2 थिस्सलुनीकियों 1:7 - Sirmouri

⁷ अरह् तुँओं जू कल़ेष भेंटो, तुऐ अमाँरी गईलो चऐनं शे; तेसी बख्ते जबे के प्रभू यीशू आप्णे शक्त्तिशाली दूत्तों की गईलो, भभ्कदी आगी शे स्वर्गो शे पर्गट हले,

सिरमौरी नौवाँ नियम

⁷ सै तुऔं चैन दैंदा जिनुवै ऐबै दुख लौआ सैय, औरौ आमु कै बै। चैन दैंदा जोबै प्रभु यीशु आपणै शौकतीशाली स्‍वर्गदूतौ कै साथै स्वर्ग शै आन्दा लागै रौआ औरौ आग कै लोपटो शै घैरैयौंदा हौंदा।

2 थिस्सलुनीकियों 1:7 ပူးပေါင်းရင်းမြစ်များ

मत्ती 16:27

आदमी का बैटा आप्णे पिता की बड़ियाऐ दे आप्णें स्वर्गदूत्त की गईलो आला, तबे से ऐक नाँम आदमी खे तिनके काँम-काज के मुताबिक प्रतिफल़ देले।”

मत्ती 16:28

“हाँव तुओं खे खास बात बुलू, के ईथे कुछ लोग असो, जुण्जे ताँव-तोड़ी मंऊँत्ती का सुवाद ने चाख्दी, मतल्व ताँव-तोड़ी ने मंर्दीं जाँव तोड़ी आदमी का बैटा तेसके राज्य दा तेसी राज कर्दे ने दे:खो।”

मत्ती 25:31

“जबे आदमी का बैटा आप्णी बड़ियाऐ आरी आला, अरह् बादे स्वर्गदूत्त तेसी आरी आले, तअ से आप्णी बड़ियाऐं के सिंगास्हणं गाशी बईठला।

मत्ती 25:41

“तबे राजा आप्णें डेरे ढबे के लोगों खे टाटी नाँऐयों बुल़्ला, ‘मुँह कैई शे दुर्के ज़ाव, श्रापित्त लोग! हमेशा के नंरक की आगी दे ज़ाव, जुण्जी शैतान अरह् तेस्के दूत्तों खे आगे ही तियार असो।

मत्ती 26:64

प्रभू यीशू ऐ तेस्खे जबाब दिता, “तुँऐं ऐजो आपु ही बुली लो; तबे बे हाँव तुओं खे बुली देंऊ, के ईन्दें पाछी तुऐं आदमी का बैटा सर्ब-शँक्त्तिमाँन के सोऐं ढबे बईठा अंदा, अरह् अस्माँनों के बाद्ल़ो मुँझी आँदे दे:ख्ले।”

मरकुस 14:62

प्रभू यीशू मसीया ऐ बुलो, “होर, हाँव ही असो! तुँऐं आदमी का बैटा सर्वशंक्त्तिमान के सोऐं ढबे बईठा अंदा अरह् असमाँनों शा बाद्ल़ो मुँझी आँदे दे:ख्ले।”

मरकुस 8:38

जुण्जा कुँऐं ईयो नाँष बाँन अरह् पाप वाल़े ज़ूंग दा मुँह अरह् मेरे बचन दा सरमाँऐं ज़ाव तेस्खे आदमी का बैटा भे जबे आप्णें पिता की बड़ियाई दा पबित्र स्वर्गदूत्त की गईलो आला, तअ से भे तेसी मानणों दा सरमाँऐं ज़ाँदा।”

लूका 16:25

परह् बाबा अब्राहम ऐं तैस्खे बुलो, ‘हे बैटा, देई तअ चींत्ते करह् के तुँऐं आप्णी जीवन दी आच्छ़ी च़ीजों लंऐ थंई; परह् ऐसी लाजर दु:ख्ह ही दु:ख भेटी रूवा, परह् ऐबे ऐसी ईथै शाँण्त्ति भेटी रंऐ; अरह् तू तड़फ़ी रूवा।

