सैहन कौरणी पौड़दी, औरौ जौल़ौ तौड़ी सैजी पीड़ो ना हौंव, तौलौ तौड़ी हांव बौहुता बैचैन हौंदा।

लूका 14:14

तोबै तू धन्‍य हौंदा, जिथुकै तिनुवागे ताखै बौदला चुकाणो कारिए किछै ना आथी, पौरौ जौल़ौ धरमी लोग मौरेयौंदे मुंजीदै जियुंदी हौंदै, तौ पौरमेशवर तुऔं इनाम दैंदा।”

लूका 3:16

तौ यूहन्नाए तिनु सौबी कै जोवाब दिया, “हांव तौ तुऔं पाणी शै बपतिस्मा दियु पौरौ सै आणौवाल़ा औसौ जू मुं दा बै शौकतीशाली औसौ; हांव तौ ऐसी लायक बै आथी ना कै तैसकै जूते कै तशमै खोले सौकु, सै तुऔं खै पवित्र आत्मा औरौ आगै लैई बपतिस्मा दैंदा।

यूहन्ना 1:33

औरौ हांव तौ तैसीखै पौछेयाणु नै थिया कै सै मसीह औसौ, पौरौ जैणै मौखै पाणी लैई बपतिस्मा दैंदा भैजा, तैणै मौखै बौल़ौ, ‘जैसी पांदी तू पवित्र आत्मा खै उतरदै बैई औरौ ठोरदे बैई दैखला; सैजाई पवित्र आत्मा लैई बपतिस्मा दैणौवाल़ा औसौ।’

यूहन्ना 5:29

जिनुवै आपणै जीवन दै भोलाए कौरे राए सै सौदा कै जिन्दगी पाणौ कारिए मौरेयौंदे मुंजीदै जियुंदी हौंदै औरौ जिनुवै बुराई मुंजी जीवन बिताए राए, सै सौजा पाए जाणौ कारिए जियुंदी हौन्दै।”

प्रेरितो कै काम 10:47

“का ऐबै कुणिए इनु पाणी लैई रौकै सौकौ कै ऐजै बपतिस्मा नी पांव, जिनुवै आमु साए पौरमेशवर की औरौ शै पवित्र आत्मा पाए राए?”

प्रेरितो कै काम 13:3

तोबै तिनुऐ उपवास औरौ प्रार्थना कौरेयौ औरौ तिनु पांदी हाथ राखैयौ तिनु पौरमेशवर का काम कौरणौ कारिए भैजै।

प्रेरितो कै काम 16:15

औरौ जोबै तियैं आपणै कुड़बे समैंत बपतिस्मा लौआ, तौ तियैं बिन्ती कौरे, “जै तुऐं मुखै सौथीखै प्रभु कै बिश‍वाशनी सौमझौ, तौ चालैयौ मैरै घोरे रौव, औरौ सै आमु कै मौनायो कै लोय गौए।”

प्रेरितो कै काम 16:33

औरौ रातै खै तियौंई घड़ी तैणै तिनु आगु नियौ कै तिनकै घाव धोवे, औरौ तैणै आपणै सौबी लोगौआरी तौलोंई बपतिस्मा लौआ।

प्रेरितो कै काम 17:18

तोबै सैजै गुरुजी जू इपिकूरी औरौ स्‍तोईकी कौरेयौ जाणै जांव थिए, औरौ तिनुमुंजी दै किछै तैसीआरी बैहस कौरदै लागै, “ऐजा बकवादी का बौताणौ चांव?” पौरौ ओकीए बौल़ौ, “सै ओकी देवताओं का प्रचारक जाणियौ,” जिथुकै सै यीशु का औरौ मौरेयौंदे मुंजीदा जियुंदी हौणौ का सुसमाचार शुणांव थिया।

प्रेरितो कै काम 2:38

पतरस तिनुकै बौल़ौ, “पाप कौरणै छोड़े दैंव औरौ तुऔं मुंजीदा हरेक आपणै-आपणै पापौ कै माफी कारिए यीशु मसीह कै नांव शै बपतिस्मा लौ; तौ तुऐं पवित्र आत्मा का वरदान पांदै।

