1 कुरिन्थियों 1:21 - सिरमौरी नौवाँ नियम

²¹ जिथुकै पौरमेशवरे आपणी बुध्दि लैई दैखै राए थियु कै आदमी कै ज्ञान कै हिसाब शै दुनिया तैसी कौलोंई ना जाणै पांदै, इथकारिए तैणै बिशवाश कौरणौवाल़ै खै बौचाणौ कारिए ऐसी सुसमाचार कै प्रचार का इस्तैमाल कौरे राए, पौरौ किछै लोग इथु मूर्ख मानौ।

Sirmouri

²¹ किन्देंखे के जबे पंणमिश्वर के ज्ञाँन के मुँताबिक संईसारी के लोगे ज्ञाँन शा पंणमिश्वर ने जाँणी, तअ पंणमिश्वर के ऐजो आछो लागो, के ऐसी प्रचार के जाँणें जेसी लोग मुरूख्ता जाँणो, ईन्दें के जाँणें बिश्वाष कर्णो वाल़े लोगो खे मुँक्त्ति दियों।

1 कुरिन्थियों 1:21 ပူးပေါင်းရင်းမြစ်များ

मत्ती 11:25

तौलोंई यीशुए बौल़ौ, “ओए रै पिता, स्वर्ग औरौ धोरती कै प्रभु, हांव तैरा धन्यवाद कौरु, कै तुऐं इनु बातौ खै ज्ञानी लोगौ औरौ सौमझदारो कैईंदी छिपायो राखै रैई, औरौ नानड़िया पांदी प्रगट कौरी।

लूका 10:21

तैसी सौमय यीशु पवित्र आत्मा दा हौयौ खुशी शै भोरै गौआ, औरौ बौल़ौ, “ओए रै पिता, स्वर्ग औरौ धोरती कै प्रभु, हांव तैरा धन्यवाद कौरु, कै तुऐं इनु बातौ खै ज्ञानी लोगौ औरौ सौमझदारो कैईंदी छिपायो राखै रैई, औरौ नानड़िया पांदी प्रगट कौरी, हौर बै, ओए रै पिता पौरमेशवर जिथुखै ताखै ऐजौ आछौ लागौ।

लूका 12:32

“तुऐं मैरै दैखभाल कारिए भेड़ो कै झुंड कै जैशणै औसौ, इथकारिए कोसी बै बातौ कै बारै मुंजी नै डौरेया, जिथुकै तोंवारै पिता पौरमेशवर कै ऐजै बात भाय रौए, कै तुऔं आपणा राज्य दैंव।

यूहन्ना 12:31

दुनिया दै लोगौ का न्याय कौरणौ कारिए पौरमेशवर का सौमय ऐबै आए रौआ, औरौ इयौं दुनिया का ठोगड़ा शैतान गाड़ै दिया जांदा।

रोमियों 1:28

जिथुकै तिनुऐ पौरमेशवर कै अपनाणा मूर्खता सौमझै, इथकारिए पौरमेशवरे बै सैजै सौबै बुरै काम कौरणौ कै तिनु तिनकै निकम्मे मन कै हालत दै छोड़े दियै।

रोमियों 11:33

आहा, पौरमेशवर कै अनुग्रह का धन औरौ बुध्‍दि औरौ ज्ञान कैतरै गंभीर औसौ! कुणिए बै तैसकै फोयसलै कै बखान ना कौरे सौकौ; औरौ ना ही कुणिए तैसकै बाटो कै जाणै सौकौ!

1 कुरिन्थियों 1:18

जोबै लोग ऐजा सौंदेश शुणौए कै मसीह क्रूसो पांदी मौरे गौआ, तौ तिनुमुंजी दै किछै सुंचौए कै ऐजा सौंदेश बकवास औसौ। ऐशैखै सुंचणौ वाल़ै लोग सैजै औसौ जू नरक कै ढौबौ जांदै लागै रौवै। पौरौ अमारै खातिर जू तैसी सौंदेश पांदी बिशवाश कौरौ, अमारा बौचाया जाणा पौरमेशवर कै अनौखी शौकतै का सबूत औसौ।

1 कुरिन्थियों 1:23

पौरौ आमु तौ उपदैश दियु कै मसीह कै अमारै पापौ शै छुड़ाणो कारिए क्रूसो पांदी मौरणौ जू यहूदी लोगौ कारिए ढैस कै बौजैह, औरौ बैगानै यहूदी लोगौ कारिए मूर्खता औसौ।

1 कुरिन्थियों 1:24

पौरौ जिनुखै पौरमेशवरे बौएदै राए का यहूदी, का बैगानै यहूदी, ऐजाई मसीह पौरमेशवर कै शौकतै औरौ पौरमेशवर का ज्ञान औसौ।

1 कुरिन्थियों 1:25

जिथुकै पौरमेशवर कै मूर्खता आदमी कै ज्ञान शै जादा ज्ञानवान औसौ, औरौ पौरमेशवर कै कमजोरी आदमी कै शौकतै शै जादा ताकतवर औसौ।

1 कुरिन्थियों 1:27

ज्ञानवालों खै बैज्जित कौरणौ कारिए पौरमेशवरे तिनुखै चुणै, जू दुनिया कै नज़र दै मूर्ख औसौ औरौ शौकतीशालियौ कै बैज्जित कौरणौ कारिए तिनुखै, जू दुनिया कै नज़र दै कमजोर औसौ।

1 कुरिन्थियों 11:32

पौरौ प्रभु अमारा न्याय कौरदा औरौ अमारा सुधार कौरौ ताकि अंत कै दूसै पौरमेशवर आमु दुनिया कै लोगौ साथी दोषी ना ठोहरांव।

