प्रेरितो कै काम 24:16 - सिरमौरी नौवाँ नियम

¹⁶ इथकारिए हांव आपी बै कौचिश कौरु, कै पौरमेशवर की औरौ आदमी कै ढौबौशा मैरा विवेक सौदा निर्दोष रौंव।

Sirmouri

¹⁶ ईन्देंखे हाँव पंण्मिश्वर अरह् आदमी की नंजरी दे आप्णीं अंन्त्तर-आत्त्मा अरह् जमीर सदा नींर-दोष रंहणों के कोशिष करदा रंऊँ।

प्रेरितो कै काम 24:16 ပူးပေါင်းရင်းမြစ်များ

प्रेरितो कै काम 23:1

पौलुसे महासभा कै ढौबौ टकटकी लायौ खै दैखौ, औरौ बौल़ौ, “ओए रै भाईयों, मोऐं ऐलो तौड़ी पौरमेशवर कारिए बिल्कुल साची विवेक शै जिन्दगी बिताए राए।”

रोमियों 2:15

सैजै लोग दिखांव कै पौरमेशवर शै दैययौंदे मूसा कै कानून तिनकै दिलो दै लैखै राए, जिथुकै तिनका आपणा विवेक दिखांव कै तिनकै विचार या तौ तिनु पांदी दोष लांव या तिनुकै निर्दोष बौतांव।

रोमियों 9:1

ऐबै किछै बै आमु पौरमेशवर कै प्यार शै जौई ना कौरे सौकौ, तौ इस्राएली लोग, पौरमेशवर शै दूर किथु औसौ? मैरै दिल दा तिनु कारिए बैजाए दुख औसौ, औरौ हमैशा मैरै दिल दी तिनु कारिए पीड़ो औसौ। सौथीखै, आपणै ही लोगौ कै उध्दार कै खातिर, हांव आपी पांदी आरोप लाणौ औरौ मसीह शै जौई हौणौ कारिए तैयार औसौ। मोऐं मसीह कै गवाह मानैयौ साचौ बौल़ै लो। पवित्र आत्मा औरौ विवेक बै गवाहै दैंव कै सौबै बातौ झूठी ना आथी।

1 कुरिन्थियों 10:32

हांव आपणी भोलाए कै बारै मुंजी बिना सोंचै, सौबी खै खुश कौरणौ कै कौचिश कौरु, ताकि तिनु बौचाए सौकु। तैशैखैई तुऐं बै ऐशैखै रौव कै ना यहूदी लोगौ ना बैगानै यहूदी लोगौ ना पौरमेशवर कै कलीसिया कारिए कुणजै पौरैशानी या कुणजै ठोकर कि बौजैह बौणौ।

1 कुरिन्थियों 4:4

जिथुकै मैरा विवेक मुखै कोसी बातौ दा दोषी ना ठोहरांव, पौरौ इथलैई हांव बैकसूर ना ठौरु, जिथुकै मैरा पोरखणै वाल़ा प्रभु औसौ।

2 कुरिन्थियों 1:12

जिथुकै आमु गर्व औसौ कै अमारा विवेक साफ औसौ, कै दुनिया दा औरौ खास कौरेयौ तोंवारै बीच अमारा चरित्र जू पौरमेशवर कै ढौबौशा औसौ ऐशणी पवित्रता औरौ सौचाई कै साथै थिया, आमु आदमियों कै ज्ञान पांदी भोरोशा ना राखु। पौरौ पौरमेशवर कै अनुग्रह पांदी राखु।

2 कुरिन्थियों 4:2

पौरौ आमुए शर्मनाक औरौ गुप्‍त कामौ खै छोड़े राए, औरौ ना चलाकी शै चालाकी कौरो, औरौ ना पौरमेशवर कै वचन दै मिलावट कौरु, पौरौ आमु पौरमेशवर कै सामणै सिरफ साचौ शिखोऊं। पौरमेशवर कै सामणै हर आदमी गवाही दैय सौकौ कै ऐजौ साचौ औसौ।

1 थिस्सलुनीकियों 2:10

तुऐं आपी ही गवाह औसौ, औरौ पौरमेशवर बै गवाह औसौ कै तुऔं सौबी बिशवाशियौं कै साथै अमारा बर्ताव कैतरा साचा, धरमी औरौ निर्दोष थिया।