लूका 17:30

अरह् तैसी देसे भे ऐष्णों ही हंदो; जैसी देसे आदमी का बैटा पर्गट हला।

यूहन्ना 1:3

तेसी ही बचन के जाँणें सब-कुछ पय्दा हुओ, अरह् जुण्जो किऐ पय्दा हुओ; तिन्दें मुँझ्शी किऐ भे चींज बचन के बिना पय्दा ने हई।

यूहन्ना 1:51

प्रभू यीशू ऐ तेस्खे बुलो, “हाँव तुओं खे खास बात बुलू: तुऐं स्वर्ग खुलो अंदो, अरह् पंण्मिश्वर के स्वर्गदूत्त आदमी के बैटे गाशी ऊँदे आँदें, अरह् ऊँबे ज़ाँदे देख्ले।”

प्रेरितो कै काम 1:11

अरह् तिनखे बुल्दे लागे, “ओ गलीली मंर्दो! तुँऐं खह्ल़ियों अस्माँनों की ढबे कैई देखी लों? सेजा ही प्रभू यीशू जिनू तुवाँरे बीच शे ऊँबे स्वर्गो दे थागी थुऐ; तिनू तुऐं ऐष्णें ही स्वर्गो शे हजो ऊँदे आँदे भे देख्ले, जेष्णें तुऐं तिनू स्वर्गो दे ऊँबे ज़ाँदे देखी थुऐ।”

प्रेरितो कै काम 3:19

तअ तबे: तुऐं लोग पस्तावा करह्, अरह् आप्णा मंन बद्ल़ियों; पंण्मिश्वर कैई पाछू फीरियों आओं, जिन्दे लंई तुवाँरे पाप मिट्टी ज़ाँव।

रोमियों 8:17

अरह् जे अलाद असो, तअ आँमें पंणमिश्वरो के बारिस भे असो, अरह् मसीया की गईलो सग्गै वारिस असो, के जे आँमें तिनू आरी दु:ख भुगबे तअ तिनकी गईलो आँमों बड़ियाऐ भे जरूर भेट्दी।

1 कुरिन्थियों 3:13

तअ ऐकी नाँमों की काँम-काज़ का पत्ता लागदा; किन्देंखे के सेजो देस तेस्खे बुल्दो ऐ, ईन्देंखे के सेजो देस आगी आरी पर्गट होंदो, अरह् सेजी आग ऐकी नाँमों की काँम-काज़ के जाँच परख कर्दी के कैष्णी असो।

2 कुरिन्थियों 4:17

किन्देखे के अमाँरा ऐगड़ी का दाँणिंक जिया कल़ेष आँमों खे बैजाऐ प्रभू यीशू के अरह् हमेशा की बड़ियाऐं पय्दा करदा ज़ाँव जिन्दें बरा-बरी ने करी ज़ादी;

इफिसियों 1:2

अमाँरे परमं-पिता पंण्मिश्वर अरह् प्रभू यीशू मसीया की ढबे शी तुँओं खे कृपा अरह् शाँण्त्ति दियों।

कुलुस्सियों 1:16

किन्देंखे के तेसी के जाँणें बादी चींजो के रंचणाँ हऐ, स्वर्गो की, अरह् धर्ती की, देखी भाँव ना देखी, का सिगाँस्ण, अरह् का हंक-अधीकार, राजा भाँव हाकम सब-कुछ़ तिनकी ही ताँईऐं बंणाँऐं थुओ।

1 थिस्सलुनीकियों 3:13

जू से तुवाँरा मंन ऐशा पाक्का करह्, के जबे अमाँरा प्रभू यीशू आप्णे पबित्र लोगो आरी आँव, तअ से अमाँरे पंण्मिश्वर अरह् पिता के सहाँम्णें पबित्रता दे नीर्दोष-बंणों।