1 कुरिन्थियों 2:14

पौरौ शारीरिक आदमी पौरमेशवर कै आत्मा की शिक्षाओं खै ना मानौ, जिथुकै सैजी तैसकै नोज़रो दी मूर्खता की बातौ औसौ, जिथुकै ऐक आदमै पवित्र आत्मा कै शिखाएयौंदी बातौ कै जांच तोबैई कौरे सौकौ, जोबै तैसदै पौरमेशवर कै आत्मा रौंव।

1 कुरिन्थियों 4:10

लोग आमु मूर्ख मानौ जिथुकै आमु मसीह कै बारै मुंजी उपदैश दियु, पौरौ तुऐं गौलती शै सुंचौए कै तुऐं बैजाए बुध्दिमान मसीह औसौ। बैजाए लोग मानौए कै आमुकैंई औधिकार ना आथी। पौरौ तुऐं गर्व शै बौल़ौए कै तुऔं कैई पौरमेशवर कै शौकतै औसौ। लोग अमारा आदर ना कौरौ पौरौ सै तोंवारा आदर कौरौ।

1 कुरिन्थियों 6:2

निशोंक हौयौ तुऐं जाणौए कै भविष्‍य दै पौरमेशवर कै लोग इयौं दुनिया कै लोगौ का न्याय कौरदै। इथकारिए, तुऐं निशोंक हौयौ ऐजौ बौताणौ दै काबिल औसौ कै तुऔं मुंजीदै कुण तोंवारै नानड़ै शै नानड़ै झोगड़े दै सोही औसौ।

गलातियौं 1:15

पौरमेशवर कै जोबै इछा हौए कै मुं पांदी आपणै बैटै कै प्रगट कौरौ कै हांव बैगानै यहूदी लोगौ मुंजी तैसका सुसमाचार शुणौऊं, तैणै मैरै पौयदा हौणौ दै आगैई मुखै चोणे राए औरौ आपणै अनुग्रह की बौजैह शै ही तैणै मुखै सेवा कौरणौ कारिए बौएदै राए। जोबै यीशुए आपी खै मुं पांदी प्रगट कौरा, तोबै हांव सलाह लोणो कारिए कोसी कै धोरे ना हुटी।

गलातियौं 4:8

जोबै तुऐं पौरमेशवर खै ना जाणौ थिए, तौ तैसी सौमय तुऐं तैसकै दास थिए, जू सौथीखै ईशवर आथी ही ना।

इफिसियों 1:9

पौरमेशवरे सैजौई कौरौ, जू तैणै ठाणै राए थियु, औरौ तियौं मैसौ कै योजना कै बारै मुंजी बौतौऊ जियौं तैणै आगै दी ही मसीह कै दवारा पूरा कौरणौ का फोयसला कौरे राए थिया।

इफिसियों 3:10

ताकि ऐबै कलीसिया कै दवारा, पौरमेशवर का सान्त-भान्त का ज्ञान तिनु प्रधानों औरौ औधिकारियो पांदी जू स्वर्ग कै ठाँव दै औसौ, प्रगट कोरी सौकौ।

कुलुस्सियों 1:19

जिथुकै पिता पौरमेशवर कै खुशी इदै औसौ कै तैसकै सारै परिपूर्णता मसीह दै मौजूद रौ।

इब्रानियों 1:14

तोबै स्‍वर्गदूतौ कै हौणौ का, का मकसद औसौ? सै सिरफ पौरमेशवर कै सेवक औसौ; जू पौरमेशवर कै दवारा तिनु लोगौ कै मौदद कौरणौ कारिए छाड़ै जांव जू उध्दार पांव।

इब्रानियों 2:3

इथकारिए निशोंक हौयौ आमु बै सौजा भैटदै जै आमै इयौं महान मोक्ति कै नी मानु। सौबीदु आगै प्रभु यीशु मसीहे आपी ऐसी उध्दार कै बारै मुंजी बौतौऊ, औरौ जिनु चैलै तैसी शौणै राए थिया, तिनुऐ आमु पांदी प्रकट कौरौ कै ऐजौ साचौ औसौ।

इब्रानियों 7:25

इथकारिए जू यीशु कै दवारा पौरमेशवर कै धोरे आंव, सै तिनकै पूरी-पूरी मोक्ति कौरी सौकौ, जिथुकै सै तिनु कारिए बिन्ती कौरणौ खै हमैशा जियुंदी औसौ।

याकूब 4:4

ओए रै धौखै बाज लोगौ, का तुऐं ना जाणौ कै दुनिया कै चीज़ौ आरी दोस्‍ते कौरणै पौरमेशवर सै बैर कौरणा औसौ? इथकारिए जू कुणिए दुनिया कै चीज़ौ आरी दोस्ती राखणा चांव, सै आपी खै पौरमेशवर का बैरी बौणांव।

याकूब 5:15

औरौ बिशवाश कै प्रार्थना लैई बीमार बौचै जांदा औरौ प्रभु तैसीखै औटेयौ खै ठीक कौरदा औरौ जै तैणै पाप बै कौरे रालै तौ पौरमेशवर तैसीखै माफ कौरदा।

याकूब 5:20

तौ तुऔं ऐजौ पौता हौणौ चैंई कै जू कुणिए आदमी सौचाई शै भोटकैयोंदै पापी कै फैर लांव, तौ सै तैसी पापी कै जिन्दगी कै मौत शै बौचांदा औरौ पौरमेशवर तैसकै सौबै पापौ कै माफ कौरे दैंदा।