तीतस 2:13 - घले नयाँ करार

¹³ यरप्रने पात्‍ता केन् परमेश्‍वर मेस्‍ये ङीनने मुक्ति पीनब येशू ख्रीष्‍ट महिमाने रब दिनजे ङीन आशा चीन्‍न ख्यङ्।

तीतस 2:13 ပူးပေါင်းရင်းမြစ်များ

मत्ती 16:27

चेनेयलो मीजे च रङ्से पजे महिमाने रङ्सेजे स्वर्गदूतयूप्रे रीय, मेस्‍ये हम्‍ब बीलने ङूदे मीयू क्‍वानेने रङ्से रङ्सेजे काम अनुसार इनाम पीन्क्य।

मत्ती 25:31

“कन्‍छ्वाब केन् महिमाने मीजे च रङ्से स्वर्गदूतयूप्रे रीय, हन्‍छ्वाब ङू मूरुम् टूङब सिंहासनने टूङ्क्‍य।

मत्ती 26:64

येशूदे ङूने यदे, “नदेने येन ख्यङ्, होरनेयली नमयूने ङ यीय, नङ्‍ग नमयूदे मीजे च सर्वशक्तिमान परमेश्‍वरजे स्येत्‍तेयोर् टूङ्देबे स्वर्गदे मूक्‍पने रेनब तङ्क्‍य।”

मर्कूस 14:62

येशूदे यदे, “अ, ङ ख्यङ्। त्‍याफे नमयूदे मीजे चने सर्वशक्तिमान परमेश्‍वरजे स्येत्‍तेयोर्‌ टूनब मेस्‍ये मूने ख्यब मूक्‍पयूप्रे रेनब तङ्‌क्‍य!”

मर्कूस 8:38

अम्‍ब पापी मेस्‍ये वेश्य पुस्ताने सूदे ङ मेस्‍ये ङैजे शिक्षाने त्‍वाय, मीजे चदेये पजे महिमा टेल्‍देबे पवित्र स्‍वर्गदूतयूप्रे रब ङूने रङ्से मी यने त्‍वाय।”

मूल स्यूस्स्यायूजे कामजे किताब 24:15

ङैदे थमयूदेप्र धर्मी मेस्‍ये धर्म त्वब थर् ङ्ही मीयू क्वाने सीबमेस्‍ये फेरि लङ्क्‍य यदेबे परमेश्वरने ङैदे आशा चे ख्यङ्।

रोमी 15:13

पीनब परमेश्‍वरने नमयूदे विश्‍वास चे ख्यङ्। ङूदेने नमयूने आनन्‍द मेस्‍ये शान्ति पीन्‍क्‍य। होरप्रने पवित्र आत्माजे शक्तिदे नमयू थेप् चेखूस्‍य।

रोमी 5:5

आशादे ङीनने सेम् सीस्ये अम्‍पीन, चेनेयलो ङीनने पीनब पवित्र आत्मादे परमेश्‍वरजे प्रेम ङीन्‍जे सेम्ने फम्‍मे ख्यङ्।

रोमी 8:18

ङ विचार चीक्क्य, अम्‍ब जीयाने ङीनदे भोक्‍तीनब सकस्यू, नङ्‍ग ङीनदे प्रेब महिमाप्रे करब लायकजे त्‍वो।

१ कोरिन्थी 1:7

येरेक्‍यूत्‍देबे ङीनजे प्रभु येशू ख्रीष्‍ट रीय यब पोजे आशाने टूनूब नमयूदे आत्माजे बरयू कम्‍बये अम्‍प्रे क्यूस्से त्‍वो।

२ कोरिन्थी 4:4

अम्ब संसारजे देऊता, शैतानदे विश्‍वास अन्चेबयूजे सेम्ने म्या अन्तङब मीप्र बन्द चीप्पे ख्यङ्। थमयूदे सूगब खबरजे महिमाजे ओथ्याङ् तङ अङ्‍खू। थमयूदे परमेश्‍वरजे खास रुप् ख्यब ख्रीष्‍टजे महिमाजे बारेने ख्यब अम्ब खबर क्व अङ्‍खू।

२ कोरिन्थी 4:6

“मून्‍दूङ् नङ्दे ओथ्याङ् क्‍यूस्‍स्‍य” यदेबे परमेश्‍वरदे य ख्यङ्। हम्ब परमेश्‍वरदे येशू ख्रीष्‍टजे त्‍वाने तङब परमेश्‍वरजे महिमा ङीनदे स्ये खूस्य यदेबे ङीनजे सेम्ने अम्ब ओथ्याङ् चेम्कीतीमे ख्यङ्।

