2 पतरस 3:7 - Sirmouri

⁷ परह् ऐजो अस्माँन अरह् धर्ती तेसी ही बचन के जाँणें ईन्देंखे थऐ थुऐ, के जल़ाऐ ज़ाव; अरह् तिनू नाँस्त्तिक आदमी का नियाँव अरह् नाँष हंणों के देसो तोड़ी ऐशे ही थुऐ ज़ाले।

सिरमौरी नौवाँ नियम

⁷ जैशैकै पौरमेशवरे धोरती कै बाणणौ कै आज्ञा दैय राए थी, तैशैखैई तैणै आज्ञा दी कै इबी दुनिया तांव तौड़ी बौणैयौंदे रौंव जांव तौड़ी सै तिनु आगै लैई जोल़ाए ना दैंव तैणै तिनु तैसी दूसौ तौड़ी राखै राए जौल़ौ सै सौबी लोगौ का न्याय कौरला औरौ तिनु लोगौ का नाश कौरे दैन्दा जू तैसकै इज्जत ना कौरौ।

2 पतरस 3:7 ပူးပေါင်းရင်းမြစ်များ

मत्ती 10:15

हाँव तुओं खे खास बात बुलू, के नियाँव के देसे, जबे पंणमिशवर तेसी नंगर खे सजा देला, तअ सेजी सजा सदोम, अरह् अमोरा के नगर, शे भे जादा बुरी हंदी।”

मत्ती 11:22

तबे भे हाँव बुलू, शुणों: के पंणमिश्वर नियाँव कर्णो के देसे तुँवारी दंषा सूर नंगर अरह् सैदा नंगर की दंषा शी भे जादा दरदनाँक तुवाँरी दषा हंदी।

मत्ती 11:24

परह् हाँव तुँओं खे बुलू, के नियाँव के देसे तेरी दंषा सदोम की दंषा शी दरदनाँक जादा सहंणों ज़ुगी हंदी।”

मत्ती 12:36

अरह् हाँव तुँओं खे बुलू, के जुण्जी-जुण्जी निकाम्मी बातो आदमी बुल़्ले, पंणमिश्वर के नियाँव के देसे तिनू ऐक नाँम बातो का लेखा-ज़ोखा देणाँ पड़ला।

मत्ती 24:35

अस्माँन अरह् धर्ती टल़ी ज़ाली, परह् मेरी बातो कद्दी ने टल़्दी।

मत्ती 25:41

“तबे राजा आप्णें डेरे ढबे के लोगों खे टाटी नाँऐयों बुल़्ला, ‘मुँह कैई शे दुर्के ज़ाव, श्रापित्त लोग! हमेशा के नंरक की आगी दे ज़ाव, जुण्जी शैतान अरह् तेस्के दूत्तों खे आगे ही तियार असो।

मरकुस 6:11

जेथै के लोग तुँओं ने माँन्ले ने, अरह् ना तुँवारी शुंणले, तेथै शे आगू ज़ाँदिऐं आप्णे लात्तों की माटी भे तेथी झाड़ी दिऐ, जू सेजी धूंढ़ तिन गाशी तिन्दें की गुवाऐ-शाज़्त ठहरली।”

यूहन्ना 12:48

जुण्जा कुँऐं मुँह ने माँन्दा, अरह् ना मेरे बचन धारण करदा; तेसी दोषी-कसूरबार बाँण्णों वाल़ा, हाँव ने आथी: परह् सेजे बचन ही असो, जुण्जे नियाँव के देसे तेसी आदमी सदा खे दोषी-कसूरबार बाँण्दें।

रोमियों 2:5

परह् तू जाँणी-बुझियों आप्णा मंन जीद्दी-कठूर करे, जिन्दे लई, तू पंणमिश्वर के कुरूध् के देसो खे, जिन्दा पंणमिश्वर का साचा नियाँव पर्गट हंदा, तुँऐं आपु खे पाप कमाऐ लुवा।

1 कुरिन्थियों 3:13

तअ ऐकी नाँमों की काँम-काज़ का पत्ता लागदा; किन्देंखे के सेजो देस तेस्खे बुल्दो ऐ, ईन्देंखे के सेजो देस आगी आरी पर्गट होंदो, अरह् सेजी आग ऐकी नाँमों की काँम-काज़ के जाँच परख कर्दी के कैष्णी असो।

फिलिप्पियों 1:28

अरह् कोसी बात दे बईरी दे ने डरो; तुँवारी ऐजी हिम्मत्त पंण्मिश्वर का बरंदाँण असो; अरह् बईरी के नाँष का नंतीजा असो, अरह् तुँओं खे ऐजा पंण्मिश्वर की ढबै शा मुँक्त्ति का नंतीजा असो।