2 तीमुथियुस 2:12

जे आँमें दु:ख्ह सबैर माँरियों संह्दे भे रंऊँबे: तअ तिनकी गईलो आँमें राज भे जरूर कर्दे; जे आँमें तिनू छुड़ी देऊँबे, तअ से भे आँमों छुड़ी देंदे।

तीतुस 2:13

अरह् तेसी धन्यबाद के भुर्षें दे मतल्व आप्णे बड़े पंण्मिश्वर अरह् छुट्कारे देणों वाल़े प्रभू यीशू मसीया कि बड़ियाऐं के पर्गट हंणों की ताक दे रंह्।

इब्रानियों 10:27

सिवाऐ नियाँव के डराव्णी बाट जुहणीं, अरह् कुरूध की आग जिन्दे लंई प्रचंन्ड जंल़्ण बाकी असो; जुण्जी पंण्मिश्वर के बिरोधियों का सफाया करी दियों।

इब्रानियों 12:29

किन्देंखे के अमाँरा पंण्मिश्वर भसंस्म कर्णो वाल़ी आग जेष्णाँ असो।

इब्रानियों 4:1

ईन्देंखे आँमें ऐसी बारे दे खास करियो च़ौक्क्ष रंह, के जाँव तोड़ी तिनके बिषाँव देसो का बाय्दा माँना ज़ाँव; ताँव तोड़ी तुओं मुँझ़्शा कुँऐं भे हाजीर हंणों शा पाछ़ू ने छुटी ज़ाँव।

इब्रानियों 4:11

ईन्देंखे आँमें तेसी बिषाँव के देसो दे हाजीर हंणों के पुरी हिमम्त्त आरी कोशिष करह्; के कोसी भी अज्ञाँ ना माँन्णों के कारण किऐ भे सजा ने पाँणीं पड़ो।

इब्रानियों 4:9

तअ: जाँणी पाव के पंण्मिश्वर के लोगो खे, बिषाँव को देस हजो भे माँनों ज़ाँव;

इब्रानियों 9:28

तेष्णा ही मसीया भे भहीते के पापो थागणों खे ऐकी बई बल़ीदाँण हुऐ, अरह् जुण्जे लोग तिनकी बाट-बाट जुहों, तिनके पाप के छ़ुट्कारे खे, हजो से दुज़ाल़िऐ बिना पाप के थागी देखाई पड़्दे।

1 पतरस 3:22

प्रभू यीशू स्वर्गो दे ज़ाऐयों पंणमिश्वर के सोऐं ढबे बऐठी गुऐ; अरह् स्वर्गदूत्त अरह् अधिकारी अरह् शक्त्तिशाली तिनके बष दे करे गुऐ।

2 पतरस 3:7

परह् ऐजो अस्माँन अरह् धर्ती तेसी ही बचन के जाँणें ईन्देंखे थऐ थुऐ, के जल़ाऐ ज़ाव; अरह् तिनू नाँस्त्तिक आदमी का नियाँव अरह् नाँष हंणों के देसो तोड़ी ऐशे ही थुऐ ज़ाले।

यहूदा 1:7

जैशे दाँई सदोम अरह् अमोरा अरह् तिनके ऊँडे-पूँडे के नंगर, जुण्जे तिनके जिऐ कू-कर्मी बंणी रूऐ थिऐं, अरह् पराई देह्-शरीर पाछी लागी रूऐ थिऐ, तिनू लोग आगी की सजा दे भस्मं हऐयों ओकी खे अनाँणों बंणें।

प्रकाशितवाक्य 1:7

देखो, से बाद्ल़ो आरी आँणों वाल़े असो, अरह् ऐक नाँम आँख तिनू देख्ली, परह् जिन्ऐं तिनू भिने थिऐ, से भे तिनू देख्लें, अरह् संईसारी-धर्ती के बादे कुल़ो के आदमी रूऐयों आप्णी-आप्णी छ़ाती-हिकुड़े पिट्ले। ऐष्णों जरूर हंदों। आमीन!

