Jemis 3:14 - Saposa

¹⁴ Sai to te kaa non fitsufainy aave mami, koma peits, an kat iny fatsing, mi ma tenoor vaare faarei maromi te kaa mirom fakats arasan ana nat a rof, mi gam em, sam gima vegiau iny a man.

Jemis 3:14 ပူးပေါင်းရင်းမြစ်များ

Matiu 27:18

Ayei nat fiisok rari tsuri te faan iny me Jisas tsunia, tana saa ri te fitsufainy.

Vurungan Rof Nane Jisas Krais Te Kirkir Iny E Jon 16:2

Ri nai gargar fatafuts maromi tana fo numaa iny fafaatouf tsuri. Ai tan nainy te naa minon te atsuiny famat maromi sei na mes ee, ana ya te fakats kat to aya, ayei te faarei te bibinun of non e Gov.

Binun Tan Amaraav 13:45

Te tagei a taa Jiun tagin vainy ser fitsufainy ri tsue vasuar iny ton vegiau te tsue iny e Pol ser tsue vaaserere iny ya.

Binun Tan Amaraav 26:9

“Anyo patsukan you fakats ma kat mamatsiny kat iring tsurin vainy fafaaman ten Jisas tan nainy muan ma kat fiiring anyo na asangan e Jisas a tsoiny Nasaret.

Binun Tan Amaraav 5:17

Kat to ana Tsoiny Mumua Tan Tsoiny Faakor tana taa Jiu fiisen ramirin fuainy fafaakouts nan ito na vainy tana gum tan vainy Sadusi fitsufainy ramiton guamaraav.

Binun Tan Amaraav 7:9

“Mes a ina safunuu ana isen a famuinyasiny ten Josep fitsufainy mi towa, ri fafiifoiny iny naa towa tan mes vainy kaner ser mei fi naa ya tana gum fan Ijip. Sen Gov kaa fiisen mi ya,

Roum 1:29

Vainy to ari te kat fatatabin fi ror to tan mamatsiny nainy: ri natiny kat fifiiring raror a vainy, ana ri te kat a fo viir kat iring vavajia, ana ri te kat, kat iny mataguas, ana ri te kat fijior ir a mesapan, an kat iny fitsufainy. Ana ri te atsuiny famat fatatabin ir a vainy, an ngue poor fatatabin iny a mesmes, an kat iny fagaug a mesmes, ana ri te kat vegiau kabuts tana mesapan. Tan sumainy kainy naa na fo kat to, ari na vainy to ari te atou bus men kat iny tsue kabuts iny a mesapan tana iring te nongoiny rori tana vainy.

Roum 13:13

Ami ma kat, kat to te faarei non a vainy to te kaa ror tana arasan, ana fokinai tagaa iny matan er, te toobing fiisok non tsura ma kaa fatavaron tana tou kaakaa tsura. I tovei: te sikia non ma toobing tsura ma jiun, jiun parits ana patsuu rara te piou ovei en, ge ma vavis tana fan, ra te kuu vavis ge oor vavis ana ra te kat fo kat te kat kat ror vainy jijiu. Te sikia kan non ma toobing tsura ma kat, kat iny tsikoor, ge ma kat, kat te farejiaf raror a mesapan te tagei rori. Ai te sikia kan non ma toobing tsura ma fapeepeits vavis fiisen me na mesmes, ge ma mataguas iny a foka te kaa miror a mesapan ge fitsufainy.

Roum 2:17

Ai tovei a saa tsumanyi to na? Anyi tsue rom a ka, “Anyo na mes tsian fiisok tana saa, anyo na tsoiny Jiu.” Ana nyi faason fi rom nei, a Faun te faan iny e Gov ten Moses. Ana nyi tenoor fi rom nei, “Gov pisan mamam a taa Jiu ma faarei amam vainy Tsunia fatoobing ana sikia pis ta mesmes.”

Roum 2:8

Fakats yam, a mesapan Gov nai fasaraa raror vainy pisiin fiisen me na koma peits tsian to te kat kat fi rori to: ri te fatsing iny a foka, ri te gima tos a mesapan, ana ri te baainy ma nongon tan kat man ten Gov, sana sikia, ri natiny vovou iny ror kat tana ngi'arapaar.

1 Korin 13:4

Ito te mangiir fi non a mes, a mesmes a mes, ayei gim non ma nai fapeepeits fiisen mi ya tan nainy te koma iring fi non ya ya. A sikia, ayei nai anaanos faamo patsukainy non a mes to ayei, ana ya te kat, kat rof tsunia. Ayei gim non ma nai fitsufainy tan nainy te kaa minon a mes to ayei na foka to te komainy fasito patsu iny non ya. Ayei gim non ma nai tenoor of a tsivon tana mes to ayei tan fo kat rof to te kat ya. Ayei gim non ma nai fapaas a puan ma kat faatok of ya na mes to ayei.

1 Korin 3:3

tana saa ami vovovou iny rom kat tan puainy mes tsun to, to te tatagaa ot iny non ya, ana kifon a ka to tsonyo tsue rou, tana saa, ami fifitsufainy, mi vatsitsien fifiisen mito na mesmes, sa faatok iny non a ka ami vovovou iny rom kat tan puainy mes tsun to te tatagaa ot iny non ya, faarei rarom mes vainy vavaajets tana monaagits to, ito te gim ror ma natiny e Krais.