2 थिस्सलुनीकियों 2:3

कैशे ही भी दाँई तुँऐं कोसी के धोखे दे ने आऐं, किन्देंखे के सेजो देस ताँव-तोड़ी ने आँदी, जाँव तोड़ी लोग पंण्मिश्वर शे दुर्के ने हुऐ ज़ाँव, अरह् सेजा पाप का नाँशू बैटा पर्गट ने हों।

1 तीमुथियुस 6:9

परह् जू सेठ-धंनवाँन बण्णों चहाँव, से ऐष्णी ही परख अरह् फाँदे अरह् भहिते ब-कार अरह् नुकसाँन, लाल़्च के जाल़ौ दे फषो, जिन्दे लई आदमी बिगड़ी ज़ाँव; अरह् नाँष के संमुँन्द्रो दे डूब्बी ज़ाँव।

इब्रानियों 12:29

किन्देंखे के अमाँरा पंण्मिश्वर भसंस्म कर्णो वाल़ी आग जेष्णाँ असो।

2 पतरस 2:9

ऐशो दाँई प्रभू जाँणों ऐ के भगत्त लोग कैशे दाँई नियाँव के देसो तोड़ी बंचाऐंयों थहणें, अरह् दुष्ट लोग कैशे दाँई सजा पाँणों खे थहणें;

2 पतरस 3:10

परह् प्रभू को देस चुप्पी चोर जिया आँदा, तेसी देसे अस्माँनों दी बैजाऐ बैशुमाँर-बड़ी-बडी गुड़ाको लई अस्माँन लुप्त होंदो, अरह् अस्माँनों के ग्रह्-पीन्ड आगी लई पगल़ी ज़ाँदे, अरह् धर्ती अरह् धर्ती गाष्ली बादी चींजो अरह् काँम-काज़ जल़ी ज़ाँदी।

2 पतरस 3:12

परह् तुँओं पंण्मिश्वर के तेसी देसो की बाट कैशी दाँई जुहणी पड़ो, अरह् तिनके शिघै आँणों की ताँईऐं कैष्णी कोशिष कर्णी पड़ो। जिन्दे के जाँणें असमाँन आगी लई पगल़ी ज़ाले, अरह् असमाँनों के ग्रह-पीन्ड भभ्कियों तप्पियों गल़ी ज़ाले।

1 यूहन्ना 4:17

तअ आँमें नियाँव के देसो दी नींडरता मतल्व दीड़-हिम्मत हों; के संईसारी दा अमाँरा सभाव मसीया के सभाव के जैष्णा हों, जिन्दें का नंतीजा अमाँरा आपसी पियार संम्पुरता दा पक्का अट्ल़ हऐ रूवा।

यहूदा 1:7

जैशे दाँई सदोम अरह् अमोरा अरह् तिनके ऊँडे-पूँडे के नंगर, जुण्जे तिनके जिऐ कू-कर्मी बंणी रूऐ थिऐं, अरह् पराई देह्-शरीर पाछी लागी रूऐ थिऐ, तिनू लोग आगी की सजा दे भस्मं हऐयों ओकी खे अनाँणों बंणें।

प्रकाशितवाक्य 17:11

जुण्जो बुँणेंर आगे थियों, अरह् ऐबे ने आथी, से आपु आठ्वाँ राजा असो, अरह् ईनू सात्तों राजा मुँझ शा ऐक हुआ, अरह् नाँष दा पड़्ला।

प्रकाशितवाक्य 17:8

जुण्जों बुँणेंर तुँऐं देखो, से आगे तअ थियों, परह् ऐबे ने से आथी, अरह् अथाह् कुँड शो नीक्ल़ियों नाँष दो पड़्दो, अरह् धर्ती दे रंहणों वाल़े जिनके नाँव संईसारी की उत्पत्ति के बख्त्तो शे जीवन की कताबे दे लिखी ने थई, से ऐथू बुँणेंर की ऐजी दंषा देखियों, के आगे थियों अरह् ऐबे ने आथी, अरह् से हजो आँदों, तबे तिनके तोरबाँण च़ूट्दे।

प्रकाशितवाक्य 20:11

ईन्दें पाछ़ी मुँऐ ऐक बड़ो चींट्टो सिंगाँस्ण अरह् तिन्दें गाशी बऐठा अंदा आदमी देंखा, अरह् धर्ती अरह् अस्माँन तेस्के सहाँम्णें छाँई-माँई हंऐ गुओं अरह् तिन्देंका ऐजा पंता ने लागी के से कैथे गुओ।

प्रकाशितवाक्य 21:1

तबे मुँऐ नुंवों अस्माँन अरह् नंऐं धर्ती देखी, पुराँणीं धर्ती अरह् पुराँणों अस्माँन दुईन्नें जाँई-माँई हऐ गुऐ; अरह् समुँन्द्रों का भे पंता ने चाली।