प्रकाशितवाक्य 14:10

सेजे भे पंण्मिश्वर के रोष, के सूर पीला, जुण्जी पंण्मिश्वर के रोष के बैलूवें दी पाऐ गऐ थी, तेसी पबित्र-स्वर्गदूत्तो, अरह् छ़ैल़्टे के सहाँम्णें आग, अरह् गंन्धक की गईरी बैद्णीं दे पाऐ ज़ाले।

प्रकाशितवाक्य 14:13

तबे मुँऐ स्वर्गो शी ऐजी धाव शुणीं, “लिख: भागोईत हंदें से मंरे अंदे, किन्देंखे के ऐबे तिनकी मंऊँत प्रभू दे हंदी,” ऐजो “साच्चो असो!” पबित्र-आत्त्मा बुलो, “होर, से आप्णी कष्टो-मेंह्नत शा बिषाँव कर्दे, किन्देखे के तिनके भले काँम-काज़ तिनकी ही गईलो असो।”

प्रकाशितवाक्य 20:11

ईन्दें पाछ़ी मुँऐ ऐक बड़ो चींट्टो सिंगाँस्ण अरह् तिन्दें गाशी बऐठा अंदा आदमी देंखा, अरह् धर्ती अरह् अस्माँन तेस्के सहाँम्णें छाँई-माँई हंऐ गुओं अरह् तिन्देंका ऐजा पंता ने लागी के से कैथे गुओ।

प्रकाशितवाक्य 21:4

से तिनकी आँखी शे बादे आशुओं आगू घुष्दा; तिन्दे पाछी ना तअ मंऊँत्त रह्दीं, अरह् ना शोग, बिलाप, ना दु:ख, किन्देंखे के पुराँणीं बातो बीती गंई।”

प्रकाशितवाक्य 22:16

“हाँव, यीशू, मुँऐ कलीसियाओं के बारे दी ऐजी बातो पर्गट कर्णो खे आप्णाँ दूत्त तुओं कैई डेयाल़ी थुवा; हाँव राजा दाऊद के बंष-गंड़ी का सोभी शी खास अलाद असो, अरह् झ़ीषौ बियाँणीं दा चंमम्कणों वाल़ा तारा असो।”

प्रकाशितवाक्य 22:6

तेने स्वर्गदूत्ते हजो मुँखे बुलो, “जुण्जो किऐ हेभी तोड़ी बुलो गुवो; सेजो साच्चो अरह् बिश्वाष ज़ुगौ असो, प्रभू ऐ, जुण्जे ऋषियों की आत्त्माओं के पंण्मिश्वर असो, तिन्ऐं आप्णें स्वर्गदूत्त आप्णें दासो कैई सेजो सब-कुछ पर्गट कर्दे डेयाल़े, जुण्जो शीघों हंणों वाल़ो असो।”

प्रकाशितवाक्य 22:9

परह् तेने स्वर्गदूत्तें मुँखे बुलो, “देख, ऐष्णों ने करे! किन्देंखे के हाँव तेरा अरह् तेरे भाऐ ऋषियों, अरह् ईयों कताबी की बातो माँनणों वाल़े का संगी-साथी दास असो, तुँऐं सिर्फ पंण्मिश्वर के सहाँम्णें आगुमुँईऐ लाँम्बे पसरियों तिनकी ही आरार्धना करे।”

प्रकाशितवाक्य 6:11

तिनू मुँझी ऐकी नाँमों खे चीट्टे खोट्णों देऐयों तिनखे बुलो, के तुँऐं किऐ हजो ठहरी ज़ाव, किन्देंखे के जाँव तोड़ी तुवाँरे संगी-साथी दास, अरह् भाऐ-बंईणों जुण्जे तुँओं जैष्णें माँरी देईले जिनकी हंत्त्या करी ज़ाँदी; अरह् सेजे हेबी तोड़ी तुँओं मुँझी ने आऐ रंई।