1 Korin 5:2

Sa kat fei mi kaa babainy rom ana mi pon fi rom nei amin vainy karap to? Sikia, ami ma reesik am susuiny matan iny ton kat tovei, tana isen a mes to fapoopoan namami te kat finy yan aveton iring vavajia ovei to, mi ma fakei fajesa osing ya na gum tsumi.

1 Korin 5:6

Te gim non ma toobing tsumi ma tenoor pinpin iny a tsivom tan nainy te kaa non a mes a aveto naa to fapoopoan namami. Eye ami nat rom tan a ka te tsue of rara ya. “A ar kakaii tsun nan yis te kat fatsub non koinykoiny faavot.” Sa faarei non, to te kaa fi non a mes naa to fapoopoan namami a kat kat fatatabiny ton aveto, ayei kat fifiiring non a gum iny vainy fafaaman faavot.

2 Korin 12:20

Nyo tsue rou a ka to, tana saa nyo oraav rou tan nainy te naa mironyo naa nyo nak matuami, nyo tsugei rou a ka te tagei anyo te katkat ami, mi tsugei to na fo vegiau tsonyo. Nyo oraav rou to te sab ronyon fataatsun, sesevee me na ka tana mesmes, fapeepeits vavis, fafatsing, tsue iny kat faduem a mesmes, tsue kabuts, fafapaas a tsivom, ai to kan tan kat fifiiring vavis gumgum tana fokinai.

Galesia 5:15

Sai to te kat fijior romin isiseiny mes ana mi te kat fareesik rari, mi te pon ma retsrets rari faarei ror kas te fataatsun fi rori, taatag yam kat rom sam nai rurei vavis ir isiseiny vainy fafaaman.

Galesia 5:20

an kat iny fafaatouf kaisa, an kat iny kat kat paapau, an vainy tsutsugei mes, ri te fatsitsien vavis, an kat iny fitsufainy, seeve, an kat iny fafatsing ge fafapaas puan, an kat iny fapeepeits me na mesapan, ri te takibaa vavis;

Galesia 5:21

an kat iny sesevee me na ka tana mesapan, an kat iny fifitokon mes, an kat iny jiu famafuu, an kat iny mamagat men guainy jijiu, an mes a fo kat fikanen. Nyo tsue of bus mami muan ai tovei nyo tsue of pis maromi, vainy kat kat ror kat iring to, te gim ror ma fasito on iny a Waan e Gov.

Galesia 5:26

Ai tovei, ara ma sarakouts vaare na tsivor, ge ma sak vaare na mesapan tan ta fo vegiau ma sevee ri, ana ra te fitsufainy vaare mina mesapan.

Galesia 6:13

Sana ri to te kat bus vaapee tsuri, kainon to te gim fi rori ma manaats fo Faun faavot te kirkir e Moses, sana ri komainy kat ror vaapee tsumi ma tenoor ramiri na taa Jiu tsumi te vovovou iny a fo vegiau tsuri.

Filipai 1:15

Te man non, a mesapan tsuran vainy fafaaman te favaanan iny Vurungan Rof nane Krais, tana saa, ari te fitsufainy vamironyo ana ri kan komainy fabiu varonyo. Sana mesapan te favaanan tana saa ari te kat mi ya fiisen men koma rof.

Filipai 2:3

Ami ma fafatsing vaare, ana mi ma kaa iny fapaas vaare na tsivom, sana mi ma fauf a tsivom, ana mi ma fakats faarof ir a mesapan, te rof fapaas pis maromi

Vaamuan Timoti 2:4

Gov komainy fiisok non a vainy faavot ma saup fatabin ana ri te naa me er nat faarof iny to na man,

Vaamuan Timoti 6:4

ayei te via minon kat iny kat faatok an fafapaas a tsivon ana ayei na piou. Ayei kaa minon fakats nun ana ya te komainy ma vatsitsien, ya te fapeepeits fiisen me na fo vegiau tana fo fafaatsuts, an kat to aya te pokei faruak tsuiny minon kat iny sesevee, vatsitsien, sigainy a mesmes, ri te fakats fifiiring iny a mesmes,

Taitus 3:3

Muan, tabuiny ruak faarei roran vainy fafaaman ten Krais, ra piou to, ana ra fanaginy tsue kan to, ai Satan fagaug ratuara. Ana ra faarei miton tsoiny binun babainy tan koman tsun tsura ana ra vovou iny ton paparaa tan koman tsura. Ra kaa to tan kat iny koma sesevee an koma suar iny a mesapan. Ana ri tsugei ratuara ana ra kan tsugei ratuari.

Jemis 1:18

Tan koman Tsunia patsukanen to, sa fapogaar fafoun ramira tan vegiau Tsunian man, ma faarei ara na vaamuan nana ka fapoopoan nana fo mamatsiny ka to te fapogaar Ya.

Jemis 3:16

tana saa a pan te kaa non fitsufainy, an kat iny fafatsing, a pan to aya, arin vainy fafatsuiny a iring an gumgum gima rof kaa non tsunia.

Jemis 5:19

Fuainy vamuinyasiny fafaaman tsonyo, to te kuar pet fi non ta mes tan vegiau man, ana isen a mes te ras fatabiny mi ya.