प्रेरितो कै काम 2:41

जू किछै पतरसे बौल़ौ जिनु लोगै तैसकी बातौ पांदी बिशवाश कौरा तिनुऐ बपतिस्मा लौआ; औरौ तैसी दूसै तीन हजार आदमी कै लमसम तिनु बिशवाशी कै गुट मुंजी जोड़े गौवै।

प्रेरितो कै काम 23:6

तोबै पौलुसे ऐजौ जाणैयौ, कै किछै सदूकी लोग औरौ किछै फरीसी लोग औसौ, महासभा मुंजी जोर शै बौल़ौ, “ओए रै भाईयों हांव फरीसी औरौ फरीसियों कै सन्तान का औसौ, मैरा मुकदमा इथकारिए हौंदा लागै रौआ जिथुकै मुखै आशा औसौ कै पौरमेशवर मौरेयौंदे लोगौ खै मौरेयौंदे मुंजीदा जियुंदी कौरदा।

प्रेरितो कै काम 24:15

औरौ पौरमेशवर शै आशा राखु जू सैजै आपी बै राखौए, कै धरमी औरौ अधरमी दुईनै कै पौरमेशवर मौरेयौंदे मुंजीदा जियुंदी कौरदा।

प्रेरितो कै काम 24:21

सिरफ ऐक दोष जू सै मैरै खिलाफ लाए सौकौ, सै ऐजा औसौ जोबै मोऐं आँगणो दो जोर-जोर शै बौल़ौ थियु? ऐलो मैरा न्यांव तैरै दवारा हौंदा लागै रौआ जिथुकै हांव बिशवाश कौरु कै पौरमेशवर तिनु लोगौ खै जू मौरे गौवै होटेयो मौरेयौंदे मुंजीदा जियुंदी कौरदा।

प्रेरितो कै काम 24:25

जोबै पौलुसे जू पौरमेशवर कै सामणै साचा औसौ औरौ आपणी इछावं पांदी काबू राखौ औरौ पौरमेशवर दवारा आणौवाल़ै न्याय कै बारै मुंजी बौताणौ शुरु कियु, तौ फेलिक्से डौरेयौ जोवाब दिया, “इबी तौ तू जा; जोबै मुंकैई सौमय हौला, हांव आपी ताखै बोईददा।”

प्रेरितो कै काम 26:8

तोबै पौलुसे भीड़ दै सौबी यहूदी लोगौ खै बौल़ौ, तुऔं ऐजै बात नामुमकिन काए लागौ कै पौरमेशवर मौरेयौंदे लोगौ खै औटेयौ जियुंदी कौरे सौकौ?

प्रेरितो कै काम 4:2

सैजै बैजाए गुस्से हुवे जिथुकै पतरस औरौ यूहन्ना यीशु कै बारै मुंजी शिखांव थिए औरौ लोगौ खै शिखांव थिए कै जू लोग मौरे गौवै पौरमेशवर तिनु औटेयौ जियुंदी कौरे दैंदा, जैशै तैणै यीशु खै मौरेयौंदे मुंजीदा जियुंदी कौरे दिया।

प्रेरितो कै काम 6:6

औरौ तिनु चोणेयौंदे चैलै कै सामणै लोऊवे औरौ तिनुऐ प्रार्थना कौरेयौ तैसी कामौ खै कौरणौ कारिए तिनुखै चुणै।

रोमियों 2:16

ऐजौ तैसी दूसै हौंदौ जौल़ौ पौरमेशवर ऐसी सुसमाचार जैसका हांव प्रचार कौरु यीशु मसीह कै दवारा आदमियों कै गुप्‍त बातौ का न्याय कौरदा।

1 कुरिन्थियों 10:2

जैशैकै आमै प्रभु यीशु कै चैलै बौणणौ कारिए बपतिस्मा लोऊ, तैशैखैई सैजै सौबै बादल़ौ कै छांव दै थिए औरौ मूसा कै चैलै बौणैयौं लाल समुन्द्र शै होयो हौटै।