कलस्सी 1:23

तम्दम्ने नमयू रङ्से विश्‍वासने अन्‍क्यापीलाबे बोल्यो क्‍यून्‍नू, मेस्ये नमयूदे सूगब खबर ङ्‍यीन्‍देबे प्रेब आशा अन्‍क्यापीलाची। अम्‍ब सूगब खबर का-मुलुक संसारजे मीयूने स्‍योक्‍क ख्यङ्। ङ, पावल अम्‍ब सूगब खबर स्‍य्‍वेब त्वो क्‍यूर ख्यङ्।

कलस्सी 1:27

अम्‍ब सूदेये स्‍ये अङ्ख्‍वब महिमाजे सम्‍पत्ति यहूदी तेब मीयूजे लागि सोरो केन् ख्यङ् यब पो क्‍व ख्‍व चीम्‍मेने परमेश्‍वरदे रङ्सेजे पवित्र मीयूने सेल्‍दे। अम्‍ब स्‍ये अङ्ख्‍वब पोजे अर्थब ख्रीष्‍ट नमयूप्रे क्‍यूरब पो ख्यङ्, हम्‍ब परमेश्‍वरजे महिमाने सामेल् क्‍यूरप्रेब आशा ख्यङ्।

कलस्सी 1:5

अम्‍ब विश्‍वास मेस्‍ये प्रेम नमयूजे लागि स्‍वर्गने जूक्‍तीदेबे हीतेब आशाजे कारणदे क्‍यूर ख्यङ्। हम्‍ब पोयू नमयूदे मालाङ्ने तम्दम्जे वचनने, या सूगब खबरने तैक ख्यङ्।

कलस्सी 3:4

नमयूजे तम्दम् जीया ब ख्रीष्‍टने ख्यङ् होर्‌दे ङू फेरि रब नमयूये ङूप्रे-प्रे महिमाने क्‍यूक्‍क्‍य।

२ थेसलोनिकी 2:16

होर्‌दे ङ्‍येदे ङीनने प्रेम चेब मेस्ये अनुग्रह चीत्देबे कलङ्बेये अन्जेनब सान्त्वना मेस्ये सोरो ज्य आशा पीनब ङीन्जे प्रभु येशू ख्रीष्‍ट रङ्सेदेने मेस्ये परमेश्‍वर ङीनजे पदे,

२ थेसलोनिकी 2:8

होर्‌दे ङ्‍येदे मुख्य दुष्‍ट मी योङ्‍रीय, तर प्रभु येशू रब रङ्सेजे ङूर्‌जे सदे हम्बने सेक्‍क्य मेस्ये ङू रब ङूजे महिमाजे ओथ्याङ्दे हम्‍बने नाश चीक्क्य।

१ तिमोथी 1:1

ङीनने मुक्ति पीनब परमेश्‍वर मेस्ये ङीनने आशा पीनब येशू ख्रीष्‍टजे आज्ञा अनुसार ख्रीष्‍ट येशूजे मूल स्यूस्स्या, ङ पावलदे अम्‍ब लिख्दीन ख्यङ्,

२ तिमोथी 1:2

ङैजे छेब च तिमोथीने: प परमेश्‍वर मेस्ये ङीनजे प्रभु येशू ख्रीष्‍टजे अनुग्रह, कृपा मेस्‍ये शान्‍ति क्‍यूस्स्‍य।

२ तिमोथी 4:1

परमेश्‍वरजे खूम्‍ने होर्‌दे सोम्‍बोयूजे मेस्ये सीयेबयूजे न्याय चेने रब ख्रीष्‍ट येशूजे खूम्‍ने, मेस्‍ये ङू रीय होर्‌दे राज्‍य चीट्‍टीय यब पोने ध्‍यान् पीन्‍देबे ङ नने बोङ्बे आज्ञा चीक्‍क्‍य,

२ तिमोथी 4:8

जेम्‍सेमेस्‍ये ङैजे लागि धार्मिक्ताजे मुकुट तयार चीत्‍देबे हीते ख्यङ्। ठीक न्याय चेब प्रभुदे हम्‍ब दिन‍ने ङैने अम्ब मुकुट कूमीय। ङैनेत्‍या दी, तर फेरि ङू रब लम् लेन्‍नब जीती क्‍वानेने पीन्क्य।