1 तीमुथियुस 1:19

औरौ ताखै यीशु मसीह पांदी बिशवाश दो बौणैयौंदो रौणौ चैंई औरौ तू सैजौई कौर जू तू जाणैए कै सै ठीक औसौ, किछै लोगै इथपांदी ध्यान ना दी, जिथका नतीजा ऐजा हौआ कै तिनुऐ मसीह पांदी बिशवाश कौरणौ कै आपणै योग्यता खै नाश कौरे दै, ठीक तैशैखैई जैशै ऐक समुन्द्री जहाज चट्टान शै टौकराएयौ नाश हौए जांव।

1 तीमुथियुस 1:5

तुऔं आज्ञा दैणौ का मैरा मकसद ऐजा औसौ कै तुऐं ऐकी दुजैआरी साची मन शै औरौ आछै विवेक औरौ निष्कपट बिशवाश कै साथै प्यार कौरौ।

1 तीमुथियुस 3:9

तिनुकैईं ऐक स्पष्ट विवेक हौणा चैंई जोबै सै इनु बातौ पांदी बिशवाश राखणा जारी कौरौ कै पौरमेशवरे जू शिक्षाए दैय रैई सै साची औसौ।

2 तीमुथियुस 1:3

हांव पौरमेशवर का धन्यवाद दियु, जैसकै मोऐं औरौ मैरै पुराणियाए शुद्ध विवेक कै साथै सेवा कौरे राए। जौल़ौ बै हांव प्रार्थना कौरु हांव तैरै नांव का जिक्र कौरणा हमैशा याद राखु।

तीतुस 1:15

तिनु लोगौ कारिए जिनकै दिल दै ऐशणै पाप वाल़ै विचार ना आथी, तिनु कारिए सौबै चीज़ौ शुध्द औसौ, औरौ जू बुरै लोग औसौ औरौ जू लोग यीशु पांदी बिशवाश ना कौरौ, तिनु कारिए सौबै चीज़ौ अशुध्द औसौ जिथुकै तिनकै दिल पूरी तरह शै बुरै हौए गौवै।

इब्रानियों 10:22

अमारै दिल कै मसीहे आपणै लोऊ लैई पवित्र कौरे राए ताकि आमै जाणै सौकु कै ऐबै आमु दै कुणजै गौलती ना आथी। अमारै शोरीर खै शुध्द पाणी लैई धौयौ आमु तैयार कौरे राए। इथकारिए बिशवाशी भाईयों, आमु आपणै पूरै मन औरौ ऐशणै बिशवाश कै साथै पौरमेशवर कै नेड़िक ओऊं। जू ऐबै हिली ना सौकौ

इब्रानियों 13:18

अमारै खातिर प्रार्थना कौरदै रौव, जिथुकै आमै निशोंक हौयौ जाणुए, कै अमारा विवेक शुध्द औसौ, औरौ आमै जू बै काम कौरो तिनु सौबी कामौ दा पौरमेशवर का आदर कौरणा चांव।

इब्रानियों 9:14

पौरौ मसीह दा कुणजाई पाप ना थी, औरौ तैणै आपी खै पौरमेशवर कै खातिर सौदा औरौ आत्मिक बल़ि कै रुप दा भैंट चौढ़ाए दिया। इथ बौजैह शै तैसकौ लोऊ कौथी जादा शौकतीशाली औसौ औरौ अमारै विवेक खै शुध्द कौरौ। ऐबै आमु जियुंदी पौरमेशवर कै सेवा कौरु औरौ तिनु चीज़ौ खै ना कौरु जू मौत कै ढौबौ लैयौ जांव।

1 पतरस 2:19

जै आमै बिना किछै गौलती कौरेयौ दुख सैहलै, तौ पौरमेशवर आमुदा खुश हौं। जिथुकै आमुए ऐजौ जाणैयौ कै दुख झैलू कै पौरमेशवर सौबै ठुँ जाणौए।

1 पतरस 3:21

औरौ पुराणै सौमय दा तिनका उध्दार ऐबै अमारै उध्दार का ऐक उदारण औसौ जोबै आमै बपतिस्मा लोऊँ। तौ जिथु पाणी मुंजी आमै बपतिस्मा लोऊँ, सै अमारै शोरीर शै मौल़ दूर ना कौरौ, पौरौ ऐजा ऐक निशान औसौ कै आमै पौरमेशवर शै माफी मांगै राए ताकि आगै खै अमारा मन पौरैशान नी रौंव। आमु माफी भैटी सौकौ जिथुकै यीशु मसीह औटेयौ मौरेयौंदे मुंजीदा जियुंदी हौए रौआ।