1 कुरिन्थियों 12:13

जिथुकै आमै सौबीए का यहूदी, का बैगानै यहूदी लोग, का गुलाम, का आज़ाद ऐकैई आत्मा कै दवारा ऐकैई शोरीर हौणौ कारिए बपतिस्मा लौआ, औरौ आमु सौबी कै ऐकैई आत्मा भैटी रौए।

2 कुरिन्थियों 5:10

जिथुकै जौरुरी औसौ, कै आमु सौबी का मसीह कै दवारा न्याय हौंदा, कै हरेक आदमी आपणै-आपणै भले बुरै कामौ का जू तैणै शोरीरो कै दवारा कौरे राए, तिथका बौदला पांव।

फिलिप्पियों 3:21

सै आपणै शौकतै कै तैसी प्रभाव कै हिसाब शै जिथकै दवारा सै सौबै चीज़ौ कै आपणै काबू दी कौरे सौकौ, औरौ अमारै कमजोर शोरीर का रुप बौदलैयौ आपणै महिमामय शोरीर कै जैशणा बाणै दैन्‍दा।

कुलुस्सियों 2:12

जोबै तुऔं बपतिस्मा दिया तोबै मसीह कै जैशणै तोंवारै पाप कौरणौ कै स्‍वभाव कै दबाए दिए औरौ तैशैखैई तुऔं नौवें स्‍वभाव कै साथै जियुंदी कौरे दिए जैशैकै मसीह कै जियुंदी कौरे राए थिया। ऐशै इथकारिए हौंव जिथुकै तुऐं बिशवाश कौरे राए, कै पौरमेशवरे आपणै शौकतै कै दवारा मसीह कै मौरणौ कै बाद औटेयौ जियुंदी कौरे दिया।

2 तीमुथियुस 2:18

तिनुऐ सौचाई पांदी बिशवाश कौरणा बन्द कौरे दिया। तिनका मानणा औसौ कै पौरमेशवरे औगौड़ियौ ही मौरेयौंदे बिशवाशी कै सौदा कै जीवन कारिए मौरेयौंदे मुंजीदै जियुंदी कौरे राए। इयौं बौजैह शै तिनुऐ बिशवाशियौं कै मसीह कै शिक्षाओं पांदी बिशवाश कौरणौ शै रौकै लौवै।

इब्रानियों 11:35

किछै बैटमाणिशै आपणै मौरेयौंदे लोगौ खै औटेयौ जियुंदी पाए; कैतरै तौ मार खाय-खायौ मौरे गौवै; पौरौ तिनुऐ आज़ाद हौणौ शै इन्कार कौरे दियु जिथुकै सै बिशवाश ना छोड़णा चांव थिए। सै जाणौ थिए कै जोबै सै औटेयौ मौरेयौंदे मुंजीदै जियुंदी हौंदै तोबै सै पौरमेशवर कै साथै हमैशा कारिए जियुंदी रौंदै।

इब्रानियों 9:10

जिथुकै सैजै नियम सिरफ लोगौ कै खाणौ-पिणौ औरौ शोरीरो खै ठीक ढंग शै धौणौ कै बारै मुंजी बौतांव जिथकै दवारा लोग बायरी तौर शै साफ हौए जांव। इनु नियमौ खै तांव तौड़ी मानणै पौड़ौ थिए जांव तौड़ी कै पौरमेशवरे आपणा नौवाँ सौमझौता शुरु नी कौरा।

2 पतरस 3:7

जैशैकै पौरमेशवरे धोरती कै बाणणौ कै आज्ञा दैय राए थी, तैशैखैई तैणै आज्ञा दी कै इबी दुनिया तांव तौड़ी बौणैयौंदे रौंव जांव तौड़ी सै तिनु आगै लैई जोल़ाए ना दैंव तैणै तिनु तैसी दूसौ तौड़ी राखै राए जौल़ौ सै सौबी लोगौ का न्याय कौरला औरौ तिनु लोगौ का नाश कौरे दैन्दा जू तैसकै इज्जत ना कौरौ।