Roum 14:2 - Saposa

² Mesapan tsumin vainy fafaaman natiny ror a ka te rof non tsumi ma ainy a fo mamatsiny kainy ainy gengen. Sana mesapan tsumin vainy fafaaman pin kan raror to te rof fi non ya tsuri ma ainy a fo mamatsiny kainy ainy gengen, to tsumi gim rom ma ainy oiny tu venoo.

Roum 14:2 ပူးပေါင်းရင်းမြစ်များ

Jenesis 1:29

Ai Gov tsue to, “Nyo faan mami na fo viirviir fua te natiny kaa miror kainy ainy, ana fo viirviir nau te kaa miror kainy ainy natiny fua ror, a foka to aya kainy ainy tsumi.

Roum 14:1

A mes a ka tovei te komainy ronyo mi ma fakats: Te kaa miror a mes a fo vainy fafaaman te kaa ror fapoopoan namami, to te suu patsukan iny ror fakats tsuar te iring fi non ya tan ainy mes a fo mar kainy ainy kaner, ana ya te rof mata rari to te manaats fatatabin fi rori na fo faun an kat tan kat, kat faakor tan ta fo mar nainy tana taa Jiu. To tsumin vainy fafaaman to te gim rom ma vovou iny a fo kat tovei, ma nom fafaatsuts tsonyo, tan nainy te vovou iny non a mes a fafaaman, fakats tsuan tana mes a ka na rof te kat non ya, ge na ka na iring te tsugainy kat non ya, vivaatau fiisen mi yam. Nyo koman maromi ma faatok ya tsumi te koma rof iny rom ya faarei romi na mes tana koman a gum tsumi. Sana nyo tsugainy maromi ma fatsutsuar fiisen mi ya tana ka na rof, ana ka na iring tana mes a fafaaman to ma kat ya.

Roum 14:14

Nyo nat faman rou, tsonyo te kat bus fakats tsonyo, tana saa anyo kaa bus you koman e Krais a Tsoiny Tatagaa Ot tsura, ito, a sikia ta iring tana kainy ainy to te faruak non a iring. Sai tan nainy te fakats non e sei na mes a ka to ee, “To te ainy ronyo na kainy ainy to, nyo aveto bus you matan e Gov, tana saa nyo tavtaav iny ya.” Ai tana mes tuwa ai te tavtaav kan iny non ya.

Roum 14:20

Nyo tsugainy maromi ma rurei a faason te faan bus e Gov tan vamuinyasiny fafaaman tsumi, ito tan ainy pinpin fo kainy ainy. A sikia ta kainy ainy te fa'agaagoiny e Gov, a sikia, fo mamatsiny kainy ainy rof iny ainy. Kainon to te man fi non ya, to te ainy pinypiny fi non a mes a kainy ainy, ana ayei natiny towa te kat ir vamuinyasiny fafaaman tsuan ser kat kainy ya, tan nainy te fakats fi na mes a fafaaman nei, “To te ainy fi ronyo ya, nyo aveto rou matan e Gov.” Tan kat to aya, a mes to te ainy pinpin non, fagotsiny bus a vamuinyasiny fafaaman tsuan sa kat, kat iring.

Roum 15:1

Aran vainy fafaaman to te kaa me na faason a parits ma faakouts rari to te gim ror ma kaa me na faason a parits, ma govets ami na fo patang tsuri, ana ra kan, ma paparaa tsun iny vaare me na tsivor.

1 Korin 10:25

Ai tovei, ami ma kat fi nei, tan nainy te tagei fi romin venoo kainy fafiifoiny iny koman a pan iny tuan, foiny tsuiny naa yam. Am rangat fakinai vaare to, fei te poo fi men venoo to aya ei, ito ma kat amin fakats tsuam to te rof fi non ya ge te iring fi non ya ma foiny ami ya am ainy towa.

1 Korin 8:9

Sa kainon to te man fi non a foka to, ami ma tamomots faarof patsukanem to tan nainy te kat romi na ka na rof tsumi ma kat, am kat vaare to na mes a fafaaman a foun tsumi to ma kat ya na ka to te tsue of yan fakats tsuan iring ma kat ya.

1 Korin 9:22

Tan nainy te favaanan naa nyo tana vainy faason tsurin gima matsua, nyo sikia ma kat ta ka te pon iny rorin iring tana mes a fafaaman ma kat, ma onot anyo ma nai fafaakouts anyo ri, er arasan iny to na saf a sanaan ei na ma kat fapaparei ari Gov. Tana sanaan to ayei, nyo kat faarei rou a fo kinai faavot to te favaanan finy anyon Vurungan Rof nane Krais, ai tana fo sanaan to ayei, nyo onot rou ma faakouts ir a vainy ma faaman patsu ri ten Krais.

Galesia 2:12

Tabuiny ruak miror a tee vainy ten Jemis poo fi me tana ngats fan tsian iny Jerusalem, Pita ainyainy fiisen ramen vainy fafaaman sikia ma taa Jiu. San tan nainy te ruak mi ri, Pita kaa fajesa osing ratuarin vainy fafaaman sikia ma taa Jiu ana ya gim to ma ainy fiisen ramituari, tana saa, ayei te oraav ir a taa Jiu te poo fi me Jerusalem te tsue tsuk iny ror ya, iton vainy te vovovou iny ror kat nan vaapee ser sogsog ir a vainy fafaaman sikia ma taa Jiu ma vaapee ri.

Vaamuan Timoti 4:4

tana saa, fo mamatsiny kainy ainy te fapogaar e Gov, u rof; bainy vaare ta isen ta kainy ainy, to ma faakats ara ana ra te tsue faarof naa ten Gov, ana ra te paparaa me na fo kainy ainy to te ainy rora,

Taitus 1:15

To tsurin vainy taabos fo mamatsiny kan taabos kan, ai to tsurin vainy pisiin an vavaajets, a sikia ta ka ta taabos na rari, tana saa fakats ana aaver rarin bong matan e Gov.

Hiburu 13:9

Famanat vaare ir a fo viir faatsuts kaner to te ras fuainy maromi tana sanaan a tavaron ana man. Te rof fiisok non aave rara, ma parits me tana koma ree'un ten Gov, sikia ma tan manaats a fo faun tana kainy ainy; to tsuri to te manaats ror a fo faun to, fo faun to gim ror ma faakouts rari.

Hiburu 9:10

Tan tsue faunot tamuan to aya, vovou tsun iny non a fo Faun tana fo kainy ainy iny ainy ana kainy jiu, ana fo Faun nan siisiuf a tsivor ana fo mes a fo Faun iny kat a fo mesa a foka iny kat. A vainy te vovou iny ror Faun to, ka iny kaa taataun tsun, onot te mei fi me Krais, u kat foun iny fafaatouf ten Gov an rof pis.