तीतस 1:2

हम्‍ब विश्‍वास मेस्ये ज्ञान कलङ्बेये अन्सीबब जीयाजे आशाने छ्‍यान ख्यङ्, होर्‌दे कलङ्बेये लूच्‍च अङ्-क्‍यमब परमेश्‍वरदे मीयूङ्मेस्‍येने कबुल चीत्‍दे।

तीतस 1:4

विश्‍वासने त्‍याप्र ख्‍यब ङैजे तम्दम्‍जे च तीतसने- प परमेश्‍वर मेस्ये ङीनने मुक्ति पीनब येशू ख्रीष्‍टजे अनुग्रह मेस्ये शान्ति।

तीतस 3:4

तर कन्‍छ्वाब ङीनने मुक्ति पीनब परमेश्‍वरजे दया मेस्‍ये मीयूने चेब प्रेम तङ्दे,

हिब्रू 9:28

होरप्रने ख्रीष्‍ट कूम मीजे पाप प्‍लेकेजे लागि त्याफे बलि क्‍यूत्‍दे। ङू फेरि दोस्रो पोलोने रीय। हन्छ्वाबब पाप प्‍लेने दी, तर ङूजे लम् लेन्‍नब मीयूजे उद्धार चेने ‍रीय।

१ पत्रुस 1:3

ङीन प्रभू येशू ख्रीष्‍टजे प परमेश्‍वरने जै-जै क्यूस्स्य। परमेश्‍वरदे रङ्सेजे सोरो केन् कृपादे चीत्‍देबे, येशू ख्रीष्‍टने सीयेबदे सोम्‍बो चीम्‍मीदेबे ङीनने कलङ्बेये अन्जेनब जीया प्रेब आशाजे लागि सर्‌ जुनि पीन ख्यङ्।

१ पत्रुस 1:7

नमयूजे विश्‍वासब मीदे खेर्‌तीकब नाश क्‍यूप्‍पब मर्‌यली सोरो कूम लूजे ख्यङ्। मर्‌ने खेर्‌तेप्रने नमयूजे विश्‍वासये सकस्यूदे जाँच चीप्प ज्य प्रमाण क्यूस्स्य, मेस्‍ये येशू ख्रीष्‍ट रब नमयूदे सार्‌या, महिमा मेस्‍ये गेसेन् प्रे खूस्स्य।

२ पत्रुस 1:1

येशू ख्रीष्‍टजे त्वो मेस्‍ये मूल स्‍यू‍स्स्‍या ङ सिमोन पत्रुसदे, ङीनजे परमेश्‍वर मेस्‍ये मुक्ति पीनब येशू ख्रीष्‍टजे धार्मिकतादे ङीनजेप्रने सोरो केन् विश्‍वास चेबयूने:

२ पत्रुस 3:18

तर ङीन्‍जे प्रभु मेस्‍ये मुक्ति पीनब येशू ख्रीष्‍टजे अनुग्रह मेस्‍ये ज्ञानने नमयू थेप् बोल्यो क्‍यूप्‍पीनू। चूजो मेस्‍ये येतार्‌ने प्रभुजे महिमा क्‍यूस्‍स्‍य। आमेन।

१ यूहन्‍ना 4:14

प परमेश्‍वरदे अम्‍ब संसारजे मुक्ति पीनब क्‍यूरने रङ्सेजे च कूल्‍बे ख्यङ् यदेबे ङीदे तङ ख्यङ्, मेस्‍ये अम्‍बजे गवाही पीन्‍क्‍य।

यहूदा 1:21

परमेश्‍वरदे येतार्‌ने प्रेम चीन्‍न ख्यङ् मन् मेस्‍ये कलङ्बेये अन्सीबब जीया प्रेजे लागि ङीनजे प्रभु येशूजे कृपाजे आशा चीत्देबे रेन्‍नू।

प्रकाश 1:7

ले, ङू मूक्‍पप्रने रेन ख्यङ्, मेस्‍ये क्‍वाजे म्‍यादे ङूने तङ्क्‍य। सू-सूदे ङूने स्‍यूल्‍दे हम्‍बयूदेये ङूने तङ्क्‍य, मेस्‍ये ङू रब पृथ्‍वीजे मीयू क्‍वाने ङूजे लागि शोक् चीक्‍क्‍य। येरेने क्‍यूस्‍स्‍य। आमेन।